ⴰⵡⴰⵍⴻⵏ ⵉⵡⴻⵥⵏⴻⵏ 3

1 ⵎⵎⵉ ⵉⵏⵓ, ⵡⴰⵔ ⵜⵜᵉⵜⵜⵓ

ⵜⴰⵖⵓⵔⵉ ⵉⵏⵓ ⵏ ⵛⵛⴰⵔⵉⵄⴰ,

ⴻⵊⵊ ⵓⵍ ⵏⵏⴻⵛ ⴰⴷ ⵉⵃⴹⴰ ⵜⵉⵡⴻⵚⵚⴰ ⵉⵏⵓ,

2 ⵎⴰⵖⴰⵔ ⵏⵉⵜⴻⵏⵜⵉ ⴰⴷ ⴰⵛ ⴷⴷ-ⵉⵡⵢⴻⵏⵜ

ⴰⵟⵟⴰⵙ ⵏ ⵡⵓⵙⵙⴰⵏ,

ⵓⵍⴰ ⴷ ⵉⵙⴻⴳⴳⵯⵓⵙⴰ ⵏ ⵜⵓⴷⴰⵔⵜ ⴷ ⵍⴻⵀⵏⴰ.   

3 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ

ⵡⴰⵔ ⵜⴻⵏ ⵜⴻⵊⵊⵉⴷ ⴰⴷ ⵣⵣⴰⵢⴻⴽ ⴼⴼⵖⴻⵏ,

ⵇⵇⴻⵏ ⵉ-ⵜⴻⵏ ⵖⴰⵔ ⵢⵉⵔⵉ ⵏⵏⴻⵛ,

ⴰⵔⵉ ⵜⴻⵏ ⵅ ⵜⴻⵍⵡⵉⵃⵜ ⵏ ⵡⵓⵍ ⵏⵏⴻⵛ,   

4 ⵅⴻⵏⵏⵉ ⴰⴷ ⵜⴰⴼⴻⴷ ⴰⵔⴹⴰ

ⴷ ⵍⴻⴼⵀⴰⵎⴻⵜ ⵉⵚⴻⴱⵃⴻⵏ

ⴷⵉ ⵜⵉⵟⵟⴰⵡⵉⵏ ⵏ ⴰⵔⴻⴱⴱⵉ ⵓ ⵏ ⴱⵏⴰⴷⴻⵎ.

5 ⵜⵉⵇⵇ ⴷⵉ ⵙⵉⴷⵉ ⵙ ⵡⵓⵍ ⵏⵏⴻⵛ ⴽⵓⵍⵛⵉ,

ⵡⴰⵔ ⵜⵜⵛⴰⵍⴰ ⵅ ⵍⴻⴼⵀⴰⵎⴻⵜ ⵏ ⵢⵉⵅⴻⴼ ⵏⵏⴻⵛ.

6 ⵙⵙⴻⵏ ⵉ-ⵜ ⴷⵉ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵛ,

ⵅⴻⵏⵏⵉ ⵏⴻⵜⵜⴰ ⴰⴷ ⵉⵙⴻⴳⴳⴻⵎ ⵉⵎⴻⵙⵔⴰⵇ ⵏⵏⴻⵛ.   

7 ⵡⴰⵔ ⵜⵜⴻⴳⴳ ⵉⵅⴻⴼ ⵏⵏⴻⵛ ⴷ ⴰⵎⵉⵖⵉⵙ.

ⴳⴳⵯⴻⴷ ⵙⵉⴷⵉ ⵓ ⴱⴻⵄⵄⴻⴷ

ⵅ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ.   

8 ⴰⵢⴰ ⴰⴷ ⵢⵉⵍⵉ ⴷ ⴰⴳⴻⵏⴼⵓ

ⵉ ⵉⵥⴻⵡⵔⴰⵏ ⵏ ⵜⵓⴷⴰⵔⵜ ⵏⵏⴻⵛ,

ⴷ ⵡⴻⵏⵄⴰⵛ ⵉ ⵉⵖⵙⴰⵏ ⵏⵏⴻⵛ.

9 ⵡⴻⵇⵇⴰⵔ ⵙⵉⴷⵉ ⵙ ⵡⴰⴳⵍⴰ ⵏⵏⴻⵛ,

ⵙ ⵜⵎⴻⵣⵡⴰⵔⵓⵜ ⵏ ⵎⴰⵔⵔⴰ ⵚⵚⴰⴱⴻⵜ ⵏⵏⴻⵛ.   

10 ⵅⴻⵏⵏⵉ ⴰⴷ ⵜⵜⵡⴰⵛⵛⵓⵔⴻⵏ

ⵍⴻⵀⵔⵉⵜ ⵏⵏⴻⵛ ⵙ ⵓⴼⴻⵢⵢⴻⴹ,

ⵓ ⵜⵉⵙⵉⵔⵉⵏ ⵏⵏⴻⵛ ⵏ ⵓⴹⵉⵍ

ⴰⴷ ⴷⴷⵓⵇⵇⵣⴻⵏ ⵙ ⴱⵉⵏⵓ ⵏ ⵊⴷⵉⴷ.   

11 ⵎⵎⵉ ⵉⵏⵓ, ⵡⴰⵔ ⵏⴻⵟⵟⴰⵔ ⵜⵜⴰⵔⴱⵉⵢⵢⴻⵜ ⵏ ⵙⵉⴷⵉ,

ⵡⴰⵔ ⵜⵜⴰⵔⵔⴰ ⴰⵄⵔⵓⵔ ⵅ ⵓⵡⴻⴱⴱⴻⵅ ⵏⵏⴻⵙ,   

12 ⵎⴰⵖⴰⵔ ⵡⴻⵏⵏⵉ ⵉⵙⵙⵄⵉⵣⵣⴰ ⵙⵉⴷⵉ,

ⴰⴷ ⵜ ⵉⵄⴰⵇⴻⴱ ⵄⴰⵡⴻⴷ,

ⴰⵎ ⵉⵜⵜⴻⴳⴳ ⴱⴰⴱⴰⵙ ⴰⴽ-ⴷ ⵎⵎⵉⵙ

ⵡⴻⵏⵏⵉ ⵅ ⵢⴰⵔⴹⴰ.   

13 ⵙⵙⴻⵄⴷ ⵏ ⴱⵏⴰⴷⴻⵎ ⵏⵏⵉ ⵉⵜⵜⴰⴼⴻⵏ ⵜⵉⵖⵉⵜ,

ⵓⵍⴰ ⴷ ⴱⵏⴰⴷⴻⵎ ⵏⵏⵉ ⵉⵜⵜⴽⴻⵙⵙⴰⴱⴻⵏ ⵍⴻⴼⵀⴰⵎⴻⵜ,

14 ⵎⴰⵖⴰⵔ ⵎⵉⵏ ⵜᵉⵜⵜⴰⵡⵉ ⵏⴻⵜⵜⴰⵜ,

ⵜⴻⵃⵍⴰ ⵅ ⵜⵙⴻⴱⴱⴰⴱⵜ ⴷⵉ ⵏⵏⵓⵇⴰⵔⵜ,

ⵓ ⵍⵖⵉⴵⴻⵜ ⵏⵏⴻⵙ ⵜⴻⵃⵍⴰ ⵅ ⵡⵓⵔⴻⵖ ⵉⵜⵜⵉⵙⵙⵉⵇⴻⵏ.   

15 ⵏⴻⵜⵜⴰⵜ ⵜⵉⵖⵍⴰ ⵅ ⵍⵎⴰⵔⵊⴰⵏ,

ⵓ ⵎⴰⵔⵔⴰ ⵎⵉⵏ ⴷⵉ ⵜⵣⴻⵎⵎⴰⵔⴻⴷ

ⴰⴷ ⵜⴻⵎⵎⴻⵥⵔⴻⴷ,

ⵡⴰⵔ ⵉⵣⴻⵎⵎⴰⵔ ⴰⴽⵉⴷⴻⵙ ⵉⵜⵜⴻⵎⵇⵓⴷⴷⴰ.   

16 ⵜⵓⵣⵣⴻⴳⴳⴰⵔⵜ ⵏ ⵡⵓⵙⵙⴰⵏ ⵖⴰⵔⴻⵙ

ⴷⴻⴳ ⵓⴼⵓⵙ ⵏⵏⴻⵙ,

ⴰⴳⵍⴰ ⴷ ⵛⵛⴰⵏ ⴰⵇⴰ ⴰⵜⴻⵏ ⵅ ⵓⵣⴻⵍⵎⴰⴹ ⵏⵏⴻⵙ.

17 ⵉⴱⵔⵉⴷⴻⵏ ⵏⵏⴻⵙ ⴷ ⵉⴱⵔⵉⴷⴻⵏ ⵏ ⵍⴻⴹⵔⴰⴼⴻⵜ,

ⵓ ⵎⴰⵔⵔⴰ ⵉⵎⴻⵙⵔⴰⵇ ⵏⵏⴻⵙ ⴰⵇⴰ ⴰⵜⴻⵏ ⴷ ⵍⴻⵀⵏⴰ.

18 ⵏⴻⵜⵜⴰⵜ ⴷ ⵜⴰⵛⴻⵊⵊⴰⵔⵜ ⵏ ⵜⵓⴷⴰⵔⵜ

ⵉ ⵢⵉⵏⵏⵉ ⵖⴰⵔⴻⵙ ⵉⵍⴻⵙⵇⴻⵏ,

ⴽⵓⵍ ⵉⵊⵊⴻⵏ ⵡⴻⵏⵏⵉ ⴷⴰⵢⴻⵙ ⵉⵜⵜⴻⵟⵟⴼⴻⵏ,

ⴰⴷ ⵢⵉⵍⵉ ⴷ ⴰⵎⴻⵙⵄⵓⴷ.   

19 ⵙⵉⴷⵉ ⵉⴳⴳⴰ ⴷⵙⴰⵙ ⵏ ⵜⴻⵎⵎⵓⵔⵜ ⵙ ⵜⵉⵖⵉⵜ ⵏⵏⴻⵙ,

ⵙ ⵍⴻⴼⵀⴰⵎⴻⵜ ⵏⵏⴻⵙ ⵉⴳⴳⴰ ⵉⵊⴻⵏⵡⴰⵏ.

20 ⵣⵉ ⵜⵓⵙⵙⵏⴰ ⵏⵏⴻⵙ ⴷⴷⵓⵇⵇⵣⴻⵏ-ⴷⴷ

ⵡⴰⵎⴰⵏ ⵉⵀⴻⵡⵍⴻⵏ,

ⵜⵜⵏⴻⵛⵏⵉⵛⴻⵏ-ⴷⴷ ⵉⵙⴻⵢⵏⵓⵜⴻⵏ ⵏⵏⴷⴰ.   

21 ⵎⵎⵉ ⵉⵏⵓ, ⵡⴰⵔ ⵜⴻⵏⵜ ⵜⴻⵊⵊⵉⴷ

ⴰⴷ ⴼⴼⵖⴻⵏⵜ ⵣⵉ ⵜⵉⵟⵟⴰⵡⵉⵏ ⵏⵏⴻⵛ,

ⵃⴹⴰ ⴰⴼⵜⴰⵏ ⴷ ⵓⵃⴰⴹⵓⵔ,   

22 ⵎⴰⵖⴰⵔ ⴰⴷ ⵉⵍⵉⵏ ⴷ ⵜⵓⴷⴰⵔⵜ ⵉ ⵍⴻⵄⵎⴰⵔ ⵏⵏⴻⵛ

ⵓⵍⴰ ⴷ ⴰⵔⴹⴰ ⵉ ⵢⵉⵔⵉ ⵏⵏⴻⵛ.

23 ⵅⴻⵏⵏⵉ ⴰⴷ ⵜⵓⵢⵓⵔⴻⴷ ⴰⴱⵔⵉⴷ ⵏⵏⴻⵛ ⴷⵉ ⵍⴰⵎⴰⵏ,

ⵡⴰⵔ ⵜᵉⵜⵜⵏⴻⵇⵔⵉⴹⴻⴷ ⴷⴻⴳ ⵓⴹⴰⵔ ⵏⵏⴻⵛ.   

24 ⵎⴰⵍⴰ ⵜⵔⵓⵃⴻⴷ ⴰⴷ ⵜⴻⵣⵣⵍⴻⴷ,

ⵡⴰⵔ ⵜⴻⵏⵏⵅⴻⵍⵄⵉⴷ,

ⵓ ⵅⵎⵉ ⵉ ⵖⴰ ⵜⴻⵣⵣⵍⴻⴷ, ⴰⴷ ⵢⵉⵥⵉⴷ ⵢⵉⴹⴻⵚ ⵏⵏⴻⵛ.   

25 ⵡⴰⵔ ⵜⵜⴻⴳⴳⵯⴻⴷ ⵣⴻⴳ ⵓⵏⴻⵅⵍⵉⵄ ⵏ ⴷⴻⵖⵢⴰ

ⵓⵍⴰ ⵣⴻⴳ ⵡⴰⵔⴻⵢⵢⴻⴱ ⵙ ⵓⴼⵓⵙ ⵏ ⵉⵄⴻⴼⴼⴰⵏⴻⵏ

ⵅⵎⵉ ⴷⴷ ⵖⴰ ⵢⴰⵙ.   

26 ⵎⴰⵖⴰⵔ ⵙⵉⴷⵉ ⴰⴷ ⴰⵛ ⵢⵉⵍⵉ ⴷ ⴰⵙⴻⵏⵏⴻⴷ ⵏⵏⴻⵛ,

ⵏⴻⵜⵜⴰ ⴰⴷ ⵉⵃⴹⴰ ⴰⴼⵓⵙ ⵏⵏⴻⵛ ⵣⵉ ⵜⵙⴰⵔⵔⵉⴼⵜ.

27 ⵡⴰⵔ ⵇⴻⵟⵟⴻⵄ ⵍⵅⴰⵔ ⵅ ⴱⴰⴱ ⵏⵏⴻⵙ,

ⵎⴰⵍⴰ ⴰⵇⴰ-ⵜ ⴷⴻⴳ ⵓⴼⵓⵙ ⵏⵏⴻⵛ

ⵎⴰⵃⴻⵏⴷ ⴰⴷ ⵜⴻⴳⴳⴻⴷ ⵍⵅⴰⵔ.

28 ⵡⴰⵔ ⵇⵇⴰⵔ ⵉ ⵊⵊⴰⵔ ⵏⵏⴻⵛ:

‘ⵔⵓⵃ ⵓⵛⴰ ⵄⵇⴻⴱ-ⴷⴷ,

ⵜⵉⵡⴻⵛⵛⴰ ⴰⴷ ⴰⵛ ⵜⵜ ⵡⵛⴻⵖ!’,

ⵎⴰⵍⴰ ⵜⴰⵎⴻⵙⵍⴰⵛⵜ ⴰⵇⴰ-ⵜⵜ ⴰⴽⵉⴷⴻⴽ.

29 ⵡⴰⵔ ⵏⴻⴽⴽⵡⵉ ⵍⵖⴰⵔ ⴰⴽ-ⴷ ⵊⵊⴰⵔ ⵏⵏⴻⵛ,

ⵓⵎⵉ ⴰⴽⵉⴷⴻⴽ ⵉⵣⴻⴷⴷⴻⵖ ⴷⵉ ⵍⴰⵎⴰⵏ.

30 ⵡⴰⵔ ⵜⴻⵎⵛⵓⴱⴱⵓⵛ

ⴰⴽ-ⴷ ⵉⵊⵊ ⵏ ⴱⵏⴰⴷⴻⵎ ⴱⵍⴰ ⵙⵙⵉⴱⴱⴻⵜ,

ⵎⴰⵍⴰ ⵏⴻⵜⵜⴰ ⵡⴰⵔ ⴷ ⴰⵛ ⵉⴳⴳⵉ ⵍⵖⴰⵔ.

31 ⵡⴰⵔ ⵜⵜⴰⵙⴻⵎ ⵣⴻⴳ ⵉⵊⵊ ⵏ ⴱⵓ-ⵍⴻⵅⵛⵓⵏⴻⵜ,

ⵃⴹⴰ ⵎⴰⵃⴻⵏⴷ ⵡⴰⵔ ⵜᵉⵜⵜⵉⵅⴹⴰⵔⴻⴷ

ⵓⵍⴰ ⴷ ⵉⵊⵊ ⵣⵉ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ.   

32 ⵎⴰⵖⴰⵔ ⵡⴻⵏⵏⵉ ⵉⵜⵜⴻⴼⴼⵖⴻⵏ ⵣⴻⴳ ⵡⴻⴱⵔⵉⴷ,

ⴰⵇⴰ-ⵜ ⴷ ⵏⵏⵄⵉ ⵉ ⵙⵉⴷⵉ,

ⵎⴰⵛⴰ ⵏⴻⵜⵜⴰ ⵉⵜⵜⴻⴳⴳ ⵍⴰⵎⴰⵏ ⵏⵏⴻⵙ

ⴷⴻⴳ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ.   

33 ⵏⵏⴻⵄⵍⴻⵜ ⵏ ⵙⵉⴷⵉ

ⴰⵇⴰ-ⵜⵜ ⵅ ⵜⴰⴷⴷⴰⵔⵜ ⵏ ⵓⵄⴻⴼⴼⴰⵏ,

ⵎⴰⵛⴰ ⵜⴰⵣⴻⴷⴷⵉⵖⵜ ⵏ ⵉⵎⵙⴻⴳⴳⴰⴷⴻⵏ

ⴰⴷ ⵜⵜ ⵉⴱⴰⵔⴻⴽ.   

34 ⵎⴰⵍⴰ ⴷ ⵉⵎⴻⵙⵜⴻⵀⵣⴰⵢⴻⵏ,

ⴰⴷ ⵣⵣⴰⵢⵙⴻⵏ ⵉⵙⵙⵜⴻⵀⵣⴰ ⵏⴻⵜⵜⴰ,

ⵎⴰⵛⴰ ⵎⴰⵍⴰ ⴷ ⵉⵏⵏⵉ ⵉⵜⵜⵡⴰⵃⵚⴰⵔⴻⵏ,

ⴰⴷ ⴰⵙⴻⵏ ⵉⵙⵛⴻⵏ ⴰⵔⴹⴰ ⵏⵏⴻⵙ.   

35 ⵉⵎⵉⵖⵉⵙⴻⵏ ⴰⴷ ⵡⴰⵔⵜⴻⵏ ⵛⵛⴰⵏ,

ⵎⴰⵛⴰ ⵉⴱⵓⵀⴰⵍⵉⵢⵢⴻⵏ

ⴰⴷ ⵙⵙⴰⵔⴱⵓⵏ ⵍⴻⴼⴹⵉⵃⴻⵜ ⵅ ⵢⵉⵅⴻⴼ ⵏⵙⴻⵏ.