ⵉⵥⴻⵀⵀⵉⴷⴻⵏ 97

1 ⵙⵉⴷⵉ ⵉⵃⴻⴽⴽⴻⵎ,

ⴻⵊⵊ ⵜⴰⵎⵎⵓⵔⵜ ⴰⴷ ⵜⴼⴰⵔⵃ,

ⴰⴷ ⴰⵔⴻⵛⵇⴻⵏⵜ ⵎⴰⵔⵔⴰ ⵜⴻⴳⵣⵉⵔⵉⵏ.   

2 ⵇⵓⵡⵡⴰⵔⴻⵏ ⴰⵙ ⵉⵙⴻⵢⵏⵓⵜⴻⵏ

ⴷ ⵢⵉⵊⵊ ⵏ ⵓⵙⴻⵢⵏⵓ ⵉⴱⴱⵓⵎⴱⴻⵙ,

ⵜⴰⵙⴻⴳⴷⴰ ⴷ ⵍⵃⴻⵇⵇ

ⴰⵇⴰ ⴰⵜⴻⵏ ⴷ ⴷⵙⴰⵙ ⵏ ⵍⵄⴰⵔⵛ ⵏⵏⴻⵙ.

3 ⵜⵉⵎⴻⵙⵙⵉ ⵜⴻⴳⴳⵓⵔ ⴰⵙ

ⵣⵣⴰⵜ ⵏ ⵡⵓⴷⴻⵎ ⵏⵏⴻⵙ,

ⵜⵇⴻⴷⴷ ⵉⵖⵔⵉⵎⴻⵏ ⵏⵏⴻⵙ

ⵉ ⴷ ⴰⵙ ⴷⴷ-ⵉⵜⵜⴻⵏⵏⴹⴻⵏ.

4 ⴰⵙⵙⴰⵎⴻⵏ ⵏⵏⴻⵙ ⵙⵙⵍⴰⵇⵇⴰⵏ ⴷⴷⵓⵏⴻⵛⵜ,

ⵜⴰⵎⵎⵓⵔⵜ ⵜⵥⴰⵔⵔ ⵉ-ⵜⵜ, ⵜⴻⵏⵀⴻⵣⵣⴰ.   

5 ⵉⴷⵓⵔⴰⵔ ⴼⴻⵙⵙⵢⴻⵏ ⴰⵎ ⵛⵛⵎⴻⵄ

ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ,

ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵏ ⵎⴰⵔⵔⴰ ⵜⴰⵎⵎⵓⵔⵜ.

6 ⵉⵊⴻⵏⵡⴰⵏ ⵜⵜⴱⴰⵔⵔⵃⴻⵏ ⵜⴰⵙⴻⴳⴷⴰ ⵏⵏⴻⵙ,

ⵎⴰⵔⵔⴰ ⵍⴻⴳⵏⵓⵙ ⵜⵜⵡⴰⵍⴰⵏ ⴰⵄⵓⴵⵉ ⵏⵏⴻⵙ.   

7 ⴻⵊⵊ ⴰⴷ ⵙⴻⴹⵃⴰⵏ ⵎⴰⵔⵔⴰ ⵉⵏⵏⵉ ⵄⴻⴱⴱⴷⴻⵏ

ⵉ ⵍⴻⵅⵢⴰⵍⴰⵜ ⵉⵏⴻⵇⵛⴻⵏ ⵏ ⵓⴽⴻⵛⵛⵓⴹ,

ⵎⴰⵔⵔⴰ ⵉⵏⵏⵉ ⵉⵜⵜⵛⴻⵏⵏⵄⴻⵏ ⴷⵉ ⵍ’ⴰⵚⵏⴰⵎ.

ⴱⴻⵏⴷⵇⴻⵎ ⵣⵣⴰⵜⴻⵙ, ⴽⴻⵏⵏⵉⵡ,

ⵎⴰⵔⵔⴰ ⵉⵔⴻⴱⴱⵉⵜⴻⵏ!

8 ⵚⵉⵀⵢⵓⵏ ⵉⵙⵍⴰ, ⵉⴼⴰⵔⵃ,

ⵢⴻⵙⵙⵉⵙ ⵏ ⵢⴰⵀⵓⴷⴰ ⴰⵔⴻⵛⵇⴻⵏⵜ,

ⵣⵉ ⵙⵙⵉⴱⴱⴻⵜ ⵏ ⵍⴻⵃⴽⴰⵎⴰⵜ ⵏⵏⴻⵛ, ⴰ ⵙⵉⴷⵉ.

9 ⵎⴰⵖⴰⵔ ⵛⴻⴽ, ⴰ ⵙⵉⴷⵉ,

ⴷ ⴰⵎⵄⵓⴵⵉ ⵅ ⵎⴰⵔⵔⴰ ⵜⴰⵎⵎⵓⵔⵜ,

ⵛⴻⴽ ⴷ ⵡⴻⵏⵏⵉ ⵢⵓⵄⵍⴰⵏ ⵇⴰⵄ

ⵅ ⵎⴰⵔⵔⴰ ⵉⵔⴻⴱⴱⵉⵜⴻⵏ.

10 ⴽⴻⵏⵏⵉⵡ ⵉ ⵉⵜⵜⴻⵅⵙⴻⵏ ⵙⵉⴷⵉ, ⵛⴰⵔⵀⴻⵎ ⵍⵖⴰⵔ.

ⵏⴻⵜⵜⴰ ⵉⵃⴻⵟⵟⴰ ⵅ ⵍⴻⵄⵎⵓⵔ ⵏ ⵉⵎⵜⵉⵇⵇⴰⵏ ⵏⵏⴻⵙ,

ⵏⴻⵜⵜⴰ ⵉⵜⵜⴼⴻⴽⴽⴰ ⵉ-ⵜⴻⵏ ⵣⴻⴳ ⵓⴼⵓⵙ ⵏ ⵉⵄⴻⴼⴼⴰⵏⴻⵏ.   

11 ⵜⴰⴼⴰⵡⵜ ⵜᵉⵜⵜⵡⴰⵣⴰⵔⵄ ⵉ ⵓⵎⵙⴻⴳⴳⴻⴷ,

ⵍⴻⴼⵔⴰⵃⴻⵜ ⵉ ⵢⵉⵏⵏⵉ ⵖⴰⵔ ⵉⴵⴰ ⵓⵍ ⵉⵙⴻⴳⴳⵎⴻⵏ.

12 ⴽⴻⵏⵏⵉⵡ ⵉⵎⵙⴻⴳⴳⴰⴷⴻⵏ, ⴼⴰⵔⵃⴻⵎ ⵣⵉ ⵙⵉⴷⵉ,

ⵇⴰⴷⴰⵎ ⵅⵎⵉ ⵜᵉⵜⵜⵉⴷⴰⵔⴻⵎ ⵜⴰⵇⴻⴷⴷⴰⵙⵜ ⵏⵏⴻⵙ.