ⵉⵥⴻⵀⵀⵉⴷⴻⵏ 92

1 ⴰⵣⴻⵀⵀⵉⴷ. ⵉⵊⵊ ⵏ ⵉⵣⵍⵉ ⵉ ⵡⴰⵙⵙ ⵏ ⵙⵙⴻⴱⵜ.

2 ⵎⴰⵎⵎⴻⵛ ⵉⵚⴱⴻⵃ

ⵎⴰⵃⴻⵏⴷ ⴰⴷ ⵏⵇⴰⴷⴰ ⵙⵉⴷⵉ,

ⴰⴷ ⵏⵣⴻⵀⵀⴻⴷ ⵉ ⵢⵉⵙⴻⵎ ⵏⵏⴻⵛ,

ⴰ ⴰⵎⵄⵓⴵⵉ ⵅ ⴽⵓⵍⵛⵉ,

3 ⵎⴰⵃⴻⵏⴷ ⴰⴷ ⵏⴱⴰⵔⵔⴻⵃ

ⵙ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ

ⵖⴰⵔ ⵜⵓⴼⴼⵓⵜ,

ⵍⴰⵎⴰⵏ ⵏⵏⴻⵛ ⴷⵉ ⴵⵢⴰⵍⵉ,

4 ⴷⵉ ⵍⵀⴰⵔⴱⴰ ⵙ ⵄⴻⵛⵔⴰ ⵏ ⵉⴼⵉⵍⴰⵏ ⵓ ⴷⵉ ⵍⵀⴰⵔⴱⴰ,

ⵙ ⵜⵉⵔⴰⵔⵜ ⵅ ⵉⴼⵉⵍⴰⵏ ⵏ ⵍⴳⴰⵎⴱⵔⵉ.

5 ⵎⴰⵖⴰⵔ ⵛⴻⴽ ⵜⴻⵙⵙⴼⴰⵔⵃⴻⴷ ⴰⵢⵉ,

ⴰ ⵙⵉⴷⵉ, ⵙ ⵜⵎⴻⴳⴳⴰ ⵏⵏⴻⵛ,

ⵏⴻⵛⵛ ⴰⴷ ⵙⵍⵉⵡⴻⵍⵡⴻⵖ

ⵅ ⵍⴻⴼⵄⴰⵢⴻⵍ ⵏ ⵉⴼⴰⵙⵙⴻⵏ ⵏⵏⴻⵛ.

6 ⵎⴰⵎⵎⴻⵛ ⵎⵖⴰⵔⴻⵏⵜ ⵜⵎⴻⴳⴳⴰ ⵏⵏⴻⵛ, ⴰ ⵙⵉⴷⵉ,

ⵎⴰⵎⵎⴻⵛ ⵓⴵⵖⴻⵏ ⵉⵅⴰⵔⵔⵉⵚⴻⵏ ⵏⵏⴻⵛ!

7 ⵉⵊⵊ ⵏ ⵓⵇⴻⴼⴼⵓⵃ ⵡⴰⵔ ⵖⴰⵔⴻⵙ ⵎⵉⵏ ⵖⴰ ⵉⵄⴰⵡⴻⴷ,

ⵉⵊⵊ ⵏ ⵓⴱⵓⵀⴰⵍⵉ ⵡⴰⵔ ⵉⴼⴻⵀⵀⴻⵎ ⵎⴰⵏ ⴰⵢⴰ.

8 ⵎⴰⵍⴰ ⵉⵄⴻⴼⴼⴰⵏⴻⵏ ⵖⴻⵎⵎⵢⴻⵏ ⴰⵎ ⴰⵔⴱⵉⵄ,

ⵓ ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ

ⵜⵜⵏⴻⵡⵡⴰⵔⴻⵏ,

ⴰⵇⴰ ⴰⵢⴰ ⴰⴷ ⵉⵙⵙⵉⵡⴻⴹ ⴰⵜⴻⵃⵃⵉ ⵏⵙⴻⵏ

ⵉ ⵍⴻⴱⴷⴰ ⵇⴰⵄ.

9 ⵛⴻⴽ ⴷ ⴰⵎⵄⵓⴵⵉ ⵅ ⴽⵓⵍⵛⵉ ⵉ ⵍⴻⴱⴷⴰ, ⴰ ⵙⵉⴷⵉ!

10 ⵎⴰⵖⴰⵔ ⵅⵣⴰⵔ, ⵍⵄⴻⴷⵢⴰⵏ ⵏⵏⴻⵛ, ⵙⵉⴷⵉ,

ⵍⵄⴻⴷⵢⴰⵏ ⵏⵏⴻⵛ ⴰⴷ ⴼⵏⴰⵏ,

ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ

ⴰⴷ ⵜⵜⵡⴰⵣⴻⴵⵄⴻⵏ.

11 ⵛⴻⴽ ⴰⴷ ⵜⴻⵙⵙⴳⴻⵄⵄⴷⴻⴷ ⴰⵛⵛⴰⵡ ⵉⵏⵓ

ⴰⵎ ⵡⴻⵏⵏⵉ ⵏ ⵉⵖⴰⵢⴹ ⵏ ⵍⴻⵅⵍⴰ

ⴰⴽ-ⴷ ⵡⴰⵛⵛⴰⵡⴻⵏ ⴷ ⵉⵣⵉⵔⴰⵔⴻⵏ,

ⵜⵜⵡⴰⴷⴻⵀⵏⴻⵖ ⵙ ⵣⵣⴻⵛⵜ ⵏ ⵟⵔⵉ.

12 ⵜⵉⵟⵟ ⵉⵏⵓ ⴰⴷ ⵜⵥⴰⵔ ⵉⵏⵏⵉ ⵅⴰⴼⵉ ⵉⵜⵜⵛⴻⴽⴽⵎⴻⵏ,

ⵉⵎⴻⵣⵣⵓⵖⴻⵏ ⵉⵏⵓ ⴰⴷ ⵙⵍⴻⵏ ⵉ ⵉⵖⵔⵉⵎⴻⵏ ⵉⵏⵓ

ⵉⵏⵏⵉ ⵅⴰⴼⵉ ⴷⴷ-ⵉⴽⴽⴰⵔⴻⵏ.

13 ⴰⵎⵙⴻⴳⴳⴻⴷ ⴰⴷ ⵉⵏⴻⵡⵡⴰⵔ

ⴰⵎ ⵜⵛⴻⵊⵊⴰⵔⵜ ⵏ ⵜⵉⵏⵉ,

ⴰⴷ ⵉⵖⵎⵉ ⴰⵎ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ

ⵅ ⵉⴷⵓⵔⴰⵔ ⵏ ⵍⵓⴱⵏⴰⵏ,   

14 ⵉⵏⵏⵉ ⵉⵜⵜⵡⴰⵥⵥⵓⵏ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ,

ⴰⴷ ⵏⵏⵓⵡⴰⵔⴻⵏ

ⴷⵉ ⵍⴻⵎⵔⴰⵃⴰⵜ ⵏ ⴰⵔⴻⴱⴱⵉ ⵏⵏⴻⵖ.

15 ⵏⵉⵜⵏⵉ ⴰⴷ ⵡⵛⴻⵏ ⵍⵖⵉⴵⴻⵜ ⴷⵉ ⵜⴻⵡⵙⴰⵔ,

ⴰⴷ ⵇⵇⵉⵎⴻⵏ ⵚⴻⵃⵃⴻⵏ ⴷ ⵟⵔⵉ.

16 ⵎⴰⵃⴻⵏⴷ ⴰⴷ ⴱⴰⵔⵔⵃⴻⵏ,

ⴱⴻⵍⵍⵉ ⵙⵉⴷⵉ ⴰⵇⴰ-ⵜ ⵏⵉⵛⴰⵏ.

ⵏⴻⵜⵜⴰ ⴷ ⵜⴰⵚⴹⴰⵔⵜ ⵉⵏⵓ

ⵓ ⵡⴰⵔ ⴷⴰⵢⴻⵙ ⴱⵓ ⵍⵖⴻⵛⵛ.