ⵉⵥⴻⵀⵀⵉⴷⴻⵏ 86

1 ⵜⴰⵥⴰⴵⵉⵜ ⵏ ⴷⴰⵡⵓⴷ.

ⴰ ⵙⵉⴷⵉ, ⴰⵔⵔ ⴰⵎⴻⵣⵣⵓⵖ ⵏⵏⴻⵛ ⵖⴰⵔⵉ,

ⵙⴻⵍ ⴰⵢⵉ,

ⵎⴰⵖⴰⵔ ⵏⴻⵛⵛ ⴷⵉ ⵍⴻⵖⴱⴻⵏ ⵓ ⵣⴻⵍⴹⴻⵖ.

2 ⵃⴹⴰ ⵅ ⵍⴻⵄⵎⴰⵔ ⵉⵏⵓ,

ⵎⴰⵖⴰⵔ ⵏⴻⵛⵛ ⴷ ⴰⵎⵜⵉⵇⵇⵉ,

ⴰ ⴰⵔⴻⴱⴱⵉ ⵉⵏⵓ,

ⵙⴻⵏⵊⴻⵎ ⴰⵎⵙⴻⵅⵅⴰⵔ ⵏⵏⴻⵛ,

ⵡⴻⵏⵏⵉ ⵅⴰⴽ ⵉⵜⵜⵛⴰⵍⴰⵏ.

3 ⵃⵉⵏⵏ ⵅⴰⴼⵉ, ⴰ ⵙⵉⴷⵉ ⵉⵏⵓ,

ⵎⴰⵖⴰⵔ ⵜⵜⵍⴰⵖⵉⵖ ⵅⴰⴽ ⴰⵙⵙ ⴰⵎ ⵉⵎⵓⵏ.

4 ⵙⴼⴰⵔⵃ ⵍⴻⵄⵎⴰⵔ ⵏ ⵓⵎⵙⴻⵅⵅⴰⵔ ⵏⵏⴻⵛ,

ⵎⴰⵖⴰⵔ ⵉ ⵛⴻⴽ, ⴰ ⵙⵉⴷⵉ ⵉⵏⵓ,

ⵙⵙⴳⴻⵄⵄⴰⴷⴻⵖ ⵍⴻⵄⵎⴰⵔ ⵉⵏⵓ.

5 ⵎⴰⵖⴰⵔ ⵛⴻⴽ, ⴰ ⵙⵉⴷⵉ ⵉⵏⵓ,

ⴷ ⴰⵚⴻⴱⵃⴰⵏ ⵓ ⴷ ⴰⵎⵙⴰⵎⴻⵃ,

ⵖⴰⵔⴻⴽ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ

ⵉ ⵎⴰⵔⵔⴰ ⵉⵏⵏⵉ ⵖⴰⵔⴻⴽ ⵉⵜⵜⵍⴰⵖⴰⵏ.

6 ⴰ ⵙⵉⴷⵉ, ⵙⴻⵍ ⵉ ⵜⵥⴰⴵⵉⵜ ⵉⵏⵓ,

ⵃⴻⴽⴽⴰⵔ ⵉ ⵜⵎⵉⵊⵊⴰ ⵏ ⵜⵓⵜⵔⴰ ⵉⵏⵓ.

7 ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ ⵉⵏⵓ

ⵜⵜⵍⴰⵖⵉⵖ-ⴷⴷ ⵖⴰⵔⴻⴽ,

ⵎⴰⵖⴰⵔ ⵛⴻⴽ ⴰⴷ ⵅⴰⴼⵉ ⴷⴷ-ⵜⴰⵔⵔⴻⴷ.   

8 ⵊⴰⵔ ⵉⵔⴻⴱⴱⵉⵜⴻⵏ ⵡⴰⵔ ⵉⴵⵉ ⵓⵍⴰ ⴷ ⵉⵊⵊⴻⵏ

ⴰⵎ ⵛⴻⴽ, ⴰ ⵙⵉⴷⵉ ⵉⵏⵓ,

ⵡⴰⵔ ⴷⵉⵏ ⵎⵉⵏ ⵢⴰⵔⵡⴻⵙⴻⵏ

ⴷⵉ ⵜⵎⴻⴳⴳⴰ ⵏⵏⵉ ⵜⴻⴳⴳⵉⴷ.   

9 ⵎⴰⵔⵔⴰ ⵍⴻⴳⵏⵓⵙ ⵉ ⵜⴻⴳⴳⵉⴷ, ⴰⴷ ⴷⴷ-ⴰⵙⴻⵏ,

ⴰⴷ ⵙⴻⵊⴷⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ,

ⴰ ⵙⵉⴷⵉ ⵉⵏⵓ,

ⴰⴷ ⵙⵙⵄⵓⴵⴻⵏ ⵉⵙⴻⵎ ⵏⵏⴻⵛ.

10 ⵎⴰⵖⴰⵔ ⵛⴻⴽ ⴷ ⴰⵎⴻⵇⵇⵔⴰⵏ

ⵓ ⵛⴻⴽ ⴷ ⵡⴻⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵊⵉⵣⴰⵜ,

ⵛⴻⴽ ⵡⴻⵃⵃⴷⴻⴽ ⴷ ⴰⵔⴻⴱⴱⵉ ⵉ ⵜⴻⴵⵉⴷ.

11 ⵙⵛⴻⵏ ⴰⵢⵉ ⴰⴱⵔⵉⴷ ⵏⵏⴻⵛ, ⴰ ⵙⵉⴷⵉ,

ⵃⵉⵎⴰ ⴰⴷ ⵓⵢⵓⵔⴻⵖ ⴷⵉ ⵜⵉⴷⴻⵜⵜ ⵏⵏⴻⵛ,

ⵙⵎⵓⵏ ⵓⵍ ⵉⵏⵓ

ⵎⴰⵃⴻⵏⴷ ⴰⴷ ⴳⴳⵯⴻⴷⴻⵖ ⵉⵙⴻⵎ ⵏⵏⴻⵛ.   

12 ⴰ ⵙⵉⴷⵉ ⵉⵏⵓ, ⴰⵔⴻⴱⴱⵉ ⵉⵏⵓ,

ⵅⵙⴻⵖ ⴰⴷ ⵛⴻⴽ ⵇⴰⴷⵉⵖ ⵙ ⵎⴰⵔⵔⴰ ⵡⵓⵍ ⵉⵏⵓ,

ⴰⴷ ⵛⴻⵏⵏⵄⴻⵖ ⵉⵙⴻⵎ ⵏⵏⴻⵛ ⵉ ⵍⴻⴱⴷⴰ ⵇⴰⵄ.

13 ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ

ⵜⴻⵎⵖⴰⵔ ⵅⴰⴼⵉ,

ⵛⴻⴽ ⵜⴼⴻⴽⴽⴻⴷ ⵍⴻⵄⵎⴰⵔ ⵉⵏⵓ

ⵣⵉ ⵍⴰⴵⴰⵖ ⵏ ⵍⴰⵅⴰⵔⵜ.

14 ⴰ ⴰⵔⴻⴱⴱⵉ,

ⵉⵎⵄⴻⴼⴼⴰⵔⴻⵏ ⴽⴽⴰⵔⴻⵏ-ⴷⴷ ⴰⴽⵉⴷⵉ,

ⵉⵛⵜ ⵏ ⴱⴰⵏⴷⵉⵢⵢⴰ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ

ⴰⵔⴻⵣⵣⵓⵏ ⴰⴷ ⵏⵖⴻⵏ ⵍⴻⵄⵎⴰⵔ ⵉⵏⵓ.

ⵛⴻⴽ ⵡⴰⵔ ⵖⴰⵔⵙⴻⵏ ⵜⴻⴵⵉⴷ

ⵇⵉⴱⴰⵍⵜ ⵉ ⵜⵉⵟⵟⴰⵡⵉⵏ ⵏⵙⴻⵏ.   

15 ⵎⴰⵛⴰ ⵛⴻⴽ, ⴰ ⵙⵉⴷⵉ ⵉⵏⵓ,

ⴷ ⴰⵔⴻⴱⴱⵉ ⴷ ⴰⵔⵃⵉⵎ ⴷ ⵓⵃⵏⵉⵏ,

ⵖⴰⵔⴻⴽ ⵜⵜⴰⵙⵉⵄ ⵏ ⵍⵅⴰⴹⴰⵔ

ⵓⵍⴰ ⴷ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ

ⴷ ⵍⴰⵎⴰⵏ ⵎⵖⴰⵔⴻⵏ.   

16 ⵅⵣⴰⵔ-ⴷⴷ ⵖⴰⵔⵉ ⵓ ⵃⵉⵏⵏ ⵅⴰⴼⵉ,

ⴻⴳⴳ ⵊⵊⴻⵀⴷ ⵏⵏⴻⵛ ⴷⴻⴳ ⵓⵎⵙⴻⵅⵅⴰⵔ ⵏⵏⴻⵛ,

ⵓⵛⴰ ⵙⴻⵏⵊⴻⵎ ⵎⵎⵉⵙ ⵏ ⵜⴰⵢⵢⴰ ⵏⵏⴻⵛ.

17 ⴻⴳⴳ ⵉⵛⵜ ⵏ ⵍⴻⵄⵍⴰⵎⴻⵜ ⴷⵉ ⵟⵟⵡⴻⵄ ⵉⵏⵓ,

ⵃⵉⵎⴰ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ

ⴰⴷ ⵜ ⵥⴰⵔⴻⵏ ⴰⴷ ⵙⴻⴹⵃⴰⵏ,

ⵎⴰⵖⴰⵔ ⵛⴻⴽ, ⴰ ⵙⵉⴷⵉ, ⵜⴻⵡⵛⵉⴷ ⴰⵢⵉ ⴰⴼⵓⵙ

ⵓ ⵜⴻⵙⵙⴼⴻⵡⵡⵊⴻⴷ ⵅⴰⴼⵉ.