ⵉⵥⴻⵀⵀⵉⴷⴻⵏ 79

1 ⴰⵣⴻⵀⵀⴻⴷ ⵏ ⴰⵙⴰⴼ.

ⴰ ⴰⵔⴻⴱⴱⵉ, ⵍⴻⴳⵏⵓⵙ ⵓⴷⴼⴻⵏ

ⵖⴰⵔ ⵍⵡⴰⵔⵜ ⵏⵏⴻⵛ.

ⵏⵉⵜⵏⵉ ⵙⵙⵅⴻⵎⵊⴻⵏ

ⵣⵣⴰⵡⴻⵛⵜ ⵏⵏⴻⵛ ⵜⴰⵎⴻⵇⵇⵔⴰⵏⵜ ⵉⵇⴻⴷⴷⵙⴻⵏ,

ⴰⵔⵔⵉⵏ ⵓⵔⵛⴰⵍⵉⵎ ⴷ ⵍⵅⵉⵔⴱⴰⵜ.

2 ⵍⵅⴻⵛⴱⴰⵜ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵛ

ⵡⵛⵉⵏ ⵜⴻⵏⵜ ⴷ ⵎⴰⵛⵛⴰ ⵉ ⵉⵊⴹⴰⴹ ⵏ ⵓⵊⴻⵏⵏⴰ,

ⴰⵢⵙⵓⵎ ⵏ ⵉⵎⵜⵉⵇⵇⴰⵏ ⵏⵏⴻⵛ

ⵉ ⵍⴻⵡⵃⵓⵛ ⵏ ⵜⴻⵎⵎⵓⵔⵜ.

3 ⵉⴷⴰⵎⵎⴻⵏ ⵏⵙⴻⵏ ⵣⴻⴵⵄⴻⵏ ⵜⴻⵏ

ⴰⵎ ⵡⴰⵎⴰⵏ

ⵖⴰⵔ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵏ ⵓⵔⵛⴰⵍⵉⵎ,

ⵓⵍⴰ ⴷ ⵉⵊⵊ ⵡⴰⵔ ⵜⴻⵏ ⵉⵏⴹⵉⵍ.

4 ⵏⴻⴷⵡⴻⵍ ⴷ ⵍⴻⴼⴷⵉⵃⴻⵜ ⵉ ⵊⵊⵉⵔⴰⵏ ⵏⵏⴻⵖ,

ⴷ ⵓⵙⵜⴻⵀⵣⵉ ⴷ ⵓⵙⴻⵃⵇⴰⵔ

ⵉ ⵎⴰⵔⵔⴰ ⵉⵏⵏⵉ ⴷ ⴰⵏⴻⵖ ⴷⴷ-ⵉⵏⵏⴹⴻⵏ.   

5 ⴰⵔ ⵎⴻⵍⵎⵉ, ⴰ ⵙⵉⴷⵉ?

ⵎⴰ ⵅⴻⵏⵏⵉ ⴰⴷ ⵜⴻⵇⵇⵉⵎⴻⴷ

ⵜⵙⴻⵄⵄⴰⵔⴻⴷ ⵉ ⵍⴻⴱⴷⴰ?

ⵎⴰ ⴰⴷ ⵜⴰⵔⴻⵖ ⵜⵓⵙⵎⵉ ⵏⵏⴻⵛ ⵉⵇⴻⴷⴷⵙⴻⵏ

ⴰⵎ ⵜⵎⴻⵙⵙⵉ ⵉ ⵍⴻⴱⴷⴰ?   

6 ⴼⴰⵔⵔⴻⵖ ⴰⵙⵄⴰⵔ ⵏⵏⴻⵛ

ⵅ ⵍⴻⴳⵏⵓⵙ ⵉ ⵡⴰⵔ ⵛⴻⴽ ⵉⵙⵙⵉⵏⴻⵏ,

ⵅ ⵜⵉⴳⴻⵍⴷⵉⵡⵉⵏ ⵏⵏⵉ ⵡⴰⵔ ⵉⵜⵜⵍⵉⵖⵉⵏ

ⵅ ⵢⵉⵙⴻⵎ ⵏⵏⴻⵛ.   

7 ⵎⴰⵖⴰⵔ ⵏⵉⵜⵏⵉ ⵛⵛⵉⵏ ⵢⴰⵄⵇⵓⴱ,

ⴰⵔⴻⴷⴷⴵⴻⵏ ⵜⴰⵣⴻⴷⴷⵉⵖⵜ ⵏⵏⴻⵙ.

8 ⵡⴰⵔ ⵅⴰⵏⴻⵖ ⵄⴻⵇⵇⴻⵍ 

ⵄⵍⴰⵃⵙⴰⴱ ⵍⵎⵓⵄⵚⵉⵢⵢⴻⵜ ⵏⵏⴻⵖ ⵏ ⵣⵉⵛ.

ⵇⴻⴵⴻⵇ, ⴻⵊⵊ ⴰⵔⵔⴻⵃⵎⴻⵜ ⵏⵏⴻⵛ

ⴰⴷ ⴽⵉⴷⵏⴻⵖ ⵜⴻⵎⵙⴰⴳⴰⵔ,

ⵎⴰⵖⴰⵔ ⵏⴻⴹⵄⴻⴼ ⴰⵟⵟⴰⵙ.   

9 ⴻⵡⵛ ⴰⵏⴻⵖ ⴰⴼⵓⵙ ⵏⵏⴻⵛ, ⴰ ⴰⵔⴻⴱⴱⵉ,

ⴷⵉ ⵟⵟⵡⴻⵄ ⵏ ⵓⵄⵓⴵⵉ ⵏ ⵢⵉⵙⴻⵎ ⵏⵏⴻⵛ,

ⴼⴻⴽⴽ ⴰⵏⴻⵖ ⵓ ⵙⴻⵚⵍⴻⵃ ⵅ ⴷⴷⵏⵓⴱ ⵏⵏⴻⵖ

ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⵛ.

10 ⵎⴰⵢⴻⵎⵎⵉ ⵖⴰ ⵉⵏⵉⵏ ⵍⴻⴳⵏⵓⵙ:

“ⵎⴰⵏⵉ ⵉⴵⴰ ⴰⵔⴻⴱⴱⵉ ⵏⵙⴻⵏ?”

ⴻⵊⵊ ⴰⵏⵜⴰⵇⴻⵎ ⵏ ⵉⴷⴰⵎⵎⴻⵏ

ⵉⵜⵜⵡⴰⵙⵙⵉⵣⵍⴻⵏ ⵏ ⵍⴳⴻⵏⵙ ⵏⵏⴻⵛ

ⴰⴷ ⵉⴷⵡⴻⵍ ⵉⵜⵜⵡⴰⵙⵙⴻⵏ

ⵊⴰⵔ ⵍⴻⴳⵏⵓⵙ ⵊⴰⵔ ⵜⵉⵟⵟⴰⵡⵉⵏ ⵏⵏⴻⵖ.

11 ⴻⵊⵊ ⴰⵣⴻⵀⵀⴰⵔ ⵏ ⵓⵎⴻⵃⴱⵓⵙ ⴰⴷ ⴷⴷ-ⵢⴰⵙ

ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ,

ⵃⴹⴰ ⵉⵃⴻⵏⵊⵉⵔⴻⵏ ⵏ ⵍⵎⴻⵡⵜ

ⵄⵍⴰⵃⵙⴰⴱ ⵍⴻⵎⵖⴰⵔⴻⵜ ⵏ ⵓⵖⵉⵍ ⵏⵏⴻⵛ.

12 ⴰⵔⵔ ⴰⵙⴻⵏ ⵉ ⵊⵊⵉⵔⴰⵏ ⵏⵏⴻⵖ ⴰⴱⴻⵀⴷⴻⵍ ⵏⵙⴻⵏ

ⵙⴻⴱⵄⴰ ⵏ ⵜⵙⴻⵇⵇⴰⵔ ⵖⴰⵔ ⵡⴻⵃⵙⵉⵏ ⵏⵙⴻⵏ,

ⴰⴱⴻⵀⴷⴻⵍ ⵏⵙⴻⵏ ⵉ ⵣⵉ ⵛⴻⴽ ⴼⴻⴹⵃⴻⵏ,

ⴰ ⵙⵉⴷⵉ ⵉⵏⵓ.

13 ⵏⴻⵛⵛⵉⵏ ⴷ ⵍⴳⴻⵏⵙ ⵏⵏⴻⵛ

ⴷ ⵡⵓⴵⵉ ⵏ ⴷⴷⵎⴰⵏⵉ ⵏ ⵜⴰⵔⴻⵡⵙⴰ ⵏⵏⴻⵛ.

ⵏⴻⵜⵜⵇⴰⴷⴰ ⵛⴻⴽ ⵉ ⵍⴻⴱⴷⴰ,

ⵣⵉ ⵊⵊⵉⵍ ⴰⵍ ⵊⵊⵉⵍ.

ⵏⴻⵛⵛⵉⵏ ⴰⴷ ⵏⴱⴰⵔⵔⴻⵃ ⵛⵛⴰⵏ ⵏⵏⴻⵛ.