ⵉⵥⴻⵀⵀⵉⴷⴻⵏ 78

1 ⴰⵅⴻⵎⵎⵉ ⵏ ⴰⵙⴰⴼ.

ⴰ ⵍⴳⴻⵏⵙ ⵉⵏⵓ, ⴻⵡⵛ ⴰⵎⴻⵣⵣⵓⵖ

ⵉ ⵛⵛⴰⵔⵉⵄⴰ ⵉⵏⵓ!

ⵎⴻⵢⵢⵍⴻⵎ ⴰⵎⴻⵣⵣⵓⵖ ⵏⵡⴻⵎ

ⵖⴰⵔ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ.

2 ⵏⴻⵛⵛ ⴰⴷ ⴰⵔⵣⵎⴻⵖ ⴰⵇⴻⵎⵎⵓⵏ ⵉⵏⵓ

ⵙ ⵡⴰⵡⴰⵍ ⵉⵡⴻⵣⵏⴻⵏ,

ⴰⴷ ⴱⴰⵔⵔⵃⴻⵖ ⵍⴻⵎⵄⴰⵏⵉ ⵉⵏⵏⵓⴼⴼⴰⵔⴻⵏ

ⵣⴻⴳ ⵡⴻⵛⵃⴰⵍ ⵓⵢⴰ,   

3 ⵜⵉⵎⴻⵙⵍⴰⵢⵉⵏ ⵏⵏⵉ ⵏⴻⵙⵍⴰ ⵓ ⵏⴻⵙⵙⴻⵏ,

ⵏⵏⵉ ⴷ ⴰⵏⴻⵖ ⵃⴰⵊⴰⵏ ⵍⴻⵊⴷⵓⴷ ⵏⵏⴻⵖ.

4 ⵡⴰⵔ ⵜⴻⵏ ⵏᵉⵜⵜⴻⴼⴼⴰⵔ ⵣⴻⴳ ⵉⵃⴻⵏⵊⵉⵔⴻⵏ ⵏⵙⴻⵏ,

ⵣⵉ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ.

ⴰⴷ ⵏⴱⴰⵔⵔⴻⵃ ⵙ ⵜⵎⴻⴳⴳⴰ ⵉⵚⴻⴱⴱⵃⴻⵏ ⵏ ⵙⵉⴷⵉ,

ⵙ ⵜⵎⴻⴳⴳⴰ ⵏⵏⴻⵙ ⵉⵊⴻⵀⴷⴻⵏ

ⴷ ⵍⵎⵓⵄⵊⵉⵣⴰⵜ ⵏⵏⴻⵙ ⵏⵏⵉ ⵜⵓⵖⴰ ⵉⴳⴳⴰ.

5 ⵎⴰⵖⴰⵔ ⵏⴻⵜⵜⴰ ⵉⴳⴳⴰ ⵉⵛⵜ ⵏ ⵛⵛⵀⴰⴷⴻⵜ

ⴷⵉ ⵢⴰⵄⵇⵓⴱ,

ⵉⵙⵙⴰⵔⵙ ⵉⵛⵜ ⵏ ⵛⵛⴰⵔⵉⵄⴰ ⴷⵉ ⵉⵙⵔⴰⵉⵍ,

ⵏⵏⵉ ⵜⵓⵖⴰ ⵢⵓⵎⵓⵔ ⵉ ⵍⴻⵊⴷⵓⴷ ⵏⵏⴻⵖ,

ⵎⴰⵃⴻⵏⴷ ⴰⴷ ⵜⵜ ⵙⵙⵖⴰⵔⴻⵏ ⵉ ⵉⵃⴻⵏⵊⵉⵔⴻⵏ ⵏⵙⴻⵏ,   

6 ⵎⴰⵃⴻⵏⴷ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ ⴰⴷ ⵉⵙⵙⴻⵏ,

ⵉⵃⴻⵏⵊⵉⵔⴻⵏ ⵏⵏⵉ ⴷⴷ ⵖⴰ ⵉⵜⵜⵡⴰⵅⴻⵍⵇⴻⵏ

ⴰⵡⴰⵔⵏⵉ ⴰⵙⴻⵏ,

ⵓ ⵅⴻⵏⵏⵉ ⵓⵍⴰ ⴷ ⵏⵉⵜⵏⵉ ⴰⴷ ⴽⴽⴰⵔⴻⵏ

ⴰⴷ ⵜⵜ ⵙⵙⴻⵄⴷⵓⵏ ⵉ ⵉⵃⴻⵏⵊⵉⵔⴻⵏ ⵏⵙⴻⵏ,

7 ⵎⴰⵃⴻⵏⴷ ⵏⵉⵜⵏⵉ ⴰⴷ ⵙⵙⴰⵔⵙⴻⵏ

ⵍⴰⵎⴰⵏ ⵏⵙⴻⵏ ⵅ ⴰⵔⴻⴱⴱⵉ,

ⵡⴰⵔ ⵜⵜᵉⵜⵜⵓⵏ ⵛⴰ ⵜⵉⵎⴻⴳⴳⴰ ⵏ ⴰⵔⴻⴱⴱⵉ,

ⵎⴰⵛⴰ ⴰⴷ ⵃⴹⴰⵏ ⵜⵉⵡⴻⵚⵚⴰ ⵏⵏⴻⵙ,

8 ⵡⴰⵔ ⵜⵜⵉⵍⵉⵏ ⴰⵎ ⵍⴻⵊⴷⵓⴷ ⵏⵙⴻⵏ,

ⵉⵊⵊ ⵏ ⵊⵊⵉⵍ ⴰⵖⴻⵏⵏⴰⵏ ⴷ ⵉⵖⴻⵡⵡⵖⴻⵏ,

ⵉⵊⵊ ⵏ ⵊⵊⵉⵍ ⵙ ⵡⵓⵍ ⵡⴰⵔ ⵉⵎⵜⴻⵏ

ⵓ ⵙ ⴰⵔⵔⵓⵃ ⵉⵖⴷⴰⵔⴻⵏ ⴰⵔⴻⴱⴱⵉ.   

9 ⴰⵢⵜ ⵏ ⵉⴼⵔⴰⵢⵉⵎ, ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ,

ⵄⴻⵇⴱⴻⵏ ⴷⴻⴳ ⵡⴰⵙⵙ ⵏ ⵓⵎⴻⵏⵖⵉ.

10 ⵡⴰⵔ ⵃⴹⴰⵏ ⵍⵄⴰⵀⴷ ⴰⴽ-ⴷ ⴰⵔⴻⴱⴱⵉ,

ⵓⴳⵉⵏ ⴰⴷ ⵓⵢⵓⵔⴻⵏ ⴷⵉ ⵛⵛⴰⵔⵉⵄⴰ ⵏⵏⴻⵙ.

11 ⵜⵜⵓⵏ ⵜⵉⵎⴻⴳⴳⴰ ⵏⵏⴻⵙ ⴷ ⵍⵎⵓⵄⵊⵉⵣⴰⵜ,

ⵜⵉⵏⵏⵉ ⵉ ⴷ ⴰⵙⴻⵏ ⵉⵙⵙⵛⴻⵏ.

12 ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵍⴻⵊⴷⵓⴷ ⵏⵙⴻⵏ

ⵉⴳⴳⴰ ⵏⴻⵜⵜⴰ ⵉⵛⵜ ⵏ ⵍⵎⵓⵄⵊⵉⵣⴰ,

ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ,

ⴷⴻⴳ ⵉⵢⵢⴰⵔ ⵏ ⵚⵓⵄⴰⵏ.

13 ⵏⴻⵜⵜⴰ ⵉⴱⴹⴰ ⵍⴻⴱⵃⴰⵔ

ⵓⵛⴰ ⵉⵙⵙⴻⵥⵡⴰ ⵜⴻⵏ ⵣⵣⴰⵢⴻⵙ,

ⵉⵊⵊⴰ ⴰⵎⴰⵏ ⴰⴷ ⴱⴻⴷⴷⴻⵏ ⴰⵎ ⵡⴻⵖⴱⴰⵔ.   

14 ⵏⴻⵜⵜⴰ ⵉⵙⵙⵇⴻⴱⴱⴻⴹ ⵉ-ⵜⴻⵏ ⵙ ⵡⴰⵙⵙ

ⵙ ⵓⵙⴻⵢⵏⵓ,

ⵙ ⴵⵉⵍⴻⵜ ⵎⴰⵔⵔⴰ ⵙ ⵜⴼⴰⵡⵜ ⵏ ⵜⵎⴻⵙⵙⵉ.   

15 ⵏⴻⵜⵜⴰ ⵉⴱⴹⴰ ⵍⴻⵊⵔⵓⴼ ⴷⵉ ⵍⴻⵅⵍⴰ,

ⵉⵡⵛⴰ ⵉ ⵍⴳⴻⵏⵙ ⴰⴷ ⵉⵙⵓ ⵙ ⵓⴼⴻⵢⵢⴻⴹ

ⴰⵎⴻⵛⵏⴰⵡ ⵣⴻⴳ ⵡⴰⵎⴰⵏ ⵉⵀⴻⵡⵍⴻⵏ.   

16 ⵏⴻⵜⵜⴰ ⵉⵊⵊⴰ ⵍⵄⵓⵏⵚⴰⵔⴰⵜ

ⴰⴷ ⴼⴻⵢⵢⴹⴻⵏⵜ ⵣⵉ ⵙⵙⴻⴵⴰⵃ,

ⵏⴻⵜⵜⴰ ⵉⵊⵊⴰ ⴰⵎⴰⵏ

ⴰⴷ ⵀⵡⴰⵏ ⴰⵎ ⵢⵉⵖⴻⵣⵔⴰⵏ.

17 ⵎⴰⵛⴰ ⵏⵉⵜⵏⵉ ⴰⵔⵏⵉⵏ

ⴷⵉ ⴷⴷⵏⵓⴱ ⵏⵙⴻⵏ ⵅⴰⵙ,

ⵖⴻⵡⵡⵖⴻⵏ ⵅ ⵓⵎⵄⵓⴵⵉ ⵅ ⴽⵓⵍⵛⵉ

ⵓⵎⵉ ⵜⵓⵖⴰ ⴰⵜⴻⵏ ⴷⵉ ⵜⵏⴻⵣⵔⵓⴼⵜ ⵢⵓⵥⵖⴻⵏ.

18 ⵏⵉⵜⵏⵉ ⵊⴰⵔⵔⴱⴻⵏ ⴰⵔⴻⴱⴱⵉ

ⴷⴻⴳ ⵡⵓⵍ ⵏⵙⴻⵏ

ⵓⵎⵉ ⵜⵜⴰⵔⴻⵏ ⵎⴰⵛⵛⴰ

ⵖⴰⵔ ⵎⴻⵥⵔⵉ ⵏ ⵍⴻⵄⵎⴰⵔ ⵏⵙⴻⵏ.

19 ⵙⵙⵉⵡⵍⴻⵏ ⴹⵉⴷⴷ ⵉ ⴰⵔⴻⴱⴱⵉ, ⵏⵏⴰⵏ:

“ⵎⴰ ⵉⵣⴻⵎⵎⴰⵔ ⴰⵔⴻⴱⴱⵉ

ⴰⴷ ⵉⵙⵙⴻⵡⵊⴻⴷ ⵟⵟⴰⴱⵍⴰ ⴷⵉ ⵍⴻⵅⵍⴰ?   

20 ⵅⵣⴰⵔ, ⵏⴻⵜⵜⴰ ⵉⵡⵜⴰ ⴷⵉ ⵜⴻⵚⴹⴰⵔⵜ,

ⴰⵍⴰⵎⵉ ⴷⴷ-ⵓⵣⵣⵍⴻⵏ ⵣⵣⴰⵢⴻⵙ

ⵡⴰⵎⴰⵏ ⴷ ⵉⵖⴻⵣⵔⴰⵏ.

ⵎⴰ ⵉⵣⴻⵎⵎⴰⵔ ⵏⴻⵜⵜⴰ ⴰⴷ ⵉⵡⵛ ⴰⵖⵔⵓⵎ

ⵏⵉⵖ ⵉⵙⵙⴻⵡⵊⴻⴷ ⴰⵢⵙⵓⵎ ⵉ ⵍⴳⴻⵏⵙ ⵏⵏⴻⵙ?”   

21 ⵙ ⵓⵢⴰ ⵉⵙⵍⴰ ⵙⵉⴷⵉ ⵓⵛⴰ ⵉⴼⴼⵓⴳⴻⵎ.

ⵜⵉⵎⴻⵙⵙⵉ ⵜⴰⵔⵖⴰ ⴹⵉⴷⴷ ⵉ ⵢⴰⵄⵇⵓⴱ,

ⵉⴽⴽⴰⵔ-ⴷⴷ ⵡⴻⵖⴹⴰⴱ ⵏⵏⴻⵙ ⴹⵉⴷⴷ ⵉ ⵉⵙⵔⴰⵉⵍ,   

22 ⵎⴰⵖⴰⵔ ⵡⴰⵔ ⵓⵎⵉⵏⴻⵎ ⵛⴰ ⴷⵉ ⴰⵔⴻⴱⴱⵉ,

ⵡⴰⵔ ⵜⵜⵛⵉⵍⵉⵏ ⴷⴻⴳ ⵓⵙⴻⵏⵊⴻⵎ ⵏⵏⴻⵙ.

23 ⵏⴻⵜⵜⴰ ⵢⵓⵎⵓⵔ ⵉⵙⴻⵢⵏⵓⵜⴻⵏ ⵙⴻⵏⵏⴻⵊ

ⵓ ⵢⴰⵔⵣⴻⵎ ⵜⵉⵡⵡⵓⵔⴰ ⵏ ⵓⵊⴻⵏⵏⴰ.

24 ⵉⴼⴰⵔⵔⴻⵖ-ⴷⴷ ⵅⴰⵙⴻⵏ ‘ⵎⴰⵏⵏⴰ’

ⵎⴰⵃⴻⵏⴷ ⴰⴷ ⵛⵛⴻⵏ,

ⵉⵡⵛⴰ ⴰⵙⴻⵏ ⵉⵎⴻⵏⴷⵉ ⵣⴻⴳ ⵓⵊⴻⵏⵏⴰ.   

25 ⵎⴰⵔⵔⴰ ⵛⵛⵉⵏ ⴰⵖⵔⵓⵎ

ⵏ ⵢⵉⵏⵏⵉ ⴷⴰⵢⵙⴻⵏ ⵍⵄⴻⵣⵣ.

ⵉⵙⵙⴻⴽⴽ ⴰⵙⴻⵏ ⵎⴰⵛⵛⴰ ⵏⵙⴻⵏ ⵖⴰⵔ ⵡⴻⴱⵔⵉⴷ

ⴰⵍⴰⵎⵉ ⵊⵊⵉⵡⵏⴻⵏ.     

26 ⵏⴻⵜⵜⴰ ⵉⴳⴳⴰ ⴰⵙⴻⵎⵎⵉⴹ

ⵏ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ

ⴰⴷ ⵉⴽⴽⴰⵔ ⴷⴻⴳ ⵓⵊⴻⵏⵏⴰ,

ⵙ ⵜⵣⴻⵎⵎⴰⵔ ⵏⵏⴻⵙ ⵉⵙⵙⴻⴽⴽ-ⴷⴷ

ⴰⵙⴻⵎⵎⵉⴹ ⵏ ⵍⵊⴰⵏⵓⴱ.   

27 ⵉⵊⵊⴰ ⴰⵢⵙⵓⵎ ⴰⴷ ⵅⴰⵙⴻⵏ ⴷⴷ-ⵉⵡⴹⴰ

ⴰⵎ ⵡⴻⵏⵥⴰⵔ ⵏ ⵜⵄⴻⵊⵊⴰⵊⵜ,

ⵉⵊⴹⴰⴹ ⵙ ⵡⴰⴼⵔⵉⵡⴻⵏ ⴰⵎ ⵢⵉⵊⴷⵉ ⵏ ⵍⴻⴱⵃⵓⵔ.

28 ⵏⴻⵜⵜⴰ ⵉⵊⵊⴰ ⵉ-ⵜⴻⵏ ⴰⴷ ⵡⴹⴰⵏ

ⴷⵉ ⵍⵡⴻⵙⵜ ⵏ ⵍⵎⴰⵔⴳⴻⵃ ⵏ ⵍⵄⴻⵙⴽⴰⵔ,

ⵖⴰⵔ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵏ ⵜⵣⴻⴷⴷⵉⵖⵉⵏ ⵏⵙⴻⵏ.

29 ⵏⵉⵜⵏⵉ ⵛⵛⵉⵏ ⵓ ⵊⵊⵉⵡⵏⴻⵏ ⵇⴰⵄ,

ⴽⵙⵉⵏ ⵎⵉⵏ ⴷⵉ ⵜⵓⵖⴰ ⴹⴻⵎⵄⴻⵏ.

30 ⵏⵉⵜⵏⵉ ⵜⵓⵖⴰ ⵄⴰⴷ ⵡⴰⵔ ⵜⵜⵡⴰⴼⴻⴽⴽⴻⵏ

ⵣⴻⴳ ⵡⴻⴹⵎⴰⵄ ⵏⵙⴻⵏ,

ⵎⴰⵛⵛⴰ ⵜⵓⵖⴰ ⵄⴰⴷ ⴷⴻⴳ ⵓⵇⴻⵎⵎⵓⵎ ⵏⵙⴻⵏ,

31 ⵓⵎⵉ ⵅⴰⵙⴻⵏ ⵉⴽⴽⴰⵔ ⵡⴻⵖⴹⴰⴱ ⵏ ⴰⵔⴻⴱⴱⵉ.

ⵏⴻⵜⵜⴰ ⵉⵏⵖⴰ ⵉⵏⵏⵉ ⵉⴵⴰⵏ

ⴷ ⵉⵇⴻⴱⴱⵓⵣⴻⵏ ⵇⴰⵄ ⵊⴰⵔ ⴰⵙⴻⵏ,

ⵢⴰⵔⵔⴰ-ⴷⴷ ⵉⵃⵓⴷⵔⵉⵢⵢⴻⵏ ⵏ ⵉⵙⵔⴰⵉⵍ

ⴰⴷ ⴰⴹⴰⵔⴻⵏ ⵖⴰⵔ ⵜⵄⴻⵊⵊⴰⵊⵜ ⵏ ⵜⴻⵎⵎⵓⵔⵜ.   

32 ⵎⴰⵛⴰ ⵇⴰⵄ ⴰⵎⴻⵏⵏⵉ ⴰⵔⵏⵉⵏ ⴳⴳⵉⵏ ⴷⴷⵏⵓⴱ,

ⵡⴰⵔ ⵓⵎⵉⵏⴻⵏ ⴷⵉ ⵍⵎⵓⵄⵊⵉⵣⴰⵜ ⵏⵏⴻⵙ.

33 ⵏⴻⵜⵜⴰ ⵉⵊⵊⴰ ⵓⵙⵙⴰⵏ ⵏⵙⴻⵏ

ⴰⴷ ⵄⴷⵓⵏ ⴰⵎ ⵢⵉⵊⵊ ⵏ ⵍⴻⴼⵡⴰⵔ,

ⵉⵙⴻⴳⴳⵯⵓⵙⴰ ⵏⵙⴻⵏ ⴰⵎ ⵢⵉⵛⵜ ⵏ ⵍⵄⵓⵔⵔⴻⵜ.

34 ⵅⵎⵉ ⵜⴻⵏ ⵉ ⵖⴰ ⵉⵏⴻⵖ, ⴰⵔⵣⵓⵏ ⵅ ⴰⵔⴻⴱⴱⵉ,

ⴷⴻⵡⵍⴻⵏ-ⴷⴷ ⵖⴰⵔⴻⵙ, ⴰⵔⵣⵓⵏ ⵅⴰⵙ ⵙ ⵛⴹⴰⵔⴻⵜ.

35 ⵏⵉⵜⵏⵉ ⵄⴻⵇⵍⴻⵏ

ⴰⵇⴰ ⴰⵔⴻⴱⴱⵉ ⴷ ⵜⴰⵚⴹⴰⵔⵜ ⵏⵙⴻⵏ,

ⴰⵔⴻⴱⴱⵉ, ⴰⵎⵄⵓⴵⵉ ⵅ ⴽⵓⵍⵛⵉ,

ⴷ ⴰⵎⴻⴼⴷⵉ ⵏⵙⴻⵏ.   

36 ⵎⴰⵛⴰ ⵏⵉⵜⵏⵉ ⵙⵙⵏⵉⵄⵎⵉⵍⴻⵏ ⵣⵣⴰⵜⴻⵙ

ⵙ ⵓⵇⴻⵎⵎⵓⵎ ⵏⵙⴻⵏ,

ⵙ ⵢⵉⵍⴻⵙ ⵏⵙⴻⵏ ⵙⵙⵅⴰⵔⵔⵉⵇⴻⵏ ⵅⴰⵙ.

37 ⵡⴰⵔ ⵜⵓⵖⵉ ⵓⵍ ⵏⵙⴻⵏ ⵉⵎⵜⴻⵏ ⴰⴽⵉⴷⴻⵙ,

ⵡⴰⵔ ⵓⵢⵓⵔⴻⵏ ⵙ ⵍⵎⴰⵏⴻⵜ

ⴰⴽ-ⴷ ⵍⵄⴰⵀⴷ ⵏⵏⴻⵙ.

38 ⵏⴻⵜⵜⴰ ⵎⴰⵛⴰ ⵜⵓⵖⴰ ⵢⴰⵔⴻⵃⵃⴻⵎ ⴷⴰⵢⵙⴻⵏ

ⵓ ⵉⵙⵙⴻⵚⵍⴻⵃ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵖ,

ⵡⴰⵔ ⵢⴰⵔⴻⴷⴷⴻⴵ, ⵎⴰⵛⴰ ⴰⵟⵟⴰⵙ ⵏ ⵜⵡⴰⵍⴰⵡⵉⵏ

ⵉⵊⵊⴰ ⵣⴻⴳ ⵡⴻⵖⴹⴰⴱ ⵏⵏⴻⵙ

ⵓ ⵡⴰⵔ ⵉⴳⴳⵉ ⵎⴰⵔⵔⴰ ⴰⵙⵄⴰⵔ ⵏⵏⴻⵙ ⴰⴷ ⵉⴽⴽⴰⵔ.

39 ⵏⴻⵜⵜⴰ ⵉⵄⵇⴻⵍ ⴰⵇⴰ ⵏⵉⵜⵏⵉ

ⵎⵖⵉⵔ ⴷ ⴰⵢⵙⵓⵎ ⵡⴰⵀⴰ,

ⴷ ⵉⵊⵊ ⵏ ⵓⵙⴻⵎⵎⵉⴹ ⵉⵄⴻⴷⴷⵓ

ⵡⴰⵔ ⴷⴷ-ⵉⵜⵜⵄⵉⵇⵇⵉⴱ.

40 ⵎⴻⵛⵃⴰⵍ ⵏ ⵜⵡⴰⵍⴰⵡⵉⵏ

ⵙⵄⴰⵔⴻⵏ ⵜ ⴷⵉ ⵍⴻⵅⵍⴰ,

ⴳⴳⵉⵏ ⴰⵙ ⵍⴻⵃⵔⵉⵇ ⴷⵉ ⵜⵏⴻⵣⵔⵓⴼⵜ!

41 ⵜⵡⴰⵍⴰ ⴰⵡⴰⵔⵏⵉ ⵜⴻⵏⵏⴻⵖⵏⵉⵜ

ⵇⴻⴵⴱⴻⵏ ⴰⵔⴻⴱⴱⵉ,

ⴳⴳⵉⵏ ⵍⴻⵃⵔⵉⵇ ⵉ ⵓⵎⵇⴻⴷⴷⴰⵙ ⵏ ⵉⵙⵔⴰⵉⵍ.

42 ⵡⴰⵔ ⵅⴰⵔⵔⵚⴻⵏ ⵛⴰ ⵄⴰⴷ ⴷⴻⴳ ⵓⴼⵓⵙ ⵏⵏⴻⵙ,

ⴷⴻⴳ ⵡⴰⵙⵙ ⵏⵏⵉ ⵍⴰⵎⵉ ⵜⴻⵏ ⵉⴼⴷⴰ

ⵣⴻⴳ ⵓⴼⵓⵙ ⵏ ⵡⴻⵏⵏⵉ ⵉ-ⵜⴻⵏ ⵉⵃⵚⴰⵔⴻⵏ,   

43 ⴰⵍⴰⵎⵉ ⵉⴳⴳⴰ ⵍⴻⵄⵍⴰⵎⴰⵜ ⴷⵉ ⵎⵉⵚⵔⴰ,

ⵓⵍⴰ ⴷ ⵍⵎⵓⵄⵊⵉⵣⴰⵜ ⵏⵏⴻⵙ ⴷⴻⴳ ⵉⵢⵢⴰⵔ ⵏ ⵚⵓⵄⴰⵏ,

44 ⴰⵍⴰⵎⵉ ⵉⴳⴳⴰ ⵉⵖⴻⵣⵔⴰⵏ ⵏⵙⴻⵏ

ⴰⴷ ⴷⴻⵡⵍⴻⵏ ⴷ ⵉⴷⴰⵎⵎⴻⵏ,

ⵓⵍⴰ ⴷ ⵎⴰⵔⵔⴰ ⵍⵄⵓⵏⵚⴰⵔⴰⵜ ⵏⵙⴻⵏ,

ⵃⵉⵎⴰ ⵏⵉⵜⵏⵉ ⵡⴰⵔ ⵣⴻⵎⵎⴰⵔⴻⵏ

ⴰⴷ ⵣⵣⴰⵢⵙⴻⵏ ⵙⵡⴻⵏ ⵄⴰⴷ.   

45 ⵉⵙⵙⴻⴽⴽ ⵊⴰⵔ ⴰⵙⴻⵏ

ⵉⵊⵊ ⵏ ⵡⴻⵢⵍⴰⴼ ⵏ ⵉⴱⴻⵄⵄⴰⵛ ⵉ ⵜⴻⵏ ⵉⵛⵛⴻⵏ,

ⵓⵍⴰ ⴷ ⵉⵇⴰⵔⵇⵔⵉⵡⴻⵏ ⵏⵏⵉ ⵜⴻⵏ ⵉⵜⴻⵃⵃⴰⵏ.   

46 ⵏⴻⵜⵜⴰ ⵉⵡⵛⴰ ⵍⵖⵉⴵⴻⵜ ⵏⵙⴻⵏ

ⵉ ⵜⵎⵓⵖⵔⵉ ⵉⵚⴰⵔⵔⴹⴻⵏ,

ⵓⵍⴰ ⴷ ⵚⵚⴰⴱⴻⵜ ⵏⵙⴻⵏ ⵉ ⵜⵎⵓⵖⵔⵉ.   

47 ⵉⵏⵖⴰ ⵜⴰⵣⴰⵢⴰⵔⵜ ⵏⵙⴻⵏ ⵙ ⵜⴻⴱⵔⵓⵔⵔⵉ,

ⵓⵍⴰ ⴷ ⵉⵣⴻⵎⵎⵓⵔⴻⵏ ⵏⵙⴻⵏ ⵙ ⵜⴽⴻⴹⴼⵉⵏ.   

48 ⵏⴻⵜⵜⴰ ⵉⵊⵊⴰ ⵍⵎⴰⵍ ⵏⵙⴻⵏ ⵉ ⵓⴱⵔⵓⵔⵉ,

ⵜⵉⵃⵉⵎⵔⵉⵡⵉⵏ ⵏⵙⴻⵏ ⵉ ⵡⴰⵙⵙⴰⵎⴻⵏ.

49 ⵏⴻⵜⵜⴰ ⵉⵙⵙⴻⴽⴽ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ

ⵊⴰⵔ ⴰⵙⴻⵏ,

ⴰⵎⵓⵣⵣⴰⵔ ⴷ ⵜⴻⴼⵇⴻⵃⵜ ⴷ ⵍⵃⴻⵚⵔⴰⵏ,

ⵓⵎⵉ ⴷⴷ-ⵉⵙⵙⴻⴽⴽ ⵍⵎⴰⵍⴰⴽⴰⵜ ⵙ ⵊⵊⵔⴰⵢⴻⵃ.

50 ⵏⴻⵜⵜⴰ ⵉⵙⴻⴳⴳⴻⵎ ⵉⵊⵊ ⵏ ⵓⵎⴻⵙⵔⴰⵇ

ⵉ ⵡⴻⵖⴹⴰⴱ ⵏⵏⴻⵙ,

ⵡⴰⵔ ⵉⵙⵙⵄⵉⵣⵣ ⵅ ⵍⴻⵄⵎⴰⵔ ⵏⵙⴻⵏ ⵣⵉ ⵍⵎⴻⵡⵜ,

ⵉⵙⵙⴻⵄⴷⵓ ⵍⵎⴰⵍ ⵏⵙⴻⵏ ⵉ ⵟⵟⴰⵄⵓⵏ.   

51 ⵏⴻⵜⵜⴰ ⵉⵏⵖⴰ ⵎⴰⵔⵔⴰ ⵉⵎⴻⵏⵣⴰ ⴷⵉ ⵎⵉⵚⵔⴰ,

ⵉⵎⴻⵏⵣⴰ ⵏ ⵢⴻⵔⵢⴰⵣⴻⵏ ⴷⴰⵢⵙⴻⵏ ⵜⴻⵔⵢⴰⵙⵜ

ⴷⴻⴳ ⵉⵇⵉⴹⴰⵏ ⵏ ⵃⴰⵎ.   

52 ⵉⴳⴳⴰ ⵍⴳⴻⵏⵙ ⵏⵏⴻⵙ ⴰⴷ ⵉⵙⵙⴳⴻⵄⵄⴻⴷ ⴰⵎ ⵡⵓⴵⵉ,

ⵉⵙⵙⵇⴻⴱⴱⴻⴹ ⵉ-ⵜⴻⵏ

ⴰⵎ ⵢⵉⵛⵜ ⵏ ⵜⵃⵉⵎⴰⵔⵜ ⴷⵉ ⵍⴻⵅⵍⴰ.

53 ⵉⵏⴷⴻⵀ ⵉ-ⵜⴻⵏ ⴷⵉ ⵍⴰⵎⴰⵏ,

ⵡⴰⵔ ⴳⴳⵯⵉⴷⴻⵏ ⵡⴰⵍⵓ,

ⵎⴰⵖⴰⵔ ⵍⴻⴱⵃⴰⵔ ⵉⴷⵍⴰ ⵍⵄⴻⴷⵢⴰⵏ ⵏⵙⴻⵏ.   

54 ⵉⵡⵢⵉ ⵜⴻⵏ ⵖⴰⵔ ⵜⴻⵎⵎⵓⵔⵜ ⵏⵏⴻⵙ ⵉⵇⴻⴷⴷⵙⴻⵏ,

ⵖⴰⵔ ⵡⴻⴷⵔⴰⵔ-ⴰ ⵏⵏⵉ ⴷ ⵉⴽⵙⴻⴱ ⵓⴼⵓⵙ ⴰⴼⵓⵙⵉ ⵏⵏⴻⵙ.

55 ⵉⵙⵙⵓⴼⴼⴻⵖ ⵍⴻⴳⵏⵓⵙ ⵣⵣⴰⵜ ⵉ ⵡⵓⴷⴻⵎ ⵏⵙⴻⵏ,

ⵉⴳⴳⴰ ⴰⴷ ⴰⵙⴻⵏ ⴷⴷ-ⵜⴻⴽⴽⴰⵔ ⵜⴻⵙⵖⴰⵔⵜ ⵏⵙⴻⵏ

ⵙ ⵓⴼⵉⵍⵓ ⵏ ⵍⴻⵄⴱⴰⵔ,

ⵓⵛⴰ ⵉⵙⵙⴻⵣⴷⴻⵖ ⵜⵉⵇⴻⴱⴱⴰⵍ ⵏ ⵉⵙⵔⴰⵉⵍ

ⴷⴻⴳ ⵉⵇⵉⴹⴰⵏ ⵏⵙⴻⵏ.   

56 ⵎⴰⵛⴰ ⵏⵉⵜⵏⵉ ⵇⴻⴵⴱⴻⵏ ⵜ, ⵙⵄⴰⵔⴻⵏ ⴰⵔⴻⴱⴱⵉ,

ⴰⵎⵄⵓⴵⵉ ⵅ ⴽⵓⵍⵛⵉ,

ⵡⴰⵔ ⵀⴹⵉⵏ ⵛⵛⵀⴰⴷⴰⵜ ⵏⵏⴻⵙ.

57 ⵏⵉⵜⵏⵉ ⴷⴻⵡⵍⴻⵏ ⵖⴰⵔ ⴹⴻⴼⴼⴰⵔ,

ⴳⴳⵉⵏ ⵙ ⵍⴻⵖⴷⴰⵔ ⴰⵎ ⵍⴻⵊⴷⵓⴷ ⵏⵙⴻⵏ.

ⵏⵉⵜⵏⵉ ⵡⴻⴷⴷⴰⵔⴻⵏ

ⴰⵎ ⵢⵉⵛⵜ ⵏ ⴼⵍⵉⵜⵛⴰ ⵏ ⵍⵇⴻⵡⵙ

ⵉ ⵉⵜⴻⴼⴼⵖⴻⵏ ⵙ ⵍⴻⵅⴷⴻⵄ.

58 ⵙⵄⴰⵔⴻⵏ ⵜ ⵙ ⵍⴻⴳⵄⵓⴷⵉ ⵏⵙⴻⵏ

ⵉ ⵅ ⵡⴻⵀⵀⴱⴻⵏ ⵜⵉⵖⴰⵔⵚⴰ,

ⴰⵔⵔⵉⵏ ⵜ ⴰⴷ ⵢⴰⵙⴻⵎ

ⵙ ⵍⴻⵅⵢⴰⵍⴰⵜ ⵏⵙⴻⵏ ⵉⵏⴻⵇⵛⴻⵏ   

59 ⴰⵔⴻⴱⴱⵉ ⵉⵙⵍⴰ ⵎⴰⵏ ⴰⵢⴰ

ⵓⵛⴰ ⵉⵜⵜⵡⴰⵙⵙⴰⵔⵖ ⵡⴻⵖⴹⴰⴱ ⵏⵏⴻⵙ,

ⵉⴷⵡⴻⵍ ⵉⵄⵉⴼⴼ ⴰⵟⵟⴰⵙ ⵣⵉ ⵉⵙⵔⴰⵉⵍ.

60 ⵏⴻⵜⵜⴰ ⵉⵊⵊⴰ ⵜⴰⵣⴻⴷⴷⵉⵖⵜ ⵏⵏⴻⵙ ⴷⵉ ⵛⵉⵍⵓ,

ⴰⵇⵉⴹⵓⵏ ⵎⴰⵏⵉ ⵜⵓⵖⴰ ⵉⵣⴻⴷⴷⴻⵖ ⵊⴰⵔ ⵉⵡⴷⴰⵏ.   

61 ⵏⴻⵜⵜⴰ ⵢⴰⵔⵔⴰ ⵊⵊⴻⵀⴷ ⵏⵏⴻⵙ

ⵖⴰⵔ ⵜⵎⴻⵃⴱⴰⵙⵜ,

ⵓⵍⴰ ⴷ ⵜⴰⵍⵡⵉⵣⵜ ⵏⵏⴻⵙ

ⵖⴰⵔ ⵓⴼⵓⵙ ⵏ ⵡⴻⵏⵏⵉ ⵜ ⵉⵃⴻⵚⵚⴰⵔⴻⵏ.   

62 ⵏⴻⵜⵜⴰ ⵉⵙⴻⵍⵍⴻⵎ ⵍⴳⴻⵏⵙ ⵏⵏⴻⵙ ⵉ ⵙⵙⵉⴼ,

ⵢⴰⵔⵖⴰ ⵡⴻⵖⴹⴰⴱ ⵏⵏⴻⵙ ⵅ ⵜⴻⵙⵖⴰⵔⵜ ⵏⵏⴻⵙ.

63 ⵜⵉⵎⴻⵙⵙⵉ ⵜⴻⵛⵛⴰ ⵉⵃⵓⴷⵔⵉⵢⵢⴻⵏ ⵏⵙⴻⵏ,

ⵜⵉⵄⵣⴰⵔⵉⵢⵢⵉⵏ ⵏⵙⴻⵏ

ⵡⴰⵔ ⵅⴰⵙⴻⵏⵜ ⴷⴷ-ⵉⵡⵢⴻⵏ ⵉⵖⴻⵏⵏⵉⵊⴻⵏ.

64 ⵉⴽⴻⵀⵀⴰⵏⴻⵏ ⵏⵙⴻⵏ ⵡⴹⴰⵏ ⵙ ⵙⵙⵉⴼ

ⵓ ⵜⵉⵊⵊⴰⵍ ⵏⵙⴻⵏ ⵡⴰⵔ ⵔⵓⵏⵜ ⵛⴰ.   

65 ⵅⴻⵏⵏⵉ ⵉⴼⴰⵇ-ⴷⴷ ⵙⵉⴷⵉ ⵉⵏⵓ

ⴰⵎ ⵛⴰ ⵏ ⵉⵊⵊ ⵉ ⵜⵓⵖⴰ ⵉⵟⵟⵚⴻⵏ,

ⴰⵎ ⵢⵉⵊⵊ ⵏ ⴱⵓ-ⵜⴻⵖⵔⵓⴹⵜ

ⵏⵏⵉ ⵉⵙⵖⵓⵢⵢⵓ ⵣⵉ ⴱⵉⵏⵓ.

66 ⵏⴻⵜⵜⴰ ⵉⵡⵜⴰ ⵉⵏⵏⵉ ⵜ ⵉⵃⴻⵚⵚⴰⵔⴻⵏ

ⵖⴰⵔ ⴹⴻⴼⴼⴰⵔ,

ⵉⴳⴳⴰ ⴷⴰⵢⵙⴻⵏ ⵍⴻⴼⴹⵉⵃⴻⵜ ⵉ ⵍⴻⴱⴷⴰ.   

67 ⴰⵇⵉⴹⵓⵏ ⵏ ⵢⵓⵙⵓⴼ ⵉⵏⴹⴰⵔ ⵉ-ⵜ,

ⵜⴰⵇⴱⵉⵍⵜ ⵏ ⵉⴼⵔⴰⵢⵉⵎ ⵡⴰⵔ ⵜⵜ ⵉⴼⴰⵔⵣ.

68 ⵉⴼⴰⵔⵣ ⵜⴰⵇⴱⵉⵍⵜ ⵏ ⵢⴰⵀⵓⴷⴰ,

ⴰⴷⵔⴰⵔ ⵏ ⵚⵉⵀⵢⵓⵏ ⵡⴻⵏⵏⵉ ⵜⵓⵖⴰ ⵉⵜⵜⴻⵅⵙ.

69 ⵉⴱⵏⴰ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ

ⴰⵎ ⵉⵊⴻⵏⵡⴰⵏ ⵢⵓⵄⵍⴰⵏ,

ⴰⵎ ⵜⴻⵎⵎⵓⵔⵜ ⵏⵏⵉ ⵉⵙⵙⴻⵎⵜⴻⵏ ⵉ ⵍⴻⴱⴷⴰ.

70 ⵉⴼⴰⵔⵣ ⴰⵎⵙⴻⵅⵅⴰⵔ ⵏⵏⴻⵙ ⴷⴰⵡⵓⴷ,

ⵉⴽⵙⵉ ⵜ ⵣⵉ ⵍⴽⵓⵔⵉⵜ ⵏ ⵡⵓⴵⵉ.   

71 ⵉⵊⵊⴰ ⵉ-ⵜ ⴰⴷ ⴷⴷ-ⵢⴰⵙ

ⵣⵉ ⵖⴰⵔ ⴹⴻⴼⴼⴰⵔ ⵏ ⵡⵓⴵⵉ,

ⵎⴰⵃⴻⵏⴷ ⴰⴷ ⵢⴰⵔⵡⴻⵙ ⵢⴰⵄⵇⵓⴱ,

ⵍⴳⴻⵏⵙ ⵏⵏⴻⵙ,

ⵓⵍⴰ ⴷ ⵉⵙⵔⴰⵉⵍ, ⵍⵡⴰⵔⵜ ⵏⵏⴻⵙ.   

72 ⵏⴻⵜⵜⴰ ⵢⴰⵔⵡⴻⵙ ⵉ-ⵜⴻⵏ

ⵄⵍⴰⵃⵙⴰⴱ ⵍⴻⵚⴼⴰⵢⴻⵜ ⵏ ⵡⵓⵍ ⵏⵏⴻⵙ,

ⵉⴳⴻⵡⵡⴻⴷ ⵉ-ⵜⴻⵏ ⵙ ⵓⴼⵓⵙ ⵉⵣⴻⵎⵎⴰⵔⴻⵏ.