31
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ.2 ⵏⴻⵛⵛ ⴰⵔⴻⴽⴽⵡⴰⵍⴻⵖ ⵖⴰⵔⴻⴽ, ⴰ ⵙⵉⴷⵉ,
ⵡⴰⵔ ⵜⵜⴻⵊⵊⵉ ⴰⴷ ⵙⴻⴹⵃⵉⵖ ⵉ ⵍⴻⴱⴷⴰ,
ⴼⴻⴽⴽ ⴰⵢⵉ ⵙ ⵜⵙⴻⴳⴷⴰ ⵏⵏⴻⵛ. ■
3 ⴻⵡⵛ ⴰⵢⵉ ⴰⵎⴻⵣⵣⵓⵖ ⵏⵏⴻⵛ, ⴼⴻⴽⴽ ⴰⵢⵉ ⴷⴻⵖⵢⴰ.
ⵉⵍⵉ ⴷ ⵜⴰⵚⴹⴰⵔⵜ ⵉⵊⴻⵀⴷⴻⵏ ⵉ ⵏⴻⵛⵛ,
ⵉⵊⵊ ⵏ ⵍⴱⵓⵔⵊ ⵃⵉⵎⴰ ⴰⴷ ⴰⵢⵉ ⵜⴻⵙⵙⵏⴻⵊⵎⴻⴷ.
4 ⵎⴰⵖⴰⵔ ⵛⴻⴽ ⴷ ⵜⴰⵚⴹⴰⵔⵜ ⵉⵏⵓ ⴷ ⵍⴱⵓⵔⵊ ⵉⵏⵓ.
ⵏⴷⴻⵀ ⴰⵢⵉ, ⵜⵀⵉⵍⵍⴰ ⴷⴰⵢⵉ
ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⵛ.
5 ⴼⴻⴽⴽ ⴰⵢⵉ ⵣⵉ ⵜⵔⴰⵛⵛⴰ
ⵏⵏⵉ ⵅⴰⴼⵉ ⴳⴳⵉⵏ ⵙ ⵜⵏⵓⴼⴼⵔⴰ,
ⵎⴰⵖⴰⵔ ⵛⴻⴽ ⴷ ⵊⵊⴻⵀⴷ ⵉⵏⵓ.
6 ⴷⴻⴳ ⵓⴼⵓⵙ ⵏⵏⴻⵛ ⵉ ⴳⴳⵉⵖ ⴱⵓⵃⴱⴻⵍ ⵉⵏⵓ.
ⵛⴻⴽ ⵜⴻⴼⴷⵉⴷ ⴰⵢⵉ, ⴰ ⵙⵉⴷⵉ, ⴰⵔⴻⴱⴱⵉ,
ⴷ ⴰⵎⵜⵉⵇⵇⵉ ⵉ ⵜⴻⴵⵉⴷ. ■
7 ⵏⴻⵛⵛ ⵛⴰⵔⵔⵀⴻⵖ ⵉⵏⵏⵉ ⵉⵜⵜⵛⴻⵖⵍⴻⵏ ⵉⵅⴻⴼ ⵏⵙⴻⵏ
ⵙ ⵍⴻⵅⵢⴰⵍⴰⵜ ⵉⴱⴻⵟⵟⵍⴻⵏ.
ⵏⴻⵛⵛ ⵜⵜⴻⵛⵍⴻⵖ ⵅ ⵙⵉⴷⵉ.
8 ⵏⴻⵛⵛ ⴰⴷ ⴰⵔⴻⵛⵇⴻⵖ ⵓ ⴰⴷ ⴼⴰⵔⵃⴻⵖ
ⵣⵉ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ,
ⵎⵉⵏⵣⵉ ⵛⴻⴽ ⵜᵉⵜⵜⵡⴰⵍⵉⴷ ⵍⴻⵖⴱⴻⵏ ⵉⵏⵓ
ⵓ ⵜⴰⵔⴻⴳⴳⴱⴻⴷ ⵅ ⵍⴻⵃⵚⴰⵔⴰⵜ ⵉⵏⵓ,
9 ⵎⵉⵏⵣⵉ ⵡⴰⵔ ⴷ ⴰⵢⵉ ⵜⴰⵔⵔⵉⴷ
ⵖⴰⵔ ⵓⴼⵓⵙ ⵏ ⵍⴻⵄⴷⵓ ⵉⵏⵓ,
ⵎⴰⵛⴰ ⵜⴻⴳⴳⵉⴷ ⴰⵢⵉ ⵜⵜⴰⵙⵉⵄ ⵖⴰⵔ ⵉⴹⴰⵔⴻⵏ ⵉⵏⵓ.
10 ⵃⵉⵏⵏ ⵅⴰⴼⵉ, ⴰ ⵙⵉⴷⵉ, ⵎⴰⵖⴰⵔ ⵜⵜⵡⴰⵃⴻⵚⵚⴰⵔⴻⵖ,
ⵜⵉⵟⵟ ⵉⵏⵓ ⴷ ⵍⴻⵄⵎⴰⵔ ⵉⵏⵓ ⴷ ⵜⴻⴽⵔⵉⵛⵜ ⵉⵏⵓ
ⴰⵇⴰ ⴼⴻⵛⵍⴻⵏ.
11 ⵎⴰⵖⴰⵔ ⵜⵓⴷⴰⵔⵜ ⵉⵏⵓ ⵜⴽⴻⵎⵎⴻⵍ ⵙ ⵡⴻⵛⴹⴰⵏ,
ⵉⵙⴻⴳⴳⵯⵓⵙⴰ ⵉⵏⵓ ⵙ ⵓⵣⴻⵀⵀⴰⵔ.
ⵊⵊⵀⴻⴷ ⵉⵏⵓ ⵉⵀⴻⵢⵢⴻⴼ ⵣⵉ ⵍⵎⵓⵄⵚⵉⵢⵢⴻⵜ ⵉⵏⵓ,
ⵉⵅⵙⴰⵏ ⵉⵏⵓ ⴰⵇⴰ ⴰⵔⵛⴰⵏ.
12 ⵉ ⵎⴰⵔⵔⴰ ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ
ⴷⴻⵡⵍⴻⵖ ⴷ ⴰⵙⵜⴻⵀⵣⵉ,
ⵉ ⵊⵊⵉⵔⴰⵏ ⵉⵏⵓ ⵇⴰⵄ ⴰⵟⵟⴰⵙ,
ⵉ ⵢⵉⵏⵏⵉ ⴷ ⴰⵢⵉ ⵉⵙⵙⵏⴻⵏ
ⴷⴻⵡⵍⴻⵖ ⴷ ⵉⵊⵊⴻⵏ ⵉ ⵉⵙⵙⵏⴻⵅⵍⵉⵄⴻⵏ.
ⵉⵏⵏⵉ ⴷ ⴰⵢⵉ ⵉⵜⵜⵡⴰⵍⵉⵏ ⴷⴻⴳ ⵡⴻⴱⵔⵉⴷ,
ⵜⵜⵔⴰⴽⴽⵡⴰⵍⴻⵏ ⵣⵣⴰⵢⵉ. ■
13 ⵜⵜⵓⵏ ⴰⵢⵉ ⵙ ⵡⵓⵍ ⴰⵎ ⵢⵉⵊⵊ ⵏ ⵓⵎⴻⵜⵜⵉⵏ,
ⴷⴻⵡⵍⴻⵖ ⴰⵎ ⵢⵉⵛⴻⵇⴼⴰⵏ ⵏ ⵡⴻⵇⴷⵉⵃ,
14 ⵎⴰⵖⴰⵔ ⵙⵍⵉⵖ ⴰⵇⴰ ⴰⵟⵟⴰⵙ ⵛⴻⵇⵇⴼⴻⵏ ⴷⴰⵢⴻⴽ,
ⴰⵙⵙⵉⴳⴳⵯⴻⴷ ⵜⵓⵖⴰ ⵉⵜⵜⴻⵏⵏⴻⴹ ⴰⵢⵉ-ⴷⴷ
ⵓⵎⵉ ⵅⴰⴼⵉ ⴳⴳⵉⵏ ⵜⴰⵎⴻⵄⵎⵓⵍⵜ.
ⵜⵓⵖⴰ ⴰⵔⴻⵣⵣⵓⵏ ⴰⴷ ⴽⴽⵙⴻⵏ ⵜⵓⴷⴰⵔⵜ ⵉⵏⵓ.
15 ⵎⴰⵛⴰ ⵏⴻⵛⵛ ⵜⵜⴻⵛⵍⴻⵖ ⵅⴰⴽ, ⴰ ⵙⵉⴷⵉ,
ⵇⵇⴰⵔⴻⵖ: ‘ⵛⴻⴽ ⴷ ⴰⵔⴻⴱⴱⵉ ⵉⵏⵓ!’
16 ⵍⵡⴻⵇⵜ ⵉⵏⵓ ⴰⵇⴰ-ⵜⵜ ⴷⴻⴳ ⵓⴼⵓⵙ ⵏⵏⴻⵛ.
ⴼⴻⴽⴽ ⴰⵢⵉ ⵣⴻⴳ ⵓⴼⵓⵙ ⵏ ⵍⵄⴻⴷⵢⴰⵏ ⵉⵏⵓ
ⵓ ⵣⴻⴳ ⵉⵏⵏⵉ ⴷ ⴰⵢⵉ ⵉⴹⴻⴼⴼⴰⵔⴻⵏ,
17 ⴻⵊⵊ ⵓⴷⴻⵎ ⵏⵏⴻⵛ ⴰⴷ ⵢⴰⵔⵖ
ⵅ ⵓⵎⵙⴻⵅⵅⴰⵔ ⵏⵏⴻⵛ,
ⵙⴻⵏⵊⴻⵎ ⴰⵢⵉ ⵙ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ.
18 ⴰ ⵙⵉⴷⵉ, ⵡⴰⵔ ⵜⵜⴻⵊⵊⵉ ⴰⴷ ⴷⴻⵡⵍⴻⵖ ⵜⵜⵙⴻⴹⵃⵉⵖ,
ⵎⴰⵖⴰⵔ ⵅⴰⴽ ⵉ ⵜⵜⵍⴰⵖⵉⵖ.
ⴰⵔⵔ ⵉⵄⴻⴼⴼⴰⵏⴻⵏ ⴰⴷ ⴷⴻⵡⵍⴻⵏ ⵜⵜⵙⴻⴹⵃⴰⵏ,
ⴰⵔⵔ ⵉ-ⵜⴻⵏ ⴰⴷ ⵙⵙⵓⵙⵎⴻⵏ ⴷⵉ ⵍⴰⵅⴰⵔⵜ.
19 ⴻⵊⵊ ⴰⴷ ⵙⵇⴰⵔⴻⵏ ⵉⵢⴻⵏⵛⵉⵛⴻⵏ ⵉⵙⵙⵅⴰⵔⵔⵉⵇⴻⵏ,
ⵉⵏⵏⵉ ⵉⵙⵙⴰⵡⴰⵍⴻⵏ ⵙ ⵏⵏⴼⴰⵅⴻⵜ
ⴹⵉⴷⴷ ⵉ ⵓⵎⵙⴻⴳⴳⴻⴷ,
ⵙ ⵓⵄⴻⴼⴼⴰⵔ ⴷ ⵓⵙⴻⵃⵇⴰⵔ.
20 ⵎⴻⵛⵃⴰⵍ ⵉⵎⴻⵇⵇⴰⵔ ⵍⵅⴰⵔ ⵏⵏⴻⵛ ⵉ ⵜⵅⴻⵎⵎⵍⴻⴷ
ⵉ ⵢⵉⵏⵏⵉ ⵛⴻⴽ ⵉⵜⵜⴻⴳⴳⵯⴻⴷⴻⵏ,
ⵏⵏⵉ ⵜⴻⵙⵙⵡⴻⵊⴷⴻⴷ ⵉ ⵢⵉⵏⵏⵉ ⵖⴰⵔⴻⴽ ⵢⴰⵔⴻⴽⴽⵡⴰⵍⴻⵏ
ⵣⵉ ⵜⴰⵔⵡⴰ ⵏ ⴱⵏⴰⴷⴻⵎ! ■
21 ⵛⴻⴽ ⵜⴻⵙⵙⴷⵓⵔⵔⵓⵢⴻⴷ ⵉ-ⵜⴻⵏ ⵙ ⵓⵍⴻⵃⵃⴰⴼ
ⵏ ⵡⵓⴷⴻⵎ ⵏⵏⴻⵛ,
ⵣⵉ ⵏⵏⴼⴰⵅⴻⵜ ⵏ ⴱⵏⴰⴷⴻⵎ.
ⵛⴻⴽ ⵜⴻⵙⵙⵏⵓⴼⴼⴰⵔⴻⴷ ⵉ-ⵜⴻⵏ ⴷⵉ ⵜⴻⵅⵣⴰⵏⵜ,
ⵣⴻⴳ ⵓⵎⵛⵓⴱⴱⴻⵛ ⵏ ⵉⵢⴻⵏⵛⵉⵛⴻⵏ.
22 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ,
ⵎⴰⵖⴰⵔ ⵏⴻⵜⵜⴰ ⵢⴰⵔⵔⴰ ⴰⵢⵉ-ⴷⴷ
ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⴷ ⵍⴻⵄⵊⴻⴱ,
ⴷⴻⴳ ⵉⵛⵜ ⵏ ⵜⴻⵏⴷⵉⵏⵜ ⵉⴼⴰⵔⵢⴻⵏ.
23 ⵏⴻⵛⵛ ⴷⴻⵖⵢⴰ ⵏⵏⵉⵖ:
“ⵏⴻⵛⵛ ⵜⵜⵡⴰⵇⴻⵙⵙⴻⵖ
ⵣⵉ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵛ!’
ⵎⴰⵛⴰ ⵄⴰⴷ ⵛⴻⴽ ⵜⴻⵙⵍⵉⴷ ⵉ ⵜⵎⵉⵊⵊⴰ ⵉⵏⵓ,
ⵓⵎⵉ ⴷⴷ ⵅⴰⴽ ⵍⴰⵖⵉⵖ. ■
24 ⵙⵄⵉⵣⵣⴻⵎ ⵙⵉⴷⵉ, ⵎⴰⵔⵔⴰ ⵉⵎⵜⵉⵇⵇⴰⵏ ⵏⵏⴻⵙ,
ⵎⴰⵖⴰⵔ ⵙⵉⴷⵉ ⵉⵃⴻⵟⵟⴰ ⵅ ⵢⵉⵏⵏⵉ ⵉⵜⵜⴰⵎⵏⴻⵏ,
ⵓ ⵡⴻⵏⵏⵉ ⵉⵜⵜⴻⴳⴳⴻⵏ ⵙ ⵏⵏⴼⴰⵅⴻⵜ,
ⵉⵜⵜⵅⴻⴵⴻⵚ ⵉ-ⵜ ⵙ ⴰⵟⵟⴰⵙ.
25 ⵉⵍⵉⵎ ⴷ ⵉⵔⵢⴰⵣⴻⵏ
ⵓ ⵏⴻⵜⵜⴰ ⴰⴷ ⴷⴰⵢⵡⴻⵎ ⵢⴻⴳⴳ ⵓⵍ,
ⵡⴰⵀ, ⵎⴰⵔⵔⴰ ⵉⵏⵏⵉ ⵉⵜⵜⵔⴰⵊⴰⵏ ⵙⵉⴷⵉ. ■