ⵉⵥⴻⵀⵀⵉⴷⴻⵏ 30

1 ⴰⵣⴻⵀⵀⴻⴷ. ⵉⵣⵍⵉ ⵉ ⵓⴷⴻⵛⵛⴻⵏ ⵏ ⵜⴰⴷⴷⴰⵔⵜ. ⵏ ⴷⴰⵡⵓⴷ.

2 ⵏⴻⵛⵛ ⴰⴷ ⵛⴻⴽ ⵙⵙⵓⵄⵍⵉⵖ, ⴰ ⵙⵉⴷⵉ,

ⵎⴰⵖⴰⵔ ⵛⴻⴽ ⵜⴻⵙⵙⴳⴻⵄⵄⴷⴻⴷ ⴰⵢⵉ,

ⵡⴰⵔ ⵜⴻⵊⵊⵉⴷ ⵛⴰ ⵍⵄⴻⴷⵢⴰⵏ ⵉⵏⵓ

ⴰⴷ ⴼⴰⵔⵃⴻⵏ ⵅ ⵡⴻⵄⵔⵓⵔ ⵉⵏⵓ.

3 ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵏⴻⵛⵛ ⵍⴰⵖⵉⵖ ⴰⵛ,

ⵓⵛⴰ ⵛⴻⴽ ⵜⴻⵙⵙⴳⴻⵏⴼⵉⴷ ⴰⵢⵉ.

4 ⴰ ⵙⵉⴷⵉ, ⵛⴻⴽ ⵜⴻⵙⵙⵓⵄⵍⵉⴷ ⵍⴻⵄⵎⴰⵔ ⵉⵏⵓ

ⵣⵉ ⵍⴰⵅⴰⵔⵜ,

ⵜⴰⵔⵔⵉⴷ ⴰⵢⵉ-ⴷⴷ ⵖⴰⵔ ⵜⵓⴷⴰⵔⵜ

ⵊⴰⵔ ⵢⵉⵏⵏⵉ ⴷⴷ-ⵉⵀⴻⴽⴽⵡⴰⵏ ⴷⴻⴳ ⵡⴻⵃⴼⵓⵔ.

5 ⵣⴻⵀⵀⴷⴻⵎ ⵉ ⵙⵉⴷⵉ,

ⴰ ⴽⴻⵏⵏⵉⵡ, ⵉⵎⵜⵉⵇⵇⴰⵏ ⵏⵏⴻⵙ,

ⵇⴰⴷⴰⵎ, ⵄⴻⵇⵍⴻⵎ ⵅ ⵜⵇⴻⴷⴷⴰⵙⵜ ⵏⵏⴻⵙ.   

6 ⵎⴰⵖⴰⵔ ⴰⵖⴹⴰⴱ ⵏⵏⴻⵙ ⵉⵜⵜⴻⴽⴽ ⴷⵔⵓⵙ ⵡⴰⵀⴰ,

ⵎⴰⵛⴰ ⴰⵔⴹⴰ ⵏⵏⴻⵙ ⵉⵜⵜⵖⵉⵎⴰ ⵎⴰⵔⵔⴰ ⵜⵓⴷⴰⵔⵜ.

ⴷⵉ ⵜⵎⴻⴷⴷⵉⵜ ⴰⵇⴰ ⴷⵉⵏ ⵉⵎⴻⵟⵟⴰⵡⴻⵏ ⴰⵍ ⴵⵉⵍⴻⵜ,

ⵎⴰⵛⴰ ⵖⴰⵔ ⵜⵓⴼⴼⵓⵜ ⴰⵇⴰ ⴷⵉⵏ ⴰⵙⵍⵉⵡⵍⴻⵡ.

7 ⴷⴻⴳ ⵓⴼⵍⴰⵃ ⵉⵏⵓ ⵏⵏⵉⵖ ⵏⴻⵛⵛ:

“ⵡⴰⵔ ⵜⵜⴼⴰⵔⵉⵖⴻⵖ ⵛⴰ ⵉ ⵍⴻⴱⴷⴰ!”

8 ⴰ ⵙⵉⴷⵉ, ⴷⵉ ⵍⵅⴰⴹⴰⵔ ⵏⵏⴻⵛ

ⵜⴻⵙⵙⵎⴻⵜⵏⴻⴷ ⴰⴷⵔⴰⵔ ⵉⵏⵓ

ⵙ ⵓⵎⴻⵜⵜⴻⵏ ⵉⵊⴻⵀⴷⴻⵏ,

ⵎⴰⵛⴰ ⵓⵎⵉ ⵜⵍⴻⵃⵃⴼⴻⴷ ⵓⴷⴻⵎ ⵏⵏⴻⵛ,

ⴷⴻⵡⵍⴻⵖ ⵜⵜⴻⴳⴳⵯⴻⴷⴻⵖ.

9 ⵏⴻⵛⵛ ⵍⴰⵖⵉⵖ ⴰⵛ-ⴷⴷ, ⴰ ⵙⵉⴷⵉ,

ⵜⵜⴰⵔⴻⵖ ⴰⵔⴹⴰ ⵣⵉ ⵙⵉⴷⵉ ⵉⵏⵓ.

10 ⵎⴰⵏ ⵍⴻⴼⴹⴻⵍ ⵏ ⵉⴷⴰⵎⵎⴻⵏ ⵉⵏⵓ,

ⵏ ⵓⵀⴻⴽⴽⵡⵓ ⵉⵏⵓ ⵖⴰⵔ ⵜⵓⵔⵚⵓⴹⵉ ⴷⴻⴳ ⵡⴻⵏⴹⴻⵍ?

ⵎⴰ ⴰⴷ ⵛⴻⴽ ⵜⵇⴰⴷⴰ ⵜⵄⴻⵊⵊⴰⵊⵜ?

ⵎⴰ ⴰⴷ ⵜⴱⴰⵔⵔⴻⵃ ⵙ ⵍⴰⵎⴰⵏ ⵏⵏⴻⵛ?

11 ⵙⴻⵍ-ⴷⴷ ⵖⴰⵔⵉ, ⴰ ⵙⵉⴷⵉ, ⵃⵉⵏⵏ ⵅⴰⴼⵉ,

ⴰ ⵙⵉⴷⵉ, ⵉⵍⵉ ⴷ ⴰⵎⵄⴰⵡⴻⵏ ⵉⵏⵓ.

12 ⵛⴻⴽ ⴰⵇⴰ ⵜⴰⵔⵔⵉⴷ ⵜⵖⵓⵢⵢⵉⵜ ⵉⵏⵓ ⵏ ⵡⴻⵛⴹⴰⵏ

ⴷ ⵛⵛⴹⵉⵃ ⵙ ⵏⵏⵓⴱⵜⴰⵜ,

ⵜⴻⵙⵙⴰⵔⵅⵓⴷ ⵜⴰⵅⴰⵏⵛⴻⵜ ⵉⵏⵓ ⵏ ⵡⴻⵛⴹⴰⵏ,

ⵜⴻⵙⵙⴱⴻⵢⵙⴻⴷ ⴰⵢⵉ ⵙ ⵍⴻⴼⵔⴰⵃⴻⵜ,

13 ⵃⵉⵎⴰ ⴰⵄⵓⴵⵉ ⵉⵏⵓ

ⴰⴷ ⴰⵛ ⵉⵣⴻⵀⵀⴻⴷ ⵓ ⵡⴰⵔ ⵉⵜⵜⵙⵓⵙⵓⵎ.

ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ,

ⵏⴻⵛⵛ ⴰⴷ ⵛⴻⴽ ⵇⴰⴷⵉⵖ ⵉ ⵍⴻⴱⴷⴰ.