ⵉⵥⴻⵀⵀⵉⴷⴻⵏ 20

1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ.

2 ⴰⴷ ⵅⴰⴽ ⴷⴷ-ⵢⴰⵔⵔ ⵙⵉⴷⵉ

ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ,

ⴰⴷ ⵛⴻⴽ ⵉⵙⵙⵉⵣⴷⴻⵖ ⵉⵙⴻⵎ ⵏ ⴰⵔⴻⴱⴱⵉ ⵏ ⵢⴰⵄⵇⵓⴱ

ⴷⴻⴳ ⵡⴻⵎⵛⴰⵏ ⵢⵓⵄⵍⴰⵏ ⵉⴼⴰⵔⵢⴻⵏ.

3 ⴰⴷ ⴰⵛ ⵉⵡⵛ ⴰⴼⵓⵙ ⵣⵉ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ,

ⴰⴷ ⵛⴻⴽ ⴷⴷ-ⵉⵄⴰⵡⴻⵏ ⵣⵉ ⵚⵉⵀⵢⵓⵏ.

4 ⴰⴷ ⵛⴻⴽ ⵢⵉⴷⴰⵔ ⴷⵉ ⵜⴻⵡⵀⵉⴱⵉⵏ ⵏ ⵍⵖⵉⴵⴻⵜ ⵏⵏⴻⵛ,

ⴰⴷ ⵜⵉⵍⵉ ⵜⵖⴰⵔⵚⵜ ⵏ ⵡⴻⵛⵎⴰⴹ ⵏⵏⴻⵛ

ⴰⵎ ⵜⴰⴷⵓⵏⵜ ⵉ ⵏⴻⵜⵜⴰ. ⵙⵉⵍⴰⵀ.

5 ⴰⴷ ⴰⵛ ⵉⵡⵛ ⵄⵍⴰⵃⵙⴰⴱ

ⵎⵉⵏ ⵉⵎⵎⴻⵥⵔⵉ ⵡⵓⵍ ⵏⵏⴻⵛ,

ⴻⵊⵊ ⵉ-ⵜ ⴰⴷ ⵉⴽⴻⵎⵎⴻⵍ ⵎⴰⵔⵔⴰ ⵉⵏⵡⴰⵢⴻⵏ ⵏⵏⴻⵛ.

6 ⵏⴻⵛⵛⵉⵏ ⴰⴷ ⵏⴻⵙⵍⵉⵡⵍⴻⵡ

ⵅ ⵓⵙⴻⵏⵊⴻⵎ ⵙ ⵓⴼⵓⵙ ⵏⵏⴻⵛ,

ⴰⴷ ⵏⴻⵙⵙⵓⵄⵍⴰ ⵉⴱⴰⵏⴷⵓⵜⴻⵏ

ⴷⴻⴳ ⵢⵉⵙⴻⵎ ⵏ ⴰⵔⴻⴱⴱⵉ ⵏⵏⴻⵖ.

ⴰⴷ ⵉⵙⵙⵊⵉⵡⴻⵏ ⵙⵉⴷⵉ ⵎⴰⵔⵔⴰ ⵎⴻⵥⵔⵉ ⵏⵏⴻⵛ.

7 ⵍⴻⵅⵅⵓ ⵙⵙⵏⴻⵖ, ⴰⵇⴰ ⵙⵉⴷⵉ ⴰⴷ ⵢⴰⵡⵉ ⴰⵙⴻⵏⵊⴻⵎ

ⵉ ⵓⵎⴻⴷⵀⵓⵏ ⵏⵏⴻⵙ.

ⵏⴻⵜⵜⴰ ⴰⴷ ⵜ-ⵉ-ⴷⴷ-ⵢⴰⵔⵔ

ⵣⴻⴳ ⵉⵊⴻⵏⵡⴰⵏ ⵏ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ,

ⵙ ⵜⵎⴻⴳⴳⴰ ⵜⵉⵎⴻⵇⵇⵔⴰⵏⵉⵏ ⵏ ⵓⵙⴻⵏⵊⴻⵎ

ⵙ ⵓⴼⵓⵙ ⴰⴼⵓⵙⵉ ⵏⵏⴻⵙ.

8 ⵉⵏⴰ ⵜⵜⵅⴰⵔⵔⴰⵚⴻⵏ ⴷⴻⴳ ⵉⴽⴰⵔⵔⵓⵜⴻⵏ

ⵓ ⵉⵏⴰ ⴷⴻⴳ ⵉⵢⵙⴰⵏ,

ⵎⴰⵛⴰ ⵏⴻⵛⵛⵉⵏ ⴰⴷ ⵏⵅⴰⵔⵔⴻⵚ

ⴷⴻⴳ ⵉⵙⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ.

9 ⵏⵉⵜⵏⵉ ⵓⴹⴰⵔⴻⵏ ⵓⵛⴰ ⵡⴹⴰⵏ,

ⵏⴻⵛⵛⵉⵏ ⵏⴻⴽⴽⴰⵔ ⵓ ⵏⴻⵇⵇⵉⵎ ⵏⴱⴻⴷⴷ.

10 ⴰ ⵙⵉⴷⵉ, ⴰⵡⵉ-ⴷⴷ ⴰⵙⴻⵏⵊⴻⵎ!

ⴻⵊⵊ ⴰⴷ ⴰⵏⴻⵖ ⴷⴷ-ⵢⴰⵔⵔ ⵓⵊⴻⴵⵉⴷ

ⴷⴻⴳ ⵡⴰⵙⵙ ⵉ ⴷⵉ ⵏⵍⴰⵖⴰ.