ⵉⵥⴻⵀⵀⵉⴷⴻⵏ 19

1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ.

2 ⵉⵊⴻⵏⵡⴰⵏ ⵜⵜⴱⴰⵔⵔⵃⴻⵏ ⵙ ⵓⵄⵓⴵⵉ ⵏ ⴰⵔⴻⴱⴱⵉ,

ⵍⵇⵓⴱⴱⴻⵜ ⵜⴻⵙⵙⴰⵡⴰⵍ

ⵅ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵙ.

3 ⴰⵙⵙ ⵉⵙⵙⴰⵣⵣⴰⵍ ⴰⵡⴰⵍⴻⵏ ⵉ ⵡⴰⵙⵙ,

ⴵⵉⵍⴻⵜ ⵜⴻⵙⵙⵛⴰⵏ ⵜⵓⵙⵙⵏⴰ ⵖⴰⵔ ⴵⵉⵍⴻⵜ.

4 ⵡⴰⵔ ⵉⴵⵉ ⴷ ⵍⵀⴰⵔⴷ ⵓ ⵡⴰⵔ ⴵⵉⵏ ⵛⴰ ⴷ ⴰⵡⴰⵍⴻⵏ,

ⵜⵎⵉⵊⵊⴰ ⵏⵙⴻⵏ ⵡⴰⵔ ⴷ ⴰⵙ ⵉⵜⵜⴻⵙⵍⵉ ⵃⴻⴷ.

5 ⵍⵓⵎⵓⵔⴰⵜ ⵏⵙⴻⵏ ⴼⴼⵖⴻⵏⵜ ⵅ ⵜⴻⵎⵎⵓⵔⵜ ⵎⴰⵔⵔⴰ,

ⴰⵡⴰⵍⴻⵏ ⵏⵙⴻⵏ ⴼⴼⵖⴻⵏ ⴰⵍ ⵟⵟⴰⵔⴼ ⵏ ⴷⴷⵓⵏⴻⵛⵜ.

ⵏⴻⵜⵜⴰ ⵉⴳⴳⴰ ⴷⵉⵀⴰ ⵉⵊⵊ ⵏ ⵓⵇⵉⴹⵓⵏ ⵉ ⵜⴼⵓⵛⵜ,   

6 ⴰⵎ ⵎⵓⵍⴰⵢ ⵏⵏⵉ ⴷⴷ-ⵉⵙⵙⵉⵊⵊⴻⵏ

ⵣⴻⴳ ⵡⴻⵅⵅⴰⵎ ⵏ ⵍⴻⵎⵍⴰⵛ,

ⵉⵙⵍⵉⵡⵍⴻⵡ ⴰⵎ ⵢⵉⵊⵊ ⵏ ⴱⵓ-ⵜⴻⵔⵢⴰⵙⵜ,

ⵃⵉⵎⴰ ⴰⴷ ⵉⴽⵙⵉ ⴷⵉ ⵜⵉⵛⵍⵉ ⵏⵏⴻⵙ.   

7 ⵉⴼⴼⴻⵖ-ⴷⴷ ⵣⴻⴳ ⵉⵊⵊ ⵏ ⵟⵟⴰⵔⴼ ⵏ ⵓⵊⴻⵏⵏⴰ,

ⵓⵛⴰ ⵢⵓⵢⵓⵔ ⴰⵍ ⵟⵟⴰⵔⴼ ⵏⵏⴻⵙ ⵏⵏⴻⵖⵏⵉ,

ⵡⴰⵔ ⵜᵉⵜⵜⵏⵓⴼⴼⴰⵔ ⵓⵍⴰ ⴷ ⵉⵛⵜ ⵏ ⵍⵃⴰⵊⴻⵜ

ⵉ ⵍⵃⴰⴷⵓⵇ ⵏⵏⴻⵙ.

8 ⴰⵇⴰ ⵜⴻⴽⵎⴻⵍ ⵛⵛⴰⵔⵉⵄⴰ ⵏ ⵙⵉⴷⵉ,

ⵜⵉⵡⵉ-ⴷⴷ ⴰⴳⴻⵏⴼⵓ ⵉ ⴱⵓⵃⴱⴻⵍ.

ⵛⵛⵀⴰⴷⴰⵜ ⵏ ⵙⵉⴷⵉ ⴷⴰⵢⵙⴻⵏⵜ ⵍⴰⵎⴰⵏ,

ⵜⵜⵉⵛⵛⴻⵏⵜ ⵜⵉⵖⵉⵜ ⵉ ⵓⵃⴰⴼⵉ.   

9 ⵍⵓⵎⵓⵔⴰⵜ ⵏ ⵙⵉⴷⵉ ⵙⴻⴳⴳⴷⴻⵏⵜ,

ⵙⵙⴼⴰⵔⵔⵃⴻⵏⵜ ⵓⵍ.

ⵜⴰⵡⵚⵉⵢⵢⴻⵜ ⵏ ⵙⵉⴷⵉ ⵜⴻⵚⴼⴰ,

ⵜⴻⵙⵙⵛⴰⵏⴰ ⵜⴰⴼⴰⵡⵜ ⵉ ⵜⵉⵟⵟⴰⵡⵉⵏ.

10 ⵜⵉⴳⴳⵯⵓⴷⵉ ⵣⵉ ⵙⵉⴷⵉ ⵜⴻⵚⴼⴰ,

ⵜⴻⵇⵇⵉⵎ ⵜⴱⴻⴷⴷ ⵉ ⵍⴻⴱⴷⴰ.

ⵍⴻⵃⴽⴰⵎⴰⵜ ⵏ ⵙⵉⴷⵉ ⴷ ⵜⵉⴷⴻⵜⵜ,

ⴰⵇⴰ ⴰⵜⴻⵏⵜ ⴷ ⵍⵃⴻⵇⵇ ⵎⴰⵔⵔⴰ.

11 ⵏⵉⵜⴻⵏⵜⵉ ⵊⴻⴱⴱⴷⴻⵏⵜ ⵎⴻⵥⵔⵉ ⴽⵜⴰⵔ ⵅ ⵡⵓⵔⴻⵖ,

ⵡⴰⵀ, ⴽⵜⴰⵔ ⵣⴻⴳ ⵡⵓⵔⴻⵖ ⵉⵜⵜⵡⴰⵚⴻⴼⴼⴰⵏ,

ⴰⵇⴰ ⴰⵜⴻⵏⵜ ⴷ ⵜⵉⵎⵉⵥⵉⴷⵉⵏ ⵅ ⵜⴰⵎⵎⴻⵏⵜ

ⵏⵉⵖ ⵅ ⵜⴰⵎⵎⴻⵏⵜ ⵏ ⵜⴻⵖⵔⴰⵚⵜ.   

12 ⵓⵍⴰ ⴷ ⴰⵎⵙⴻⵅⵅⴰⵔ ⵏⵏⴻⵛ

ⵉⵜⵜⵡⴰⵡⴻⴱⴱⴻⵅ ⵣⵣⴰⵢⵙⴻⵏⵜ,

ⴷⴻⴳ ⵓⵃⴻⵟⵟⵓ ⵏⵙⴻⵏⵜ ⵜᵉⵜⵜⵏⵓⴼⴼⴰⵔ

ⴷⴰⵢⴻⵙ ⵍⵎⵓⵏⴻⵜ ⵜⴰⵎⴻⵇⵇⵔⴰⵏⵜ.

13 ⴰⵡⴻⴷⴷⴰⵔ, ⵡⵉ ⵣⵣⴰⵢⴻⵙ ⵢⵓⵛⵉⵏ?

ⵙⵉⵣⴷⴻⴳ ⴰⵢⵉ ⵣⵉ ⵎⵉⵏ ⵡⴰⵔ ⵉⵜⵜⴱⵉⵏⴻⵏ.

14 ⵃⴹⴰ ⴰⵎⵙⴻⵅⵅⴰⵔ ⵏⵏⴻⵛ ⵄⴰⵡⴻⴷ ⵣⴻⴳ ⵓⵄⴻⴼⴼⴰⵔ,

ⵃⵉⵎⴰ ⵡⴰⵔ ⵅⴰⴼⵉ ⵉⵜⵜⵚⴻⴵⵉⴹ,

ⵃⵉⵎⴰ ⴰⴷ ⵉⵍⵉⵖ ⴷ ⴰⵎⴻⵣⴷⴰⴳ

ⵣⴻⴳ ⵓⵅⴻⵟⵟⵓ ⵉⵎⵖⴰⵔⴻⵏ.

15 ⴰⴷ ⴷⴷ-ⴰⵙⴻⵏ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ

ⴷ ⵉⵅⴰⵔⵉⵚⵚⴻⵏ ⵏ ⵡⵓⵍ ⵉⵏⵓ,

ⵅ ⵍⵅⴰⴹⴰⵔ ⵏⵏⴻⵛ, ⴰ ⵙⵉⴷⵉ,

ⴰ ⵜⴰⵚⴹⴰⵔⵜ ⵉⵏⵓ ⴷ ⴰⵎⴻⴼⴷⵉ ⵉⵏⵓ!