ⵉⵙⵜⵉⵔ 6

ⵛⵛⴻⵏⵄⴻⵜ ⵉ ⵎⵓⵔⴷⴰⵅⴰⵢ

1 ⴷⵉ ⴵⵉⵍⴻⵜ ⵏⵏⵉ ⵙⵉⵎⴰⵏⵜ ⵏⵏⴻⵙ ⵜⵓⵖⴰ ⵢⵓⴳⵉ ⴰⴷ ⵉⴽⴽ ⵉⴹⴻⵚ ⵅ ⵓⵊⴻⴵⵉⴷ ⵓⵛⴰ ⵉⵏⵏⴰ ⴰⴷ ⴰⵙ ⴷⴷ-ⴰⵡⵢⴻⵏ ⴰⴷⵍⵉⵙ ⵏ ⵍⵉⴷⴰⵔⴻⵜ ⵏ ⵉⵎⴻⵣⵔⵓⵢⴻⵏ ⵓⵛⴰ ⵖⵔⵉⵏ ⵣⵣⴰⵢⵙⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ. 2 ⵉⵜⵜⵡⴰⴼ ⵓⵔⴰⵏ ⴷⴰⵢⴻⵙ, ⴰⵇⴰ ⵎⵓⵔⴷⴰⵅⴰⵢ ⵉⵅⴻⴱⴱⴰⵔ ⵅ ⴱⵉⵖⵜⴰⵏⴰ ⴷ ⵜⴰⵔⴰⵛ, ⵜⵏⴰⵢⴻⵏ ⵏ ⵉⵎⵙⴻⵅⵅⴰⵔⴻⵏ ⵉⵛⴻⵏⵏⵄⴻⵏ ⵏ ⵓⵊⴻⴵⵉⴷ, ⵣⴻⴳ ⵉⵄⴻⵙⵙⴰⵙⴻⵏ ⵏ ⵜⴻⵡⵡⴰⵔⵜ, ⵉⵏⵏⵉ ⵜⵓⵖⴰ ⵢⴰⵔⴻⵣⵣⵓⵏ ⴰⴷ ⵡⵜⴻⵏ ⴰⴼⵓⵙ ⵏ ⵓⵊⴻⴵⵉⴷ ⴰⵃⴰⵛⵡⵉⵔⵓⵛ. 3 ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ: “ⵎⴰⵏ ⵛⵛⴰⵏ ⴷ ⵍⴻⵎⵖⴰⵔⴻⵜ ⵉ ⵉⵜⵜⵡⴰⴳⴳⴻⵏ ⵉ ⵎⵓⵔⴷⴰⵅⴰⵢ ⵅ ⵎⴰⵏ ⴰⵢⴰ?” ⵉⵎⵙⴻⵅⵅⴰⵔⴻⵏ ⵉⵃⵓⴹⵔⵉⵢⵢⴻⵏ ⵏ ⵓⵊⴻⴵⵉⴷ ⵏⵏⵉ ⵜⵓⵖⴰ ⵉ ⴷ ⴰⵙ ⵉⵜⵜⵙⴻⵅⵅⴰⵔⴻⵏ, ⵏⵏⴰⵏ: “ⵡⴰⵔ ⴷ ⴰⵙ ⵉⵜⵜⵡⴰⴳⴳ ⵡⴰⵍⵓ ⴷⵉ ⵟⵟⵡⴻⵄ ⵏⵏⴻⵙ!” 4 ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ: “ⵡⵉ ⴷⵉⵏ ⴱⴰⵔⵔⴰ ⴷⴻⴳ ⵡⴰⵣⵣⴰⵢ?” ⵀⴰⵎⴰⵏ ⵜⵓⵖⴰ ⵄⴰⴷ ⵎⴰⵎⵎⴻⵛ ⴷⴷ-ⵉⵜⵜⴰⴷⴻⴼ ⵖⴰⵔ ⵡⴰⵣⵣⴰⵢ ⵏ ⵜⴰⴷⴷⴰⵔⵜ ⵏ ⵓⵊⴻⴵⵉⴷ ⵉ ⵉⴵⴰⵏ ⵖⴰⵔ ⴱⴰⵔⵔⴰ ⵇⴰⵄ ⵃⵉⵎⴰ ⴰⴷ ⵢⵉⵏⵉ ⵉ ⵓⵊⴻⴵⵉⴷ ⵃⵉⵎⴰ ⴰⴷ ⵢⴰⵢⴻⵍ ⵎⵓⵔⴷⴰⵅⴰⵢ ⵖⴰⵔ ⵜⵃⴻⵏⴰⵛⵜ ⵏ ⵡⴰⵢⴰⵍ, ⵜⴻⵏⵏⵉ ⵉ ⴷ ⴰⵙ ⵉⵙⵙⴻⵡⵊⴻⴷ. 5 ⵉⵎⵙⴻⵅⵅⴰⵔⴻⵏ ⵏ ⵓⵊⴻⴵⵉⴷ ⵏⵏⴰⵏ ⴰⵙ: “ⴰⵇⴰ ⴷ ⵀⴰⵎⴰⵏ ⵉ ⴷⴰ ⵉⴱⴻⴷⴷⴻⵏ ⴷⴻⴳ ⵡⴰⵣⵣⴰⵢ.” ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ: “ⴻⵊⵊ ⵉ-ⵜ ⴰⴷ ⵢⴰⴷⴻⴼ!”

6 ⵅⵎⵉ ⵢⵓⴷⴻⴼ ⵀⴰⵎⴰⵏ, ⵉⵏⵏⴰ ⴰⵙ ⵓⵊⴻⴵⵉⴷ: “ⵎⵉⵏ ⵖⴰ ⵉⵜⵜⵡⴰⴳⴳⴻⵏ ⴰⴽ-ⴷ ⵡⴻⵔⵢⴰⵣ ⵉ ⵓⵎⵉ ⵉⵅⵙ ⵓⵊⴻⴵⵉⴷ ⴰⴷ ⵜ ⵉⵛⴻⵏⵏⴻⵄ?” ⵉⵅⴻⵎⵎⴻⵎ ⵀⴰⵎⴰⵏ ⴷⴻⴳ ⵡⵓⵍ ⵏⵏⴻⵙ: “ⵎⴰⵏ ⵡⴻⵏ ⵉⵅⵙ ⵓⵊⴻⴵⵉⴷ ⴰⴷ ⵉⵛⴻⵏⵏⴻⵄ ⴽⵜⴰⵔ ⵣⵣⴰⵢⵉ?” 7 ⵙ ⵓⵢⴻⵏⵏⵉ ⵢⴰⵔⵔⴰ-ⴷⴷ ⵀⴰⵎⴰⵏ ⵅ ⵓⵊⴻⴵⵉⴷ: “ⴰⵔⵢⴰⵣ ⵉ ⵉⵅⵙ ⵓⵊⴻⴵⵉⴷ ⴰⴷ ⵜ ⵉⵛⴻⵏⵏⴻⵄ, 8 ⴰⴷ ⴰⵙ ⵉⵎⵎⴻⵡⵛ ⵜⵛⴰⵎⵉⵔ ⵉⴳⴻⵍⵍⴷⴻⵏ ⵉ ⵣⵉ ⵉⵏⵏⵓⵎ ⵓⵊⴻⴵⵉⴷ ⴰⴷ ⵢⴰⵔⴹ ⵓⵍⴰ ⴷ ⴰⵢⵉⵙ ⵉ ⵅⴻⴼ ⵉⵏⵏⵓⵎ ⵓⵊⴻⴵⵉⴷ ⴰⴷ ⵉⵏⵉⵢ ⵓⵛⴰ ⴰⴷ ⵙⵙⴰⵔⵙⴻⵏ ⵉⵊⵊ ⵏ ⵜⵜⴰⵊ ⵉⴳⴻⵍⵍⴷⴻⵏ ⵅ ⵓⵣⴻⴵⵉⴼ ⵏⵏⴻⵙ. 9 ⴰⴷ ⴳⴳⴻⵏ ⵜⵛⴰⵎⵉⵔ ⴷ ⵓⵢⵉⵙ ⴷⴻⴳ ⵓⴼⵓⵙ ⵏ ⵉⵊⵊ ⵣⵉ ⵍⵃⵓⴽⴽⴰⵎ ⵏ ⵓⵊⴻⴵⵉⴷ, ⵉⵊⵊⴻⵏ ⵣⵉ ⵜⴰⵔⵡⴰ ⵏ ⵜⴰⵚⵉⵍⴻⵜ, ⵓⵛⴰ ⴰⴷ ⵣⵣⴰⵢⴻⵙ ⵙⵙⵢⴰⵔⴹⴻⵏ ⴰⵔⵢⴰⵣ ⵏⵏⵉ ⵉ ⵉⵅⵙ ⵓⵊⴻⴵⵉⴷ ⴰⴷ ⵉⵛⴻⵏⵏⴻⵄ ⵓⵛⴰ ⴰⴷ ⵜ ⵙⵙⵏⴻⴷⵀⴻⵏ ⵅ ⵓⵢⵉⵙ ⴷⴻⴳ ⵡⴰⵣⵣⴰⵢ ⵏ ⵜⴻⵏⴷⵉⵏⵜ, ⵓⵛⴰ ⴰⴷ ⴱⴰⵔⵔⵃⴻⵏ: ‘ⴰⵎⵎⵓ ⵉ ⵖⴰ ⵉⵜⵜⵡⴰⴳⴳ ⴰⴽ-ⴷ ⵡⴻⵔⵢⴰⵣ, ⵡⴻⵏⵏⵉ ⵉⵅⵙ ⵓⵊⴻⴵⵉⴷ ⴰⴷ ⵜ ⵉⵛⴻⵏⵏⴻⵄ!’ ” 10 ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ ⵉ ⵀⴰⵎⴰⵏ: “ⵇⴻⴵⴻⵇ, ⴽⵙⵉ ⵜⵛⴰⵎⵉⵔ ⴷ ⵓⵢⵉⵙ ⴰⵎ ⵎⴰⵎⵎⴻⵛ ⵜⴻⵏⵏⵉⴷ ⵓⵛⴰ ⴻⴳⴳ ⴰⵎⴻⵏⵏⵉ ⴰⴽ-ⴷ ⵎⵓⵔⴷⴰⵅⴰⵢ ⵡⴻⵏⵏⵉ ⵉⵇⵇⵉⵎⴻⵏ ⴷⵉ ⵜⴻⵡⵡⴰⵔⵜ ⵏ ⵓⵊⴻⴵⵉⴷ ⵓ ⵡⴰⵔ ⵜⵜⴻⵊⵊⵉ ⵓⵍⴰ ⴷ ⵉⵊⵊ ⵏ ⵡⴰⵡⴰⵍ ⴰⴷ ⵉⵡⴹⴰ ⵣⵉ ⵎⴰⵔⵔⴰ ⵎⵉⵏ ⵜⴻⵙⵙⵉⵡⵍⴻⴷ.”

11 ⵉⴽⵙⵉ ⵀⴰⵎⴰⵏ ⵜⵛⴰⵎⵉⵔ ⴷ ⵓⵢⵉⵙ ⵓⵛⴰ ⵉⵙⵙⵢⴰⵔⴹ ⵎⵓⵔⴷⴰⵅⴰⵢ ⵙ ⵜⵛⴰⵎⵉⵔ ⵓ ⵉⵙⵙⵏⴻⴷⵀ ⵉ-ⵜ ⵅ ⵡⴰⵣⵣⴰⵢ ⵏ ⵜⴻⵏⴷⵉⵏⵜ ⵓⵛⴰ ⵉⵙⵙⴻⴽⴽⴰⵔ ⴰⴱⴰⵔⵔⴻⵃ ⵇⵉⴱⴰⵍⵜ ⵏⵏⴻⵙ: “ⴰⵎⵎⵓ ⵉ ⵖⴰ ⵉⵜⵜⵡⴰⴳⴳ ⴰⴽ-ⴷ ⵡⴻⵔⵢⴰⵣ ⵡⴻⵏⵏⵉ ⵓⵎⵉ ⵉⵅⵙ ⵓⵊⴻⴵⵉⴷ ⴰⴷ ⴰⵙ ⵉⵛⴻⵏⵏⴻⵄ!’” 12 ⴰⵡⴰⵔⵏⵉ ⴰⵢⴰ ⵉⵄⵇⴻⴱ ⵎⵓⵔⴷⴰⵅⴰⵢ ⵄⴰⵡⴻⴷ ⵖⴰⵔ ⵜⴻⵡⵡⴰⵔⵜ ⵏ ⵓⵊⴻⴵⵉⴷ, ⵎⴰⵛⴰ ⵀⴰⵎⴰⵏ ⵢⵓⵢⵓⵔ ⴷⴻⵖⵢⴰ ⵖⴰⵔ ⵜⴰⴷⴷⴰⵔⵜ, ⵉⵃⵣⴻⵏ ⵓ ⵜⵓⵖⴰ ⴰⵣⴻⴵⵉⴼ ⵏⵏⴻⵙ ⵉⵍⴻⵃⵃⴻⴼ. 13 ⵉⵄⴰⵡⴻⴷ ⵀⴰⵎⴰⵏ ⵉ ⵣⴰⵔⴰⵛ, ⵜⴰⵎⵖⴰⵔⵜ ⵏⵏⴻⵙ, ⵓ ⵉ ⵎⴰⵔⵔⴰ ⵉⵎⴻⴷⴷⵓⴽⴽⴰⵍ ⵏⵏⴻⵙ ⵎⴰⵔⵔⴰ ⵎⵉⵏ ⵉ ⴷ ⴰⵙ ⵉⵎⵙⴰⵔⴻⵏ. ⵅⴻⵏⵏⵉ ⵏⵏⴰⵏ ⴰⵙ ⵉⵎⵉⵖⵉⵙⴻⵏ ⵏⵏⴻⵙ ⴷ ⵣⴰⵔⴰⵛ, ⵜⴰⵎⵖⴰⵔⵜ ⵏⵏⴻⵙ: “ⵎⴰⵍⴰ ⵎⵓⵔⴷⴰⵅⴰⵢ, ⵡⴻⵏⵏⵉ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ ⵜⴻⴱⴷⵉⴷ ⴰⴷ ⵜⴻⵡⴹⵉⴷ, ⵣⵉ ⵣⵣⴰⵔⵉⵄⴻⵜ ⵏ ⵡⵓⴷⴰⵢⴻⵏ ⵉ ⵢⴻⴵⴰ, ⵡⴰⵔ ⴷ ⴰⵙ ⵜⵣⴻⵎⵎⴰⵔⴻⴷ, ⵎⴰⵛⴰ ⵙ ⵜⵉⴷⴻⵜⵜ ⴰⴷ ⵜⴻⵡⴹⵉⴷ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ.” 14 ⵓⵎⵉ ⵏⵉⵜⵏⵉ ⵙⵙⵉⵡⵍⴻⵏ ⵄⴰⴷ ⴰⴽⵉⴷⴻⵙ, ⵓⵙⵉⵏ-ⴷⴷ ⵉⵎⵙⴻⵅⵅⴰⵔⴻⵏ ⵉⵛⴻⵏⵏⵄⴻⵏ ⴷ ⵓⵊⴻⴵⵉⴷ ⵓⵛⴰ ⵇⴻⴵⵇⴻⵏ ⴰⴷ ⴰⵡⵢⴻⵏ ⵀⴰⵎⴰⵏ ⵖⴰⵔ ⵣⵣⴰⵔⴷⴻⵜ ⵏⵏⵉ ⵜⴻⵙⵙⴻⵡⵊⴻⴷ ⵉⵙⵜⵉⵔ.