ⵏⴰⵃⴰⵎⵢⴰ
ⵜⴰⵣⴰⴵⵉⵜ ⵏ ⵏⴰⵃⴰⵎⵢⴰ ⵉ ⵍⴳⴻⵏⵙ ⵏ ⵉⵙⵔⴰⵉⵍ
1
1 ⴰⵡⴰⵍⴻⵏ ⵏ ⵏⴰⵃⴰⵎⵢⴰ, ⵎⵎⵉⵙ ⵏ ⵃⴰⴽⴰⵍⵢⴰ. ⵉⵎⵙⴰⵔ ⴷⴻⴳ ⵓⵢⵓⵔ ⵏ ⴽⵉⵙⵍⵓⵡ, ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵄⵉⵛⵔⵉⵏ, ⵓⵎⵉ ⴷ ⴰⵢⵉ ⵜⵓⵖⴰ ⴷⵉ ⵍⴻⵇⵚⴰⵔ ⴷⵉ ⵛⵓⵛⴰⵏ, 2 ⴰⵇⴰ ⵢⵓⵙⴰ-ⴷⴷ ⵃⴰⵏⴰⵏⵉ, ⵉⵊⵊⴻⵏ ⵣⴻⴳ ⴰⵢⵜⵎⴰ, ⵊⵎⵉⵄ ⴰⴽ-ⴷ ⵛⴰ ⵏ ⵢⴻⵔⵢⴰⵣⴻⵏ ⵣⵉ ⵢⴰⵀⵓⴷⴰ, ⵓⵛⴰ ⵙⵙⴻⵇⵙⵉⵖ ⵜⴻⵏ ⵅ ⵡⵓⴷⴰⵢⴻⵏ ⵏⵏⵉ ⵉⵏⵏⴻⵊⵎⴻⵏ, ⵉⵏⵏⵉ ⵉⵇⵇⵉⵎⴻⵏ ⵣⵉ ⵜⵎⴻⵃⴱⴰⵙⵜ, ⵓ ⵅ ⵓⵔⵛⴰⵍⵉⵎ. 3 ⵏⵉⵜⵏⵉ ⵏⵏⴰⵏ ⴰⵢⵉ: “ⵉⵏⵏⵉ ⵉⵇⵇⵉⵎⴻⵏ, ⵉⵏⵏⵉ ⴷⵉⵏ ⵉⵇⵇⵉⵎⴻⵏ ⴷⵉ ⵍⵄⴰⵎⴰⵍⴰ ⵣⵉ ⵜⵎⴻⵃⴱⴰⵙⵜ, ⴰⵇⴰ ⴰⵜⴻⵏ ⴷⵉ ⵍⴻⵖⴱⴻⵏ ⴷ ⴰⵎⴻⵇⵇⵔⴰⵏ ⵓ ⴷⵉ ⵍⴻⴼⴹⵉⵃⴻⵜ ⵓ ⵍⵃⵉⴹ ⵏ ⵓⵔⵛⴰⵍⵉⵎ ⵉⵜⵜⵡⴰⵔⵥ ⵓ ⵜⵉⵡⵡⵓⵔⴰ ⵏⵏⴻⵙ ⵜⵜⵡⴰⵙⵙⵛⴻⵎⴹⴻⵏⵜ.”
4 ⵓⵎⵉ ⵙⵍⵉⵖ ⴰⵡⴰⵍⴻⵏ-ⴰ, ⵉⵎⵙⴰⵔ, ⴰⵇⴰ ⵇⵇⵉⵎⴻⵖ ⵖⴰⵔ ⵜⴻⵎⵎⵓⵔⵜ, ⵔⵓⵖ ⵓ ⵛⴻⴹⵏⴻⵖ ⵛⴰ ⵏ ⵡⵓⵙⵙⴰⵏ, ⵥⵓⵎⵎⴻⵖ ⵓ ⵥⵓⴵⴻⵖ ⵣⵣⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ ⵏ ⵉⵊⴻⵏⵡⴰⵏ. 5 ⵏⵏⵉⵖ: “ⴰ ⵙⵉⴷⵉ, ⴰⵔⴻⴱⴱⵉ ⵏ ⵉⵊⴻⵏⵡⴰⵏ, ⵛⴻⴽ ⴷ ⴰⵔⴻⴱⴱⵉ ⴷ ⴰⵎⴻⵇⵇⵔⴰⵏ ⵉⵙⵙⴰⴳⴳⵯⴰⴷⴻⵏ, ⵡⴻⵏⵏⵉ ⵉⵟⵟⴼⴻⵏ ⴷⵉ ⵍⵄⴰⵀⴷ ⴷ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷⵉ ⵟⵟⵡⴻⵄ ⵏ ⵢⵉⵏⵏⵉ ⵛⴻⴽ ⵉⵜⵜⴻⵅⵙⴻⵏ ⵓ ⵏ ⵢⵉⵏⵏⵉ ⵉⵟⵟⴼⴻⵏ ⴷⵉ ⵜⵡⴻⵚⵚⴰ ⵏⵏⴻⵛ, ■ 6 ⴻⵊⵊ ⴰⴷ ⵢⵉⵍⵉ ⵓⵎⴻⵣⵣⵓⵖ ⵏⵏⴻⵛ ⵉⴼⵜⴻⵏ ⵓ ⵜⵉⵟⵟⴰⵡⵉⵏ ⵏⵏⴻⵛ ⴰⵔⵣⵎⴻⵏⵜ, ⵃⵉⵎⴰ ⴰⴷ ⵜⴻⵙⵍⴻⴷ ⵉ ⵜⵥⴰⴵⵉⵜ ⵏ ⵓⵎⵙⴻⵅⵅⴰⵔ ⵏⵏⴻⵛ ⵏⵏⵉ ⵥⵓⴵⴻⵖ ⴰⵙⵙ-ⴰ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ, ⴰⵙⵙ ⴷ ⴵⵉⵍⴻⵜ, ⴷⵉ ⵟⵟⵡⴻⵄ ⵏ ⴰⵢⵜ ⵏ ⵉⵙⵔⴰⵉⵍ, ⵉⵎⵙⴻⵅⵅⴰⵔⴻⵏ ⵏⵏⴻⵛ. ⵏⴻⵄⵎⴻⵖ ⵄⴰⵡⴻⴷ ⵙ ⴷⴷⵏⵓⴱ ⵏ ⴰⵢⵜ ⵏ ⵉⵙⵔⴰⵉⵍ ⵉ ⵣⵉ ⵅⴰⴽ ⵅⴹⴰⵏ. ⵏⴻⵛⵛ ⴷ ⵜⴰⴷⴷⴰⵔⵜ ⵏ ⴱⴰⴱⴰ, ⴰⵇⴰ ⵏⴻⵅⴹⴰ ⴰⴽⵉⴷⴻⴽ. 7 ⵏⴻⴳⴳⴰ ⴰⴽⵉⴷⴻⴽ ⵙ ⵡⴰⵟⵟⴰⵙ ⵏ ⵍⴻⵖⴷⴰⵔ ⵓ ⵡⴰⵔ ⵏⴻⵟⵟⵉⴼ ⵛⴰ ⴷⵉ ⵍⵓⵎⵓⵔⴰⵜ ⴷ ⵜⵡⴻⵚⵚⴰ ⴷ ⵍⴼⴰⵔⴰⵢⵉⴹ ⵉ ⵣⵉ ⵜⵓⵎⵓⵔⴻⴷ ⵉ ⵓⵎⵙⴻⵅⵅⴰⵔ ⵏⵏⴻⵛ ⵎⵓⵙⴰ. 8 ⵉⴷⴰⵔ ⴰⵡⴰⵍ ⵉ ⵜⵓⵎⵓⵔⴻⴷ ⵉ ⵓⵎⵙⴻⵅⵅⴰⵔ ⵏⵏⴻⵛ ⵎⵓⵙⴰ ⵓⵎⵉ ⵜⴻⵏⵏⵉⴷ: “ⵎⴰⵍⴰ ⴽⴻⵏⵏⵉⵡ ⴷ ⵉⵖⴻⴷⴷⴰⵔⴻⵏ, ⴰⵇⴰ ⴰⴷ ⴽⴻⵏⵏⵉⵡ ⵙⵙⵣⴻⴵⵄⴻⵖ ⵊⴰⵔ ⵍⴻⴳⵏⵓⵙ, ■ 9 ⵎⴰⵛⴰ ⵎⴰⵍⴰ ⵜⴷⴻⵡⵍⴻⵎ-ⴷⴷ ⵖⴰⵔⵉ, ⴰⴷ ⵟⵟⴼⴻⵎ ⴷⵉ ⵍⵓⵎⵓⵔⴰⵜ ⵉⵏⵓ ⵓ ⴰⴷ ⵜⴻⵏⵜ ⵜⴻⴳⴳⴻⵎ, ⵡⴰⵅⵅⴰ ⴷⵉⵏ ⵣⵣⴰⵢⵡⴻⵎ ⵉⵏⵏⵉ ⵅ ⵢⵓⵥⵥⵍⴻⵏ ⵖⴰⵔ ⵟⵟⴰⵔⴼ ⴰⵏⴻⴳⴳⴰⵔ ⵏ ⵓⵊⴻⵏⵏⴰ, ⵏⴻⵛⵛ ⴰⴷ ⵜⴻⵏ ⵙⵙⵎⵓⵏⴻⵖ ⵙⵙⴻⵏⵏⵉ, ⴰⴷ ⵜⴻⵏ ⴰⵡⵢⴻⵖ ⵖⴰⵔ ⵡⴻⵎⵛⴰⵏ ⵉ ⵉⵅⴹⴰⵔⴻⵖ ⵏⴻⵛⵛ ⵃⵉⵎⴰ ⴰⴷ ⴷⵉⵏⵏⵉ ⵙⵙⴻⵣⴷⵖⴻⵖ ⵉⵙⴻⵎ ⵉⵏⵓ. 10 ⵏⵉⵜⵏⵉ ⵡⴰⵀ, ⴷ ⵉⵎⵙⴻⵅⵅⴰⵔⴻⵏ ⵏⵏⴻⵛ ⴷ ⵍⴳⴻⵏⵙ ⵏⵏⴻⵛ ⵏⵏⵉ ⵜⴼⴻⴽⴽⴻⴷ ⵙ ⵊⵊⴻⵀⴷ ⵏⵏⴻⵛ ⴰⵎⴻⵇⵇⵔⴰⵏ ⵓ ⵙ ⵓⴼⵓⵙ ⵏⵏⴻⵛ ⵉⵊⴻⵀⴷⴻⵏ. 11 ⴰ, ⵙⵉⴷⵉ ⵉⵏⵓ, ⴻⵊⵊ ⴰⴷ ⵉⴼⵜⴻⵏ ⵓⵎⴻⵣⵣⵓⵖ ⵏⵏⴻⵛ ⵖⴰⵔ ⵜⵥⴰⴵⵉⵜ ⵏ ⵓⵎⵙⴻⵅⵅⴰⵔ ⵏⵏⴻⵛ ⵓ ⵖⴰⵔ ⵜⵥⴰⴵⵉⵜ ⵏ ⵉⵎⵙⴻⵅⵅⴰⵔⴻⵏ ⵏⵏⵉ ⵉⵜⵜⴻⵅⵙⴻⵏ ⴰⴷ ⵜⵜⴻⴳⴳⵯⴻⴷⴻⵏ ⵣⴻⴳ ⵢⵉⵙⴻⵎ ⵏⵏⴻⵛ. ⴻⵊⵊ ⴰⵎⵙⴻⵅⵅⴰⵔ ⵏⵏⴻⵛ ⴰⴷ ⵢⴰⵡⴻⴹ ⴰⵙⵙ-ⴰ ⵓ ⴻⵡⵛ ⴰⵙ ⴰⵔⵔⴻⵃⵎⴻⵜ ⵣⵣⴰⵜ ⵉ ⵡⵓⴷⴻⵎ ⵏ ⵡⴻⵔⵢⴰⵣ-ⴰ.” ⵏⴻⵛⵛ ⵜⵓⵖⴰ ⴰⵢⵉ ⴷ ⴰⵡⴰⵔⵔⴰⴷ ⵏ ⵓⵊⴻⴵⵉⴷ.