ⵜⴰⵎⴻⵄⵎⵓⵞ ⵏ ⵀⴰⵎⴰⵏ ⴹⵉⴷⴷ ⵉ ⵡⵓⴷⴰⵢⴻⵏ
3
1 ⴰⵡⴰⵔⵏⵉ ⵎⴰⵏ ⴰⵢⴰ ⵉⴽⴽⴰⵔ ⵓⵊⴻⴵⵉⴷ ⴰⵃⴰⵛⵡⵉⵔⵓⵛ, ⵉⴳⴳⴰ ⵛⵛⴰⵏ ⴷ ⴰⵎⴻⵇⵇⵔⴰⵏ ⴷⵉ ⵀⴰⵎⴰⵏ, ⵎⵎⵉⵙ ⵏ ⵀⴰⵎⵎⴰⴷⴰⵜⴰ, ⴰⵊⴰⵊⵉ, ⵓⵛⴰ ⵉⵙⵙⴳⴻⵄⵄⴻⴷ ⵉ-ⵜ ⵓⵛⴰ ⵢⴰⵔⵔⴰ ⵍⴽⵓⵔⵙⵉ ⵏⵏⴻⵙ ⵙⴻⵏⵏⴻⵊ ⵉ ⵎⴰⵔⵔⴰ ⵍⵃⵓⴽⴽⴰⵎ ⵏⵏⵉ ⵖⴰⵔⴻⵙ ⵉⴵⴰⵏ. □ 2 ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏ ⵓⵊⴻⴵⵉⴷ ⵏⵏⵉ ⵜⵓⵖⴰ ⵖⴰⵔ ⵜⴻⵡⵡⴰⵔⵜ ⵏ ⵓⵊⴻⴵⵉⴷ, ⵓⴹⴰⵔⴻⵏ, ⵇⴻⵡⵙⴻⵏ ⵣⵣⴰⵜ ⵉ ⵀⴰⵎⴰⵏ, ⵎⵉⵏⵣⵉ ⴰⵎⵎⵓ ⵉ ⵜ ⵢⵓⵎⵓⵔ ⵓⵊⴻⴵⵉⴷ. ⵎⴰⵛⴰ ⵎⵓⵔⴷⴰⵅⴰⵢ ⵡⴰⵔ ⵉⵡⴹⵉ ⵅ ⵉⴼⴰⴷⴷⴻⵏ ⵏⵏⴻⵙ ⵓ ⵡⴰⵔ ⵉⴱⴻⵏⴷⵉⵇ. 3 ⵏⵏⴰⵏ ⵉⵎⵙⴻⵅⵅⴰⵔⴻⵏ ⵏ ⵓⵊⴻⴵⵉⴷ ⵉ ⵉⴵⴰⵏ ⴷⵉ ⵜⴻⵡⵡⴰⵔⵜ ⵏ ⵓⵊⴻⴵⵉⴷ ⵉ ⵎⵓⵔⴷⴰⵅⴰⵢ: “ⵎⴰⵢⴻⵎⵎⵉ ⵜⵄⴻⴷⴷⵉⴷ ⵅ ⵍⵓⵎⵓⵔ ⵏ ⵓⵊⴻⴵⵉⴷ?” 4 ⵓⵎⵉ ⵅⴰⵙ ⵏⵏⴰⵏ ⴰⵢⴰ ⵣⴻⴳ ⵡⴰⵙⵙ ⵖⴰⵔ ⵡⴰⵙⵙ ⵓ ⵏⴻⵜⵜⴰ ⵡⴰⵔ ⴷ ⴰⵙⴻⵏ ⵉⵙⵍⵉ ⵛⴰ, ⵉⵎⵙⴰⵔ ⴰⵇⴰ ⵏⵉⵜⵏⵉ ⵅⴻⴱⴱⴰⵔⴻⵏ ⴰⵢⴰ ⵉ ⵀⴰⵎⴰⵏ ⵃⵉⵎⴰ ⴰⴷ ⵥⴰⵔⴻⵏ ⵎⴰ ⴰⴷ ⵇⵇⵉⵎⴻⵏ ⴱⴻⴷⴷⴻⵏ ⴰⵡⴰⵍⴻⵏ ⵏ ⵎⵓⵔⴷⴰⵅⴰⵢ ⵉ ⵣⵉ ⵉⵡⵡⴻⵜ ⵅ ⵢⵉⵅⴻⴼ ⵏⵏⴻⵙ, ⵎⵉⵏⵣⵉ ⵉⵙⵙⴰⵔⴳⴻⴱ ⵉ-ⵜⴻⵏ ⴱⴻⵍⵍⵉ ⴰⵇⴰ ⵏⴻⵜⵜⴰ ⴷ ⵓⴷⴰⵢ. 5 ⵍⴰⵎⵉ ⵉⵥⵔⴰ ⵀⴰⵎⴰⵏ ⴱⴻⵍⵍⵉ ⵎⵓⵔⴷⴰⵅⴰⵢ ⵡⴰⵔ ⵢⵉⵡⴹⵉ ⵅ ⵉⴼⴰⴷⴷⴻⵏ ⵏⵏⴻⵙ ⵓ ⵡⴰⵔ ⴷ ⴰⵙ ⵉⴱⴻⵏⴷⵉⵇ, ⵉⵙⵄⴰⵔ ⵀⴰⵎⴰⵏ ⵙ ⵡⴰⵟⵟⴰⵙ. 6 ⵎⴰⵛⴰ ⵉⵜⵜⵖⵉⵍ ⴰⵙ ⴰⵢⴰ ⴷ ⴰⵙⴻⵃⵇⴰⵔ ⵎⴰⵃⴻⵏⴷ ⴰⴷ ⵉⵙⵙⵡⵉⵥⵥⴻⴹ ⴰⴼⵓⵙ ⵏⵏⴻⵙ ⵖⴰⵔ ⵎⵓⵔⴷⴰⵅⴰⵢ ⵡⴰⵀⴰ, ⵎⵉⵏⵣⵉ ⵙⵙⵉⵡⵍⴻⵏ ⴰⴽⵉⴷⴻⵙ ⵅ ⵍⴳⴻⵏⵙ ⵏ ⵎⵓⵔⴷⴰⵅⴰⵢ. ⵙ ⵓⵢⴰ ⵢⴰⵔⴻⵣⵣⵓ ⵀⴰⵎⴰⵏ ⴰⴷ ⵉⵀⴻⵍⵍⴻⴽ ⵎⴰⵔⵔⴰ ⵓⴷⴰⵢⴻⵏ ⵏⵏⵉ ⵉⴵⴰⵏ ⴷⵉ ⵎⴰⵔⵔⴰ ⵜⴰⴳⴻⵍⴷⵉⵜ ⵏ ⴰⵃⴰⵛⵡⵉⵔⵓⵛ, ⵍⴳⴻⵏⵙ ⵏ ⵎⵓⵔⴷⴰⵅⴰⵢ. 7 ⴷⴻⴳ ⵓⵢⵓⵔ ⴰⵎⴻⵣⵡⴰⵔⵓ, ⵡⴻⵏⵏⵉ ⴷ ⴰⵢⵓⵔ ⵏ ⵏⵉⵙⴰⵏ, ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⴻⵏⵄⴰⵛ ⵏ ⵓⵊⴻⴵⵉⴷ ⴰⵃⴰⵛⵡⵉⵔⵓⵛ, ⴳⴳⵉⵏ ⵏⵉⵜⵏⵉ ‘ⴱⵓⵔ’, ⵉⵅⵙ. ⴰⴷ ⵢⵉⵏⵉ ‘ⵜⴰⵇⴻⴷⴷⵓⵃⵜ’, ⵣⵣⴰⵜ ⵉ ⵡⵓⴷⴻⵎ ⵏ ⵀⴰⵎⴰⵏ, ⵉ ⴽⵓⵍ ⴰⵙⵙ ⵓ ⵉ ⴽⵓⵍ ⴰⵢⵓⵔ, ⴰⵍ ⴷⴷ-ⵉⵡⴹⴰ ⵜⵇⴻⴷⴷⵓⵃⵜ ⵅ ⵓⵢⵓⵔ ⵡⵉⵙⵙ ⵜⴻⵏⵄⴰⵛ, ⵡⴻⵏⵏⵉ ⴷ ⴰⵢⵓⵔ ⵏ ⴰⴷⴰⵔ. □ 8 ⵎⵉⵏⵣⵉ ⵉⵏⵏⴰ ⵀⴰⵎⴰⵏ ⵉ ⵓⵊⴻⴵⵉⴷ ⴰⵃⴰⵛⵡⵉⵔⵓⵛ: “ⴰⵇⴰ ⴷⵉⵏ ⵉⵊⵊ ⵏ ⵍⴳⴻⵏⵙ ⵉⵎⵟⴰⵔⵔⴻⵛ ⵓ ⵉⵜⵜⵡⴰⴱⴹⴰ ⵊⴰⵔ ⵍⴻⴳⵏⵓⵙ ⴷⵉ ⵎⴰⵔⵔⴰ ⵍⵄⴰⵎⴰⵍⴰⵜ ⵏ ⵜⴳⴻⵍⴷⵉⵜ ⵏⵏⴻⵛ. ⵉⵣⴻⵔⴼⴰⵏ ⵏⵙⴻⵏ ⴼⴰⵔⵔⵇⴻⵏ ⵅ ⵎⴰⵔⵔⴰ ⵍⴻⴳⵏⵓⵙ ⵓ ⵏⵉⵜⵏⵉ ⵡⴰⵔ ⵟⵟⵉⴼⴻⵏ ⵛⴰ ⴷⴻⴳ ⵉⵣⴻⵔⴼⴰⵏ ⵏ ⵓⵊⴻⴵⵉⴷ. ⵙ ⵓⵢⴻⵏⵏⵉ ⵡⴰⵔ ⴷ ⴰⵙ ⵉⵄⴻⴷⴷⴻⵍ ⵉ ⵓⵊⴻⴵⵉⴷ ⴰⴷ ⵜⴻⵏ ⵢⴻⵊⵊ ⴰⵎⵎⵓ. □ 9 ⵎⴰⵍⴰ ⵜⵓⵙⴰ ⴰⵙ-ⴷⴷ ⵉ ⵓⵊⴻⴵⵉⴷ ⵙ ⵍⵅⴰⴹⴰⵔ, ⵅⴻⵏⵏⵉ ⴰⴷ ⴰⵔⵉⵏ ⵉⵊⵊ ⵏ ⵍⵓⵎⵓⵔ, ⵃⵉⵎⴰ ⴰⴷ ⵜⴻⵏ ⴰⵔⴻⴷⴷⴵⴻⵏ, ⵅⴻⵏⵏⵉ ⵏⴻⵛⵛ ⴰⴷ ⴳⴳⴻⵖ ⴰⴷ ⵙⵙⵡⴻⵣⵏⴻⵖ ⵉⵊⵊ ⵏ ⵍⵇⴻⴷⴷ ⵏ ⵄⴻⵛⵔⴰ-ⴰⵍⴰⴼ ⵜⴰⵍⵉⵏⵜ ⵏ ⵏⵏⵓⵇⴰⵔⵜ, ⴰⴷ ⴳⴳⴻⵖ ⴰⵢⴰ ⴷⴻⴳ ⵉⴼⴰⵙⵙⴻⵏ ⵏ ⵢⵉⵏⵏⵉ ⵉ ⵖⴰ ⵉⵃⴹⴰⵏ ⵍⵅⴻⴷⵎⴻⵜ, ⵎⴰⵃⴻⵏⴷ ⴰⴷ ⵜ ⵙⵙⵉⴷⴼⴻⵏ ⴷⴻⴳ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵏ ⵓⵊⴻⴵⵉⴷ.” 10 ⵉⴽⴽⴻⵙ ⵓⵊⴻⴵⵉⴷ ⵜⴰⵅⴰⴷⴻⵏⵜ ⵏ ⵓⵛⴻⵎⵎⵉⵄ ⵉ ⵣⵉ ⵢⴰⵔⴻⵛⵛⴻⵎ ⵣⴻⴳ ⵓⴹⴰⴹ ⵏ ⵓⴼⵓⵙ ⵏⵏⴻⵙ ⵓⵛⴰ ⵉⵡⵛⴰ ⵉ-ⵜⵜ ⵉ ⵀⴰⵎⴰⵏ, ⵎⵎⵉⵙ ⵏ ⵀⴰⵎⵎⴰⴷⴰⵜⴰ, ⴰⵊⴰⵊⵉ, ⵍⴻⵄⴷⵓ ⵏ ⵡⵓⴷⴰⵢⴻⵏ. 11 ⵉⵏⵏⴰ ⵓⵊⴻⴵⵉⴷ ⵉ ⵀⴰⵎⴰⵏ: “ⵏⵏⵓⵇⴰⵔⵜ ⵊⵊⵉⵖ ⴰⵛ ⵜⵜ, ⵓⵍⴰ ⴷ ⵍⴳⴻⵏⵙ, ⵃⵉⵎⴰ ⴰⴷ ⵣⵣⴰⵢⴻⵙ ⵜⴻⴳⴳⴻⴷ ⵎⵉⵏ ⵜⵡⴰⵔⵉⴷ ⴷ ⵍⴻⵎⵍⵉⵃ ⴷⵉ ⵜⵉⵟⵟⴰⵡⵉⵏ ⵏⵏⴻⵛ.”
12 ⴷⴻⴳ ⵓⵢⵓⵔ ⴰⵎⴻⵣⵡⴰⵔⵓ, ⴷⴻⴳ ⵡⴰⵙⵙ ⵏⵏⴻⵙ ⵡⵉⵙⵙ ⵜⵍⴻⵟⵟⴰⵛ, ⵎⵍⴰⵖⴰⵏ ⵉⵎⴰⵔⵉⵔⴻⵏ ⵏ ⵓⵊⴻⴵⵉⴷ, ⵓⵔⴰⵏ ⵎⴰⵔⵔⴰ ⵄⵍⴰⵃⵙⴰⴱ ⵍⵓⵎⵓⵔ ⵏ ⵀⴰⵎⴰⵏ ⵉ ⵉⵊⴻⴵⵉⴷⴻⵏ ⵉ ⵉⴵⴰⵏ ⵙⴰⴷⵓ ⵓⵊⴻⴵⵉⴷ ⵓ ⵉ ⵍⵡⵓⵍⴰⵜ ⵏⵏⵉ ⵉⴵⴰⵏ ⵅ ⴽⵓⵍ ⵍⵄⴰⵎⴰⵍⴰ ⵓ ⵉ ⵍⵃⵓⴽⴽⴰⵎ ⵏ ⴽⵓⵍ ⵍⴳⴻⵏⵙ. ⵏⵉⵜⵏⵉ ⵓⵔⴰⵏ ⵉ ⴽⵓⵍ ⵍⵄⴰⵎⴰⵍⴰ ⵙ ⵜⵉⵔⴰ ⵏⵏⴻⵙ ⵓ ⵉ ⴽⵓⵍ ⵍⴳⴻⵏⵙ ⵙ ⵉⵍⴻⵙ ⵏⵏⴻⵙ. ⵜⵓⵖⴰ ⵜⴰⴱⵔⴰⵜ ⵜⵓⵔⴰ ⵙ ⵢⵉⵙⴻⵎ ⵏ ⵓⵊⴻⴵⵉⴷ, ⵓ ⵜᵉⵜⵜⵡⴰⵛⴻⵎⵎⴻⵄ ⵙ ⵜⵅⴰⴷⴻⵏⵜ ⵏ ⵓⵛⴻⵎⵎⵉⵄ ⵏ ⵓⵊⴻⴵⵉⴷ. □ 13 ⵙⵙⴻⴽⴽⴻⵏ ⵜⵉⴱⵔⴰⵜⵉⵏ ⴰⴽ-ⴷ ⵉⵔⴻⵇⵇⴰⵙⴻⵏ ⵏ ⵜⴰⵣⵍⴰ ⵖⴰⵔ ⵎⴰⵔⵔⴰ ⵍⵄⴰⵎⴰⵍⴰⵜ ⵏ ⵓⵊⴻⴵⵉⴷ, ⵃⵉⵎⴰ ⴰⴷ ⵜⴻⵃⵃⴰⵏ, ⴰⴷ ⵏⵖⴻⵏ ⵓ ⴰⴷ ⵀⴻⵍⵍⴽⴻⵏ ⵎⴰⵔⵔⴰ ⵓⴷⴰⵢⴻⵏ, ⴰⵎ ⵓⵎⴻⵥⵢⴰⵏ ⴰⵎ ⵓⵎⴻⵇⵇⵔⴰⵏ, ⵉⵃⴻⵏⵊⵉⵔⴻⵏ ⵉⵎⴻⵥⵢⴰⵏⴻⵏ ⴷ ⵜⴻⵎⵖⴰⵔⵉⵏ, ⴷⴻⴳ ⵡⴰⵙⵙ ⴷ ⵉⵊⵊⴻⵏ, ⴷⴻⴳ ⵡⴰⵙⵙ ⵡⵉⵙⵙ ⵜⵍⴻⵟⵟⴰⵛ ⵏ ⵓⵢⵓⵔ ⵡⵉⵙⵙ ⵜⴻⵏⵄⴰⵛ, ⵡⴻⵏⵏⵉ ⴷ ⴰⵢⵓⵔ ⵏ ⴰⴷⴰⵔ, ⵓ ⵅⴻⵏⵏⵉ ⴰⴷ ⴽⴻⵛⵛⴹⴻⵏ ⵎⴰⵔⵔⴰ ⵎⵉⵏ ⵖⴰⵔⵙⴻⵏ ⴷ ⵜⴰⴽⴻⵛⵛⴰⴹⵜ. 14 ⵜⵓⵖⴰ ⵉⵜⵜⵅⴻⵚⵚⴰ ⴰⴷ ⵙⵙⵓⴼⴼⵖⴻⵏ ⵎⵉⵏ ⵉⴵⴰⵏ ⴷⵉ ⵜⵉⵔⴰ ⴰⵎ ⵢⵉⵊⵊ ⵏ ⵓⵣⴻⵔⴼ, ⵣⴻⴳ ⵉⵛⵜ ⵏ ⵍⵄⴰⵎⴰⵍⴰ ⴰⵍ ⵜⴻⵏⵏⴻⵖⵏⵉ ⵙ ⴱⵟⴰⵢⵟⴰⵢ ⵉ ⵎⴰⵔⵔⴰ ⵍⴻⴳⵏⵓⵙ, ⵃⵉⵎⴰ ⴰⴷ ⵉⵍⵉⵏ ⵃⴻⵣⵣⵎⴻⵏ ⵉ ⵓⵢⴰ ⴷⴻⴳ ⵡⴰⵙⵙ ⵏⵏⵉ. 15 ⴼⴼⵖⴻⵏ ⵉⵔⴻⵇⵇⴰⵙⴻⵏ ⵏ ⵜⴰⵣⵍⴰ, ⵜⵜⵡⴰⵛⴻⵊⵊⵄⴻⵏ ⵙ ⵓⵣⴻⵢⵢⴰⵔ ⵙ ⵡⴰⵡⴰⵍ ⵏ ⵓⵊⴻⴵⵉⴷ, ⵓⵛⴰ ⵉⵜⵜⵡⴰⵙⵙⵓⴼⴼⴻⵖ ⵓⵣⴻⵔⴼ ⵄⴰⵡⴻⴷ ⴷⵉ ⵍⵇⴻⵍⵄⴰ ⵏ ⵛⵓⵛⴰⵏ. ⵜⵓⵖⴰ ⴰⵊⴻⴵⵉⴷ ⴷ ⵀⴰⵎⴰⵎ ⵇⵇⵉⵎⴻⵏ ⵙⴻⵙⵙⴻⵏ, ⵎⴰⵛⴰ ⵜⴰⵏⴷⵉⵏⵜ ⵏ ⵛⵓⵛⴰⵏ ⵜⵓⵖⴰ-ⵜⵜ ⵜⴻⵀⵡⴻⵍ.