Asḥeyyed n ijj n umednub zi tmesmunt
5
1 Řḥasuř, ittwanna belli aqa din jar awem farq-ccɣeř, u anect n farq-ccɣeř nni war iǧin qaɛ jar řegnus, aqa ijj n mmis ɣares tamɣart n babas. ■ 2 Kenniw tessuffam ixef nwem, waxxa ittxeṣṣa awem di tidett ad tceḍnem ḥima ad tḥeyyḍem wenni iggin man aya zi řwest nwem. 3 Waxxa necc aggʷejeɣ ɛlaḥsab arrimet, aqa ayi ḥḍareɣ di Arruḥ, uca aqa ḥekmeɣ axmi ḥḍareɣ x wenni iggin man aya. 4 Ittxeṣṣa ad tmunem marra deg Yisem n Siditneɣ Yeccu Lmasiḥ u necc ak-d kenniw di Arruḥ, s jjehd n Siditneɣ Yeccu Lmasiḥ, 5 uca kenniw ad t tsellmem i cciṭan i txessart n arrimet nnes tamednubt ḥima ad iddar di Arruḥ deg wass n Siditneɣ Yeccu Lmasiḥ. ■ 6 War dd xawem yusi ufeyyec! Ma war tessinem ca belli cwayt n wentun issmemm marra taɛebbuzt n warecti? ■ 7 Sizedgem ixef nwem xenni zeg wentun aqdim ḥima xenni ad tiřim d arecti n jdid. Aqa kenniw s tidett břa antun, minzi ɛawed Taɣarṣt nneɣ n Useɛdu aqa tᵉttwaɣarṣ i neccin, aqa Netta d Lmasiḥ. ■ 8 Ammu xenni ejj aneɣ ad nɛeyyed, war iǧi s wentun aqdim, niɣ s wentun n tuɛeffna d řɣar, maca s wentun n řeṣfayet d tqeddast. ■
9 Aqa uriɣ awem-dd di tebrat ḥima war ttɛacarem ayt n farq-ccɣeř ■
10 War ssiwřeɣ x marra ayt n farq-ccɣeř nni iǧan di ddunect-a, niɣ x iḍemmaɛen niɣ x ibeɛɛaj niɣ x yenni iɛebbden l’aṣnam, mařa ammu, iři ad teffɣem zi ddunect-a.
11 Maca uriɣ awem-dd řexxu ḥima war tᵉttɛaccarem ca ḥed, waxxa qqaren as uma, maca aqa-t d bu-farq-ccɣeř niɣ d aḍemmaɛ niɣ d wenni iɛebbden l’aṣnam niɣ d amceqqaf niɣ d askarji niɣ d aceffar. Ak-d ḥed am wanita war kis tᵉttem! ■
12 Minzi man řḥeqq ɣari ḥima ad ḥekmeɣ x yenni iǧan barra? Ḥekkmem kenniw x yenni iǧan daxeř!
13 Maca inni iǧan barra, AREBBI ad xasen iḥkem, maca sḥeyydet xawem aɛeffan! ■