2 Ikurintiyyen
Aseǧem ɣar umezwaru
1
1 Bulus, rrasul n Yeccu Lmasiḥ ɛlaḥsab řxaḍar n AREBBI, d tawmat Timutiyu, i tmesmunt n AREBBI tenni iǧan di Kurintus u i marra imqeddasen inni iǧan di marra Axaya: □ ■ 2 Ad kidwem yiři arḍa d řehna n AREBBI, Babatneɣ, u n Siditneɣ Yeccu Lmasiḥ. ■ Arebbi isfewwej di marra řeḥṣaret
3 Lbaraka aqa-tt i AREBBI, Tababat n Siditneɣ Yeccu Lmasiḥ, Tababat n arreḥmet d AREBBI n marra afewwej. ■ 4 Netta issfewwaj aneɣ di marra řmeḥnet nneɣ, ḥima uřa d neccin nqedd ad nessfewwej x yenni iǧan di mammec ma teǧa řmeḥnet am neccin, s ufewwej i zi nettwassfewwej zi AREBBI. ■ 5 Minzi amen ifeyyeḍ dayneɣ aweddeb n Lmasiḥ, ammu ifeyyeḍ ɛawed ufewwej nneɣ s Lmasiḥ. ■ 6 Maca ɛawed mařa ḥṣaren aneɣ, aqa nettwaḥsar i ufewwej nwem u i Tudart nwem. U mařa nettwafewwej, aqa d man aya ḥima ad tᵉttwasfewwjem uřa d kenniw maḥend ad ɣarwem yiři ṣṣabr ařami tzemmarem ɛawed ad teksim aweddeb amecnaw neksi uřa d neccin aweddeb. ■ 7 Asitem nneɣ i kenniw imten, minzi nessen, belli amecnaw tcarrcem deg uweddeb, ammu i ɣa tcarcem deg ufewwej.
8 A aytma, nexs ad tessnem x řmeḥnet i xaneɣ dd-ikkin di Asiya, aqa tekka-dd xaneɣ řmeḥnet sennej x tzemmar nneɣ, ařami ɛřaḥař neqḍeɛ řayas zi tudart nneɣ. ■ 9 Aqa neḥseb neḥkem x yixef nneɣ s řmewt, ḥima war nettiqqi ca deg ixef nneɣ, maca di AREBBI wenni dd-issnekkaran imettinen. ■
10 Netta aqa ifekk aneɣ zi řmewt ineqqen uca nettraja ad aneɣ ifekk twařa nneɣni ■
11 s uɛawen n tẓaǧitin nwem xaneɣ, maḥend ad tiři tawhibt nnes i neccin d lbaraka i waṭṭas, ḥima ad as qadan zi ssibbet nneɣ. ■
Abeddeř n usafar n Bulus
12 Minzi wa d asemɣar nneɣ, cchadet n tnefsect nneɣ, belli aqa aneɣ neggur di ddunect s ṣfa d tazdugi u di arḍa n AREBBI, war iǧi s tiɣit n bnadem amednub, uca d amezwaru ak-d kenniw u i kenniw.
13 Minzi war d awem nuri uřa d ict n tmesřact mɣir min tessnem u ad as tfehmem, iwa ssitimeɣ ad tfehmem ař aneggaru,
14 am mammec ɛawed tfehmem zzayneɣ drus, belli aqa aneɣ d asemɣar nwem, am mammec uřa d kenniw d asemɣar nneɣ deg wass n Siditneɣ Yeccu Lmasiḥ.
15 Di řaman-a tuɣa xseɣ ad ɣarwem dd-aseɣ qbeř, ḥima ad ɣarwem yiři arḍa tnayen n tseqqar. ■
16 Tuɣa xseɣ ad ɣarwem dd-usiɣ deg webrid ɣar Makiduniya, u xenni tuɣa xseɣ ad ɣarwem dd-ɛeqbeɣ ɛawed zi Makiduniya, ḥima kenniw ad ayi tessqebbḍem ɣar Yahudiyya.
17 Řami tuɣa ɛewwřeɣ ad ggeɣ man aya, ma qeǧqeɣ? Niɣ min xarṣeɣ ad t ggeɣ, ma xarṣeɣ t ɛlaḥsab ddat tamednubt, ařami dayes ittwaf ‘Wah, wah!’ uřa d ‘Lla, lla!’?
18 Maca AREBBI d amtiqqi i yeǧa, awař nneɣ i kenniw war t tuɣi ‘Wah!’ uřa d ‘Lla!’ ■
19 Minzi Mmis n AREBBI, Yeccu Lmasiḥ, wenni i zi ittwabarreḥ jar awem zzayneɣ, zzayi u zi Silwanus d zi Timutiyu, aqa Netta war iǧi d ‘Wah!’ uřa d ‘Lla!’, maca ‘Wah’ dayes i yeǧa. 20 Minzi marra lwuɛud n AREBBI, aqa aten d ‘Wah!’, di Lmasiḥ. S uyenni neqqar zzayes ɛawed ‘Amin!’ i uɛuǧi n AREBBI. 21 Maca AREBBI d wenni i d aneɣ iḍmen akidwem di Lmasiḥ nni i d aneɣ idhen. 22 Igga xaneɣ ɛawed acemmiɛ nnes uca iwca aneɣ Arruḥ d řɛarbun deg wuřawen nneɣ. ■
23 Maca necc cehhdeɣ zzat i AREBBI x yixef inu, aqa tuɣa ayi d aḥnin xawem, řami war dd-usiɣ ɣar Kurintus. ■ 24 War iǧi xenni minzi nettṣelleṭ x l’iman nwem, maca neccin d imsexxaren i řefraḥet nwem, minzi zi l’iman tbeddem tmetnem. ■