Asgenfi n ijj n weryaz d aneɛḍab
3
1 Cimɛun Buṭrus d Yuḥanna jmiɛ geɛɛden ɣar Zzawect Tameqqrant di tsaɛɛet n tẓaǧit tenni d wiss tesɛa, ixs ad yini d třata awarni ḍḍhur. 2 Xzar, tuɣa din ijj n weryaz d aneɛḍab zeg uɛeddis n yemmas, arbun t inni innumen ad t-i-dd-awyen, ssɣiman t ɣar tewwart n Zzawect Tameqqrant umi qqaren ‘Tawwart Taṣebḥant’, ḥima ad ittar ṣṣedqet zeg inni ittadfen ɣar Zzawect Tameqqrant. ■ 3 Aqa wa, umi iẓra belli Cimɛun d Yuḥanna ttadfen ɣar Zzawect Tameqqrant, ittar zzaysen ṣṣedqet. 4 Cimɛun ak-d Yuḥanna nḍaren dayes tiṭṭawin, nnan as: “Xzar dayneɣ!” 5 Netta iqceɛ daysen, ittraja ad zzaysen iṭṭef ca. 6 Inna as Cimɛun: “Nnuqart d wureɣ war ɣari ǧin, maca min ɣari d man aya i d ac ɣa wciɣ s Yisem n Yeccu Lmasiḥ Nnaṣiri! Kkar, tuyured!” ■ 7 Iṭṭef i-t zeg ufus nnes afusi uca issnekkar i-t. Řexdenni menɛen iḍaren nnes d ticeɛbin nnes, 8 ingez uca ibedd x iḍaren, iggur uca yudef akidsen ɣar Zzawect Tameqqrant, iggur, ineggez, issemɣara di AREBBI. □ 9 Marra řgens iẓra i-t iggur issemɣara di AREBBI.
10 Ssnen iwdan aqa netta d wenni tuɣa ittɣiman ittettar kuř ass ɣar ‘Tewwart Taṣebḥant’ n Zzawect Tameqqrant uca nitni dewřen ccuren s wedhac d utebhet x min d as imsaren.
11 Am tuɣa aryaz aneɛḍab ittcebbar di Cimɛun d Yuḥanna, dduqqzen xasen marra iwdan ɣar useqqif ak-d ukulwar d ipilaren, umi qqaren ‘aseqqif n Suliman’, tbehten.
12 Umi iẓra Cimɛun aya, iṭṭef deg wawař, inna asen: “A iryazen n Israil, min kenniw ideɛwen tᵉttbehtem s uya? Mayemmi dayneɣ tejɛarem axmi s jjehd nneɣ niɣ s ṣṣulṭa nneɣ narr i-t iggur?
13 AREBBI n Ibrahim d Isḥaq d Yaɛqub, AREBBI n řejdud nneɣ, aqa issɛuǧa Mmis Yeccu wenni tsellmem u tmenḍarem zzat n wudem n Pilaṭus wenni tuɣa xas iḥkem s ijj n řḥukm iseggden u tuɣa ixs ad as yarxu. ■
14 Maca kenniw aqa tenkarem Amqeddas d Amseggad, tzawgem ad awem immewc aryaz aqettař. ■
15 Aqa tenɣim Azeǧif n Tudart, wenni dd-issnekkar AREBBI zi taddart n imettinen, aqa neccin marra d řechud nnes. ■
16 S l’iman deg Yisem nnes, aqa issejhed u issgenfa wa wenni tᵉttwařam, tessnem t. L’iman dayes aqa iwca as agenfi aya zzatwem marra.
17 Řexxu, a aytma, ssneɣ, aqa teggim aya s tqubbanect, am mammec i ggin uřa d imeqqranen nwem.
18 Ammu aqa ikemmeř AREBBI min tuɣa issizwar ixebbar xas s uqemmum n marra inabiyyen belli Lmasiḥ iggur ad iweddeb. ■
19 S uyenni tubem, tdewřem ɣar webrid ḥima ad awem ittwamseḥ ddnub nwem uca xenni ad dd-asen wussan n arraḥet zzat i wudem n SIDI. ■ 20 uca Netta ad awem dd-issekk wenni iwejden i kenniw: Yeccu Lmasiḥ, 21 wenni ittxeṣṣa ujenna ad t iqbeř i ukemmeř n ikuden n marra timesřayin min xef tuɣa issawař AREBBI s uqemmum n marra inabiyyen nnes iqeddsen zi zman. 22 Maɣar Musa inna:
‘SIDI ad awem dd-issnekkar ijj n Unabi amecnaw necc zeg wawmatwem.
I Netta umi ɣa tesřem di marra mixef d awem i ɣa issiweř.’ ■
23 Ad yiři belli kuř řeɛmar i war isřin ɣar unabi aya ad ittwashellek zeg weydud.
24 Marra inabiyyen zi Camwil d marra inabiyyen nni i-t-i-dd ixeřfen, aqa izwaren ssiwřen barrḥen s wussan-a. 25 Kenniw d tarwa n inabiyyen u n řɛahd i igga AREBBI ak-d řejdud nwem řami tuɣa iqqar i Ibrahim:
‘S zzariɛet nnek ad ttwabarkent marra tiqebbař n temmurt!’ ■
26 Zic igga Netta řɛahd nnes akidwem uca issekk-dd AREBBI řexxu Mmis maḥend ad awem ibarek u maḥend ad tewcem s weɛrur i řɣar nwem uca ad tubem.”