Abarreḥ n Yeccu x qeṭṭu n ddunect
13
1 Ařami dd-iffeɣ zi Zzawect Tameqqrant, inna as ijjen zeg imeḥḍaren nnes: “A Amseɣɣar, xzar, mammec ǧan iẓra aya d řebni aya!” ■ 2 Yarra-dd Yeccu, inna as: “Ma teẓrid řebni aya imɣaren? War da ittɣimi uřa d ijj n weẓru x weẓru nneɣni i war ittnehdim.” ■ 3 Řami tuɣa iqqim x wedrar n Zzitun qibač i Zzawect Tameqqrant, sseqsan t Buṭrus d Yaɛqub d Yuḥanna d Andrawus řami ten tuɣa weḥḥedsen: ■ 4 “Ini aneɣ meřmi i ɣa yiři man aya, u man řeɛřamet aqa ggur ad ikemmeř marra aya?” ■ 5 Ibda Yeccu iqqar asen: “Xzarem, ḥima war kenniw ittɣarri ḥed. ■
6 Aqa aṭṭas ad dd-asen s Yisem inu qqaren: ‘Aqa d NECC!’, uca ad ɣarren aṭṭas. ■ 7 Mařa tesřim x řbaruḍ d řexbar n řbaruḍ, war ttnexřiɛem ca, minzi s uɣiř ad yiři man aya, maca war ittiři ɛad d aneggar. 8 Minzi řgens ad ikkar ḍidd i řgens nneɣni u tageldit ḍidd i tgeldit nneɣni. Ad iřin inhezzan n temmurt zeg wemcan ɣar wemcan nneɣni uca ad yiři řaẓ d uɣewwuɣ. Timesřayin-a d beddu n řewjeɛ n tarwa. ■
9 Xzarem ɣar yixef nwem, minzi ad kenniw sellmen i tudrin n ccreɛ, ad kenniw hettken s urekkuḍ di temzidawin nsen, uca ad kenniw ssiwḍen ɣar ijeǧiden d řḥukkam x ssibbet inu, d cchadet i nitni. ■
10 Ɣar umezwar ittxeṣṣa ad ittwabarreḥ s Řexbar Aṣebḥan di marra řegnus.
11 Xmi kenniw i ɣa ggewwden ḥima ad kenniw sellmen, war kessi s wemnus qbeř zi min ɣa tinim, war dayes txarriṣem ca, maca min ma d awem i ɣa immewcen di tsaɛɛet nni, siwřem zzayes, minzi war teǧim d kenniw i issawařen maca d Arruḥ Iqeddsen. ■
12 Umas ad isellem umas maḥend ad t nɣen, u babas ad isellem mmis, uca ad tekkar tarrawt x lwalidin nnes uca ad ten nɣen. ■
13 Ad kenniw carhen marra di ssibbet n Yisem inu, maca wenni i ɣa iṣbaren ař aneggar, ad ittwassenjem. ■
14 Xmi i ɣa tẓarem nnɛi n wareyyeb, min xef tuɣa issawař unabi Daniyal, ittbedda mani war ittxeṣṣa ad ibedd - wenni iɣrin ad ifhem! - řexdenni ittxeṣṣa i yenni iǧan di Yahudiyya ad arewřen ɣar idurar, ■
15 u wenni iǧan x tzeqqa war dd-ihekkwi ca ɣar taddart u war ittidef ca ḥima ad iksi ca zi taddart nnes,
16 u wenni iǧan deg iyyar war dd-ittɛiqqib ca ḥima ad iksi aseřham nnes.
17 Uct x tinni iǧan s ddeyset d tinni issuṭuḍen deg wussan nni!
18 Ẓaǧem ḥima war tᵉttiři tarewřa nwem di řmecta,
19 Minzi deg wussan nni ad din tiři ict n řmeḥnet i war tuɣi amecnaw nettat zeg wami dd-ixřeq AREBBI ddunect ař řexxu uca war tᵉttiři ɛemmarṣ ɛawed. ■ 20 Mařa SIDI war issemẓi ussan nni, war tnejjem uřa d ict n ddat, maca di ṭṭweɛ n yinni ittwafarzen inni i ixḍar Netta, aqa issemẓi ussan nni.
21 Xenni mařa inna awem ijjen: ‘Aqa Lmasiḥ da!’, niɣ: ‘Aqa-t diha!’, war t ttamnem. ■ 22 Minzi ad dd-kkaren imasiḥen issxarriqen d inabiyyen issxarriqen, ad ggen řeɛřamat d řeɛjayeb ḥima, mařa izemmar, ad ɣarren ɛad inni ittwafarzen. ■ 23 Kenniw maca, ḥḍam, aqa marra nniɣ awem t qbeř.
24 Maca deg wussan nni awarni řmeḥnet nni ad tebbarcen tfuct uca taziri war tᵉttic ɛad ṭṭya nnes, ■ 25 itran ad dd-wḍan zeg ujenna uca ṣṣulaṭat i iǧan deg ijenwan ad ttwanhezzent. ■ 26 Xenni ad ẓaren Mmis n bnadem ittas-dd deg iseynuten s jjehd d uɛuǧi ameqqran. ■ 27 Řexdenni ad issekk lmalakat nnes uca ad iyru inni zzayes ittwafarzen zi arebɛa isemmiḍen zi ṭṭarf aneggaru n temmurt ař ṭṭarf aneggaru n ujenna.
28 Řemdem zeg wartu n tazart amettiř-a: xmi i ɣa dewřen řefruɛ nnes ad dd-areḍben uca tifray ad dd-ffɣent, xenni ad tessnem aqa anebdu yiweḍ-dd. ■ 29 Ammu ɛawed uřa d kenniw, xmi i ɣa tẓarem timesřayin-a ttemsarant, xenni ssnem, aqa man aya yudes-dd x tewwart. 30 S tidett ad awem iniɣ, jjiř-a war iɛeddu ca ař d ɣa yiři man aya marra. 31 Ajenna d temmurt ad fnan, maca awařen inu war fennan ɛemmarṣ. ■ 32 Maca ass nni d tsaɛɛet nni uřa d ijj war t issin, uřa d lmalakat inni iǧan deg ujenna, uřa d Tamemmit, mɣir Tababat. ■ 33 Ḥḍam, ɛessem, ẓaǧem, minzi war tessinem ca meřmi dd ɣa taweḍ řweqt nni. ■
34 Aqa-t amecnaw ijj n bnadem ittxeṣṣa as ad isafar, ijja taddart nnes, iwekkeř imsexxaren nnes s ṣṣulṭa, iwca i kuř ijj zzaysen řxedmet nnes, uca iɛřem as i uɛessas n tewwart maḥend ad iqqim ad iḥḍa. 35 Iwa ḥḍam xenni, minzi war tessinem ca meřmi i dd ɣa yas bab n taddart, ɣar uɛecci niɣ ɣar wezyen n ǧiřet niɣ ɣar usquqeɛ n uyaẓiḍ niɣ ɣar ṣṣbeḥ zic, 36 ḥima war dd-ittis deɣya, ad kenniw yaf tᵉtteṭṭṣem. 37 Min d awem qqareɣ řexxu, qqareɣ t i marra: Qqimem tfaqem!”