Udayen arezzun ad nɣen Yeccu
14
1 Iqqim as tnayen n wussan i Řɛid n Tɣarṣt n Useɛdu d Řɛid n Weɣrum břa Antun u tuɣa imeqqranen n ikehhanen d imseřmaden n idlisen arezzun ict n tewwart maḥend ad t ṭṭfen s teḥraymect uca ad t nɣen. ■ 2 Maca nitni nnan: “War ittiři di řɛid ḥima war ittiři uɣewwuɣ di řgens.” Adhan n Yeccu di Bayt-Ɛanya
3 Řami tuɣa iqqim ɣar ṭṭabřa di Bayt-Ɛanya di taddart n Cimɛun, wenni di iǧa řbarṣ, tusa-dd ict n temɣart, aqa-tt ɣares ict n tziyyat n alabaster dayes řeɛtuř n ṣṣenbel teṣfa, tiɣřa. Tarẓa taziyyat n alabaster uca tfarreɣ i-tt x uzeǧif n Yeccu. ■ 4 Tuɣa din ca n imeḥdaren, xeyyqen aṭṭas deg ixef nsen x man aya, nnan: “Mayemmi aḍeyyeɛ n řeɛtuř-a n ṣṣenbel? 5 Minzi iři ad ittwammenz řeɛṭur-a s ktar zi teřt-mya n dinar uca xenni ad immewc i imezřaḍ.” Uca xeyyqen xas aṭṭas. 6 Maca Yeccu inna: “Jjem tt! Mayemmi xas tᵉttɛeddam? Aqa tegga dayi ijj n cɣeř icna. 7 Minzi imezřaḍ aqa aten řebda akidwem, tzemmarem ad kisen teggem řxar meřmi ma texsem, maca Necc war kidwem ttɣimiɣ řebda. ■ 8 Nettat tegga min umi tzemmar. Aqa tizzar temseḥ arrimet inu s řeɛṭur i wenḍeř. 9 S tidett, Necc ad awem iniɣ: Mani ma i ɣa ittwabarreḥ s Řexbar-a Aṣebḥan zzayi di marra ddunect, ad xebbaren ɛawed x min dayi tegga d řidaret i nettat.”
Yahuda izzenz ixef nnes maḥend ad isellem Lmasiḥ
10 Xenni iruḥ Yahuda Isxariyuṭi, ijjen zi tenɛac, ɣar imeqqranen n ikehhanen ḥima ad asen isellem Yeccu. ■
11 Umi sřin man aya, farḥen uca waɛden ad as wcen tmenyat. U netta tuɣa yarezzu ict n tewwart ḥima ad asen t isellem.
Asewjed n umensi n Řɛid n Tɣarṣt n Useɛdu
12 Deg wass amezwar n Řɛid n Weɣrum břa Antun, řami tuɣa Wudayen ɣarrṣen i Tɣarṣt n Useɛdu, nnan as imeḥḍaren nnes: “Mani texsed ad nraḥ ḥima ad nessewjed maḥend ad tecced Taɣarṣt n Useɛdu?” ■
13 Issekk tnayen zeg imeḥḍaren nnes, inna asen: “Ruḥem ɣar tendint, u xzar, ad temsagarem ak-d ijj n weryaz, yarbu ict n teqbuct n waman. Ḍfarem t!
14 U mani i ɣa yadef xenni, inim i bab n taddart: ‘Amseřmad nneɣ iqqar: Mani teǧa tɣurfet ḥima ad cceɣ Taɣarṣt n Useɛdu ak-d imeḥḍaren inu?’
15 Xenni netta ad awem immeř ijj n arwa imɣar sennej, issu, iɛdeř. Dinni i d aneɣ ɣa tesswejdem.”
16 Ffɣen imeḥḍaren, usin-dd ɣar tendint uca ufin marra am mammec tuɣa d asen inna, xenni sswejden Taɣarṣt n Useɛdu.
Yeccu izwar issiweř x wenni i t ɣa isellmen
17 Ɣar uɛecci yusa-dd ak-d tenɛac. ■
18 Řami tuɣa qqimen ɣar ṭṭabřa, ttᵉtten, inna Yeccu: “S tidett, Necc ad awem iniɣ, aqa ijjen zzaywem wenni kidi ittᵉtten, ad ayi iɣdar!” ■
19 Bdan ttecḍinen, nnan as ijjen awarni wenneɣni: “Ma d necc?” 20 Yarra-dd, inna asen: “Aqa-t d ijjen zi tenɛac i issisnen akidi aɣrum di ṭṭebṣi. 21 Aqa Mmis n bnadem ad iraḥ mammec d as tura. Maca uct x bnadem nni zi ɣa ittwaɣdar Mmis n bnadem. Ḥsen as i bnadem nni meɛlik war dd-ixřiq.”
Amensi n Řɛid n Tɣarṣt n Useɛdu
22 Řami tuɣa ttᵉtten, iksi Yeccu aɣrum, ibarek i-t, yarẓa i-t uca iwca asen t, inna: “Ksim, ccem, aqa ta d Arrimet inu.” ■ 23 Xenni iksi aɣarraf, iqada, ibarek, uca iwca asen t, u marra idsen swin zzayes. 24 Inna asen: “Aqa ina d Idammen inu n Řɛahd n Jdid i ɣa ittwassizřen i waṭṭas n iwdan. 25 S tidett, Necc ad awem iniɣ, Necc war sesseɣ ɛemmarṣ ɛad zi řɣiǧet n tzayart ař ass i di i ɣa sweɣ jdid di Tgeldit n AREBBI.” 26 Xenni awarni řami ɣennjen iẓři n ttesbiḥ, ffɣen ɣar wedrar n Zzitun.
Yeccu izwar issiweř x wenkar n Buṭrus
27 Inna asen Yeccu: “Aqa marra kenniw ad dayi tessrubam di ǧiřet-a, minzi tura s ufus n unabi Zakariyya:
‘Aqa ad wteɣ Ameksaw,
uca ad ittwazeǧeɛ wuǧi.’ ■
28 Maca awarni řami dd-kkareɣ ɛawed, ad awem izwareɣ ɣar Ljalil.” ■
29 Inna as Buṭrus: “Waxxa ad sseḍḥan marra, necc war zzayek sseḍḥiɣ ca.” 30 Inna as Yeccu: “S tidett, Necc ad ac iniɣ, aqa ass-a di ǧiřet-a, qbeř i ɣa issquqeɛ uyaẓiḍ tnayen n twařawin, ad ayi tenkared třata n twařawin.” ■ 31 Maca netta tuɣa iqqar s tmijja ijehden ɛad aṭṭas: “Mařa ittxeṣṣa ad mmteɣ akidek, war Cek nekkareɣ, a Sidi inu!” Uca amecnaw netta, ammu i nnan uřa d nitni marra. ■
Taẓaǧit n Yeccu di Xitsimaniy
32 Usin-dd ɣar wemcan umi qqaren ‘Xitsimaniy’. Inna i imeḥḍaren nnes: “Qqimem da ař ɣa kemmřeɣ taẓaǧit!” ■ 33 Xenni iksi Buṭrus d Yaɛqub d Yuḥanna uca ibda ittnexřaɛ, iggʷed aṭṭas. 34 Inna asen: “Aqa řeɛmar inu icḍen ař řmewt. Qqimem da, teḥḍam!” ■ 35 Yuyur cwayt ɣar zzat uca iwḍa ɣar temmurt, iẓẓuǧ ḥima, mařa iɛeddeř, ad xas teɛdu tsaɛɛet nni. ■ 36 Inna: “Baba, Baba inu, kuřci tzemmared xas! Ksi xafi řkas-a, maca war ittiři min xseɣ Necc, maca min texsed Cek.” ■
37 Uca idweř-dd, yufa i-ten ṭṭṣen. Inna as i Buṭrus: “A Cimɛun, ma aqa cek tᵉtteṭṭṣed? Ma war tzemmared ad teḥḍid uřa d ict n tsaɛɛet? ■ 38 Ḥḍam, ẓaǧem, ḥima war tᵉttidfem deg uɣekkwi. Arruḥ aqa iwjed, maca ddat aqa teḍɛef.” ■ 39 Uca yuyur ɛawed, iẓẓuǧ, iɛawed i wawařen nni d ijjen.
40 Idweř-dd uca yufa i-ten ɛawed ṭṭṣen, maɣar tuɣa tiṭṭawin nsen deqřent u nitni war ssinen mammec xas dd ɣa yarren. 41 Uca idweř-dd Netta ɣarsen twařa wiss třata, inna asen: “Ṭṭṣem řexxu, tareyyḥem! Icfa! Aqa tiweḍ-dd tsaɛɛet. Xzarem, aqa Mmis n bnadem ad immewc deg ifassen n imednab. 42 Kkarem, ad nraḥ, xzarem, aqa da wenni d ayi ɣa isellmen, aqa yudes-dd.”
Aḥebbes n Yeccu
43 Am tuɣa ɛad issawař, yusa-dd Yahuda, ijjen zi tenɛac, ak-d ijj n řɣaci ameqqran s řesyuf d iɛumad, sekken ten-dd imeqqranen n ikehhanen d imseřmaden n idlisen d imɣaren n řgens. ■ 44 Uca wenni t i ɣa iɣdaren tuɣa ittegg asen ict n řeɛřamet, iqqar: “Wenni i ɣa ssudmeɣ d wenni Netta. Ṭṭfem t uca awyem t-i-dd.” 45 Deɣya yuyur ɣares, inna: “A Amseřmad inu, a Amseřmad inu!”, uca issudem i-t. ■ 46 Ssarsen xas ifassen uca ṭṭfen t. 47 Ijjen zeg inni din ibedden ijbed ssif nnes uca iwta amsexxar n arrays n ikehhanen, iqess as amezzuɣ. 48 Yarra-dd Yeccu, inna asen: “Ma axmi x yijj n uceffar i teffɣem s řesyuf d iɛumad ḥima ad ayi tᵉṭṭfem? 49 Kuř ass tuɣa ayi akidwem di Zzawect Tameqqrant sseřmadeɣ, war d ayi tᵉṭṭifem. Maca man aya imsar ḥima ad ttwakemmřen Idlisen.” ■ 50 Xenni jjin t imeḥḍaren nnes uca arewřen. ■ 51 Iḍfar i-t ijj n uɛezri, tuɣa yarḍ tcamir n řeqṭen azdad waha x tqeddit nnes, uca ṭṭfen t-i-dd. 52 Maca netta ijja tcamir uca yarweř zzaysen d aɛaryan.
Lmasiḥ zzat i Lmeḥkama Tameqqrant n Wudayen
53 Iwyen Yeccu ɣar Qayafa, arrays n ikehhanen, uca munen-dd ɣares marra imeqqranen n ikehhanen d imɣaren n řgens d imseřmaden n idlisen. ■ 54 Tuɣa Cimɛun iḍfar i-t-i-dd zi řaggʷaj, ɣar daxeř n řemraḥ n arrays n ikehhanen, uca tuɣa iqqim jar imxazniyyen, ittweqqaḥ ixef nnes ɣar tmessi. 55 Tuɣa imeqqranen n ikehhanen d marra Lmeḥkama Tameqqrant n Wudayen, qqaren as ‘Sunhidrin’, arezzun cchadet ḍidd i Yeccu ḥima ad t nɣen, maca war tt ufin, ■ 56 minzi aṭṭas tuɣa xas cehhden s ẓur, maca cchadat nsen war ttmeřqint.
57 Xenni kkaren-dd ca uca cehden xas s ẓur, nnan: 58 “Neccin nesřa as umi inna: ‘Ad hedmeɣ Zzawect Tameqqrant i ittwaggen s ifassen uca di třata n wussan ad bniɣ icten nneɣnit i war ittwaggen s ifassen.’ ” ■ 59 Maca uřa ammu war ttmeřqint ca cchadat nsen.
60 Xenni ikkar arrays n ikehhanen di řwest nsen uca isseqsa Yeccu, inna as: “Ma war dd-tarrid s ca? Min xak cehhden yina?” ■ 61 Maca Netta isqar, war dd-yarri ca. Isseqsa t arrays n ikehhanen ɛawed, inna as: “Ma Cek d Lmasiḥ, Mmis n Lmubarek?” ■ 62 Inna as Yeccu: “Aqa d NECC! U kenniw ad tẓarem Mmis n bnadem ittɣima x ufusi n jjehd, ad dd-yas s iseynuten n ujenna.” ■ 63 Icarreg arrays n ikehhanen tcamir nnes uca inna: “Mayemmi neḥdaj ɛad řechud! 64 Aqa tesřim aceqqef nni! Min dd awem iḍharen?” Uca marra ḥekmen xas belli isdaheǧ řmewt. 65 Ca zzaysen bdan ssusufen xas, ttřeḥḥafen i uɣembub nnes, ccaten t s řpuniyyat, qqaren as: “Nabb!” Uca wtin t imxazniyyen ɣar uɣembub s imeddarḍan. ■
Ankar n Buṭrus
66 Řami tuɣa Cimɛun di řemraḥ swadday, tusa-dd din icten zi tiyya n arrays n ikehhanen. ■ 67 Umi teẓra Buṭrus ittweqqaḥ, texzar dayes, tenna: “Aqa tuɣa cek ak-d Yeccu Nnaṣiri.” 68 Maca netta inkar, inna: “War t ssineɣ, war fhimeɣ min teqqared.” Iffeɣ barra ɣar tesqift n tewwart, uca řexdenni issquqeɛ uyaẓiḍ. 69 Umi t teẓra tayya ijj n umur nneɣni, tebda teqqar i yenni din ibedden: “Aqa wa d ijjen zzaysen!” ■ 70 Maca netta inkar i umur nneɣni. Cwayt xenni nnan inni tuɣa din ibedden i Buṭrus: “S tidett, cek zzaysen nican minzi cek ɛawed d Ajalili. Řḥarḍ nnek amecnaw wenni nsen.” 71 Ibda ineɛɛeř ixef nnes, ittjjaǧa: “War ssineɣ Bnadem mixef tessawařem.” 72 Řexdenni issquqeɛ uyaẓiḍ wiss martayen. Ifekkar Cimɛun deg wawař i inna Yeccu: “Qbeř i ɣa issquqeɛ uyaẓiḍ wiss martayen, ad ayi tenkared třata n twařawin.” Xenni ibda ittru aṭṭas. ■