Amedya n umarjuɛ n tzayart d ixemmasen iɛeffanen
12
1 Ibda issawař akidsen s imedya: “Ijj n bnadem igga ijj n umarjuɛ n uḍiř, iẓẓu dayes tizayarin, iqewwar as-dd s ijj n wefray, iɣza tasirt n uḍiř, ibna dayes ṣṣumɛet uca yarhen i-t i ixemmasen uca isafar. ■ 2 Řami dd-yiweḍ řḥař, issekk ijj n umsexxar ɣar ixemmasen ḥima ad iksi tasɣart nnes zeg weřqaḍ n umarjuɛ n uḍiř. 3 Maca nitni ṭṭfen t, wtin t uca ssekken t ixwa. 4 Ɛawed issekk ɣarsen ijj n umsexxar nneɣni, arejmen t, marẓen as uca řami t ssbeḥtřen, uẓẓřen xas. 5 Ɛawed issekk-dd ɣarsen wenneɣni uca nɣin t uřa d netta. Ammu i issekk ɛad aṭṭas n inneɣni, hettken ca zzaysen s urekkuḍ d ca nneɣni zzaysen nɣin ten. 6 Ɣar uneggar issekk ɣarsen ayenni n mmis i ɣares i xas iɛizzen, inna: ‘Nican ad weqqaren mmi!’ 7 Maca ifeǧaḥen nni nnan jar asen: ‘Aqa d wa d awrit. Zidem, ad t neneɣ uca ad ɣarneɣ yiři řwart.’ ■ 8 Ksin t, nɣin t uca nḍaren t barra i umarjuɛ n uḍiř. 9 Min i ɣa yegg bab n umarjuɛ n uḍiř? Ad dd-yas ad ineɣ ixemmasen uca ad iwc amarjuɛ n uḍiř i inneɣni. 10 Ma war teɣrim tira aya? ...
‘Aẓru i tuɣa iɛiffen ibennayen,
aqa idweř d azeǧif n teɣmart. ■
11 Man aya ittwagg zi SIDI,
u man aya tesstebhat tiṭṭawin nneɣ.’ ” ■
12 Xsen ad t ṭṭfen maca nitni ggʷeden zi řɣaci, minzi fehmen belli tuɣa issawař xasen s umedya nni. Nitni jjin t uca uyuren.
Axeǧeṣ n ḍḍariba i qayṣar
13 Xenni ssekken ɣares ca n Ifarisiyyen u ca zi taddart n Hirudus, ḥima ad as ggen taxceft s wawařen nnes. ■
14 Umi dd-usin, nnan as: “A Amseɣɣar, neccin nessen aqa Cek d tidett, war teggʷided zeg iwdan, u war txezzared ca ɣar wudem n iwdan, maca tesseřmaded abrid n AREBBI s tidett. Ma iḥeǧeř ad newc ddariba i kuř ijjen zzayneɣ i qayṣar niɣ lla? Ma ittxeṣṣa aneɣ ad nxeǧeṣ ḍḍariba niɣ lla?”
15 Řami Netta yargeb x nnifaq nsen, inna asen: “Mayemmi i d ayi tᵉttjarrabem? Awyem ayi-dd ijj n dinar ḥima ad t ẓareɣ!”
16 Iwyen as-dd ijj n dinar. Xenni inna asen: “Wi yiřan taṣwirt-a d tira aya?” Nnan as: “N qayṣar!”
17 Yarra-dd Yeccu, inna asen: “Wcem xenni i qayṣar min iǧan i qayṣar u i AREBBI min iǧan i AREBBI.” Uca ttɛejben dayes. ■
Aseqsi n Iṣaduqiyyen x tnukra
18 Usin-dd ɣares ɛawed Iṣaduqiyyen inni iqqaren belli war din bu tnukra. Sseqsan t, nnan: ■
19 “A Amseɣɣar, aqa yura aneɣ Musa, mařa immut i ḥed umas uca ijja tamɣart, maca war dd-ijji bu tarrawt, ad yawi umas tamɣart nni uca ad as issgeɛɛed dduriyet i umas. ■ 20 Tuɣa din sebɛa n wawmaten. Amezwaru yiwi ict n temɣart uca awarni řami immut, war dd-ijji bu dduriyet. 21 Xenni yiwyi i-tt wenni wiss tnayen uca immut, war dd-ijji bu dduriyet uřa d netta, uca ammu uřa d wenni wiss třata. 22 Marra sebɛa nni iwyen tt, war dd-jjin bu dduriyet. Aneggar nsen marra temmut temɣart nni ɛawed. 23 Iwa di tnukra, xmi dd ɣa kkaren, umi ɣa tiři temɣart nni? Minzi nettat tuɣa d tamɣart i sebɛa nni marra.” 24 Yarra-dd Yeccu, inna asen: “Ma war txeṭṭim ca minzi war tessinem ca Idlisen d jjehd n AREBBI? 25 Maɣar xmi dd ɣa kkaren jar n imettinen, war tent ttiwyen d tamɣart, u war ssmiǧicen timɣarin i yeryazen, maca ad iřin amecnaw lmalakat i iǧan deg ijenwan. ■ 26 Maca zi jjihet n imettinen aqa ttwasnekkaren-dd: Ma war teɣrim deg wedlis n Musa, mammec akides issiweř AREBBI zi cbarq ak-d isennanen, inna: ‘D NECC, AREBBI n Ibrahim d AREBBI n Isḥaq d AREBBI n Yaɛqub!’? ■ 27 Netta maci d AREBBI n imettinen maca d AREBBI n yinni iddaren. S uyenni aqa kenniw txeṭṭam aṭṭas.”
Ttawṣeyyet tameqqrant
28 Umi isřa ijjen zeg imseřmaden n idlisen belli tuɣa ttemharwaḍen jar asen uca issen belli Netta aqa yarra-dd xasen mliḥ, xenni yusa-dd ɣares, isseqsa t: “Man tent iǧan d tawṣeyyet tamezwarut x kuřci?” ■ 29 Yarra-dd xas Yeccu: “Aqa tamezwarut x marra tiweṣṣa: ‘Seř a Israil! SIDI, AREBBI nneɣ, SIDI d Ijj. ■ 30 Ad texsed SIDI, AREBBI nnek s marra wuř nnek s marra řeɛmar nnek s marra řeɛqeř nnek s marra jjehd nnek.’ Ta d tawṣeyyet tamezwarut. 31 U tawṣeyyet wiss tnayen, amecnaw tanita, aqa d ta: ‘Ad texsed amqarreb nnek amecnaw ixef nnek.’ War din bu tewṣeyyet nneɣnit d tameqqrant x tina s tnayen.” ■ 32 Inna as umseřmad n idlisen: “Nican, a Amseřmad inu, s tidett tennid belli Netta d Ijjen, war din uřa d ijj nneɣni mɣir Netta, 33 u belli mařa ijj n bnadem ad t ixs s wuř marra, s řeɛqeř marra, s řeɛmar marra u s jjehd marra uca ad ixs amqarreb nnes amecnaw ixef nnes, aqa d man aya ḥsen zi marra tiɣarṣin n wecmaḍ d marra tiɣarṣin nneɣnit.” 34 Umi iẓra Yeccu belli yarra-dd s řeɛqeř, inna as: “Aqa cek war tiggʷijed ca x Tgeldit n AREBBI.” Xenni war iɛewweř ḥed ad t isseqsa uřa deg ict n tmesřact. ■
Man wen iǧan d mmis n Dawud?
35 Řami tuɣa isseřmad di Zzawect Tameqqrant iṭṭef Yeccu deg wawař, inna: “Mammec qqaren imseřmaden n idlisen belli Lmasiḥ d mmis n Dawud? ■ 36 Minzi Dawud s yixef nnes inna s Arruḥ Iqeddsen:
‘Inna SIDI i Sidi inu:
Qqim-dd x ufusi inu ař dd ɣa yarreɣ řɛedyan nnek
d tanebdat sadu iḍaren nnek.’ ■
37 S uya ittřaɣa as-dd Dawud: ‘Sidi inu!’ Manis dd-ikka d mmis?” Marra řɣaci tuɣa isřa as s řefraḥet.
Aɛřam ɣar řgens x imseřmaden n idlisen
38 Inna asen deg useřmad nnes: “Ḥḍam ixef nwem zeg imseřmaden n idlisen inni umi itteɛjib řḥař xmi i ɣa uyuren s řeɛbayat tizirarin u xmi i xasen i ɣa seǧmen iwdan di řeswaq, ■ 39 inni umi itteɛjib řekrasi n zzat di temzidawin, uřa d imucan imezwura ɣar imensiwen n wuraren, 40 inni ittetten tudrin n tijjař umi ttẓaǧan aṭṭas di ṭṭweɛ n ict n tewhibt. Aqa ina ad ksin řḥukm d ameqqran.” ■
Ṣṣedqet n tajjač
41 Am iqqim Yeccu qibač i ssenduq n ṣṣedqet, iẓra mammec ineṭṭar řɣaci tinɛacin di ssenduq. Aṭṭas n aytbab n wagřa tuɣa neṭṭaren dayes aṭṭas. ■ 42 Tusa-dd ict n tajjač d řmeskina tenḍar dayes tnayen n uqiyyat n nnḥas, qqaren asent ‘camunat’. □ 43 Xenni iřaɣa Yeccu i imeḥḍaren nnes, inna asen: “S tidett, Necc ad awem iniɣ, tajjač-a řmeskina aqa tenḍar dayes ktar x marra inni inḍaren di ssenduq n ṣṣedqet. ■ 44 Minzi marra nḍaren dayes zi min ɣarsen aṭṭas, maca ta zi drus nnes tenḍar dayes kuřci min ɣares, marra řeɛweč nnes.”