Lmuɛjiza n usecci n ktar n arebɛa-ařaf n yeryazen
8
1 Deg wussan nni, am tuɣa din ɛawed aṭṭas n řɣaci uca war tuɣi ɣarsen min ɣa ccen, iřaɣa Yeccu x imeḥḍaren nnes, inna asen: ■ 2 “Aqa zziǧzen ayi řɣaci, minzi qqimen akidi ɛad třata n wussan, war ɣarsen min ɣa ccen. 3 Mařa ssekkeɣ ten ɣar tudrin nsen am ɛad ǧuẓen, ad ttwaheyyfen deg webrid, minzi ca zzaysen usin-dd zi řaggʷaj.” 4 Arrin-dd xas imeḥḍaren nnes: “Zi manis izemmar ḥed ad issjjiwen ina s weɣrum da di řexřa aya?” 5 Isseqsa ten: “Mecḥař n tecnifin i ɣarwem?” Nnan: “Sebɛa.” 6 Xenni yumur řɣaci ad iqqim di temmurt, uca iksi sebɛa nni n tecnifin, u awarni řami iqada, yarẓa i-tent, iwca i-tent i imeḥḍaren nnes ḥima ad tent qeddmen, uca xenni qeddmen tent i řɣaci. 7 Tuɣa ɣarsen ɛawed cwayt n iseřman d imeẓyanen. Uca awarni řami ibarek, inna ad qeddmen ina ɛawed. 8 Ccin, jjiwnen, uca yarwen min iceṭṭen, aqa sebɛa n tsuǧatin. 9 Inni iccin tuɣa aten ɛraḥař di arebɛa-ařaf. 10 Xenni issekk i-ten, uca řexdenni inya di tɣarrabut ak-d imeḥḍaren nnes, uca yiweḍ ɣar jjwayeh n Dalmanuta. ■
Ifarisiyyen ttaren ict n řeɛřamet
11 Ffɣen Ifarisiyyen, bdan ttqacaḥen dayes, ttaren zzayes ict n řeɛřamet zeg ujenna ḥima ad t jarrben. ■
12 Issqinfed di Arruḥ nnes uca inna: “Mayemmi ittettar jjiř-a ict n řeɛřamet? S tidett, Necc ad awem iniɣ, ɛemmarṣ war d as temmewc i jjiř-a ict n řeɛřamet!” ■
13 Xenni ismeḥ daysen uca inya di tɣarrabut, uca iruḥ ɣar ujemmaḍ.
Antun n Ifarisiyyen
14 Maca imeḥḍaren nnes ttun ad kisen ksin aɣrum, uca war tuɣi ɣarsen walu di tɣarrabut mɣir ict n tecnift n weɣrum waha.
15 Uca Netta iɛřem asen, inna: “Xzarem, ḥḍam zeg wentun n Ifarisiyyen d wentun n Hirudus.” ■
16 Mmcawaren jar asen, nnan: “D man aya minzi war ɣarneɣ bu tecnifin n weɣrum.”
17 Maca yargeb Yeccu, inna asen: “Mayemmi temmcawarem belli war ɣarwem bu tecnifin n weɣrum? Ma war tucim, ma war tefhimem? Ma ɛad uřawen nwem qesḥen? ■
18 Ma ɣarwem tiṭṭawin maca war tᵉttwiřim? Ma ɣarwem imezzuɣen maca war tᵉttesřim? Ma war tefhimem ɛad?
19 Umi arẓiɣ xemsa n tecnifin n weɣrum i xemsa-ařaf n iwdan, mecḥař n tsuǧatin i iccuren s iřeqqʷaz i tyarwem?” Nnan as: “Tenɛac.” ■ 20 “U umi arẓiɣ sebɛa n tecnifin n weɣrum i arebɛa-ařaf, mecḥař n tsuǧatin iccuren s iřeqqʷaz i tyarwem?” Nnan: “Sebɛa!” ■ 21 Xenni inna asen: “Mammec ɛad war tefhimem ař řexxu?”
Asgenfi n ijj n udarɣař di Baytṣayḍa
22 Usin-dd ɣar Baytṣayda uca iwyen as-dd ijj n udarɣař, zawgen t ad iḥada wanita. 23 Netta imneɛ adarɣař zeg ufus, indeh i-t barra i dcar uca issusef di tiṭṭawin nnes, issars xas ifassen, isseqsa min ittwařa. ■ 24 Issgeɛɛed tamuɣři nnes, inna: “Ttwařiɣ iwdan gguren am ticejjura.” 25 Xenni issars ɛawed ifassen x tiṭṭawin nnes. Xenni iggenfa, idweř ittwařa marra mliḥ. 26 Issekk i-t ɣar taddart nnes, inna: “War d ttidef dcar, war t qqar i ḥed di dcar!”
Cchadet n Buṭrus x Yeccu
27 Xenni yuyur Yeccu ak-d imeḥḍaren nnes ɣar ředcur n Qayṣariya-Filippus. Deg webrid isseqsa imeḥḍaren nnes, inna asen: “Min qqaren iwdan min ɛniɣ Necc?” ■ 28 Arrin-dd: “Yuḥanna Amseɣḍaṣ!”, ca nneɣni qqaren: “Iliya!”, inneɣni qqaren: “Ijjen zeg inabiyyen!” ■ 29 Inna asen: “I kenniw min teqqarem xafi?” Yarra-dd Cimɛun, inna as: “Cek d Lmasiḥ, Mmis n AREBBI iddaren!” ■ 30 Yumur i-ten mliḥ maḥend war xas ssiwiřen uřa i yijj.
Yeccu izwar issiweř x řmewt d tnukra nnes i twařa tamezwarut
31 Ibda isseřmad aqa Mmis n bnadem ittxeṣṣa as ad iweddeb aṭṭas uca ad ittwasseḥqar zeg imɣaren n řgens d imeqqranen n ikehhanen d imseřmaden n idlisen, ad t nɣen uca awarni třata n wussan ad dd-ikkar ɛawed. ■ 32 Inna awař-a s bṭayṭay. Maca iksi t Buṭrus ɣares ɣar uɣezdis uca ibda ittwebbex i-t. 33 Xas uca inneqřeb, ixzar deg imeḥḍaren nnes uca iwebbex i Cimɛun, iqqar: “Aggʷej xafi awarni ayi, a cciṭan minzi cek war d ac icqi min iǧan n AREBBI, maca min iǧan n iwdan.” ■
34 Iřaɣa-dd i řɣaci ak-d imeḥḍaren nnes ɣares, inna asen: “Wenni ixsen ad ayi iḍfar, ad inkar ixef nnes, ad iksi ṣṣalib nnes uca ad ayi dd-iḍfar. ■ 35 Minzi wenni ixsen ad issenjem tudart nnes, ad tt ixsar, maca wenni i ɣa ixsaren tudart nnes di ṭṭweɛ inu u di ṭṭweɛ n Řexbar Aṣebḥan, ad tt issenjem. ■ 36 Minzi man řefḍeř n bnadem mařa yarbeḥ ddunect marra, maca iřqef i-t druct di řeɛmar nnes? 37 Minzi min ɣa iwc bnadem deg wemcan n řeɛmar nnes? ■ 38 Minzi wenni zzayi i ɣa isseḍḥan u zeg wawařen inu di jjiř-a izennan ixḍan, aqa uřa d Mmis n bnadem ad zzayes isseḍḥa xmi dd ɣa yas s uɛuǧi n Babas ak-d lmalakat iqeddsen.” ■