Amḥarweḍ ak-d Ifarisiyyen x Ccariɛa d tubbart n iwdan
7
1 Munen ɣares Ifarisiyyen d imseřmaden n idlisen i dd-yusin zi Urcalim. ■ 2 Umi ẓrin belli ca n imeḥḍaren nnes ccin aɣrum břa ma ad ssirden ifassen nsen, ɛeyyben xasen. 3 Minzi Ifarisiyyen d Wudayen war ttᵉtten mɣir awarni řami ssiriden ifassen s yijj n řuḍu mliḥ, minzi tteṭṭfen di tubbart n řejdud. 4 U řami dd-usin zi ssuq, war ttᵉtten mařa war ssirden d amezwaru, u aqa din aṭṭas n tmesřayin nneɣni qebřen tent maḥend ad zzaysent ṭṭfen ɛlaḥsab tubbart nsen am usird n řkisan d iɣarrafen d tebriqin n nnḥas d dduri n řectawat. 5 Xenni sseqsan t Ifarisiyyen d imseřmaden n idlisen: “Mayemmi war ḍfaren imeḥḍaren nnek tubbart n řejdud, maca ttᵉtten aɣrum am war ssiriden ifassen?” 6 Yarra-dd, inna asen: “Nican inebba Icaɛya xawem, a imnafqen, am mammec tura: ‘Řgens-a icenneɛ ayi s iyencicen nnes,
maca uř nsen iggʷej xafi! ■
7 Maca nitni cennɛen ayi baṭeř,
minzi sseřmaden tiɣuriwin tinni d tiweṣṣa n iwdan.’ ■
8 Tejjim tawṣeyyet n AREBBI , xenni tᵉṭṭfem di tubbart n iwdan amecnaw asird n iɣarrafen d řkisan u aṭṭas n tmesřayin nneɣni amecnaw tina.” 9 Inna asen: “Nican aqa tbeṭṭřem tawṣeyyet n AREBBI ḥima ad teqqim tbedd tubbart nwem.
10 Minzi Musa inna: ‘Weqqar babac d yemmac!’, u: ‘Wenni i ɣa ineɛřen babas niɣ yemmas, ittxeṣṣa ad immet.’ ■
11 Maca kenniw teqqarem: ‘Mařa ijj n weryaz inna i babas niɣ i yemmas: Min ma tzemmarem ad zzayi testenfɛem, aqa-t d ṣṣedqet i Arebbi!,
12 xenni war t tᵉttejjim qaɛ ad igg ca i babas d yemmas.
13 Ammu tbeṭṭřem awař n AREBBI s tubbart nwem i tᵉttsellamem, u tᵉtteggem aṭṭas n tmesřayin am tina.” ■
Tazdugi n wuř
14 Umi xas dd-iřaɣa marra řɣaci ɛawed, inna asen: “Sřem-dd ɣari marra uca fehmem! ■
15 War din uřa d ict n řḥajjet i dd-ittadfen ɣar bnadem zi barra tzemmar ad t tessexmej. Maca min i dd-itteffɣen zi bnadem, aqa man aya issexmaj bnadem. ■
16 Wenni ɣar ǧan imezzuɣen i useǧi, ejj i-t ad iseř.”
17 Umi dd-yudef ɣar taddart zi řɣaci, sseqsan t imeḥḍaren nnes x umedya nni. ■
18 Inna asen: “Ma kenniw ɛad břa řefhamet? Ma war tefhimem ca belli marra min ɣa yadfen bnadem zi barra, war izemmar ad t issexmej,
19 minzi man aya war dd-ittidef ca ɣar wuř nnes, maca ɣar uɛeddis, xenni ad iffeɣ ɣar wemcan nnes, am issizdeg marra macca.” 20 Xenni inna: “Min i dd-itteffɣen zi bnadem d man aya issxemmaj bnadem. 21 Minzi zi daxeř, zeg wuřawen n iwdan i dd-itteffɣen ixarriṣen iɛeffanen: zzina, farq-ccɣeř, tukkarḍa, anɣay, ■ 22 ṭṭmeɛ, řɣar, taḥraymect, afucceḥ, tiṭṭ taɛeffant, aceqqef, tuffet d tubbuheřya. 23 Marra timesřayin-a tiɛeffanin tteffɣent-i-dd zi daxeř uca ssxemmajent bnadem.”
Liman n temɣart di temmurt n Tirus d Ṣidun
24 Ikkar ssenni uca iruḥ ɣar temmurt n Ṣur d Ṣaydun. Řami dd-yudef ɣar ict n taddart, war ixs ad t issen ḥed, waxxa amenni war izemmar ad innufar. ■ 25 Minzi ict n tmeṭṭut, ɣares yeǧis dayes ijj n řaryaḥ d amengus, tesřa xas deɣya, uca tusa-dd ɣares, tewḍa as ɣar iḍaren nnes. 26 Tuɣa tamɣart-a d ict n tbarranit zi temmurt n Suriya d Finiqiya. Uca tzawg i-t maḥend ad issuffeɣ cciṭan zeg yeǧis. 27 Maca Yeccu inna as: “Ejj iḥenjiren amezwar ad jjiwnen, minzi war iřiq ad ittwakkes weɣrum n iḥenjiren ad immenḍar i yiṭan.” 28 Maca nettat tarra-dd, tenna as: “Wah, a Sidi, uřa d iṭan ttᵉtten iřeqqʷaz n iḥenjiren sadu ṭṭabřa.” 29 Inna as Yeccu: “X ssibbet n wawař-a i tennid, uyur! Aqa cciṭan iffeɣ zeg yeǧim.” 30 Řami dd-tusa ɣar taddart nnes, tufa yeǧis tezzeř di qama u cciṭan ittwassuffeɣ zzayes.
Asgenfi n ijj n bnadem azinun
31 Awarni řami dd-iffeɣ ɛawed zi temmurt n Ṣur d Ṣaydun, icuqq di řwest n temmurt n Dikapulis uca yiweḍ ɣar řebḥar n Ljalil. ■ 32 Iwyen-dd ɣares ijj n udehcur, iwɛar xas ad issiweř, uca ttaren zzayes ad xas issars afus nnes. ■ 33 Issiggʷej i-t zi řɣaci ɣar ijj n uɣezdis uca igga as iḍewḍan deg imezzuɣen nnes, issusef uca iḥada iřes nnes. 34 Xenni ixzar ɣar ujenna, issqinfed, inna as: “Nurzem!” 35 Řexdenni nnurzmen imezzuɣen nnes uca tefsi tesɣunt n yiřes nnes, ibda issawař nican. 36 Iɛřem asen war t qqaren i ḥed, maca mecḥař ma ten yumur ammu, waxxa amenni tuɣa ssuffuɣen xas řexbar mahu. 37 Uca tbehten s unexřiɛ ařami nnan: “Marra igga i-t mliḥ! Yarra idehcar ttesřan d ignawen ssawařen.” ■