Asɛuǧi n Yeccu x wedrar ak-d Musa d Iliya
9
1 Uca inna asen: “S tidett, Necc ad awem iniɣ, aqa ca zeg inni da ibedden war ttqasin ca řmewt ař ɣa ẓaren Tageldit n AREBBI, tenni i dd ɣa yasen s jjehd.” ■ 2 Awarni setta n wussan Yeccu yiwi-dd akides Buṭrus d Yaɛqub d Yuḥanna weḥḥedsen ɣar ijj n wedrar yuɛřan uca ibeddeř addud nnes qibač nsen. ■ 3 Arruḍ nnes idweř yařeqq, d acemřař aṭṭas amecnaw adfeř, war izemmar uřa d ijj n bnadem x temmurt ad issemřeř amenni. 4 Iḍhar asen-dd Iliya ak-d Musa am tuɣa ssawařen ak-d Yeccu. 5 Iṭṭef Buṭrus deg wawař, inna i Yeccu: “A Amseřmad inu, aqa mliḥ umi da neǧa, ejj aneɣ ad newwet třata n iqiḍan, ijjen i Cek, ijjen i Musa u ijjen i Iliya.” 6 Minzi tuɣa iweddar as min ɣa yini, minzi nitni ggʷeden aṭṭas. 7 Ikka-dd useynu issduři i-ten s tiři nnes uca třaɣa-dd ict n tmijja zeg useynu, teqqar: “Wa d Mmi iɛizzen, sřem ɣares!” ■ 8 Umi ssgeɛɛden nitni tiṭṭawin nsen, deg ict n tecti war qqimen ttwařan ɛad ḥed akidsen mɣir Yeccu weḥḥdes. 9 Ařami dd-hwan zeg wedrar, yumur i-ten ḥima war ttɛiwiden i ḥed walu zi min ẓrin ař dd ɣa ikkar Mmis n bnadem jar n imettinen. ■
10 Xemmřen awař-a i yixef nsen am tuɣa ttseqsan ixef nsen min ixs ad yini wawař-a: ‘Ař dd ɣa ikkar jar n imettinen’?
11 Sseqsan t, nnan as: “Mayemmi qqaren imseřmaden n idlisen belli ittxeṣṣa ad dd-yas Iliya d amezwaru?” ■
12 Yarra-dd, inna asen: “Aqa Iliya ad dd-yas d amezwaru uca ad yarr kuřci, uca am mammec tura x Mmis n bnadem, ad iweddeb aṭṭas uca ad t sseḥqaren. ■
13 Maca Necc ad awem iniɣ, Iliya aqa yusa-dd uca ggin zzayes min tuɣa xsen am mammec xas tura.” ■
Asgenfi n ijj n webřiɣ dayes řaryaḥ amengus
14 Řami dd-yusa ɣar imeḥḍaren, iẓra ijj n řɣaci d ameqqran ittenneḍ asen-dd, u imseřmaden n idlisen ttqacaḥen ten.
15 Řami t iẓra marra řɣaci, tbehten aṭṭas, uca uzzřen-dd ɣares, seǧmen xas.
16 Xenni isseqsa imseřmaden n idlisen: “Min xef kidsen tᵉttqacaḥem?”
17 Yarra-dd ijjen zi řɣaci, inna: “A Amseɣɣar, iwyeɣ-dd mmi ɣarek, aqa dayes řaryaḥ wenni t yarrin d agnaw. ■
18 Xmi t itteṭṭef, ineṭṭar i-t ɣar temmurt, itteffeɣ as-dd ukuffu zeg uqemmum, ittɣezza tiɣmas nnes uca ittaẓeɣ. Nniɣ i imeḥḍaren nnek ad t ssuffɣen, maca war d as zemmaren.”
19 Yarra-dd, inna asen: “A jjiř war yuminen, mecḥař kidwem i ɣa qqimeɣ, mecḥař i kenniw i ɣa yarbuɣ ɛad? Awyem t-i-dd ɣari!”
20 Uca iwyen t-i-dd ɣares. Umi t iẓra, řexdenni ijbed i-t řaryaḥ ammu d wammu, ařami iwḍa ɣar temmurt, ibda ittbarkikkiḍ, ittekk as-dd ukuffu zeg uqemmum. ■ 21 Yeccu isseqsa babas: “Mecḥař zeg wami t-i-dd-iḥkem uya?” Inna as: “Zi temẓi nnes. 22 Aṭṭas n imuren ineṭṭar i-t di tmessi u deg waman ḥima ad t isshellek. Maca mařa tzemmared x ca, ɛawen ayi u ḥinn xafi!” 23 Inna as Yeccu: “Mařa tzemmared ad tamned, aqa kuřci izemmar i wenni yumnen.” ■ 24 Řexdenni isɣuyy babas n uḥenjir s imeṭṭawen, inna: “Umneɣ, a Sidi, ɛawen l’iman ineqsen inu.” 25 Umi iẓra Yeccu řɣaci idduqqez-dd ɣares, iwebbex řaryaḥ amengus, inna as: “A řaryaḥ agnaw adehcur, Necc umureɣ cek: Ffeɣ zzayes! War ɣares dakkʷař ɛad ɛemmarṣ!” 26 Isɣuyy cciṭan nni aṭṭas, ijebbed i-t aṭṭas ammu d wammu uca iffeɣ zzayes. Xenni idweř uḥenjir am ijj n umettin, ařami tuɣa nnan aṭṭas, aqa immut. 27 Iṭṭef i-t Yeccu zeg ufus nnes, issbedd i-t.
28 Umi dd-yudef ɣar taddart, sseqsan t imeḥḍaren nnes weḥḥedsen: “Mayemmi war nzemmar neccin ad t nessuffeɣ?” ■ 29 Inna asen: “Ddegg-a war izemmar ad ittwassuffeɣ uřa s ict n řḥajjet mɣir s uẓummi d tẓaǧit waha.”
Yeccu izwar issiweř x řmewt d tnukra nnes i twařa wiss tnayen
30 Ffɣen-dd ssenni uca cuqqen di Ljalil. Netta tuɣa war ixs ad t iɛqeř uřa d ijjen. ■ 31 Tuɣa isseřmad imeḥḍaren nnes, iqqar asen: “Aqa Mmis n bnadem ad immewc deg ifassen n iwdan, ad t nɣen uca awarni řami t ɣa nɣen, ad dd-ikkar deg wass wiss třata.” 32 Maca nitni war fhimen i wawař-a uca ggʷeden ad t sseqsan x uya.
Man wen iǧan d ameqqran?
33 Xenni usin-dd ɣar Kafarnaḥum u awarni řami udfen di taddart isseqsa ten: “Di min di tuɣa tḥarrḍem ak-d wayawya deg webrid?” ■ 34 Maca sqaren, minzi tuɣa ttemqacaḥen deg webrid di win iǧan d ameqqran zzaysen. 35 Iqqim, iřaɣa-dd i tenɛac, inna asen: “Mařa ḥed ixs ad yiři d amezwar, ad yiři d aneggar kuřci u d amsexxar qaɛ i marra.” ■ 36 Iksi aḥenjir ameẓyan, issbedd i-t di řwest nsen, idarreɛ as, uca inna asen: ■ 37 “Wi ɣa iqebřen mɣir ijj n bnadem am uḥenjir-a s Yisem inu, aqa iqbeř ayi u wi d ayi ɣa iqebřen, war d ayi iqebbeř, maca iqebbeř wi d ayi-dd issekken.” ■
Wi war iǧin ḍidd nneɣ, aqa-t akidneɣ
38 Yarra-dd xas Yuḥanna, inna as: “A Amseřmad inu, neẓra ijjen issuffuɣ ccwaṭen s Yisem nnek u nemneɛ i-t minzi netta war dd aneɣ iḍeffar.” ■ 39 Inna Yeccu: “War t mennɛem ca, minzi war din uřa d ijj i ɣa yeggen timegga ijehden s Yisem inu, uca řexdenni deɣya ggur ad xafi issiweř s řɣar. ■ 40 Minzi wi war iǧin ḍidd nneɣ, aqa-t akidneɣ. 41 Wi kenniw i ɣa isseswen s yijj n řkas n waman minzi aqa kenniw n Lmasiḥ, aqa s tidett, Necc ad awem iniɣ, netta war ixessar ca řmunet nnes. ■
Yeccu iɛřem iwdan x min iɣekkʷan i ddnub
42 U wi i ɣa isseɣwan ijjen zeg imeẓyanen-a i dayi yumnen, iḥřa as ad as tᵉttwagg ict n teṣḍart n tsirt tedqeř deg iri nnes, ad immenḍar di řebḥar. ■ 43 Mařa isseɣwa cek ufus nnek, qess i-t. Iḥřa ac ad tadfed ɣar Tudart d ameɛḍuř x wadaf s tnayen n ifassen di jᵉhennama, ■ 44 mani tikecca nsen war tᵉttmetti u timessi war txessi. ■ 45 Mařa isseɣwa i cek uḍar nnek, qess i-t. Iḥřa ac ad tadfed ɣar Tudart d ameɛḍuř x uweṭṭu s tnayen n iḍaren di jᵉhennama, 46 mani tikecca nsen war tᵉttmetti u timessi war txessi. 47 Mařa tesseɣwa i cek tiṭṭ nnek, qeřɛ i-tt. Iḥřa ac ad tadfed ɣar Tgeldit n AREBBI s ict n tiṭṭ x uweṭṭu s tnayen n tiṭṭawin di tmessi n jᵉhennama, 48 mani tikecca nsent war tᵉttmetti u timessi war txessi. 49 Minzi kuř ijjen ad ittwameǧeḥ s tmessi u kuř taɣarṣt ad tᵉttwameǧeḥ s tmeǧaḥt. ■ 50 Tameǧaḥt teṣbeḥ, maca mařa tameǧaḥt ixsar uředdi nnes, s min zi tt i ɣa tɛedřem. Ad tiři tmeǧaḥt daywem uca ḥḍam řehna jar awem.” ■