Amedya n ɛecra n teɛzariyyin
25
1 “Xenni ad tiři Tgeldit n ijenwan amecnaw ɛecra n teɛzariyyin iwyent řefnarat nsent, ffɣent ḥima ad mmeřqent ak-d wesři d tesřit. 2 Xemsa zzaysent d timiɣisin u xemsa d tifɣař. 3 Tinni iǧan d tifɣař ksint řefnarat nsent, maca war iwyint ca zzect. 4 Timiɣisin iwyent-i-dd zzect di tziyyatin nsent ak-d řefnarat nsent. 5 Řami iɛḍeř umuřay, bdant ttnudument marra uca ṭṭṣent. 6 Di řwest n ǧiřet tuɣa din tɣuyyit: ‘Xzarem, aqa amuřay yusa-dd, ffɣem-dd, ad t teřqam!’ 7 Xenni kkarent teɛzariyyin nni, ssewjdent-i-dd řefnarat nsent. 8 Tifɣař nnant i tmiɣisin: ‘Wcent aneɣ zi zzect nkent minzi řefnarat nneɣ xesyent.’ 9 Arrint-i-dd xasent tmiɣisin, nnant: ‘Ɛemmarṣ, war d aneɣ ittqeddi i neccin d kennint. Ruḥent ɣar isebbaben maḥend ad tesɣent i yixef nkent.’
10 Řami ruḥent nitenti ḥima ad sɣent, yusa-dd umuřay u tinni tuɣa iwejjden udfent akides ɣar wurar uca tbelleɛ tewwart.
11 Awarni man aya usint teɛzariyyin nneɣni, qqarent: ‘A siditneɣ, a siditneɣ, arzem aneɣ!’
12 Netta maca yarra-dd, inna: ‘S tidett, necc ad akent iniɣ, war kennint ssineɣ.’
13 S uyenni ḥḍam, minzi kenniw war tessinem ca ass uřa d tasaɛɛet i di dd ɣa yas Mmis n bnadem.” ■
Amedya n imsexxaren d talintat nsen
14 “Minzi tamesřact am ijj n bnadem isafar barra i temmurt nnes, iřaɣa-dd x imsexxaren nnes uca ikellef i-ten x wagřa nnes. ■
15 Iwca i yijjen xemsa n talintat, i wenneɣni tnayen, i wenni wiss třata icten n talint, kuř ijjen ɛlaḥsab tizemmar nnes, řexdenni ikkar, isafar. □
16 Wenni iṭṭfen xemsa n talintat, iruḥ, isebbeb daysen uca yarbeḥ xemsa.
17 Amenni ɛawed wenni iṭṭfen tnayen n talintat, yarbeḥ tnayen nneɣni.
18 Maca wenni iṭṭfen ict n talint, iruḥ, iɣza di temmurt uca issnuffar tmenyat n bab nnes.
19 Řami teɛdu aṭṭas n řweqt yusa-dd bab n imsexxaren nni uca igga akidsen řeḥsab. 20 Xenni yusa-dd wenni iṭṭfen xemsa n talintat, yiwi-dd xemsa n talintat nneɣni, inna: ‘A sidi, tewcid ayi xemsa n talintat, aqa da, arebḥeɣ xemsa nneɣni ktar.’ 21 Yarra-dd xas bab nnes, inna: ‘Mliḥ i teggid, a amsexxar aṣebḥan d umtiqqi. Tuɣa cek d amtiqqi x drus, ad ac ggeɣ x waṭṭas, adef-dd ɣar řefraḥet n sidi nnek.’ 22 Xenni yusa-dd ɛawed wenni iṭṭfen tnayen n talintat, inna: ‘A sidi, tewcid ayi tnayen n talintat, aqa arebḥeɣ tnayen nneɣni ktar.’ 23 Inna as sidi nnes: ‘Mliḥ i teggid, a amsexxar aṣebḥan d umtiqqi. Tuɣa cek d amtiqqi x drus, ad ac ggeɣ x waṭṭas, adef-dd ɣar řefraḥet n sidi nekk.’
24 Maca wenni iṭṭfen ict n talint, yusa-dd ɛawed, inna: ‘A sidi, ssneɣ aqa cek d bnadem tqesḥed, tmejjared mani war tzarrɛed, tyarrwed mani war tᵉssarwated. 25 S uyenni ggʷedeɣ uca ruḥeɣ, ssnuffareɣ talint nnek di temmurt. Aɣac tenni nnek.’ 26 Yarra-dd sidi nnes, inna as: ‘A amsexxar aɛeffan ameɛguz, aqa tessned belli aqa mjareɣ mani war zarɛeɣ u yarweɣ mani war ssarweteɣ. 27 Xenni mři tiwyed tmenyat inu ɣar řbanku, xenni necc, xmi dd ɣa yaseɣ, ad ttareɣ min iǧan inu s arriba. 28 Kksem as talint nni, ewc i-tt i wenni ɣar iǧa ɛecra n talintat!’ 29 Minzi i kuř ijjen wenni i ɣar iǧa ad as immewc uca ad ɣares yiři s waṭṭas, maca wenni war ɣar iǧi uřa d min ɣares ad as ittwakkes. ■ 30 Nḍarem amsexxar ibeṭṭřen ɣar barra deg uneggar n taǧest mani i ɣa iřin imeṭṭawen d uɣezzi n teɣmas.” ■
Řḥukm n Lmasiḥ x iḥuřiyyen u x iɣayḍen
31 “Xmi dd ɣa yas Mmis n bnadem deg uɛuǧi nnes u marra lmalakat nnes iqeddsen akides, xenni ad iqqim x řɛarc n uɛuǧi nnes. ■ 32 Ad ssmunen marra řegnus qibač nnes uca Netta ad ten issebḍa amecnaw ameksa issbeṭṭa iḥuřiyyen x iɣayḍen. ■ 33 Netta ad igg iḥuřiyyen x ufusi nnes, maca iɣayḍen x uzeřmaḍ nnes.
34 Řexdenni ad ini Ujeǧid i yenni x ufusi nnes: ‘Asem-dd, a kenniw inni ittwabarken zi Baba, wartem Tageldit i d awem dd-iwejden zeg wami tᵉttwagg ddunect. ■ 35 Minzi tuɣa dayi řaẓ uca kenniw tesseccem ayi. Tuɣa ffudeɣ, tewcim ayi ad sweɣ. Tuɣa ayi d abarrani, kenniw tesszedɣem ayi, ■ 36 tuɣa ayi d aɛaryan, kenniw tessyarḍem ayi, tuɣa heřceɣ, kenniw tessijem-dd xafi, tuɣa ayi di řeḥbes, kenniw tusim-dd ɣari.’ ■
37 Xenni ad xas dd-arren imseggaden, qqaren: ‘A Siditneɣ, meřmi Cek neẓra tǧuẓed uca nessecc i Cek, niɣ meřmi Cek neẓra tᵉffudded uca newc ac ad teswed? 38 Meřmi Cek neẓra d abarrani uca nessezdeɣ i Cek, niɣ d aɛaryan uca nessyarḍ i Cek? 39 Meřmi Cek neẓra theřced niɣ di řeḥbes uca nusa-dd ɣarek?’
40 Ad dd-yarr ujeǧid, ad asen yini: ‘S tidett, Necc ad awem iniɣ, min i teggim i yijjen zeg wawmaten imeẓyanen inu, i Necc umi t teggim.’ ■
41 Řexdenni ad yini i yenni iǧan x uzeřmaḍ nnes: ‘Beɛɛdem xafi, a kenniw inni ittwaneɛřen, ɣar tmessi n řebda i iwejden i ibřis d lmalakat nnes. ■ 42 Minzi tuɣa dayi řaẓ war d ayi tesseccem, ffudeɣ war d ayi tewcim ad sweɣ. 43 tuɣa ayi d abarrani, kenniw war d ayi tesszedɣem, tuɣa ayi d aɛaryan, war d ayi tessyarḍem, heřceɣ u ttwaḥebseɣ war xafi dd-tessijem ca.’
44 Řexdenni uřa d nitni ad xas dd-arren, ad inin: ‘A Siditneɣ, meřmi Cek neẓra teǧuẓed niɣ tᵉffudded niɣ d abarrani niɣ d aɛaryan niɣ theřced niɣ di řeḥbes, xenni neccin war xak nsexxar ca?’ 45 Xenni ad xasen dd-yarr, ad yini: ‘S tidett, Necc ad awem iniɣ: Min war teggim i yijjen zeg wawmaten imeẓyanen inu, i Necc umi war t teggim ɛawed.’ ■ 46 Ad raḥen nitni ɣar řeɛdab ittduman, maca imseggaden ɣar Tudart ittduman.” ■