Yeccu issawař x tuqqat n ddunect-a
24
1 Xenni yuyur Yeccu, iffeɣ zi Zzawect Tameqqrant. Usin-dd ɣares imeḥḍaren nnes ḥima ad as ssecnen řebniyyat n Zzawect Tameqqrant. ■ 
Zzawect Iqeddsen di řweqt Irumaniyyen (Mt. 24:1)
3 Umi tuɣa iqqim x wedrar n Zzitun, usin-dd ɣares imeḥḍaren nnes, am tuɣa ttemsawařan, nnan: “Ini aneɣ, meřmi i ɣa imsar man aya u man řeɛřamet n twasit nnek u n qeṭṭu n ddunect?” ■ 4 Yeccu yarra-dd, inna asen: “Ḥḍam ixef nwem, war kenniw iɣekkwi ḥed. ■ 5 Minzi aṭṭas ad dd-asen s Yisem inu, ad inin: ‘Aqa d NECC, Lmasiḥ!’, uca ad ɣwan aṭṭas. ■ 6 Uca ad tesřem x řbaruḍ u x řexburat n garrat. Ɣarwem aqa ad teggʷedem, minzi s uɣiř ad yiři man aya, maca war ittiři ɛad d aneggar. 7 Minzi řgens ad imneɣ ak-d řgens nneɣni u tageldit ak-d tgeldit nneɣni, ad yiři řaẓ d řehřacat yewɛaren d inhezzan n temmurt da d diha. ■ 8 Maca marra man aya d beddu n řewjeɛ n tarut waha. 9 Xenni ad kenniw dd-awyen ɣar řeḥṣaret uca ad kenniw nɣen, u marra řegnus ad kenniw carhen zi ssibbet n Yisem inu. ■
10 Řexdenni ad wḍan aṭṭas, ad sellmen ijjen wenneɣni uca ad carhen ijjen wenneɣni.
11 Ad kkaren waṭṭas n inabiyyen issxarriqen uca ad sseɣwan aṭṭas. ■
12 S waṭṭas n řmuɛṣiyyet ad tudrus tayri n waṭṭas n iwdan, □ ■
13 maca wi i ɣa iṣbaren ɣar uneggar, aqa netta ad iddar. ■
14 Řexbar-a Aṣebḥan n Tgeldit ad zzayes barrḥen di ddunect marra d cchadet i marra řegnus uca řexdenni ad dd-yas uneggar.”
15 “Xmi i ɣa tẓarem nnɛi n wareyyeb, min xef issiweř unabi Daniyal, deg wemcan iqeddsen - ejj wenni t i ɣa iɣaren ad iften - ,■
16 řexdenni jjem inni iǧan di Yahudiyya ad arewřen ɣar idurar.
17 Wenni iǧan x tzeqqa war dd-ihekkwi ca ḥima ad iksi ca zi taddart nnes,
18 u wenni iǧan deg iyyar, war dd-iddikkʷiř ca ḥima ad dd-yawi arruḍ nnes.
19 Uct x tinni iǧan s ddeyset d tinni issuṭṭuḍen deg wussan nni! 20 Ẓaǧem ḥima war tᵉttiři tarewřa nwem di řmecta niɣ di ssebt, ■ 21 minzi řexdenni ad tiři řmeḥnet tameqqrant i war imsaren ɛemmarṣ zeg wami teǧa ddunect ař i řexxu u ɛemmarṣ war tᵉttiři ɛad. ■ 22 Mři ussan nni war ttwasmeẓyen, xenni war ittwassenjem uřa d ijj n bnadem, maca ussan nni ad ttwasmeẓyen di ṭṭweɛ n yinni ittwafarzen. 23 Mařa inna awem ḥed: ‘Xzarem, aqa da Lmasiḥ!’ niɣ: ‘Aqa-t diha!’ war t ttimnem. ■ 24 Minzi ad iřin imasiḥen issxarriqen d inabiyyen issxarriqen, ad ggen řeɛřamat d lmuɛjizat ḥima, mři zemmaren, ad ɣwan ɛawed inni ittwafarzen. ■ 25 Xzarem, aqa nniɣ awem t qbeř. 26 Mařa nnan awem: ‘Xzarem-dd, Netta aqa-t di řexřa!’, war ttriḥem ca din, niɣ: ‘Xzarem-dd, Netta aqa-t daxeř i wexxam!’, war t ttimnem. ■ 27 Minzi amecnaw ajjaj i dd-itteffɣen zi ccarq uca ittegg tafawt ař řɣarb, ammu i ɣa tiři twasit n Mmis n bnadem. 28 Mani i ɣa tiři řxecbet, diha ad munen ineḍḍiwen.” ■
29 “Řexdenni awarni řmeḥnet n wussan nni, ad tbarcen tfuct u taziri war tᵉttic ɛad ṭṭya nnes u itran ad dd-wḍan zeg ujenna u ṣṣulaṭat n ijenwan ad ttwanhezzent. ■ 30 Xenni ad dd-teḍhar řeɛřamet n Mmis n bnadem deg ujenna u marra tiqebbař n temmurt ad wtent agejdur uca ad ẓaren Mmis n bnadem yusa-dd x useynu s jjehd u s izřan n uṣebbeḥ. ■ 31 Netta ad issekk lmalakat nnes s řḥess ijehden n uṣuḍi deg uyicc n icarri, uca ad dd-ssmunent inni ittwafarzen zi arebɛa n iɣezdisen n usemmiḍ, zi ṭṭarf aneggaru n ijenwan ař wenneɣni.” ■
32 “Řemdem zeg wartu amedya aya: xmi i ɣa dewřen řefruɛ nnes d iřeqqaɣen, ad dd-ssuffɣen tifray, ad tessnem aqa anebdu yudes-dd. ■ 33 Ammu ɛawed kenniw, xmi i ɣa tẓarem marra man aya, ad tessnem aqa yudes-dd, ɣar tewwart.”
34 “S tidett, Necc ad awem iniɣ: Jjiř-a war iɛeddu ař ɣa imsar man aya marra. 35 Ajenna d temmurt ad ɛdun maca awařen inu war ɛeddun ɛemmarṣ. ■
Arebbi weḥḥdes i issnen ass d tsaɛɛet
36 Maca x wass nni niɣ x tasaɛɛet nni war xas issin uřa d ijj, uřa d lmalakat n ijenwan, mɣir Tbabat weḥḥdes. ■ 37 Am mammec tuɣa iǧa deg wussan n Nuḥ ammu i ɣa tiři ɣar twasit n Mmis n bnadem. ■ 38 Minzi am mammec ten tuɣa deg wussan qbeř ṭṭufan, ttᵉtten, sessen, meǧcen u ssmeǧacen ař ass i di yudef Nuḥ deg uɣarrabu, □ ■ 39 uca war ucin walu ařami dd-yusa ṭṭufan, imḥa i-ten marra, ammu i ɣa tiři ɣar twasit n Mmis n bnadem. 40 Di řweqt nni ad iřin tnayen deg iyyar, ijjen ad t ksin u wenneɣni ad t jjen. ■ 41 Tnayen n temɣarin ad ḥaryent s tsirt, icten ad tt ksin u tenneɣni ad tt jjen. 42 Xenni ḥḍam, minzi war tessinem ca di man tasaɛɛet i dd ɣa yas Siditwem. ■
43 Maca ssnem aya: mařa bab n taddart issen tasaɛɛet n ḥeṭṭu n ǧiřet nni di dd ɣa yas uceffar, iři iqqim iḥeṭṭa, war t ittejji ad yadef ɣar taddart nnes. ■ 44 S uyenni, iřim twejdem uřa d kenniw, minzi Mmis n bnadem ad dd-yas deg ict n tsaɛɛet war tt tᵉttrijim.”
X wi iǧan d amsexxar amtiqqi d amiɣis
45 “Wi iǧan xenni d amsexxar amtiqqi d amiɣis i igga bab nnes ḥima ad ibḍa x imsexxaren min ɣa ccen di řweqt nnes? ■ 46 Sseɛd n umsexxar wenni i ɣa yafen sidis iřha ammu xmi dd ɣa yas. 47 S tidett, Necc ad awem iniɣ, ad t igg x marra agřa nnes. 48 Maca mařa amsexxar aɛeffan nni ad yini deg wuř nnes: ‘Sidi inu iɛeṭṭař!’, 49 uca ibda iccat imsexxaren inni akides iǧan, ad icc ad isu ak-d imeskaren, 50 xenni ad dd-yas sidis n umsexxar nni deg wass i di war t ittriji u di tsaɛɛet war tt issin, 51 ad t iqess d iwetwiten uca ad tiři tesɣart nnes ak-d imnafqen. Din i ɣa yiřin imeṭṭawen d uɣezzi n teɣmas.” ■