Tameɛmuč n Wudayen maḥend ad nɣen Yeccu
26
1 Awarni řami ikemmeř Yeccu awařen-a, inna i imeḥḍaren nnes: 2 “Tessnem belli awarni tnayen n wussan ad yiři Řɛid n Tɣarṣt n Useɛdu. Řexdenni ad immewc Mmis n bnadem ḥima ad ittwaṣelleb.” ■ 3 Řexdenni munen imeqqranen n ikehhanen d imseřmaden n idlisen d imɣaren n řgens di řemraḥ n arrays n ikehhanen, wenni umi qqaren Qayafa, ■ 4 uca mcawaren mammec i ɣa ṭṭfen Yeccu s teḥraymect uca ad t nɣen. 5 Maca nnan: “War ittiři di řɛid ḥima war ittekkar uɣewweɣ di řgens.” Adhan n Yeccu di Bayt-Ɛanya
6 Řami tuɣa Yeccu di Bayt-Ɛanya, di taddart n Cimɛun, wenni di iǧa řbarṣ, 7 tusa-dd ɣares ict n temɣart s ict n tqedduḥt n ulabaster teccur s ict n zzect i wedhan iɣřan uca tfarreɣ i-tt x uzeǧif nnes amen iqqim Yeccu ɣar ṭṭabřa. ■
8 Umi ẓrin imeḥḍaren man aya, iqqes asen řḥař aṭṭas, nnan: “Min umi teǧa txessart-a? 9 Tuɣa izemmar ad temmenz zzect-a n wedhan s ttaman d ameqqran, uca xenni ad temmewc i imezřaḍ.”
10 Maca Yeccu tuɣa issen man aya, inna: “Mayemmi tziyyarem x temɣart-a, minzi nettat tegga ayi ict n řxedmet teṣbeḥ.
11 Minzi imezřaḍ aqa aten řebda akidwem, maca Necc war kiwem ttiřiɣ i řebda. ■
12 Minzi nettat, mařa tfarreɣ-dd zzect-a i wedhan x arrimet inu, aqa tegga man aya i usewjed n wenḍeř inu.
13 S tidett, Necc ad awem iniɣ: Mani ma i ɣa ittwabarreḥ Řexbar-a Aṣebḥan zzayi di marra ddunect, ad ssiwřen ɛawed x min dayi tegga, d řiḍaret i nettat.”
Yahuda izzenz ixef nnes maḥend ad isellem Yeccu
14 Řexdenni iřuḥ ijjen zi tenɛac, qqaren as Yahuda Isxariyuṭi, ɣar imeqqranen n ikehhanen, ■
15 inna: “Min d ayi ɣa tewcem maḥend ad awem sellmeɣ Yeccu?” Uca waɛden t s třatin n řewzen n nnuqart. ■
16 Ssenni tuɣa yarezzu ict n tewwart ḥima ad t isellem.
Amensi n Tɣarṣt n Useɛdu
17 Deg wass amezwaru n Řɛid n Weɣrum břa Antun, usin-dd imeḥḍaren ɣar Yeccu, nnan: “Mani texsed ad nessewjed maḥend ad tecced Taɣarṣt n Useɛdu?” ■
18 Inna asen: “Uyurem ɣar tendint ɣar ijj n fřan, inim as: ‘Amseřmad nneɣ iqqar: Aqa řweqt inu tiweḍ-dd, ad ɣarek ggeɣ Řɛid n Taɣarṣt n Useɛdu ak-d imeḥḍaren inu.’ ”
19 Imeḥḍaren ggin am mammec ten iweṣṣa Yeccu uca ssewjden Taɣarṣt n Useɛdu. 20 Řami dd-tiweḍ tmeddit, iqqim ɣar ṭṭabřa ak-d tenɛac n imeḥḍaren nnes. ■ 21 Am ttᵉtten nitni, inna: “S tidett, Necc ad awem iniɣ, ijjen zzaywem ad ayi iɣdar.” ■ 22 Nitni dewřen ceḍnen aṭṭas uca kuř ijjen zzaysen ibda ad as yini: “Ma war iǧi d necc, a Sidi?” 23 Yarra-dd xasen, inna: “Wenni issisnen afus akidi di ṭṭebṣi d netta i d ayi ɣa iɣdaren. ■ 24 Mmis n bnadem ad iraḥ am mammec xas tura, maca uct x bnadem nni i ɣa iɣdaren Mmis n bnadem. Iḥřa as i bnadem nni war dd-ixřiq ɛemmarṣ.” 25 Yahuda wenni i t ɣa iɣdaren yarra-dd, inna: “Ma war iǧi d necc, a Amseřmad inu?” Netta inna as: “Aqa cek tennid t.”
Řidaret n Sidi s weɣrum d binu
26 Am tuɣa ttᵉtten, iksi Yeccu aɣrum u awarni řami ibarek, yarẓa i-t, iwca i-t i imeḥḍaren, inna: “Ksim, ccem, ta d arrimet inu.” ■ 27 Iksi řkas, iqada uca iwca asen t, inna: “Swem zzayes marra idwem, 28 minzi tina d idammen inu, idammen n Řɛahd n Jdid inni i ɣa ittwassizřen i weɣfar n ddnub. ■ 29 Necc ad awem iniɣ, zi řexxu tsawent war sesseɣ ɛad zi řɣiǧet n tzayart ař ass i di tt ɣa sweɣ zi jdid akidwem di Tgeldit n Baba.” 30 U awarni řami ɣennjen zzhid n ttesbiḥ, ffɣen ɣar wedrar n Zzitun. ■
Yeccu izwar issiweř x wenkar n Buṭrus
31 Xenni inna asen Yeccu: “Ǧiřet-a marra kenniw ad dayi tenderfem, minzi aqa tura: ‘Ad wteɣ ameksa uca iḥuřiyyen n tḥimart ad mmsebḍan.’ ■ 32 Maca awarni řami i dd ɣa ttwasnekkareɣ, ad awem izwareɣ ɣar Ljalil.” ■ 33 Maca Buṭrus yarra-dd, inna as: “Mařa dayek i ɣa nderfen marra, necc war dayek ttendrifeɣ ca ɛemmarṣ.” ■ 34 Inna as Yeccu: “S tidett, Necc ad ac iniɣ, di ǧiřet-a, qbeř i ɣa issquqeɛ uyaẓiḍ, ad ayi tenkared třata n twařawin.” ■ 35 Buṭrus inna as: “Waxxa tuɣa ittxeṣṣa ayi ad mmteɣ akidek, necc war cek nekkareɣ ɛemmarṣ.” Ammu i nnan marra imeḥḍaren ɛawed.
Taẓaǧit n Yeccu deg weḥwic n Xitsimaniy
36 Řexdenni iruḥ Yeccu akidsen ɣar ijj n wemcan qqaren as ‘Xitsimaniy’, inna i imeḥḍaren: “Qqimem danita u Necc ad raḥeɣ ḥima ad ẓẓaǧeɣ din.” ■ 37 Am kis yiwi Buṭrus d tnayen iḥenjiren n Zabdi, ibda issḥissif uca tudef dayes tiggʷudi. 38 Xenni inna asen: “Řeɛmar inu issḥissif aṭṭas ař řmewt. Qqimem da, ḥḍam akidi.” ■ 39 Am yuyur cwayt ɣar zzat, iwḍa x uɣembub nnes, ittẓaǧa, inna: “A Baba, mařa iɛeddeř, ejj ad xafi iɛdu řkas-a! Maca war ittiři am mammec xseɣ Necc, maca am mammec texsed Cek.” ■ 40 Řexdenni idweř-dd ɣar imeḥḍaren nnes uca yufa i-ten ṭṭṣen. Inna i Buṭrus: “Ma war tzemmarem ad kidi teḥḍam uřa d ict n tsaɛɛet? 41 Ḥḍam, ẓẓaǧem ḥima war dd-tidfem deg uɣekkwi. Arruḥ aqa ixs, maca ddat teḍɛef.” ■
42 Yuyur ɛawed i umur wiss tnayen uca iẓẓuǧ, inna: “A Baba, mařa řkas-a war izemmar ad xafi yekk mɣir mařa Necc swiɣ t, aqa ad yiři min texsed Cek!” 43 Řami dd-idweř, yufa i-ten ɛawed ṭṭṣen minzi tiṭṭawin nsen tuɣa ḍeqqřent.
44 Ijja i-ten, yuyur ɛawed uca iẓẓuǧ i twařa wiss třata, iqqar awařen-a ɛawed. 45 Řexdenni idweř-dd ɣar imeḥḍaren nnes, inna asen: “Kemmřem x yiḍeṣ nwem řexxu, areyyḥem. Xzarem, aqa tsaɛɛet tiweḍ-dd aqa Mmis n bnadem ad immewc deg ifassen n imednab. 46 Kkarem, ad nraḥ. Xzarem, wenni d ayi ɣa iɣdaren, yudes-dd.”
Uḍuf n Yeccu
47 Am tuɣa issawař ɛad, yusa-dd Yahuda, wenni t i ɣa iɣdaren, ijjen zi tenɛac, ak-d ijj n řɣaci ameqqran s řesyuf d iɛumad, usin-dd zeg imeqqranen n ikehhanen d imɣaren n řgens. ■ 48 Yahuda, wenni t i ɣa iɣdaren, aqa iwca asen ict n řeɛřamet, inna: “Wenni i ɣa ssudmeɣ d wenni Netta, ṭṭfem t.” 49 Řexdenni dd-iqarreb ɣar Yeccu, inna: “Sřam xak, a Amseřmad inu!”, uca issudem i-t. 50 Xas uca Yeccu inna as: “A ameddukkeř inu, min xef dd-tusid da?” Řexdenni qarrben-dd ɣares, ḥarten x Yeccu uca ṭṭfen t. 51 U xzar, ijjen zeg inni iǧan ak-d Yeccu, isswiẓẓeḍ afus nnes, ijbed ssif uca iwta amsexxar n arrays n ikehhanen, iqess as amezzuɣ. 52 Xenni inna as Yeccu: “Arr ssif ɣar wemcan nnes, minzi marra inni ikessin ssif ad mmten s ssif. 53 Niɣ ittɣiř ac belli Necc war zemmareɣ ad ẓẓaǧeɣ i Baba, aqa Netta ad d ayi dd-issekk ktar zi tenɛac n ilixiyunen n lmalakat? □ 54 Mammec xenni i ɣa ttwakemmřen idlisen i iqqaren belli ittxeṣṣa ad imsar ammu?” ■
55 Di tsaɛɛet nni ɛawed issiweř Yeccu ak-d řɣaci: “Axmi x uceffar i dd-teffɣem s řesyuf d iɛumad maḥend ad ayi tᵉṭṭfem. Kuř ass tuɣa qqimeɣ ɣarwem, sseřmadeɣ di Zzawect Tameqqrant, war dayi tᵉṭṭifem. 56 Maca man aya marra imsar ḥima ad ttwakemmřen Idlisen n inabiyyen.” Řexdenni semḥen dayes marra imeḥḍaren uca arewřen. □ ■
Yeccu qibač i Lmeḥkama Tameqqrant n Wudayen
57 Inni iṭṭfen Yeccu, iwyen t ɣar Qayafa, arrays n ikehhanen, wenni ɣar tuɣa munen imseřmaden n idlisen d imɣaren n řgens. ■ 58 Cimɛun Buṭrus iḍfar i-t-i-dd zi řaggʷaj ařami d yiweḍ ɣar řemraḥ n arrays n ikehhanen u řami yudef, iqqim jar imxazniyyen ḥima ad iẓar mammec i ɣa teffeɣ. 59 Imeqqranen n ikehhanen d imɣaren n řgens u marra Lmeḥkama Tameqqrant n Wudayen, qqaren as ‘Sunhidrin’, tuɣa arezzun ict n cchadet n ẓur x Yeccu maḥend ad t nɣen. ■ 60 Maca war zemmaren ad tt afen, waxxa usin-dd aṭṭas n řechud issxarriqen. Ɣar uneggar usin-dd tnayen n řechud issxarriqen. 61 Nitni nnan: “Wa aqa inna: ‘Necc zemmareɣ ad hedmeɣ Zzawect Tameqqrant n AREBBI u s třata n wussan ad tt bniɣ ɛawed.’ ” ■ 62 Arrays n ikehhanen ikkar-dd, inna as: “Ma war dd-tarrid s walu? Min xak cehhden ina?” ■
63 Maca Yeccu isqar. Inna as arrays n ikehhanen: “Necc ad Cek jjeɣ ad tejjaǧed s AREBBI iddaren belli Cek ad aneɣ tinid, ma xenni Cek d Lmasiḥ, Mmis n AREBBI?” ■ 64 Inna as Yeccu: “Cek tennid t. Maca Necc ad awem iniɣ: ‘Zi ssa tsawent ad tẓarem Mmis n bnadem iqqim x ufusi n Tzemmar xmi dd ɣa yas x iseynuten n ujenna.” ■
65 Řexdenni icarreg arrays n ikehhanen arruḍ nnes, inna: “Netta aqa iceqqef di AREBBI, mayemmi neḥdaj ɛad řechud? Xzarem, řexxu aqa tesřim i uceqqef nnes. 66 Min d awem ittɣiř kenniw?” Nitni arrin-dd xas, nnan: “Netta isdaheǧ řmewt.” ■ 67 Xenni bdan ssusufen as x uɣembub, ccaten t s řpuniyyat x uzeǧif u inneɣni wtin t ɛawed, ■ 68 nnan: “Nabb aneɣ, a Cek, Lmasiḥ, wi Cek iwtin?” ■
Ankar n Yeccu zi Buṭrus
69 Buṭrus iqqim ɣar barra di řemraḥ. Tqarreb-dd ɣares ict n tayya, tenna: “Uřa d cek tuɣa cek ak-d Yeccu, zi Nnaṣira.” □ ■ 70 Maca netta inkar zzat i marra, inna: “War ssineɣ min xef tessawařed.” 71 Am iggur ɣar usqif n tewwart, teẓra i-t ict n tayya nneɣni, tenna asen i yenni din iqqimen: “Wa tuɣa ak-d Yeccu zi Nnaṣira.” 72 Netta inkar ɛawed s ict n tjaǧit, inna: “War ssineɣ Bnadem nni.” 73 Cwayt ɣar zzat usin-dd inni din ibedden ɣar Buṭrus, nnan: “Nican, uřa d cek d ijjen zzaysen, minzi řhard nnek issbeyyen i cek.” 74 Xenni ibda ineɛɛeř, ittjjaǧa: “Necc war ssineɣ Bnadem nni.” Řexdenni issquqeɛ uyaẓiḍ 75 uca iɛqeř Buṭrus awař i d as inna Yeccu: “Qbeř i ɣa issquqeɛ uyaẓiḍ, ad ayi tenkared třata n twařawin.” Uca iffeɣ, iru s imeṭṭawen imerzagen. ■