Řḥukm x řɛedyan n Yahuda
2
1 Sdewřem-dd ixef nwem ɣar řeɛqeř, dewřem-dd ɣar řeɛqeř, a řgens břa useḍḥi,
2 qbeř i ɣa iffeɣ řḥukm,
- ass am uřum iɛeddu - ,
qbeř i xawem dd ɣa yas řḥaduq n weɣḍab n SIDI,
qbeř i xawem dd ɣa yas wass n weɣḍab n SIDI.
3 Arzum x SIDI, marra imwaḍɛen n temmurt,
inni itteggen řḥeqq nnes!
Arzum tasegda, arzum awaḍeɛ,
ad taɣ ad tennuffarem kenniw
deg wass n weɣḍab n SIDI. ■
4 Maɣar Ɣazza ad tᵉttwajj,
Acqalun ad tedweř d řxarbet,
Acdud ad xas azzřen ɣar wezyen n wass,
uca Ɛaqrun ad tᵉttwaqřeɛ.
5 Uct x imezdaɣ n tma n řebḥar,
řgens n Ikritiyyen.
Awař n SIDI ad xawem yiři,
a Kenɛan, tammurt n Ifilisṭiniyyen!
Necc ad kenniw hellkeɣ, war ittiři umezduɣ ɛad.
6 Tammurt nni x tma n řebḥar ad tiři d ddmani n tarewsa,
uřa d wanuten i imeksawen d řkurit i wuǧi.
7 Ad tiři temmurt i min iqqimen n taddart n Yahuda,
ḥima ad dayes arewsen tiḥimriwin nsen.
Di tudrin n Acqalun ad din arsen ɣar tmeddit,
maɣar SIDI, AREBBI nsen, ad ɣarsen yarzef,
u Netta issneqřeb tameḥbast nsen.
8 Necc sřiɣ i useḥqar n Mu’ab
d uceqqef n ayt n Ɛammun,
i zi ssḥeqaren nitni řgens inu,
u ssgeɛɛden ixef nsen aṭṭas ḍidd i temmurt nsen.
9 X uya, s tidett am ddareɣ Necc,
iqqar SIDI n řɛeskarat, AREBBI n Israil:
Mu’ab ad tedweř am Sadum,
u ayt n Mu’ab am Ɛamurra,
zi ssibbet n tzeggʷart d wanuten n tmeǧaḥt,
ict n řxarbet i řebda.
Min iqqimen n řgens inu ggur ad ten ikecceḍ
u min iqqimen n řgens inu ggur ad iṭṭef tasɣart nsen d řwart.
10 Aya ad ten iřqef zi ssibbet n nnfaxet nsen,
maɣar nitni tuɣa sseḥqaren u arzmen aqemmum nsen
x řgens n SIDI n řɛeskarat.
11 Issaggʷad ad ɣarsen iffeɣ SIDI,
maɣar Netta ad iqḍa x marra irebbiten zi temmurt,
u nitni ad as sejden,
kuř ijj zeg wemcan nnes,
marra tigzirin n řegnus.
12 Kenniw ɛawed, a ayt n Kuc,
ttwasnuqqben nitni zi ssif inu.
13 Netta ad isswiẓẓeḍ s ufus nnes ɣar ccamal,
Netta ad yareddeǧ Accur,
u ad yarr Ninwa d ict n řxarbet,
tuẓeɣ am řexřa.
14 Di řwest nnes ad geyyrent tḥimriwin,
marra řmař nnes, aqa tteggen deg ijj ubarru n n řgens.
Uřa d bu-iɛuqqan, wah uřa d twuct n ǧiřet
ad ssensen x izeǧifen n ipilaren nnes.
Tmijja nsen ad tt tɣennej zi řkazi,
areddeǧ ad yiři x tnebdat nnes,
maɣar tafrewt n tengelt tᵉttwaɛarra.
15 D ta d tandint isřiwřiwen,
tenni iqqimen di řaman,
tenni innan deg wuř nnes:
‘Necc d tenni, war teǧi d tenneɣni!’
Mammec tedweř d řxarbet,
ict n wemcan n arraḥet i řmař n řexřa!
Marra inni xas ɣa ikken,
ad xasen iṣeffaru s useḥqar ad issenhezz afus nnes.