Ḥaggay
Acejjeɛ i řebni n Zzawect Tameqqrant
1
1 Deg useggʷas wiss tnayen n ujeǧid Dariyus, deg uyur wiss setta, deg wass amezwaru n uyur, yusa-dd wawař n SIDI, s ufus n Ḥaggay, anabi, ɣar Zarubbabil, mmis n Ca’altiyal, lwali n Yahuda, u ɣar Yahucaɛ, mmis n Yahuṣadaq, arrays n ikehhanen, inna: 2 “Ammu i issawař SIDI n řɛeskar, iqqar: Řgens-a iqqar: ‘Ɛad war dd-yiwiḍ řḥař, řḥař maḥend ad tᵉttwabna Taddart n SIDI ɛawed.’ ” 3 Xenni yusa-dd wawař n SIDI s ufus n unabi Ḥaggay, inna:
4 “Ma yiwed-dd řḥař ḥima kenniw ad tzedɣem di tudrin nwem ittwaseqqfen, am Taddart-a d řxarbet? 5 Řexxu maca inna SIDI n řɛeskarat: Ḥḍam mliḥ ibriden nwem deg wuřawen nwem ... 6 Kenniw tzarrɛem aṭṭas, tmejjarem drus. Kenniw tᵉttettem, war tᵉttjjiwinem, kenniw tsessem, maca war iǧi ařami kenniw ad tescarem, kenniw tyarḍem arruḍ, maca war issḥemmi u wenni d ɣa iṭṭfen řmunet, ad iṭṭef řmunet deg ict n tkemmust tᵉnnuqqeb. ■ 7 Ammu i iqqar SIDI n řɛeskar: Ḥḍam mliḥ ibriden nwem deg wuřawen nwem. 8 Gaɛɛdem adrar, awyem-dd akeccuḍ u bnam Taddart-a u Necc ad xas arḍiɣ u ad zzayes ttwasɛuǧeɣ, inna SIDI. 9 Kenniw tarrim taynit i waṭṭas, maca xzarem, aqa-t mɣir drus u xmi t-i-dd-tᵉttawyem ɣar taddart, Necc ttṣuḍeɣ xas. Mayemmi?, iqqar SIDI n řɛeskarat. Zi ssibbet n Taddart inu tenni idewřen d řxarbet, am kuř ijjen zzaywem ittazzeř x taddart n yixef nnes.
10 S uyenni mennɛen xawem ijenwan nnda u tammurt tmenneɛ xawem řɣiǧet nnes. ■
11 Necc řaɣiɣ-dd x řekḥeḍ i temmurt, x idurar, x imendi, x binu, x zzect, u x marra min i dd-tᵉttawi temmurt, uřa x iwdan u x řmař u x warber n ifassen.”
12 Xenni isřa Zarubbabil, mmis n Ca’altiyal, u akides Yahucuɛa, mmis n Yahuṣadaq, arrays n ikehhanen, u marra min iqqimen n řgens, ɣar tmijja n SIDI, AREBBI nsen, u ɣar wawařen n unabi Ḥaggay, am mammec i t issekk SIDI, AREBBI nsen. U nitni, řgens, ggʷeden zzat i wudem n SIDI.
13 S uya ibarreḥ Ḥaggay, amsexxar n SIDI, i řgens, inna: “Necc aqa ayi akidwem!” iqqar SIDI.
14 Uca issekkar SIDI buḥbeř n Zarubbabil, mmis n Ca’altiyal, lwali n Yahuda, uřa d buḥbeř n Yahucaɛ, mmis n Yahuṣadaq, arrays n ikehhanen, uřa d buḥbeř n marra min iqqimen zi řgens u nitni usin-dd u ggin řxedmet di Taddart n SIDI n řɛeskarat, AREBBI nsen.
15 deg wass wiss arebɛa u-ɛicrin n uyur, deg uyur wiss setta, deg useggʷas wiss tnayen n ujeǧid Dariyus.