Ṣafanya
1
1 Awař n SIDI i dd-yusin i Ṣafanya, mmis n Kuci, mmis n Jadalya, mmis n Amarya, mmis n Ḥizqiya, deg wussan n Yuciya, mmis n Amun, ajeǧid n Yahuda. □ Řḥukm nni dd ɣa yasen x Yahuda
2 Necc ad kkseɣ qaɛ marra min iǧan zeg wudem n temmurt,
ammu i iqqar SIDI.
3 Ad kkseɣ bnadem d řmař,
ad kkseɣ ijḍaḍ n ujenna
d iseřman n řebḥar
d tɛenkrifin ak-d iɛeffanen,
wah Necc ad qḍiɣ bnadem x wudem n temmurt, ammu i iqqar SIDI. ■
4 Necc ad sswiẓẓḍeɣ s ufus inu ḍidd i Yahuda
u ḍidd i marra imezdaɣ n Urcalim,
Necc ad teḥḥiɣ min iqqimen zi Baɛl zeg wemcan-a
ak-d yisem n ikehhanen n ṣṣanam □
5 d yenni yuḍaren x tzeɣwin zzat i řɛeskar n ijenwan,
u yenni, am uḍaren, jjuǧen ɣar SIDI,
u aqa jjuǧen ɣar Malkam,
6 uřa d yenni dd-ittɛaqqaben zi ḍeffar n SIDI,
u yenni war arezzun x SIDI u war xas ttsseqsin. ■
Ass ameqqran n SIDI
7 Seɣd zzat i wudem n Sidi inu, SIDI,
maɣar ass n SIDI yudes.
SIDI aqa issewjed ict n tɣarṣt,
Netta issqeddes imeɛraḍen nnes.
8 Ad imsar deg wass n tɣarṣt n SIDI,
aqa Necc ad ɛaqbeɣ řḥukkam d iḥenjiren n ujeǧid
d marra inni yarrḍen arruḍ aɣrib.
9 Deg wass nni ad ɛaqbeɣ
marra inni ineggzen tanebdat,
inni ittɛemmaren taddart n siditsen
s lɛunf d řɣecc.
10 Deg wass nni, iqqar SIDI,
ad din yiři ijj n řḥess n iɣuyyan zi Tewwart n Iseřman,
uřa d řḥess n yenni ittrun zi tendint n jdid
d ict n tareẓẓit temɣar zi tewririn.
11 Rum, imezdaɣ n jjihet n Umehraz,
minzi marra isebbabben ttwaseɣḍen,
marra inni iwezznen tmenyat ttwaqeḍɛen.
12 Di řweqt nni ad beqqceɣ di Urcalim s řeqnadeř,
u Necc ad ɛaqbeɣ iryazen
inni ittwagdaren zi řatar nni iqqimen n binu,
inni iqqaren deg wuř nsen
‘SIDI war ittegg řxar u war ittegg řɣar!’
13 Agřa nsen ad yiři i tkeccaḍt
d tudrin nsen ad dewřent d řxarbet.
Nitni ad bnan tudrin i yixef nsen,
maca war daysent zeddɣen ca,
nitni ad ẓẓun tizayarin,
maca war sessen zi binu nnes.
14 Ass ameqqran n SIDI yudes,
aqa-t yudes, deɣya yusa-dd.
Řḥess n wass n SIDI!
Ad isɣuyy bu-teɣruḍt din s yict n tɣuyyit tarzeg.
15 Ass nni ad yiři d ass n uduqqez n ufugem,
d ass n řeḥṣaret d ḍḍiqa,
d ass n uxarreb d wareddeǧ,
d ass n ṭṭřam d taǧest,
d ass n iseynuten d useynu ibbumbes,
16 ijj n wass n uṣuḍi deg uyicc n icarri u n uṣuḍi s wesruddeḥ
ḍidd i tneddam ifaryen
u ḍidd i ṣṣumɛat nni iǧan ɣar tɣemmura.
17 Necc ad ḥṣareɣ iwdan
u nitni ad uyuren am idarɣařen,
minzi nitni ggin ddenb x SIDI.
Idammen nsen ad ttwazeǧɛen am tɛejjajt,
d weysum nsen am ixxan.
18 Uřa d nnuqart nsen d wureɣ nsen
war zemmaren ad ten ssnejmen
deg wass n uduqqez n ufugem n SIDI.
Timessi n wassam nnes ad tecc marra tammurt,
maɣar deɣya Netta ad iqḍa marra imezdaɣ n temmurt. ■