إِژْرَا إِدَّارنْ إِ ثَادَّارْثْ ن أَرُّوحْ ن أَربِّي
2
1 س ؤُينِّي بعّْذمْ خْ مَارَّا مِينْ إِدْجَانْ ذ أَعفَّانْ، خْ عْڒَامْ كُوڒْ ثَاحْرَايْمشْثْ ذ نِّيفَاقْ ذ ڒحْسذْ ؤُ خْ ؤُشقّفْ. ▪ 2 إِڒِيمْ أَمْ إِسيْمَانْ إِنِّي د-إِتّْوَاخڒْقنْ زِي جْذِيذْ، وحّْشمْ أَوَاڒْ أَمشْنَاوْ أَغِي إِزْذِيڭنْ ذ أَرُّوحَانِي حِيمَا أَذْ زَّايسْ ثڭْمَامْ س جّهْذْ ذِي ثُوذَارْثْ، 3 مَاڒَا أَقَا كنِّيوْ ثقَّاسمْ ؤُ ثتّْوَاڒَامْ أَقَا سِيذِي إِصْبحْ، ▪ 4 ونِّي غَارْ د-ثتَّاكّْوَاضمْ، أَژْرُو إِدَّارنْ، ونِّي مّنْضَارنْ إِوْذَانْ، مَاشَا غَارْ أَربِّي أَقَا إِتّْوَافَارْزْ إِغْڒَا. ▪ 5 أَمُّو كنِّيوْ عَاوذْ، أَمشْنَاوْ إِژْرَا إِدَّارنْ، أجّْ أَذْ زَّايْومْ ثتّْوَابْنَانْثْ ثِيزَاوِييِّينْ ن أَرُّوحْ، أَذْ ثِيڒِيمْ ذ إِكهَّاننْ إِقدّْسنْ، حِيمَا أَذْ ثوْشمْ ثِيغَارْصِينْ ن أَرُّوحْ إِ أَرْضَا ن أَربِّي س يشُّو لْمَاسِيحْ. ▪ 6 س ؤُينِّي إِتّْوَانَّا ذِي ثِيرَا إِقدّْسنْ: ”أَقَا ذَا، أَذْ سَّارْسغْ ذِي صِيهْيُونْ إِجّْ ن وژْرُو إِغْڒَا أَمْ ؤُزدْجِيفْ ن ثغْمَارْثْ،
ونِّي ذَايسْ إِ غَا يَامْننْ، وَارْ ذَايسْ إِتِّيذفْ ؤُسضْحِي عمَّارْصْ.“ ▪
7 إِ كنِّيوْ، إِنِّي إِتَّامْننْ، أَقَا ثمّوْشْ شّنْعثْ أَيَا، مَاشَا إِ ينِّي وَارْ إِطِيعنْ أَقَا-ث ذ أَژْرُو ن ؤُنقْرَاضْ ذ ثَاصْضَارْثْ ن ثْعنْكْرِيفْثْ،▪
8 ؤُشَا نِيثْنِي تّْنقْرَاضنْ ذَايسْ، مِينْزِي وَارْ تِّيمْننْ ذڭْ وَاوَاڒْ، أَمْ مَامّشْ ذ أَسنْ يُورَا. ▪
9 مَاشَا كنِّيوْ ثدْجَامْ ذ إِجّْ ن جِّيڒْ إِتّْوَافَارْزنْ، إِنِّي إِ إِتّْسخَّارنْ أَمْ إِكهَّاننْ إِ ثْڭلْذِيثْ، كنِّيوْ ذ إِجّْ نْ ڒْڭنْسْ إِقدّْسنْ، إِشْثْ ن ثْمسْمُونْثْ ثتّْوَافْذَا زَّايسْ مَاحنْذْ أَذْ بَارّْحنْ ثْشُونِي ن ونِّي ذ أَنغْ د-إِڒَاغَانْ زِي ثَادْجسْثْ غَارْ ؤُفيّضْ ن ثْفَاوْثْ نّسْ. ▪
10 كنِّيوْ وَارْ ثتّْوِيحْسِيبمْ أَمْ ڒْڭنْسْ، مَاشَا ڒخُّو أَقَا كنِّيوْ ذ ڒْڭنْسْ ن أَربِّي. عَاوذْ ثُوغَا أَرّحْمثْ وَارْ كنِّيوْ ثْڒحّفْ، مَاشَا ڒخُّو ثتّْوَافَارّغْ-د خَاومْ أَرّحْمثْ نّسْ. ▪
11 أَ إِمْعِيزّنْ، أَقَا كنِّيوْ ذ إِمعْزَابْ ذ إِبَارَّانِييّنْ، خْ ؤُينِّي زِييَّارغْ خَاومْ، وَارْ ضفَّارمْ شَا نّشْوَاثْ ن أَرِّيمثْ ثِينِّي إِتّْمنْغَانْ أَكْ-ذ ڒعْمَارْ نْومْ، ▪
12 ؤُيُورمْ نِيشَانْ زَّاثْ إِ مَارَّا ثَارْوَا ن بْنَاذمْ إِنِّي خَاومْ إِتّْعَاوَاذنْ ڒخْپُورَاثْ ثِيعفَّانِينْ، أَڒَامِي إِ غَا ژَترنْ ڒخْذَايمْ نْومْ ثِيصبْحَانِينْ، أَذْ سّمْغَارنْ ذِي أَربِّي ذڭْ وَاسّْ ن ؤُقدْجبْ. ▪
طَّاعثْ إِ مَارَّا صُّولَاطَاثْ
13 طَّاعمْ إِ مَارَّا بْنَاذمْ ذِي طّْوعْ ن أَربِّي: إِ إِجدْجِيذنْ زِي سِّيبّثْ ن صُّولْطَا إِ غَارْسنْ ثدْجْ، ▪
14 إِ ڒْقُوضَاثْ، مِينْزِي نِيثْنِي تّْوَاسكّنْ زَّايسْ حِيمَا أَذْ عَاقْبنْ إِعفَّاننْ ؤُ حِيمَا أَذْ سّمْغَارنْ إِنِّي إِتّڭّنْ ثَاصبْحَانْثْ.
15 مِينْزِي مَانْ أَيَا إِتّخْسْ إِ-ث أَربِّي، حِيمَا، خْمِي إِ غَا ثڭّمْ مِينْ إِصبْحنْ، أَذْ ثسّغْذمْ أَقمُّومْ ن إِوْذَانْ إِفْغَاڒْ، إِنِّي وَارْ إِسِّيننْ أَربِّي، ▪
16 أَمْ إِنِّي إِدَّارنْ نِيشَانْ ذِي ثِيڒلِّي، وَارْ إِدْجِي أَمْ إِنِّي إِڭِّينْ ثِيڒلِّي نْسنْ أَمْ إِجّْ ن ؤُڒحَّافْ خْ ثُوعفّْنَا نْسنْ، مَاشَا أَمْ إِمْسخَّارنْ ن أَربِّي. ▪
17 وقَّارمْ مَارَّا إِوْذَانْ، سْعِيزّمْ ثَاوْمَاثْ، ڭّْوذمْ أَربِّي، شنّْعمْ إِجدْجِيذنْ. ▪
18 جّمْ إِنِّي ذ إِمْسخَّارنْ جَارَاومْ، أَذْ طَّاعنْ إِ أَيْثْبَابْ نْومْ س ثِيڭّْوُوذِي، وَارْ إِدْجِي إِ ينِّي إِصبْحنْ إِضَارْفنْ وَاهَا، مَاشَا عَاوذْ إِ ينِّي إِقسْحنْ ذ يوْعَارنْ. ▪
19 مِينْزِي إِمْسخَّارنْ أَمْ يِينَا أَذْ د-أَسنْ إِ أَربِّي إِ ڒْخَاضَارْ نّسْ، إِنِّي ذِي طّْوعْ ن ثْنفْسشْثْ ثشْنَا، كْسِينْ ثَامَارَا نِّي وَارْ ت إِسْذِيهدْجنْ. ▪ 20 مَانْ شَّانْ إِ ذِينْ إِ ينِّي إِكْسِينْ ثَامَارَا زِي سِّيبّثْ ن ثفْغُوڒْثْ نْسنْ؟ مَاشَا مَاڒَا كنِّيوْ ثڭِّيمْ ثْشُونِي، أَمْ ذَايْومْ تّڭّنْ ثُوعفّْنَا، أَقَا مَانْ أَيَا إِسّمْغَارْ شَّانْ نْومْ غَارْ أَربِّي. ▪ 21 مِينْزِي كنِّيوْ ثتّْوَاڒَاغَامْ-د إِ مَانْ أَيَا ؤُمِي أَقَا لْمَاسِيحْ ثُوغَا إِمُّوثْ ذِي طّْوعْ نّغْ ؤُشَا إِجَّا أَنغْ-د إِجّْ ن لْمَاثَالْ، حِيمَا أَذْ نُويُورْ ذِي جُّورّثْ ن إِضَارنْ نّسْ: ▪ 22 نتَّا وَارْ إِڭِّي شَا دّْنُوبْ ؤُ وَارْ إِتّْوِيفْ ذڭْ ؤُقمُّومْ نّسْ شَا ن ڒْغشّْ، ▪ 23 ونِّي، مَاڒَا زَاوَارنْ ث، وَارْ د-إِتَّارِّي أَوَاڒْ، ؤُ مَاڒَا إِتّْوَاودّبْ، وَارْ د-إِتَّارِّي شَا دّنْفْ، مَاشَا إِتَّارَّا دّعْوثْ نّسْ غَارْ ڒْقَاضِي ن ثْسڭْذَا، ▪ 24 ونِّي إِكْسِي دّْنُوبْ نّغْ س إِخفْ نّسْ ؤُشَا إِسّْڭعّذْ إِ-ثنْ ذِي أَرِّيمثْ نّسْ غَارْ صَّالِيبْ. مَاغَارْ مَاڒَا نمُّوثْ إِ دّْنُوبْ أَذْ ندَّارْ ذِي ثْسڭْذَا نّسْ، مِينْزِي كنِّيوْ أَقَا ثتّْوَاسْڭنْفَامْ س إِيزِّيمنْ نّسْ. ▪ 25 مِينْزِي كنِّيوْ ثُوغَا ثْودَّارمْ أَمشْنَاوْ إِحُوڒِييّنْ، ڒخُّو مَاشَا ثْذوْڒمْ-د غَارْ ؤُمكْسَاوْ ذ ؤُمحْضَايْ ن ڒعْمُورْ نْومْ. ▪