1 بُوطْرُوسْ
أَسدْجمْ غَارْ ؤُمزْوَارُو
1
1 بُوطْرُوسْ، رَّاسُولْ ن يشُّو لْمَاسِيحْ، إِ ينِّي إِتّْوَافَارْزنْ ؤُ إِ إِبَارَّانِييّنْ، إِنِّي إِتّْوَاژدْجْعنْ ذِي بُونْطُوسْ، ڭَالَاطِييَا، كَابَّاذُوكِييَا، أَسِييَا ذ بِيثِينِييَا، ▫ ▪ 2 إِنِّي إِتّْوَافَارْزنْ عْلَاحْسَابْ ثُوسّْنَا إِ إِدْجَانْ غَارْ أَربِّي ثَابَابَاثْ قْبڒْ، س ثُوقدّسْثْ ن أَرُّوحْ، إِ طَّاعثْ ؤُ إِ ؤُرُوشِّي س إِذَامّنْ ن يشُّو لْمَاسِيحْ: أَرْضَا ذ ڒهْنَا أَذْ ذَايْومْ إِمَّارْنِي. ▪ أَرّحْمثْ ثَامقّْرَانْثْ ن أَربِّي ذِي يشُّو لْمَاسِيحْ
3 لْبَارَاكَا إِ أَربِّي، ثَابَابَاثْ ن سِيذِيثْنغْ يشُّو لْمَاسِيحْ ونِّي ذ أَنغْ د-يجِّينْ زِي جْذِيذْ س أَرّحْمثْ نّسْ ثَامقّْرَانْثْ، س ثْنُوكْرَا ن يشُّو لْمَاسِيحْ مَاحنْذْ أَذْ ثِيڒِيمْ ذ أَسِيثمْ إِدَّارنْ، ▪ 4 مَاحنْذْ أَذْ غَارْومْ يِيڒِي إِجّْ ن ڒْوَارْثْ وَارْ إِفنِّي، وَارْ إِتّْوَابقّضْ، وَارْ إِتّسْڒِيوْ، ونِّي إِ ذ أَومْ إِتّْوَاسّْوجْذنْ ذڭْ إِجنْوَانْ، ▪ 5 أَمْ ثتّْوَاحْضَامْ كنِّيوْ س جّهْذْ ن أَربِّي، ؤُ س لْ-إِيمَانْ، إِ ثُوذَارْثْ إِ إِوجْذنْ حِيمَا أَذْ ثتّْوَاسّضْهَارْ ذِي ڒْوقْثْ ثَانڭَّارُوثْ، 6 إِ ذِي إِ غَا ثْفَارْحمْ إِ ڒبْذَا، وَاخَّا ثْحزْنمْ ڒخُّو ذْرُوسْ زِي سِّيبّثْ ن عْڒَامْ كُوڒْ إِغكّْوَانْ إِ خَاومْ د-إِتّكّنْ، ▪ 7 حِيمَا ثَاقدْجبْثْ ن لْ-إِيمَانْ نْومْ، ثنِّي ثِيغْڒَا خْ وُورغْ إِقُّورنْ ونِّي إِتّْوَاسِيصْفنْ زِي ثْمسِّي، أَذْ ثِيڒِي إِ ؤُسمْغَارْ ذ شَّانْ ذ ؤُعُودْجِي خْ مِينِّي إِ د-غَا إِضْهَارْ يشُّو لْمَاسِيحْ، ▪
8 ونِّي وَارْ ث ثژْرِيمْ، وَاخَّا أَمنِّي ثتّخْسمْ ث. ؤُ ثْفَارّْحمْ س لْ-إِيمَانْ نّسْ س إِشْثْ ن ڒفْرَاحثْ إِعُودْجنْ وَارْ إِزمَّارْ أَذْ زَّايسْ إِنْطقْ إِڒسْ، ▪ 9 بلِّي أَذْ ثتّطّْفمْ ڒْمُونثْ ن لْ-إِيمَانْ نْومْ، أَقَا-ت ذ ثُوذَارْثْ ن بُوحْبڒْ نْومْ.
10 ثُوذَارْثْ-أَ ثُوغَا أَرزُّونْ خَاسْ إِنَابِييّنْ، إِنِّي ثُوغَا إِتّْنَابّنْ خْ أَرْضَا إِ ذ أَومْ د-إِكَّارنْ، ▪
11 ؤُمِي ثُوغَا أَرزُّونْ مَانْ ڒْوقْثْ إِ ذ أَسنْ إِسّْشنْ أَرُّوحْ ن لْمَاسِيحْ إِ ذَايْسنْ إِزدّْغنْ، ؤُ مَانْ ڒْوقْثْ إِ خفْ ثُوغَا إِشهّذْ، أَقَا أَذْ د-يَاسْ ؤُودّبْ إِ غَا إِكّنْ خْ لْمَاسِيحْ ؤُڒَا ذ أَعُودْجِي نّسْ أَوَارْنِي مَانْ أَيَا. ▪
12 أَقَا إِتّْوَاسَّارْڭبْ أَسنْ، أَقَا مَارَّا مِينْ خفْ ثُوغَا أَرزُّونْ، أَقَا وَارْ ث أَرْزُونْ ذِي ثِيزِي نْسنْ، مَاشَا ذِي ثِيزِي نّغْ ثُوغَا تّْنَابّنْ نِيثْنِي خْ ثْمسْڒَايِينْ إِ ذ أَومْ إِتّْوَاسَّارْڭْبنْ ڒخُّو س ثْمسْڒَايِينْ إِ ذ أَومْ نْبشَّارْ س أَرُّوحْ إِقدّْسنْ ونِّي د-إِتّْوَاسّكّنْ زڭْ ؤُجنَّا، مَانِي ؤُڒَا ذ لْمَالَاكَاثْ تّْوَاجبْذنْثْ أَذْ ذَايْسنْثْ نطْحنْ. ▪
ثَاقدَّاسْثْ ذ ثَايْرِي جَارْ وَاوْمَاثنْ
13 س ؤُينِّي حزْممْ ڒْخَانْسْرَا ن ڒعْقڒْ نْومْ، إِڒِيمْ تّْفَاقمْ، ؤُشَا سْمُونمْ مَارَّا أَسِيثمْ نْومْ ذِي ڒفْرَاهثْ إِ ذ أَومْ غَا يَاوْضنْ خْمِي د غَا إِضْهَارْ سِيذِيثْنغْ يشُّو لْمَاسِيحْ. ▪
14 إِڒِيمْ أَمشْنَاوْ ثَارْوَا إِطَاعنْ، وَارْ د-ثْذكّْوِيڒمْ ثْشَارّْشمْ ذِي نّشْوَاثْ نْومْ ثِينِّي ثُوغَا ثضْفَارمْ قْبڒْ ؤُمِي ثُوغَا كنِّيوْ عَاذْ ذ إِقُوبَّانِييّنْ،
15 إِڒِيمْ ذ إِمْقدَّاسنْ ذِي مَارَّا مِينْ ثتّڭّمْ، أَمشْنَاوْ نتَّا ونِّي خَاومْ د-إِڒَاغَانْ أَقَا-ث ذ أَمْقدَّاسْ، ▪
16 مِينْزِي ثُورَا:
”إِڒِيمْ ذ إِمْقدَّاسنْ، مِينْزِي ؤُڒَا ذ نشّْ ذ أَمْقدَّاسْ!“ ▪
17 ؤُ مَاڒَا ثتّْڒَاغَامْ إِ ثْبَابَاثْ، ونِّي وَارْ إِتّڭّنْ س إِغمْبَابْ، ذ ونِّي إِحكّْمنْ كُوڒْ إِجّنْ عْلَاحْسَابْ ڒخْذَايمْ نّسْ، خنِّي ؤُيُورمْ س ثِيڭّْوُوذِي ذِي ڒْوقْثْ-أَ ؤُمِي كنِّيوْ عَاذْ ذ إِبَارَّانِييّنْ ذَانِيثَا، ▪
18 ؤُمِي ثسّْنمْ بلِّي كنِّيوْ وَارْ ثتّْوَافْذِيمْ س نُّوقَارْثْ ذ وُورغْ إِفنَّانْ زِي ڒخْذَايمْ نْومْ إِبضْڒنْ ثنِّي إِ ذ أَومْ سلّْمنْ ڒجْذُوذْ نْومْ، ▪
19 مَاشَا س إِذَامّنْ إِغْڒَانْ ن إِزْمَارْ وَارْ ذَايسْ بُو ڒْعِيبْ وَارْ إِبقّْضنْ، أَقَا-ث ذ لْمَاسِيحْ. ▪ 20 نتَّا ثُوغَا إِتّْوَافَارْزْ إِ مَانْ أَيَا قْبڒْ مَا أَذْ إِتّْوَاڭّْ ذْسَاسْ ن دُّونشْثْ، ؤُشَا إِتّْوَاسّضْهَارْ أَومْ-د ڒخُّو ذڭْ إِكُوذنْ إِنڭُّورَا ن ڒْوقْثْ ذِي طّْوعْ نْومْ، ▪ 21 إِ كنِّيوْ إِنِّي زَّايسْ إِتَّامْننْ ذِي أَربِّي، ونِّي ث-إِ-د-إِسّْنكَّارنْ زِي ثَادَّارْثْ ن إِمتِّيننْ ؤُشَا إِوْشَا أَسْ أَعُودْجِي حِيمَا لْ-إِيمَانْ ذ ؤُسِيثمْ نْومْ أَذْ إِڒِينْ خْ أَربِّي، ▪
22 حِيمَا أَذْ تّْوَاقدّْسنْ ڒعْمُورْ نْومْ س طَّاعثْ إِ ثِيذتّْ، أَذْ تّْوَاعمَّارنْ س ثَايْرِي، بْڒَا مَا أَذْ ثڭّمْ س وُوذْمَاونْ، أَذْ ثخْسمْ أَيَاوْيَا س وُوڒْ إِزْذِيڭْ إِكْمڒْ، ▪ 23 أَمْ إِوْذَانْ إِ د-إِتّْوَاخڒْقنْ زِي جْذِيذْ، وَارْ إِدْجِي زِي زَّارِيعثْ إِفنَّانْ، مَاشَا زِي ثنِّي وَارْ إِفنِّينْ، أَقَا زڭْ وَاوَاڒْ إِدَّارنْ ن أَربِّي إِ إِتّْذُومَانْ إِ ڒبْذَا. ▪
24 ”مِينْزِي مَارَّا أَرِّيمَاثْ ن ويْسُومْ أَمشْنَاوْ ڒحْثِيشْ،
ؤُشَا مَارَّا أَعُودْجِي نّسْ أَمشْنَاوْ ثَاوَارْذشْثْ جَارْ ڒحْثِيشْ.
ڒحْثِيشْ أَذْ إِسْڒَاوْ، ثَاوَارْذشْثْ أَذْ ثوْضَا، ▪
25 مَاشَا أَوَاڒْ ن أَربِّي إِتّْغِيمَا إِ ڒبْذَا قَاعْ.
أَوَاڒْ-أَ نتَّا ذ ڒخْبَارْ أَصبْحَانْ ونِّي ذ أَومْ د-إِتّْوَابَارّْحنْ.“