يَاعْقُوبْ 4

أَوَاضعْ زَّاثْ إِ أَربِّي

‏1 مَانِيسْ د-إِكَّا ؤُمنْغِي ذ إِمْشُوبّشنْ جَارْ أَومْ؟ مَا زعْمَا زڭْ شّهْوَاثْ إِ إِمّنْغنْ ذڭْ إِغزْذِيسنْ نْومْ؟    ‏2 كنِّيوْ ثمّژْرمْ مَاشَا كنِّيوْ وَارْ غَارْومْ وَالُو. كنِّيوْ ثْنقّمْ ؤُ ثتَّاسْممْ ؤُشَا قَاعْ أَمنِّي وَارْ د أَومْ إِتِّيكّْوِيضْ وَالُو. كنِّيوْ ثمْشُوبُّوشمْ ؤُ ثمّنْغَامْ، مَاشَا وَارْ غَارْومْ وَالُو، مِينْزِي كنِّيوْ وَارْ ثتَّارَامْ. ‏3 نِيغْ كنِّيوْ ثتَّارَامْ، مَاشَا وَارْ ثكْسِيمْ شَا، مِينْزِي ثتَّارمْ مِينْ وَارْ إِحْڒِينْ حِيمَا أَذْ ثڭّمْ غَارْ شّهْوَاثْ نْومْ.    ‏4 أَ كنِّيوْ إِنِّي إِزنَّانْ! مَا وَارْ ثسِّينمْ شَا بلِّي ثَامخْسِيوْثْ ن دُّونشْثْ أَقَا-ت ذ ڒعْذَاوثْ خْ أَربِّي؟ أَحقَّا ونِّي إِتّخْسنْ أَذْ يِيڒِي ذ أَمدُّوكّڒْ ن دُّونشْثْ، أَذْ يِيڒِي ذ ڒعْذُو ن أَربِّي.    ‏5 نِيغْ إِتّْغِيڒْ أَومْ بلِّي ثِيرَا إِقدّْسنْ وَارْ غَارسْ لْمعْنَا:

”أَرُّوحْ ونِّي ذَايْنغْ إِزدّْغنْ إِتَّاسمْ س ثُوسْمِي!“؟   

‏6 مَاشَا سِيذِيثْنغْ إِتِّيشْ أَنغْ أَرْضَا كْثَارْ، مَاغَارْ إِنَّا:

”أَربِّي إِسّْوَاضّعْ إِمْعفَّارنْ،

مَاشَا إِ إِمْوَاضْعنْ إِتِّيشْ أَسنْ أَرْضَا.“   

‏7 س ؤُينِّي وْشمْ إِخفْ نْومْ إِ أَربِّي، مْعَاڒَامْ أَكْ-ذ شِّيطَانْ ؤُشَا نتَّا أَذْ زَّايْومْ يَارْوڒْ.    ‏8 أَذْسمْ أَربِّي ؤُشَا نتَّا أَذْ كنِّيوْ د-يَاذسْ. سِيرْذمْ إِفَاسّنْ نْومْ، أَ إِمذْنَابْ، قدّْسمْ ؤُڒَاونْ نْومْ، أَ كنِّيوْ، إِنِّي غَارْ إِدْجْ ثْنَاينْ ن إِزدْجِيفنْ. ‏9 سْحِيسّْفمْ، شضْنمْ! جّمْ ثَاضحَّاشْثْ نْومْ أَذْ ثذْوڒْ ذ أَشْضَانْ ؤُ ڒفْرَاحثْ نْومْ أَذْ ثذْوڒْ ذ ڒحْزنْ.   

‏10 مَارْسمْ إِخفْ نْومْ زَّاثْ إِ سِيذِي ؤُشَا نتَّا أَذْ كنِّيوْ إِسّْعُودْجْ.   

‏11 أَ أَيْثْمَا، وَارْ تّْشقَّافمْ شَا ذڭْ وَايَاوْيَا! ونِّي إِشقَّافنْ ذڭْ ؤُمَاسْ نِيغْ إِحكّمْ خْ ؤُمَاسْ، أَقَا وَا إِتّْشقَّافْ ذِي شَّارِيعَا ؤُشَا إِحكّمْ خْ شَّارِيعَا. ؤُشَا مَاڒَا ثْحكْمذْ خْ شَّارِيعَا، أَقَا وَارْ ثدْجِيذْ شَا ذ ونِّي إِتّڭّنْ شَّارِيعَا، مَاشَا ثَارِّيذْ إِخفْ نّكْ ذ ڒْقَاضِي ن شَّارِيعَا.

‏12 إِجّنْ وَاهَا إِ إِدْجَانْ ذ بَابْ ن شَّارِيعَا، نتَّا ذ ونِّي غَارْ ثدْجْ ثْزمَّارْ حِيمَا أَذْ إِوْشْ ثُوذَارْثْ نِيغْ أَذْ ت يَاريّبْ. مَاشَا مِينْ ثعْنِيذْ شكْ ؤُمِي ثْحكّْمذْ خْ ؤُمْقَارّبْ نْومْ؟

‏13 مَا خنِّي إِ غَا نِينِي خْ ينِّي إِقَّارنْ: ”أَسّْ-أَ نِيغْ ثِيوشَّا أَذْ نْرَاحْ غَارْ ثنْذِينْثْ-أَ غَارْ ثنْذِينْثْ-إِنْ، أَذْ ذِينْ نڭّْ ثَاسبَّابْثْ، أَذْ نْسغْ أَذْ نزّنْزْ أَذْ نَارْبحْ!“   

‏14 نِيثْنِي وَارْ سِّيننْ مَامّشْ إِ غَا ثِيڒِي ثِيوشَّا. مِينْ ثعْنَا ثُوذَارْثْ نّغْ؟ أَقَا-ت مْغِيرْ ذ إِجّْ ن ڒفْوَارْ إِ غَا د-إِضْهَارْ، أَذْ إِذُورّقْ، أَذْ ثفْسِي ڒخْذنِّي؟   

‏15 س ؤُيَا إِتّْخصَّا أَذْ إِنِينْ: ”مَاڒَا إِخْسْ سِيذِي، أَذْ ندَّارْ، أَذْ نڭّْ ثَا ذ ثِينْ.“   

‏16 إِوَا نِيثْنِي تّْفيّْشنْ ڒخُّو ذڭْ ؤُعفَّارْ نْسنْ، مَاشَا قَاعْ أَفيّشْ-أَ ذ أَعفَّانْ.

‏17 ونِّي إِسّْننْ أَذْ إِڭّْ ڒْخَارْ ؤُشَا وَارْ ث إِتّڭّْ، أَذْ أَسْ د-إِتّْوَاحْسبْ ذ دّنْبْ.