إِعِيبْرَانِييّنْ 1

إِعِيبْرَانِييّنْ

مِّيسْ يُوعْڒَا أَطَّاسْ خْ لْمَالَاكَاثْ

‏1 ذڭْ وُوسَّانْ إِعْذُونْ إِسِّيوڒْ أَربِّي ذِي مَارَّا إِكُوذنْ ؤُ ذڭْ وَاطَّاسْ ن إِبْرِيذنْ أَكْ-ذ ڒجْذُوذْ نّغْ س إِنَابِييّنْ. ‏2 ذڭْ وُوسَّانْ-أَ إِنڭُّورَا أَقَا إِسِّيوڒْ أَكِيذْنغْ س مِّيسْ، ونِّي إِڭَّا ذ أَوْرِيثْ ن كُوڒْشِي، س ونِّي عَاوذْ إِڭَّا دُّونشْثْ.    ‏3 مِينْزِي نتَّا ذ ثَاللّشْثْ ن ؤُعُودْجِي نّسْ ؤُڒَا ذ تّسْوِيرْثْ ن سِيمَانْثْ نّسْ، ؤُ نتَّا ذ ونِّي يَاربُّونْ مَارَّا ثِيمسْڒَايِينْ س جّهْذْ ن وَاوَاڒْ نّسْ. أَقَا نتَّا إِسِّيزْذڭْ دّْنُوبْ نّغْ ذڭْ يِيخفْ نّسْ، ؤُشَا إِرُوحْ إِقِّيمْ غَارْ يفُّوسْ ن لْعَاضِيمْ ذِي ڒُوعْڒَا.    ‏4 نتَّا يُوعْڒَا أَطَّاسْ خْ لْمَالَاكَاثْ أَمْ إِسمْ إِ إِطّفْ ذ ڒْوَارْثْ أَقَا إِشْنَا خْ ونِّي نْسنْ.

‏5 مِينْزِي إِ مَانْ ثنْ زِي لْمَالَاكَاثْ إِنَّا أَربِّي:

”مِّي إِ ثدْجِيذْ شكْ، أَسّْ-أَ نشّْ جِّيغْ-د شكْ!“،

ؤُشَا عَاوذْ إِنَّا:

”نشّْ أَذْ أَسْ إِڒِيغْ ذ بَابَاسْ ؤُ نتَّا أَذْ أَيِي يِيڒِي ذ مِّي“؟   

‏6 ؤُشَا خنِّي خْمِي د-إِسِّيذفْ أَمنْزُو غَارْ دُّونشْثْ، إِنَّا:

”أَذْ أَسْ سجْذنْ مَارَّا لْمَالَاكَاثْ ن أَربِّي.“   

‏7 ؤُشَا خْ لْمَالَاكَاثْ إِنَّا:

”نتَّا إِڭَّا لْمَالَاكَاثْ نّسْ ذ إِسمِّيضنْ،

ؤُشَا إِمْسخَّارنْ نّسْ ذ إِشْثْ ن ثْمسِّي إِتّحْذُوذُوقنْ“،     

‏8 مَاشَا خْ ممِّي:

”ڒْعَارْشْ نّكْ، أَ أَربِّي، أَقَا إِدْجْ إِ ڒبْذَا قَاعْ.

ثَاغَّارْشْثْ ن ثْڭلْذِيثْ نّكْ، أَقَا-ت ذ ثَاغَّارْشْثْ ثصْفَا.   

‏9 أَقَا ثخْسذْ ثَاسڭْذَا، ثْشَارْهذْ ڒْغَارْ.

س ؤُينِّي أَقَا إِذْهنْ إِ شْ أَربِّي، أَربِّي نّكْ،

س زّشْثْ ن ڒفْرَاحثْ سنّجْ إِ إِمْعَاشَارنْ نّكْ.“   

‏10 ؤُشَا خنِّي:

”زڭْ ؤُبدُّو ثڭِّيذْ شكْ ذْسَاسْ ن ثمُّورْثْ،

ؤُشَا إِجنْوَانْ دْجَانْ ذ ڒْخذْمثْ ن إِفَاسّنْ نّكْ.   

‏11 إِنَا أَذْ تّْوَاثحَّانْ، مَاشَا شكْ أَذْ ثْذُومذْ،

ؤُشَا إِنَا مَارَّا أَذْ أَرْشَانْ أَمْ وَارُّوضْ.   

‏12 أَمشْنَاوْ إِجّْ ن ؤُسڒْهَامْ أَذْ ثنْ تّْضفْسذْ.

أَذْ تّْوَابدّْڒنْ أَمْ وَارُّوضْ،

مَاشَا شكْ أَذْ ثِيڒِيذْ ذ ونِّي ؤُشَا إِسڭّْوُوسَا نّكْ وَارْ قطِّينْ شَا.“   

‏13 ؤُ إِ مَانْ ثنْ زِي لْمَالَاكَاثْ إِنَّا إِجّْ ن وَاسّْ:

”قِّيمْ غَارْ يفُّوسْ إِنُو

أَڒْ ذ غَا ڭّغْ ڒْعذْيَانْ نّكْ ذ ثَانبْذَاثْ سَاذُو إِضَارنْ نّكْ“؟   

‏14 مَا وَارْ دْجِينْثْ نِيثنْثِي ذ أَرُّوحَاثْ إِ ثْسخَّارْثْ، تّْوَاسكّنْثْ-إِ-د حِيمَا أَذْ سخَّارنْثْ إِ ينِّي غَا إِوَارْثنْ ثُوذَارْثْ؟