إِفَاسُوسِييّنْ 4

إِشْثْ ن أَرِّيمثْ ذ إِجّْ ن أَرُّوحْ س لْمَاسِيحْ

‏1 أَمْ ؤُمحْپُوسْ ذِي سِيذِيثْنغْ، زِييَّارغْ خَاومْ، حِيمَا أَذْ ثُويُورمْ أَمْ مَامّشْ د-ثُوسَا أَكْ-ذ ثْڒَاغِيثْ إِ زِي ثتّْوَاڒَاغَامْ،    ‏2 س مَارَّا أَوَاضعْ ن بُوحْبڒْ، س ثمْهِينْثْ ؤُ س تَّاسِيعْ ن ڒْخَاضَارْ، أَقَا أَذْ ثْقبّْڒمْ إِجّْ ونّغْنِي ذِي ثَايْرِي،    ‏3 أَذْ ثشْضَارمْ أَذْ ثْمُونمْ ذ إِجّْ ذِي أَرُّوحْ س ثْسغْوِينْ ن ڒهْنَا، ‏4 مَاحنْذْ أَذْ ثِيڒِيمْ ذ إِشْثْ ن أَرِّيمثْ ذ إِجّْ ن أَرُّوحْ أَمْ مَامّشْ ؤُمِي ثتّْوَاڒَاغَامْ ذڭْ ؤُسِيثمْ ن ثْڒَاغِيثْ نْومْ ذ إِجّنْ. ‏5 مَاغَارْ سِيذِي ذ إِجّنْ، ذ لْ-إِيمَانْ ذ إِجّنْ ؤُڒَا ذ أَسغْضصْ ذ إِجّنْ،    ‏6 ؤُ أَربِّي ذ إِجّنْ، ثَابَابَاثْ ن مَارَّا ؤُ خْ مَارَّا ؤُ أَكْ-ذ مَارَّا ؤُ ذَايْنغْ مَارَّا.

‏7 مَاشَا أَرْضَا إِمّوْشْ أَنغْ مَارَّا إِذْنغْ عْلَاحْسَابْ مِينْ ذ أَنغْ إِوْشَا لْمَاسِيحْ.    ‏8 س ؤُينِّي قَّارنْ:

”أَمْ إِڭعّذْ غَارْ ڒُوعْڒَا، إِحبّسْ ڒحْبسْ، إِوْشَا ثِيموْشَا إِ إِوْذَانْ.“   

‏9 مِينْ إِعْنَا عَاوذْ وَاوَاڒْ-أَ، أَقَا نتَّا إِڭعّذْ سنّجْ، مْغِيرْ أَقَا نتَّا غَارْ ؤُمزْوَارْ ثُوغَا إِهْوَا-د غَارْ طّْرُوفَا ن ثمُّورْثْ ن وَادَّايْ قَاعْ؟!   

‏10 ونِّي ثُوغَا د-إِهْوَانْ، نتَّا عَاوذْ ذ ونِّي ثُوغَا إِڭعّْذنْ سنّجْ إِ مَارَّا إِجنْوَانْ، حِيمَا أَذْ إِسِّيوضْ مَارَّا غَارْ ڒكْمَاڒثْ.

‏11 نتَّا يَارَّا شَا ذ رُّوسُولْ، شَا ذ إِنَابِييّنْ، شَا ذ إِمْبشَّارنْ، شَا ذ إِمكْسَاونْ ؤُ شَا ذ إِمْسڒْمَاذنْ،     

‏12 حِيمَا أَذْ زَّايْسنْ تّْوَاكمّْڒنْ إِمْقدَّاسنْ إِ ڒْخذْمثْ ن ثْسخَّارْثْ، إِ ڒبْنِي ن أَرِّيمثْ ن لْمَاسِيحْ،   

‏13 أَڒْ إِ غَا نَاوضْ مَارَّا غَارْ ؤُمُونِي ن لْ-إِيمَانْ ذ إِجّْ ؤُ ن ثُوسّْنَا ن مِّيسْ ن أَربِّي، ؤُڒَا ذ إِجّْ ن بْنَاذمْ إِكْمڒْ ذِي صِّيفثْ ثْمُونْ ن لْمَاسِيحْ.

‏14 إِتّْخصَّا وَارْ نتِّيڒِي أَمْ إِحنْجِيرنْ إِنِّي إِتّْوَاعَارَّانْ زِي طَّارْفْ غَارْ ونّغْنِي س كُوڒْ أَسمِّيضْ ن ؤُسڒْمذْ ؤُشَا ذوْڒنْ ڭّْوجنْ س ينِّي يَارزُّونْ أَذْ غَارّنْ س ثحْرَايْمشْثْ نْسنْ.   

‏15 بدّمْ نِيشَانْ ذِي ثَايْرِي نّغْ، مَاحنْذْ أَذْ نڭْمَا ذِي مَارَّا إِ لْمَاسِيحْ ونِّي ذ أَزدْجِيفْ، أَقَا-ث ذ لْمَاسِيحْ،   

‏16 زَّايسْ ثنّجْرُو ؤُ ثتّْوَاسْمُونْ أَرِّيمثْ مَارَّا س مَارَّا ڒمْفَاصڒْ عْلَاحْسَابْ ڒْقدّْ إِ إِمّوْشنْ إِ مْكُوڒْ أَغزْذِيسْ إِ ثْيُومِي ن أَرِّيمثْ أَڒْ غَا إِتّْوَاكمّڒْ ڒبْنِي نّسْ ذِي ثَايْرِي.   

ثَارْوَا ن ثْفَاوْثْ

‏17 نشّْ قَّارغْ ؤُ شهّْذغْ مَانْ أَيَا ذِي سِيذِي، حِيمَا وَارْ ثڭُّورمْ عَاذْ أَمشْنَاوْ مَامّشْ ؤُيُورنْ ڒڭْنُوسْ إِنّغْنِي، إِنِّي إِدَّارنْ ذِي ڒْبَاطڒْ ن إِخَارِّيصنْ نْسنْ،   

‏18 بَارْشْننْ ذِي ڒعْقڒْ نْسنْ ؤُ ڭّْوجنْ خْ ثُوذَارْثْ ن أَربِّي، مِينْزِي وَارْ ذَايْسنْ بُو ثُوسّْنَا ؤُ خْ سِّيبّثْ ن ثْقُوبَّانشْثْ إِ ذَايْسنْ إِدْجَانْ ؤُ خْ سِّيبّثْ ن ڒقْسَاحثْ ن وُوڒْ نْسنْ.   

‏19 نِيثْنِي ذوْڒنْ وَارْ تِّيشِينْ شَا، سلّْمنْ إِخفْ نْسنْ إِ ؤُفُوشّحْ، حِيمَا أَذْ ڭّنْ مَارَّا ڒخْمجْ س مژْرِي. ‏20 مَاشَا وَارْ إِدْجِي أَمُّو إِ ثسّْنمْ لْمَاسِيحْ، ‏21 ڒَامِي زعْمَا كنِّيوْ ثُوغَا ثسْڒَامْ غَارسْ ؤُشَا ثْڒمْذمْ زَّايسْ عْلَاحْسَابْ ثِيذتّْ إِ إِدْجَانْ ذِي يشُّو، ‏22 مَاشَا إِتّْخصَّا أَذْ ثنْضَارمْ ثِيشْڒِي نْومْ ن زِيشْ، أَذْ ثجّمْ بْنَاذمْ أَقْذِيمْ إِ إِتّْوَاسخْسَارنْ س نّشْوَاثْ إِغشّنْ.    ‏23 تّْوَاعذْڒمْ زِي جْذِيذْ س أَرُّوحْ ن ڒعْقڒْ نْومْ. ‏24 أَرْضمْ بْنَاذمْ ن جْذِيذْ إِ د-إِتّْوَاخڒْقنْ ذِي أَربِّي ذِي ثْسڭْذَا ؤُ ذِي ثُوقدّْسِي ن ثِيذتّْ.   

‏25 س ؤُينِّي جّمْ إِخَارِّيقنْ، سِيوْڒمْ ثِيذتّْ كُوڒْ إِجّْ أَكْ-ذ ؤُمْقَارّبْ نّسْ، مِينْزِي نشِّينْ ذ إِخْفَاونْ إِجّنْ إِ ونّغْنِي.    ‏26 خيّْقمْ، مَاشَا وَارْ تّڭّمْ شَا دّْنُوبْ، وَارْ ثجِّي أَذْ ثغْرِي ثْفُوشْثْ خْ ؤُخيّقْ نْومْ.    ‏27 وَارْ تِّيشمْ شَا أَمْشَانْ إِ إِبْڒِيسْ.    ‏28 وَارْ ثجِّي ونِّي إِتَّاشَارنْ أَذْ يَاشَارْ عَاذْ، مَاشَا حْسنْ أَذْ يَارْبرْ س إِفَاسّنْ نّسْ مَاحنْذْ أَذْ إِسُّوفّغْ إِشْثْ ذ ڒْحَاجّثْ ذ ثَاصبْحَانْثْ مَاحنْذْ أَذْ ت إِوْشْ إِ ينِّي إِحْذَاجنْ.    ‏29 وَارْ د-إِتّكّْ شَا وَاوَاڒْ إِخمْجنْ زڭْ ؤُقمُّومْ نْومْ، مَاشَا مِينْ إِصبْحنْ إِ ڒبْنِي أَمْ مَامّشْ إِتّْخصَّا، حِيمَا أَذْ ثسِّيوْضمْ أَرْضَا إِ ينِّي إِ غَا إِسْڒَانْ.    ‏30 وَارْ تّسّْفُّوڭْممْ شَا أَرُّوحْ إِقدّْسنْ ن أَربِّي إِ زِي ثتّْوَاطبْعمْ أَڒْ أَسّْ ن وصْڒَاحْ.    ‏31 جّمْ أَذْ زَّايْومْ كّْسنْ مَارَّا ثَارْزُوڭِي ذ لْغَاضَابْ ذ ؤُصدّعْ ذ ؤُشقّفْ أَكْ-ذ مَارَّا ثُوعفّْنَا إِ د-إِتَّاسنْ أَكْ-ذ مَانْ أَيَا.    ‏32 إِڒِيمْ ثْضَارْفمْ ؤُ ڭّمْ ڒحْنُونشْثْ ذڭْ وَايَاوَا. سَامْحمْ إِ وَايَاوْيَا أَمشْنَاوْ أَربِّي عَاوذْ أَقَا إِغْفَارْ أَنغْ ذِي لْمَاسِيحْ.