إِفَاسُوسِييّنْ 3

بُولُوسْ ذ أَمْبَارّحْ ن ڒخْبَارْ أَصبْحَانْ إِ ڒڭْنُوسْ

‏1 س ؤُينِّي نشّْ، بُولُوسْ، أَقَا أَيِي ذ أَمحْپُوسْ ن يشُّو لْمَاسِيحْ، إِ كنِّيوْ إِنِّي إِدْجَانْ زِي ڒڭْنُوسْ،    ‏2 مَاڒَا زعْمَا أَقَا ثسْڒَامْ خْ ثْسخَّارْثْ ن أَرْضَا ن أَربِّي إِ ذ أَيِي إِمّوْشنْ جَارَاومْ،    ‏3 بلِّي إِتّْوَاسَّارْڭبْ أَيِي-د سِّيرّْ-أَ، أَمْ إِزَّارغْ ؤُرِيغْ أَومْ-د س ذْرُوسْ.    ‏4 خْمِي إِ غَا ثْغَارمْ مَانْ أَيَا، ثْزمَّارمْ أَذْ ثْفهْممْ ڒفْهَامثْ إِنُو ن سِّيرّْ ن لْمَاسِيحْ، ‏5 ونِّي وَارْ إِتّْوَاسَارْڭبْ شَا ذِي ثَارْوَا ن بْنَاذمْ ذِي ڒشْيُورْ ن زِيشْ، أَمْ مَامّشْ إِتّْوَاعَارَّا خَاسْ ڒخُّو س أَرُّوحْ إِ رُّوسُولْ إِمْقدَّاسنْ نّسْ ؤُ إِ إِنَابِييّنْ نّسْ،      ‏6 أَحقَّا إِنِّي زِي ڒڭْنُوسْ أَذْ إِڒِينْ ذ إِوْرِيثنْ أَكِيذْسنْ، ؤُ إِغزْذِيسنْ ن أَرِّيمثْ نّسْ ؤُ ن لْوَاعْذْ نِّي ذَايسْ إِمّوْشنْ س ڒخْبَارْ أَصبْحَانْ،    ‏7 إِ زِي ذوْڒغْ ذ أَمْسخَّارْ عْلَاحْسَابْ ثَاوْهِيبْثْ ن أَرْضَا ن أَربِّي إِ ذ أَيِي إِمّوْشنْ عْلَاحْسَابْ جّهْذْ نّسْ إِ ذَايِي إِخدّْمنْ.    ‏8 أَقَا إِمّوْشْ أَيِي أَرْضَا أَيَا، إِ نشّْ ذ أَمُوقْڒِيڒْ قَاعْ جَارْ مَارَّا إِمْقدَّاسنْ، حِيمَا أَذْ بَارّْحغْ س ڒخْبَارْ أَصبْحَانْ، إِوَا أَڭْڒَا ن لْمَاسِيحْ إِ وَارْ نْزمَّارْ أَذْ نفْهمْ،    ‏9 ؤُ حِيمَا أَذْ سُّوفّْغغْ غَارْ ثْفَاوْثْ إِ مَارَّا مِينْ إِخْسْ أَذْ يِينِي ؤُوكّڒْ ن سِّيرّْ إِ ثُوغَا إِنُوفَّارنْ ذڭْ إِكُوذنْ ن زِيشْ ذِي أَربِّي، ونِّي إِ د-إِخڒْقنْ كُوڒْشِي،   

‏10 حِيمَا ثِيغِيثْ ن أَربِّي أَكْ-ذ وَاطَّاسْ ن إِغزْذِيسنْ نّسْ أَذْ ثِيڒِي ثتّْوَاسْننْ س ثْمسْمُونْثْ غَارْ صُّولَاطَاثْ ذ ڒْحُوكَّامْ ذڭْ ؤُجنَّا،   

‏11 مِينْ ثُوغَا إِسّوْجذْ نتَّا قْبڒْ زِي ڒبْذَا ؤُشَا إِكمّڒْ إِ-ث ذِي سِيذِيثْنغْ يشُّو لْمَاسِيحْ،

‏12 ونِّي ذَايسْ أَقَا غَارْنغْ ثَارْيَاسْثْ ذ وَاذَافْ أَكْ-ذ تِّيقثْ س لْ-إِيمَانْ نّسْ.   

‏13 س ؤُينِّي تّْزَاوْڭغْ كنِّيوْ مَاحنْذْ وَارْ تِّيحْڒمْ شَا س ڒمْحَايمْ إِنُو ذِي طّْوعْ نْومْ. أَقَا مَانْ أَيَا إِ ؤُعُودْجِي إِ كنِّيوْ.   

ثَاژَادْجِيثْ ن بُولُوسْ خْ إِفَاسُوسِييّنْ

‏14 أَذْ أَذَارغْ س إِفَادّنْ إِنُو زَّاثْ إِ ثْبَابَاثْ ن سِيذِيثْنغْ يشُّو لْمَاسِيحْ

‏15 إِ ونِّي ؤُمِي سمَّانْ كُوڒْ إِجّْ ن ثْبَابَاثْ إِ إِدْجَانْ ذڭْ إِجنْوَانْ ذ ثمُّورْثْ،

‏16 حِيمَا أَذْ أَومْ إِوْشْ عْلَاحْسَابْ أَڭْڒَا ن ؤُعُودْجِي نّسْ ؤُ حِيمَا أَذْ ثتّْوَاسْجهْذمْ س جّهْذْ س أَرُّوحْ نّسْ ذِي بْنَاذمْ ن ذَاخڒْ،   

‏17 حِيمَا لْمَاسِيحْ أَذْ إِزْذغْ ذڭْ وُوڒَاونْ نْومْ س لْ-إِيمَانْ ؤُ س ثَايْرِي، خْ مِينِّي ثشَّاثمْ إِژوْرَانْ ؤُ أَذْ ثسْمثْننْ ذْسَاسْ نْومْ،   

‏18 حِيمَا أَذْ ثْزمَّارمْ أَذْ ثْفهْممْ أَكْ-ذ مَارَّا إِمْقدَّاسنْ مِينْ ثعْنَا ثِيرُو ذ ثُوزّڭَّارْثْ ذ ڒُوعْڒَا ذ ڒَادْجَاغْ،

‏19 ؤُ أَذْ ثسّْنمْ عَاوذْ ڒمْغَارثْ ن ثُوسّْنَا ن ثَايْرِي ن لْمَاسِيحْ، ؤُشَا أَذْ ثِيڒِيمْ ثْعمَّارمْ س مَارَّا أَعمَّارْ ن أَربِّي.

‏20 مَاشَا إِ نتَّا ؤُمِي غَارسْ ثِيزمَّارْ إِفيّْضنْ حِيمَا أَذْ إِڭّْ ذِي طّْوعْ نّغْ سنّجْ إِ مِينْ نتّتَّارْ نِيغْ نتّْخَارّصْ، عْلَاحْسَابْ جّهْذْ نّسْ إِ إِخدّْمنْ ذَايْنغْ،    ‏21 إِ نتَّا إِكَّارْ أَسْ-د ؤُعُودْجِي ذِي ثْمسْمُونْثْ س يشُّو لْمَاسِيحْ، ذِي مَارَّا ڒشْيُورْ إِ ڒبْذَا قَاعْ. أَمِينْ.