إِڭَالَاطِييّنْ 1

إِڭَالَاطِييّنْ

أَسدْجمْ غَارْ ؤُمزْوَارُو

‏1 بُولُوسْ، رَّاسُولْ، - وَارْ إِدْجِي س إِوْذَانْ ؤُڒَا س ڒْخَاضَارْ ن بْنَاذمْ مَاشَا س يشُّو لْمَاسِيحْ ؤُ س أَربِّي، بَابَاسْ، ونِّي إِ-ث-إِ-د-إِسّْنكَّارنْ زِي ثَادَّارْثْ ن إِمتِّيننْ - ،    ‏2 ؤُ مَارَّا أَوْمَاثنْ إِنِّي إِدْجَانْ أَكِيذِي، إِ ثْمسْمُونِينْ ن ڭَالَاطِييَا: ‏3 أَرْضَا ذ ڒهْنَا أَذْ خَاومْ إِڒِينْ زِي أَربِّي، ثَابَابَاثْ، ؤُ زِي سِيذِيثْنغْ، يشُّو لْمَاسِيحْ،    ‏4 ونِّي إِوْشِينْ إِخفْ نّسْ خْ دّْنُوبْ نّغْ حِيمَا أَذْ أَنغْ إِفكّْ زِي دُّونشْثْ-أَ أَعفَّانْ، أَمْ مَامّشْ ت إِخْسْ أَربِّي، بَابَاثْنغْ،    ‏5 ونِّي ؤُمِي إِ غَارْ إِدْجْ ؤُعُودْجِي إِ ڒبْذَا قَاعْ. أَمِينْ.

أَقَا ذِينْ إِجّْ ن ڒخْبَارْ أَصبْحَانْ وَاهَا، وَارْ ذِينْ إِدْجِي نّغْنِي

‏6 تّْبهْثغْ ؤُمِي ثمُّوطْيمْ أَمُّو ذغْيَا خْ لْمَاسِيحْ، ونِّي ذ أَومْ د-إِڒَاغَانْ س أَرْضَا نّسْ، غَارْ إِجّْ ن ڒخْبَارْ أَصبْحَانْ نّغْنِي    ‏7 نِّي وَارْ ذِينْ إِدْجِي، مَاشَا ذِينْ شَا ن يِينِّي كنِّيوْ إِحيَّارنْ ؤُشَا خْسنْ أَذْ بدّْڒنْ ڒخْبَارْ أَصبْحَانْ ن لْمَاسِيحْ.    ‏8 مَاشَا مَاڒَا نشِّينْ نِيغْ إِجّْ ن لْمَالَاكْ زڭْ ؤُجنَّا أَذْ أَومْ إِبَارّحْ س يِيجّْ ن ڒخْبَارْ أَصبْحَانْ نّغْنِي خْ ونِّي إِ زِي نْبَارّحْ إِ كنِّيوْ، أَذْ يِيڒِي ذ أَمنْعُوڒْ.    ‏9 أَمْ إِزَّارغْ نِّيغْ، قَّارغْ ث عَاوذْ ڒخُّو إِجّْ ن ؤُمُورْ نّغْنِي: مَاڒَا حذْ إِبشَّارْ إِ كنِّيوْ س إِجّْ ڒخْبَارْ أَصبْحَانْ نّغْنِي خْ ونِّي ثْقبْڒمْ، أَذْ ثَافْ أَذْ إِتّْوَانْعڒْ.

‏10 مَا أَرزُّوغْ ڒخُّو أَذْ سّْقنّْعغْ إِوْذَانْ نِيغْ أَربِّي؟ نِيغْ أَرزُّوغْ أَذْ أَرْضِيغْ إِوْذَانْ؟ مَاڒَا أَرزُّوغْ أَذْ أَرْضِيغْ إِوْذَانْ، وَارْ تِّيڒِيغْ عَاذْ ذ أَمْسخَّارْ ن لْمَاسِيحْ.   

ثَاڒَاغِيثْ ن أَربِّي خْ بُولُوسْ

‏11 مِينْزِي أَذْ أَومْ مْڒغْ، أَ أَيْثْمَا، بلِّي ڒخْبَارْ أَصبْحَانْ إِ ذ إِتّْوَابَارّْحنْ زَّايِي، وَارْ إِدْجِي عْلَاحْسَابْ بْنَاذمْ،   

‏12 مَاغَارْ نشّْ وَارْ ث طِيطْفغْ نِيغْ وَارْ ث ڒْمِيذغْ زِي بْنَاذمْ، مَاشَا س ؤُسَارْڭبْ ن يشُّو لْمَاسِيحْ.   

‏13 أَقَا ثسْڒِيمْ مَامّشْ ثُوغَا ڭُّورغْ قْبڒْ ذِي دِّينْ ن وُوذَاينْ، ثُوغَا ذَارّْشغْ خْ ثْمسْمُونْثْ ن أَربِّي أَطَّاسْ، أَرزُّوغْ أَذْ ت أَردّْدْجغْ.   

‏14 ثُوغَا إِزَّارغْ ذِي دِّينْ ن وُوذَاينْ خْ وَاطَّاسْ ن إِقْرِيننْ زِي ڒْڭنْسْ إِنُو، مِينْزِي ثُوغَا محْضغْ أَطَّاسْ خْ ثْغُورِي ن ڒجْذُوذْ إِنُو.

‏15 مَاشَا ڒَامِي ثُوغَا يَارْضَا أَربِّي، ونِّي ذ أَيِي إِحُوزنْ ذ ونِّي خَافِي ذ إِڒَاغَانْ س أَرْضَا نّسْ ؤُمِي ثُوغَا أَيِي عَاذْ ذڭْ ؤُعذِّيسْ ن يمَّا،   

‏16 مَاحنْذْ أَذْ ذَايِي د-إِسّضْهَارْ مِّيسْ حِيمَا أَذْ زَّايسْ بَارّْحغْ جَارْ ڒڭْنُوسْ، خنِّي وَارْ سَّارْڭِيبغْ مَانْ أَيَا ذغْيَا إِ ينِّي غَارْسنْ إِدْجْ دَّاثْ ذ إِذَامّنْ.   

‏17 عَاوذْ وَارْ رُوحغْ شَا غَارْ ؤُرْشَالِيمْ، غَارْ ينِّي إِ ثُوغَا ذ رُّوسُولْ قْبڒْ إِنُو، مَاشَا رُوحغْ غَارْ أَرَابِييَّا ؤُشَا ذوْڒغْ-د خنِّي عَاوذْ غَارْ ذِيمَاشْقْ.

‏18 أَوَارْنِي ثْڒَاثَا ن إِسڭّْوُوسَا، رُوحغْ غَارْ ؤُرْشَالِيمْ حِيمَا أَذْ مّڒْقِيغْ أَكْ-ذ بُوطْرُوسْ، ؤُشَا زذْغغْ أَكِيذسْ خمّسْطَاشْ ن وُوسَّانْ.

‏19 وَارْ ژْرِيغْ حذْ نّغْنِي زِي رُّوسُولْ مْغِيرْ يَاعْقُوبْ، ؤُمَاسْ ن سِيذِيثْنغْ. ‏20 مِينْ ذ أَومْ تَّارِيغْ ڒخُّو، أَقَا ذَا شهّْذغْ زَّاثْ إِ أَربِّي: وَارْ سّْخَارِّيقغْ شَا!    ‏21 أَوَارْنِي مَانْ أَيَا رُوحغْ غَارْ جّْوَايهْ ن سُورِييَا ذ كِيلِيكِييَا. ‏22 ثِيمسْمُونِينْ ن يَاهُوذِييَّا إِ إِدْجَانْ ذِي لْمَاسِيحْ، وَارْ سِّيننْ أَغمْپُوبْ إِنُو. ‏23 نِيثْنِي ثُوغَا سْڒِينْ خَافِي أَمُّو وَاهَا: ”أَقَا ونِّي ثُوغَا خَانغْ إِذَارّْشنْ قْبڒْ، ڒخُّو إِتّْبَارّحْ س لْ-إِيمَانْ إِ ثُوغَا يَاردّدْجْ زِيشْ!“، ‏24 ؤُشَا سّمْغَارنْ ذِي أَربِّي زِي سِّيبّثْ إِنُو.