Maiyafua edde nagá
12
Baade asman ot ekkán ḍoóñr nicán dahá gíyeh: eggwá mayafua beil findá, híbar ṭéng or tole san asé, aar matár uore baró wa tara ola eggwá tas asé. 2 Híba hámil, aar fua zormo dibar októr dukké guzorat accíl. 3 Tarfore asman ot arekkán nicán dahá gíyeh: eggwá ḍoóñr lal nagá, yíba ttu háñt twa matá edde doc cán cíng asé, aar yíbar matá gún ot háñt twa tas asé. 4 Yíbar lese asman or tin bák or ek bák tara ṭani aní yore duniyait félaidiye. Hé nagá wa ze mayafua wa fua zormo doom-doom óiye híbar muúntu tíyai táikke, zeéne híba ye zormo dilé mottor híbar Fua wa re háifelai fare. 5 Mayafua wa ye eggwá morot Fua zormo diyé, zibá ye luwár loṛí lói tamám koum ókkol or uore hókumot goríbo. Híbar hé Fua wa re súlan mari Allar edde Íbar toktór hañse aná gíyeh. 6 Tarfore mayafua wa moidan zagat dáigiyegoi, zeṛé Alla ye híba lla ekkán zaga toiyar gorí raikké, zeéne héṛe híba re baró có háiṭ din fán fala zah.7 Baade asman ot larái óiye: Maikelea edde yóggwar fírista ókkole nagá llói larái goijjé; aar nagá edde yíbar fírista ókkole yó híin lói larái goijjé, 8 montor híine nó zite, aar híin ore asman ot ar zaga diiya nó zah. 9 Hé ḍoóñr nagá re félaidiya gíyeh, yáni furana háf zibá re Ibilíc edde Cóitan howá zah, zibá ye fura duniyair maincóre gollot ot loiza yíba re. Yíba re duniyait félaidiya gíyeh, aar yíbar fúañti yíbar fírista gún ore yó félaidiya gíyeh.
10 Tarfore añí asman ot eggwá ḍoóñr abas fúinni, eén hoór de,
“Yala añárar Allar nejat, taakot, raijjo
edde Íbar Mosihr adíkar házir óiye,
kiyólla-hoilé añárar imandár báiboináin dor uore elzam-lagoya
zee niki añárar Allar muúntu dine raite ítarar uore elzam lagaitó,
ítare toh nise félaidiya gíyeh.
11 Ítara Bérasóol-or-Sóor lou wór
edde nize dyíl de gobár hotár zoriya
ítare ziti aiccé;
ítara moot or muk ot úddwa
nizor zan ore ador nó goré.
12 Hétolla, ó asman ókkol
edde zetará héṛe táko, kúci goró.
Montor, ó zobin edde doijja,
tuáñrar uore afsús,
kiyólla-hoilé Ibilíc toh tuáñrar héṛe lami aiccé.
Íte rake furaiya óiye,
kiyólla-hoilé íte ítar ṭaim baṛí de zane.”
13 Zeñtté nagá wa ye nizoré duniyait félaidiya gíyeh de deikké, hétunot yíba ze mayafua wa ye morot Fua zormo diyé híbar fisá doijje. 14 Montor hé mayafua wa re ḍoóñr sil or duiyán fak diiya giyéh, zeéne híba ye moidan zagat nizor zaga waán ot uri zai fare, ziyán ot híba re cáro tin bosór foijjonto hé háf or muúntu no fore fángori fala zaybo. 15 Baade hé háf fwa ye nizor gal ottu faní neelai mayafua war fisé hál or ḍóilla gorídiye, zeéne hé faníbane híba re bácai loizagói. 16 Montor zobine mayafua wa re modot goijjé; zobine nizor gal kúli hál lan or faní gún háifelaiye, ziín nagá ye nizor gal ottu neeláil. 17 Hétolla hé nagá wa mayafua wa lloi bicí rak óiye, aar híbar badbaki nosól uitará lloi larái goittó giiyói zetará Allar hókum ókkol amól goré edde Isár diya gobá re dóri táikke.