Kitab edde Bérasóol-or-Sóo
5
Zibá toktó gán or uore boiṛá asé Íbar den át ot añí éggwa kitab deikkí, zibár bútore-baáre kessú leikká asé, zibá háñt twa moór lói moór lagaiya. 2 Baade añí éggwa taakotwala fírista deikkí zibá ye ḍoóñr abase elan gorér de, “Hé moór gún kúlifelai kitab pwá kúlibar laayek honókiye asó né?” 3 Montor asman ot yáh zobin ot yáh fatalfur ot endilla honókiyo re faa nó zah, zee niki kitab pwá kúlibar yáh yíbar bútore saibár kaabel. 4 Hétunot añí bicí hañdat doijji, kiyólla-hoilé hé kitab pwá kúlibar yáh yíbar bútore saibár laayek honókiyo re faa nó zah. 5 Montor murubbi-neta gún ottu ekzone añré hoór de, “No hañdiyó; soó, Yohúdahr háandan or ze Cínggo asé, zibá Dawud or Cíñyor, Íba zitigiyói; Íba kitab pwá kúlibar edde yíbar háñt twa moór gún báñgifelaibár kaabel.”6 Baade añí deikkí de, toktó gán or sairó wa zandár or edde murubbi-neta gún or mazéhale eggwá Bérasóol-or-Sóo tíyaiya, zibá re saité zooráifela gíyeh fán. Íba ttu háñt tan cíng edde háñt twa suk asé; suk híin óilde Allar háñt twa ruh uúin ziín ore fura duniyait difeṛá gíyeh. 7 Íba aái yore, zibá toktór uore boiṛá asé Íbar den át ottu kitab pwá loiyé. 8 Íba ye kitab pwá looi baade, sairó wa zandáre edde ekkuri sair zon murubbi-neta gúne hé Bérasóol-or-Sóor war muúntu sóida foijjé; ítara fottíkiyor át ot ekgwá-ekgwá bina edde agórbatti lói bóraiya cúnar fiyala asé, ziín óilde Allar pak bonda ókkol or dua. 9 Ítara eggwá noya seér gaiyé, hondilla hoilé,
“Tuñí kitab pwá loibar
edde yíbar moór gún kúlifelaibar laayek;
kiyólla-hoilé Tuáñre toh zooráifela gíyl,
aar Tuñí Nizor lou loi hárr háandan ottu, hárr zuban ottu, hárr koum ottu edde hárr dec ottu
Alla lla manúc ókkol kinnó.
10 Tuñí ítara re lói ekkán raijjo banaiyó, aar añárar Allar ham olla ítara re imam banaiyó;
ítara duniyait hókumot goríbo.”
11 Tarfore añí abar saiyí rár, hé toktó gán ore, zandár gún ore edde murubbi-neta gún ore gíridoijja boóut fírista ókkol or abas fúinni, ziín or gona lak-lak, edde kuṭí-kuṭí; 12 híine eggwá ḍoóñr abase howát asé de,
“Ze Bérasóol-or-Sóo wa re zooráifela gíyl,
Íba kémota, dón-doulot, giyan, taakot,
izzot, mohíma, edde taarif or laayek.”
13 Tarfore añí fúinni de, asman ot, zobin ot, fatalfur ot, edde doriyat zedún mohóluk ókkol asé, yáni híin or bútore ziín asé híin beggúne eén hoór,
“Zibá hé toktór uore boiṛá asé Íbar edde Bérasóol-or-Sóo war
taarif, izzot, mohíma edde raastri abadulabad hámica zari tákouk.”
14 Tói sairó wa zandáre “aamin” hoiyé, aar murubbi-neta gúne uúiñtoi fori sóida goijjé.