Kórin cóor ot Pául
18
Yárbaade Pául Aten cóor ottu bacá loi Kórin cóor ot giyé. 2 Héçe íba ye Ekúila nam or ek zon Yohúdi loot faiyé, zibá Pontus ot zormo óoil. Baáñcca Kalediyuse Yohúdi beggún ore Rom sári zaitogói hókum diíl de hétolla, yóggwa kessú ṭaim age yóggwar bou Prisíla re loi Iṭali ttu aáigilgói. Páule ítara re saitó giyé, 3 ar íba yó zettót ítarar ḍóilla ṭambu-ṭakoya, íba ítarar fúañti táki ham goijjíl. 4 Íba ye fottí ebaadot or din mujilíc-hánat toskara ókkol gorí-gorí Yohúdi ókkol ore edde Girík ókkol ore imandár banaibár kucíc goittó.5 Zeéñtte Sílas edde Timóti Mekodóniya ttu aiccé, Páule kalam tobolik gorát furafuri lagi táka cúru goijjé. Íba ye Yohúdi ókkol or hañsé gobá dito de, Isá óilde Moósi. 6 Montor Yohúdi ókkole zettót Pául or muhálefi edde beizzoti gorér, íba ye ítarar ulḍa nizor gair or hoor zárifelái hoór de, “Tuáñrar lou wór zimma tuáñrar matár uore óuk! Añí behosúr. Añí ehón ottu lóti Beyohúdi ókkol or héçe zaiyum.”
7 Yárbaade Pául mujilíc-hána sári Titus Yustus nam or ek manúic or gór ot giyé. Yóggwa Allar ebaadotgár accíl, ar yóggwar gór gán mujilíc-hánar ḍáke accíl. 8 Mujilíc-hánar sóddar Kirispase edde íbar gór ṭíya ye Malik or uore iman ainníl, héndilla Pául or boiyan fúni boóut Kórintiyóle yó iman ainníl ar bápṭísma loóil.
9 Ek din raitta Malike Pául ore ekkán dorcón ot hoór de, “No ḍoraic, bólke huwát ták, nizám ói no tákic, 10 kiyólla-hoilé Añí tor fúañti-fúañti así. Tor hóti gorí bolla toré honókiyé hámla no goríbo, kiyólla-hoilé e cóor ot Añár ttu bicí manúic asé.” 11 Tói Pául Kórin ot der-bosór foijjonto táki maincóre Allar kalam or taalim diíl.
12 Montor Galiyo zeéñtte Akaya elakar hókumot-goróya accíl, Yohúdi ókkol ektofák ói Pául or hélaf tíaiyé ar íba re adalot ot ainné. 13 Ítara hoór de, “Manúic ibá ye maincóre Allar ebaadot endilla torika ye goittó uskai deer, ziyán córiyot or ulḍa.”
14 Páule hotá huwá cúru goitté, Galiyo ye Yohúdi ókkol ore hoór de, “Óu Yohúdi ókkol, zodi tuáñrar elzam yián honó sóiyi hosúrir yá gollot ham or baabute óito, tóoile tuáñrar hotá fúnon añár lla hazor óito. 15 Montor yián ot zettót taalim, nam edde tuáñrar nizor córiyot or baabute súwal gólaiya asé, yián ore tuáñra nizebaze hól gorógoi; añí endilla maamelar bisarhar óito no saái.” 16 Héen hoói yóggwa ye ítara re adalot ottu duñrai diyé. 17 Hétunot ítara beggúne mujilíc-hánar sóddar Sostin ore dóri yóre adalot or muúntu mara-dóra goijjé. Montor Galiyo ye híin or híkka honó díyan nó dee.
Enṭiyok ot Pául or waafesi
18 Pául Kórin ot boóut din táki baade, imandár báiyain dor ttu bidai loi zaáñs ot gorí Siíriya mulluk ot zai bolla bacá loiyé; fúañti Prisíla edde Ekúila yó accíl. Kiniríya cóor ot táite íba ye nizor sul haçifélail, kiyólla-hoilé íba ekkán manoc or tole accíl. 19 Tará Ífisas cóor ot foóñsi baade Páule Pirisíla edde Ekúila re héçe raikké. Baade íba nize mujilíc-hánat zai yóre Yohúdi ókkol loi toskara gorát doijje. 20 Yohúdi ókkole íba re aró hooddin ítarar fúañti táki bolla aros goijjíl, montor íba razi nó. 21 Bólke zaibarcót ítara re hoór de, “Alla ye sailéa añí tuáñrar hañsé abar aiccúm.” Baade íba zaáñs ot gorí Ífisas ottu bacá loiyé, 22 ar Kaisáriyat lami baade uore Jerúsalem ot giyé. Tarfore héçiyar zomát or manúic ókkol ore sólam zanai Enṭiyok ot giyégoi.
23 Héçe hooddin táki baade íba Galatíya edde Fergíya elakar agagurat zai-zai ummot ókkol or iman mozbut gorát accíl.
Ífisas ot Apólos or tobolik
24 Hé októt Apólos nam or ek zon Yohúdi Ífisas ot aiccíl, zibá Alexzendariya cóor ot zormo óoil. Yóggwa ye cúndor gorí waáz goittó, ar pak-kalam or baabute furafuri zainto. 25 Yóggwa ye Malik or torikar baabute taalim faáil, ar bicí josbar sáañte Isár baabute sóiyi gorí taalim dito edde cíkka dito, montor yóggwa ye zainto de siríf Yaháyar bápṭísmar baabute. 26 Yóggwa ye hímmot or sáañte mujilíc-hánat waáz gorát doijje, montor Prisíla edde Ekúila ye zeéñtte yóggwar hotá fúinne, ítara yóggwa re ítarar gór ot loizai Allar rastar baabute aró cúndor gorí buzáiye.
27 Apólos ottu Akaya elakat zaito mone hoiyé rár, Ífisas or imandár báiyain de yóggwa re hímmot diyé, ar yóggwa re estekbal gorí bolla héçiyar ummot ókkol or hañsé ekkán ceñçí leikké. Ar zetará Allar rahámote iman ainné ítara re yóggwa ye héçe foóñsi baade bicí modot goijjé. 28 Kiyólla-hoilé yóggwa ye Isá óilde Moósi de híyan pak-kalam ottu dolil diyat accíl, ar héndilla gorí yóggwa ye manúic ókkol or muúntu Yohúdi ókkol ore zuresúre gollot sábut goijjíl.