Tissálonika cóor ot hánggama
17
Tará Amfipolís edde Apoloníya cóor bái zai Tissálonika cóor ot aiccé, zeçé Yohúdir ekkán mujilíc-hána accíl. 2 Páule nizor niyom mozin mujilíc-hánat giyé, ar lagatar tin ebaadot or din foijjonto ítara lloi pak-kalam ottu toskara ókkol goijjé. 3 Íba ye toskara gorí buzár de edde dolil deer de ki, Moósi ttu duk faibar edde mora ttu zinda úwar zorur accíl. Íba ye hoiyé de, “Añí tuáñra re ze Isár baabute boiyan gorír, Íba óilde hé Moósi.” 4 Ítara hoozzone iman aní Pául edde Sílas lói bóng óiye, héndilla bicí zon Girík dindár manúic edde boóut zon mocúr maiya fuain óu bóng óiye.5 Montor ar baki Yohúdi ókkol ottu gairot lagi bazar ottu hodún hóraf manúic loi eggwá ḍaái baindé ar cóor ore úrussul gorífelaye. Ítara Jason or gór ore hámla gorí Pául edde Sílas ore tuwaiyé, zeéne tará re awam ókkol or muúntu aní fare. 6 Montor tará re zettót tuwai nó faa, ítara Jason edde kessú imandár báiyain dore ṭani-ṭani cóor or adikari ókkol or muúntu ainné, ar guzori hoór de, “Manúic itará fura duniyait ferecani foida gorí yala eçé yó aiccé, 7 ar Jasone itará re nizor gór ot zaga diyé. Itará beggúne baáñcca Káisar or hókum or ulḍa goré, ar hoó de, Káisar baade aró eggwá baáñcca asé, zibár nam óilde Isá.” 8 Héndilla hoói ítara awam ókkol or edde cóor or adikari ókkol or matá hóraf gorídiyé. 9 Montor Jason edde oinno manúic ókkol tará lla zabin óiye rár, sóddar ókkole tará re eridiyé.
Beriyat Pául edde Sílas
10 Hé din raitta imandár báiyain de toratori Pául edde Sílas ore Beriyat duñraidiyé. Héçe foóñsi yóre tará Yohúdir mujilíc-hánat giyé. 11 Héçiyar Yohúdi híin Tissálonika cóor or Yohúdi ókkol ottu aró bicí cáda dil ola accíl, kiyólla-hoilé ítara ḍoóñr azzu ye kalam fúni kobul goijjíl. Ítara Páule ziín hoitó híin fottí din pak-kalam tahákik gorí sóiyi né na sóiyi saitó. 12 Hétolla ítarar bútor ttu boóut zone iman ainné; héndilla boóut zon Girík mocúr maiya fuain edde morot fuain de yó iman ainné.
13 Montor Tissálonikar Yohúdi ókkole zeéñtte Páule Beriyat óu Allar kalam tobolik gorér de fúinne, ítara héçe yó zai manúic ókkol ore uskai dii oulzóul foida goijjé. 14 Hétolla imandár báiyain de toratori Pául ore doijjar hañsat duñrai diyé, montor Sílas edde Timóti héçe táigiílgoi. 15 Zetará Pául ore barái dito giíl ítara íba re Aten cóor foijjonto foóñsai diyé, ar Sílas edde Timóti zendilla fare héndilla hára Pául or hañsé ai bolla hókum fai yóre ítara waafes giyégoi.
Aten cóor ot Pául
16 Páule Aten cóor ot Sílas olla edde Timóti lla entezar gorér de októt, hé cóor gán mutti loi furaiya de dekí íba ttu dil ot bicí ferecan laiggíl. 17 Hétolla íba ye mujilíc-hánat Yohúdi edde dindár Beyohúdi ókkol loi toskara ókkol goittó, héndilla somónit zai zetará re loot faa ítara lloi yó fottí din goittó. 18 Ipíkuri edde Stoiki fírkar hoozzon úzure yó íba lloi barábari diyat doijje, hodúne hoór de, “E fálṭu ite kii hoitó saár de?” Ar hodúne hoór de, “Ite eggwá bidecí debotar baabute taalim deer fán lager.” Ítara e hotá etollá hoiyé, kiyólla-hoilé Páule Isár edde zinda ói uçár baabute kúchóbor tobolik gorát accíl. 19 Ítara Pául ore Ariyopagus mujilíc or héçe aní fusár gorér de, “Tui ze noiya taalim ekkán doór híyan kii añára zani faijjum né? 20 Kiyólla-hoilé tui tou añárar han ot endilla hotá ókkol anór, ziín honó din fúna nó zaa, hétolla añára ttu híin or sóiyi maáni zainto mone hoór.” 21 Tamám Ateni ókkol edde bidecóitta ókkol zetará hé cóor ot tákito, ítara siríf noiya-noiya hotá ókkol huwát edde fúnat ṭaim haçaitó.
22 Páule Ariyopagus mujilíc ot tíai hoór de, “Óu Aten or manúic ókkol! Añí dekír de, tuáñra hárr mikká ttu bicí dindár. 23 Kiyólla-hoilé añí berai-berai tuáñra ebaadot goró de jiníc ókkol díyan dii saáir de októt, añí endilla ekkán kurbani-gáñ yó deikkí ziyán ot leikká asé de, ‘OSIN KÚDAR HAÑSÉ.’ Hétolla tuáñra no zani zibár fuñza gorór, añí íbar baabute boiyan gorír.
24 Ze Alla ye duniyai re edde híyan ot asé de híin beggún foida goijjé, Íba zettót asman edde zobin or Malik, Íba insán or áte banaiya mondir ókkol ot no táke. 25 Íba honó kessúr muútac ot no fore, hétolla Íba ttú insán or át or honó hédmot or zorur nái, kiyólla-hoilé Íba nize fottíkiyó re zindigi dee, niyác dee edde beggún dee. 26 Ek zon manúic ottu Íba ye fura duniyait táki bolla tamám koum ókkol foida goijjé, ar ítara hoóñtte hon zagat tákibo híin óu Íba ye age lóti fáisela gorí eijjé. 27 Alla ye héndilla etollá goijjé, zeéne ítara átai-átai tuwai faibar acá ye Íbar talac goré, montor háleke Íba añára honókiyó ttu duré de noó. 28 Kiyólla-hoilé añára tou Íbar bútore zindigi haçai, solafíra gorí edde zinda así. Tuáñrar kessú cáir ókkole úddwa endilla hoiyé, ‘Añára yó Íbar fuain.’
29 Hétolla, añára zettót Allar fuain, añára ttu endilla kíyal nu aná foribó de ki, Kúdayi hoó de híyan cúna, sañdi, yáto fattór or ḍóilla ekkán sóbi, ziyán or cokól insán or añka edde báfani loi bana giyé. 30 Agor zobanat manúic ókkole Alla re no zainto de híyan Íba ye dekíle yó nó deké fán gorí tákito, montor yala Íba ye hárr zagar manúic beggún ore touwá gorí bolla hókum deer. 31 Kiyólla-hoilé Íba ye eggwá din ṭík gorí raikké, ze din ot Íba ye Nizor basíloiya Manúic cwár áta insáf loi duniyair bisar goríbo. Íba ye híyan Íba re mora ttu zinda gorí manúic beggún or hañsé sábut goijjé.”
32 Zeéñtte Ítara mora ttu zinda ói uçár baabute fúinne, hoozzone Pául ore téceráiye, montor ar hodúne hoór de, “Añára yián or baabute tuáñr ttu arek motto fúniyum.” 33 Baade Pául hé mujilíc sári giyégoi. 34 Hoozzon manúic íba lloi bóng diyé ar iman ainné. Imandár ítarar bútore mujilíc híyan or membór Diyonísiyus accíl, Damári nam or eggwá maiya fua accíl, edde fúañti aró hoozzon accíl.