28
To tameada' ia lumumpa' lao, moi anna tä' deem umpadondoi,sapo' to meada' ia, malino masannam susi singa kabahanianna.
2 Ianaanna kende' liui to pabali kahha' illaam botto, tä' deem manontom to mampahe';
ianaanna deenni to kepikkiham, anna deem kapaissanganna mampahe', la tontä ke'de' matoto' pa'bottoam.
3 To mase-mase umpakapi'di' satomase-masena,
sihhapam uham mahämbä' umbosii alaam kinande.
4 Menna-menna umpa'bahinni'i paondom DEBATA, kalembasanna umpa'kasallei to tameada',
sapo' menna-menna muanti manda' untobe matoto' paondom DEBATA, kalembasanna umpobali to tameada'.
5 To tameada' tanalambi' pikkihanna diona undu' lollä,
sapo' to umpenombai DEBATA, muissam si'da-si'da ia undu' lollä.
6 Aham to mase-mase sapo' malolo lingka salukatuboanna,
anna la to makaka sapo' massalu sengko'.
7 Mesa änä' to untuhu'i paondom disangai änä' kepikkiham,
sapo' to siala inaba to soko umpakasihi' ambena.
8 Menna-menna umpalängäm kullena naala dio mai doi' keänä' keampo,
tihempum lako hi tia to uhhäntängam bua to mase-mase.
9 Menna-menna umpa'talingalenda'i paondom DEBATA,
nakabassi duka' DEBATA sambajanna.
10 Menna-menna umbaba bulim to malolo penaba lako lalam kadake,
la mehonno' dokko tolombu ikalena.
Sapo' to tä' deem sassainna la umpomana' lolongam dalle' upa' mapia.
11 To makaka ussangai kalena keaka',
sapo' naissam ia to mase-mase kepikkiham, sipa'na tau ia too.
12 Ianaanna to meada'i tiäkä' mendadi to pebaba, buda tau kassi tilalla',
sapo' ianaanna to tameada'i tiäkä' mendadi to pebaba, buda tau usseheam kalena.
13 Menna-menna umbuniangam kasalaanna tä' ia la kehongko',
sapo' menna-menna muakui anna nalämpäsammi ube napatisam kaju la napogau' pole, la nahäntängam bua DEBATA.
14 Maupa' anna katambasam to mengkahea' liu längäm DEBATA,
sapo' menna-menna umpomakahha' penabanna la mehonno' tama katilakaam.
15 Umba susi singa ma'ehhem battu haka beruang pahopängam,
susim too duka' to tameada' ungkuasai hupatau mase-mase.
16 To pebaba takepikkiham makahha' pandahhana,
sapo' to pebaba ungkahidi' pangngala malussu, la tubo mahendem.
17 Menna-menna umpatitollo hahana pada säppä'na
umbateam lalam kamateam kalena.
Deem aham ungkalako-lakoanni!
18 Menna-menna tubo tä' deem sassainna la dilangnga'i,
sapo' menna-menna massalu sengko' la tilaka säkä-säkä.
19 Menna-menna ungkähä litä' la buda alaam kinandena,
sapo' menna-menna umpadondoi käle-käle la sitammu ia kapemase-maseam.
20 To mala dihannuam la ullambi' tamba' sanda silapi',
sapo' to maelo' masimpam to makaka, tä' la lappa' dio mai pa'tahungkungam.
21 Tä' mapia mangngalaangam illaam pahhottosam;
sapo' deem ohi to mahhotto' maelo' disissingam sädäna saiha' hoti lambi' umpa'lullu' ätoham.
22 To di'di' bosi sipangngula' kulle,
tä' nalambi' pikkihanna naua: la nalambi'ä' kapemase-maseam.
23 Menna-menna mantappakadai la dipa'kasallei puha ia pa'ibundianna,
anna la to umpopeala-ala bakunna.
24 Menna-menna muala kahha' kullena ambena sola indona
mane nauai: “Taia kasedaam kukähä,”
yabo lemba' tasitolam to pahappa.
25 To lando soppä', umpakende' kasipengkaam;
sapo' to mahannu längäm DEBATA, la silambi' kabosasam.
26 Menna-menna uhhannuam pikkiham kalena, to maho ia,
sapo' menna-menna tubo sibaba kakeakasam la sikambela ia katilakaam.
27 Menna-menna ma'pebeem lako to mase-mase tä' la napolalam tioho' salukatuboanna,
sapo' menna-menna tä' umposamele to mase-mase la buda tädo ullambi'i.
28 Ianaanna to tameada'i tiäkä' mendadi to pebaba, buda tau usseheam kalena,
sapo' ianaanna pa'dem, tuttuam buda to meada'.