27
Daa ussengkenganni indo la umpogau' allo makale',aka tala muissam sia aka la dadi illaam allo ia too.
2 Daa umpuji kalemu, tau senga' dam umpujiko,
daa ussangai kalemu, tau senga' dam ussangaiko.
3 Batu ia mabanda', anna bungim meheko,
sapo' mabanda' puha ia ke mepi'di' penabai to maho kalebu.
4 Aha' meepe' anna aha' kasalle medi'dim,
sapo' mennangka tau la umbelai untingngajo kakembuhuam?
5 Aham tau dilompä ditappakadai,
anna la dipakamaja illaam bäbä penaba.
6 Pesämbä'na sangkalamma' pehambi mahio,
sapo' to mepobali mepa'kalapu'-lapu'i lelem ia.
7 To dea' umpa'lappi' duho sau' dekke,
sapo' to tadea' ia moi mapäi' susi pa'du angga' golla toi nasi'dim.
8 Umba susi dassi umpellei sehäna,
susim too duka' hupatau to umpellei lao banuanna.
9 Minnä'-minnä' bubanau' anna bauam bubanau' umpatiala inaba,
susim too duka' petundam pepakilalaanna sangkalamma' umpasundede bua.
10 Daa ungkalembei sangkalamma'mu battu haka sangkalamma'na ambemu.
Daa ullulako banuanna solasubummu ke ussi'dingko kamasussaam;
kalando puha ia sambanua
anna la solasubum ke mambelai.
11 O änä'ku, pengkakeaka'ko, anna pomasannangannä' penabangku,
anna mala deem kuola mentimba' ke deennä' ussassai.
12 To keakkalam ia usseheam kalena ke muitai la mesägäinna,
sapo' to saidi' kapaissanganna tahhu'-tahhu' ia lambi' sägä.
13 Menna-menna umpangngindosam tau senga', sihatam dita'ga' jubana,
sipäto' dipatohho pohebana sulle bala'na tau ia too.
14 Menna-menna mebengngi'-bengngi'pi anna lao ham katamba-tamba umpa'lambeam solana,
iya hapam di tia kada pantädo natula'.
15 Baine napohäe ma'mämmä
mentalodo susi uham mahämbä'.
16 Menna-menna la umpopengkamma'i sihhapam untähäm hibu',
anna sihhapam ungkingkim tabaho tubo.
17 Bassi ia umpopataham sabassinna,
hupatau ia umpopataham pikkihanna padanna hupatau.
18 Menna-menna ullima'i kaju ara la napuppu' buana,
anna menna-menna untahinana puäna la dipa'kasallei.
19 Umba susi uwai dipa'petua'i hupa,
susim too duka' tungka sipa'na hupatau diita dio busäsam penabanna.
20 Umba susi ku'bu' tä' deem la ussoho'i to mate,
susim too duka' matanna hupatau tä' deem la soho'na ungkailui pada naitanna.
21 Pamuttu dipammahehei peha' anna api dipallälläi bulabam,
sapo' pa'pakate'de' ia dipake umpangngitai sipa'na hupatau.
22 Moi la dilambu' tama issä to maho kalebu dipasilambu' gandum,
inna tä' sia la mala dipasilappa' kamahoanna.
23 Jappanni manappai olo'-olo'mu,
lima'i manappai ingganna patuboammu,
24 aka inde kulle sihhapam uwai dipalimbä.
Deem daka tia to sahapu toko la ia lium ia umbaba babangam tomahaja?
25 Ianaanna disäe'um humpu' matua, iya napessullem humpu' mangnguha,
anna ianaanna dikandaom humpu' längäm tanete,
26 iya la mahombo bulunna dombamu napadeengangko poheba,
anna beke lakimmu la napadeengangko doi' mualliam bela'.
27 La ganna' toi bumbungam beke umpokatuboam, umpokatuboam sola sahapummu,
anna napokatuboam to ma'tahiammu baine.