15
Pentimba' mahambem malute muoppo' aha',sapo' pentimba' mepatei kada umpakende' aha'.
2 Pessubungam pudu'na to keaka' ungkembuaam kapaissangam umpatiala inaba,
sapo' tappaam pudu'na to maho angga ia untantam kamahoam.
3 Ingganna ongeam nalampa'-lampa'i asam DEBATA,
anna ummata-matai to kadake gau' anna to mapia gau'.
4 Ingganna tula' malute sihhapam kaju mepatubo buana,
sapo' tula' mateko mepi'di' penaba mepatippallem bua.
5 To maho kalebu untumpu pala' pepanännä' ambena,
sapo' menna-menna untahima mapia ke ditappakadai keaka' ia.
6 Illaam banuanna to meada' buda ebangam ma'mata-mata,
sapo' pangngala malussunna to tameada' umpakende' kamasussaam.
7 Pessubungam pudu'na to keaka' muambo' kapaissangam,
sapo' tä' ia susi lalam penabanna to maho.
8 Tunuanna to tameada' nakabassi DEBATA,
sapo' sambajanna to malolo penaba napohä'di' Ia.
9 Lingka salukatuboanna to tameada' nakabassi DEBATA,
sapo' umpake pangkaha' pa'kamase lako to umpa'buda-budai kamaloloam.
10 Pesämbä' kahha' dipalambi'iam to sala' lalam,
anna menna-menna nakabassi ke ditappakadai la napokattu sungnga'.
11 Nalampa'-lampa'i DEBATA kaliane anitu anna lembä bolom,
iya senga'pa ia issi penabanna hupatau!
12 To patelle moka ditappakadai;
tanaaku umpellambi'i to keaka'.
13 Penaba tilalla' tandaam dio lindo malute,
sapo' ianaanna masussai penaba umpalussem buku.
14 Lalam penabanna to kepikkiham umpameä kapaissangam,
sapo' pudu'na to maho angga ia ungkontalam kamahoam.
15 Allo salukatuboanna to masussa tä' deem sipopenaba penabanna,
sapo' to masannam penaba anggasanna liu ia ma'hame-hame.
16 Aham saidi' kulle sapo' mengkahea' tau dio oloNa DEBATA,
anna la buda kulle sapo' mahussa penaba.
17 Aham tau muande daum kaju sapo' siolaam tau,
anna la muande bale sapo' sipemboko'-bokosam tau.
18 To pa'keaha' umpakende' kasipengkaam,
sapo' to ponno sa'baha' umpa'dei kasipengkaam.
19 Lingka salukatuboanna to busungam sihhapam lalam nakapu' duhi,
sapo' lingka salukatuboanna to malolo penaba mahampa' ia tä' deem laba-labaam.
20 Änä' keaka' umpasundede buana ambena,
sapo' änä' to maho umpa'bahinni'i indona.
21 Kamahoam pa'pohäena ia to takepikkiham,
sapo' to manähä ia muundu' lalam malolo.
22 Ianaanna tä'i deem tula' pepakilalaam, inna tä' sia mala sule lako pattuju penaba,
sapo' ianaanna budai to mepakilala sule lako ia pattuju penaba.
23 Mesa tau kassi tilalla' aka uhhua kada pentimba'na,
anna tä' deem pada samapia ke dipaokko'i okkosanna tula'!
24 Ma'palulängäm ia lalam katuboanna to keaka',
anna mala sikambela dio mai kaliane anitu.
25 Banuanna to malangka' penaba nataleam DEBATA,
sapo' attasa'na mesa to balu baine tanahumbu-humbu ia tanaseho-seho.
26 Pattujunna to tameada' nakabassi DEBATA,
sapo' tula' mahambem malute tä' deem pada samahändä dio oloNa.
27 Menna-menna lando soppä' lako pangngala buni, ungkadakei pandaposanna,
sapo' menna-menna ungkabassi doi' passahoma'dinni la tubo ia.
28 To meada' napikki' yolo mane mentimba'i,
sapo' tappaam pudu'na to tameada' ussembu' ia tula' kadake.
29 DEBATA umpemboko'i to tameada',
sapo' pelauanna to meada' nahingngiam Ia.
30 Lindo malute umpatiala inaba,
anna kaheba mapia umpasule buku.
31 To umpatananni talinga pantappakadai mepatubo
la tohho illaam alla'-alla'na to keaka'.
32 Menna-menna umpa'talingalenda'i pepanännä' umpomatuna kalena,
sapo' menna-menna ma'pehingngi ke ditappakadai ullolongam ia kamanähängam.
33 Mengkahea' längäm DEBATA mesa pepanännä' mepakeaka',
anna kamahempoam penaba pentoosanna pa'pakasalle.