14
Baine keaka' untampo punti pandaposanna,sapo' baine to maho ma'kale ia ungkadakei pandaposanna.
2 Menna-menna malolo lingka salukatuboanna, mengkahea' längäm DEBATA,
sapo' menna-menna sala' lalam, umpa'bahinni'i ia DEBATA.
3 To maho kalebu ia nasambe' tula'na,
sapo' to keaka' ia pudu'na umpasikambelai kakadakeam.
4 Ianaanna tä'i deem sapim, iya mapattim balatana,
sapo' ianaanna deenni sapim ma'tengko, buda alaam kinande.
5 Sa'bi matoto' ma'tula' setappa',
sapo' sa'bi tatappa' angga ia kaägä'-ägä'.
6 To mantelle umpeä kakeakasam, sapo' umba opa la nalambi',
sapo' to kepikkiham, masimpam ia ullolongam kapaissangam.
7 Pasikambelai kalemu to maho,
aka tä' ia deem kapaissangam lemba' dio pudu'na la mala umpehapanni.
8 Kakeakasanna to keakkalam umpaissannii lalam umba la naola,
sapo' to maho ia napasalanduam kamahoanna.
9 To maho kalebu ia umpa'bahinni'i tunuam pebasei dosa,
sapo' to malolo penaba ia dadi kamapiaam illaam alla'-alla'na.
10 Pi'di' penabanna mesa tau anggam ia duka' kalena muissanni,
anna kamasannanganna tä' mala nasi'dim tau senga'.
11 Banuanna to tameada' la titale bangke',
sapo' kemana to malolo penaba la ma'tällä matoosam ma'abo' mahapuam.
12 Deem lalam nasanga hupatau malolo,
sapo' dio tämpä'na tinanda lako kamateam.
13 Mala too metaba tau diita, sapo' setonganna deem siam pi'di' penaba,
anna katilallasam mala nabala'i kamasussaam.
14 To umpemboko'i Debata la nalambi' pa'dallena,
anna to mapia penaba la nalambi' buana gau' mapianna.
15 To saidi' kapaissanganna ungkatappa'i asam ia ingganna tula',
sapo' to keaka' ia napikki' yolo mane mentekkai.
16 To keaka' napaela' ma'palako anna umpasikambela kalena kakadakeam,
sapo' to maho ia ma'palako sihha' anna ma'pekadommi'.
17 Menna-menna lette aha', ma'gau' to maho,
anna menna-menna ma'pattuju kadake nakabassi tau.
18 To saidi' kapaissanganna umpokaponam tapuppu' kamahoam,
sapo' to keaka' ia sihhapam umpa'songko' kahajaam kapaissangam.
19 To kadake gau' ma'udum guntu' dio olona to mapia penaba;
to tameada' ma'udum guntu' dio olo ba'bana to meada'.
20 To mase-mase nakabassi moi sola-solana,
sapo' to makaka ia buda solana.
21 Menna-menna umpetuna solana, madosa ia,
sapo' maupa' anna katambasam to uhhäntängam bua to mase-mase.
22 Tä' daka tia bulim to umpattuju kakadakeam?
Sapo' menna-menna umpattuju kamapiaam la untammu pangkaha' pa'kamase anna kamanontongam.
23 Mengkähä kahha' kembua mapia,
sapo' pelamboho bäbä tula' umpasule kapemase-maseam.
24 To keaka' ia umpa'songko' kahajaam katomakakaanna;
sapo' to maho ia umpa'tali kamahoanna.
25 Sa'bi malolo ullappasam sungnga' dio mai kamateam,
sapo' sa'bi tatappa' uhhonnosam solana.
26 Mengkahea' längäm DEBATA umpahapa' penaba,
anna mendadi hindim batunna papa uhunna pandadiam.
27 Mengkahea' längäm DEBATA umpasule katuboam mapia,
nasuhum mepalappa' dio mai pepungona kamateam.
28 Ianaanna budai pakka' titande tomahaja,
sapo' ianaanna pa'dei pakka' pa'de hapam to pebaba.
29 Menna-menna ponno sa'baha', mandalam pikkihanna,
sapo' menna-menna pa'keaha', umpatampanni kamahoanna.
30 Masannam penaba umpomapia pa'kaleam,
sapo' sihi ate umpasikatekä' buku.
31 Menna-menna undahha to mase-mase, umpa'bahinni'i To metampana,
sapo' menna-menna uhhäntängam bua to mehio-hio, umpa'kasallei ia To metampa.
32 To tameada' dipembussusam natumä gau' kadakena,
sapo' to meada' ia tihindim batu tipapa uhu sule lako matena.
33 Kakeakasam tianna mana' illaam penabanna to kepikkiham,
sapo' tala deem ia kende' illaam penabanna to maho.
34 Kamaloloam umpatitande sanganna pa'lembängam,
sapo' dosa ia untullungam lembä.
35 Tomahaja umpohäe sabua' keaka',
sapo' napahuai ia aha'na lako to mepakasihi'.