12
Menna-menna umpohäe pepanännä', umpohäe ia kapaissangam,sapo' menna-menna nakabassi ke ditappakadai, takepikkiham ia.
2 To mapia gau' la untammu kamapiaam penabanNa DEBATA,
sapo' to ma'pattuju kadake la nalambi' ia pa'tahungkunganNa.
3 Maka' deem tau angga ungkähä kakadakeam tä' la sitontongam liu salukatuboanna,
sapo' to meada' ia ke'de' matoto' sihhapam kaju mandalam waka'na.
4 Baine hatta' sihhapam danga-danga tubo yabo ulunna muanena,
sapo' baine mepakasihi' sihhapam ia saki kahha' umpasikatekä' bukunna muanena.
5 Pattujunna to meada' umpake undu' lollä,
sapo' pattujunna to tameada' angga mateko.
6 Pessubungam pudu'na to tameada' mebuno talemba' mebatta tatida',
sapo' pessubungam pudu'na to malolo penaba melangnga'i dio mai katilakaam.
7 To tameada' dipadahi kapu' lambi' tamehä'dä'um tameata,
sapo' pessubunna ia to meada' tontä liu ke'de' matoto'.
8 Mesa tau dipuji situhu' kakeakasanna,
sapo' to sengko' penaba dipetuna ia.
9 Aha-ahangki' disangai to bahinni' sapo' muampuangki' sabua',
anna la ussanga-sangaki' kaleta sapo' tasidandum kinandeta.
10 To meada' ia ullima'i manappa olo'-olo'na,
sapo' moi ia pa'kamasena to tameada' makahha' toi.
11 Menna-menna ungkähä litä' la buda alaam kinandena,
sapo' menna-menna umpadondoi käle-käle takepikkiham ia.
12 To tameada' ungkailui pangngala malussunna to kadake gau',
sapo' to meada' ia sihhapam kaju kalando waka'na tahha' buana.
13 To tameada' nasambe' kadanna,
sapo' to meada' ia lappa' dio mai kamasussaam.
14 To mapia pessubungam pudu'na la dipasogo'i kamapiaam,
anna to mengkähä manappa la nalambi' bua pengkähäna.
15 Ulalanna to maho kalebu nasangam ia duka' malolo,
sapo' to keaka' ia umpehingngii petundam pepakilalaam.
16 To maho kalebu ia madellä' aha'na,
sapo' to keaka' ia tä' umpaalai penaba pantelle.
17 Menna-menna ma'tula' malolo muundu' ia lollä,
sapo' sa'bi tatappa' umbungkeko' ia lilana.
18 To ussassa' tula' mebuno talemba' pessubungam pudu'na,
sapo' tula'na ia to keaka' mendadi tamba' anna pamole.
19 Tula' malolo messubum dio pudu' dikannangam liu,
sapo' tula' napassubum lila dibungkeko' sappälli' anna kaleängammi.
20 Angga kamanekoam illaam penabanna to umpattuju kakadakeam,
sapo' to umpa'kadua-duai kasiolaam la masannam ia.
21 To meada' ia la sikambela ingganna kamasussaam,
sapo' to tameada' ia la sitammu liu kamasussaam.
22 Lila dibungkeko' nakabassi ia DEBATA,
sapo' to manontom tula'na napohäe ia DEBATA.
23 To keaka' ia tä' untappu' lolo hea kapaissanganna,
sapo' to maho ia muete' lelem kamahoanna.
24 Lima bassa' la mendadi to mampahe',
sapo' to busungam la dipakatu'do-tu'do ia.
25 Kamalallangam penaba umpalussem buku,
sapo' tula' mapia umpasule sumanga' umpaende pahaja.
26 To meada' umpatuhoi lalam malolo solana,
sapo' pa'ulalanna ia to tameada' umbaba bulim kalena.
27 To busungam ia inna tala deem pealanna nanasu,
sapo' to bassa' ia la muampuam kulle buda.
28 Ulalam malolo mepatinanda lako katuboam,
anna ulalam ia too tä' mepatinanda lako kamateam.