11
Timbangam dikanähäi nakabassi DEBATA,sapo' timbangam iannapi anna ia napohäe Ia.
2 To malangka' penaba ia la kasihisam,
sapo' kakeakasam illaam ia kalena to mahempo penaba.
3 To malolo penaba napatette kamahändängam penabanna,
sapo' to ma'dua tambu' la napa'deam kamanekoanna.
4 Tä'um deem gunana kulle ke lambi'um allona umpasule aha'Na Puang Allataala,
sapo' kamaloloam ullangnga'i hupatau dio mai kamateam.
5 Kamaloloanna to tä' deem sassainna iam too la uhhampasanni lalam katuboanna,
sapo' to tameada' ia la nahonnosam gau' kadakena.
6 To malolo penaba la nalappasam kamaloloanna,
sapo' to ma'dua tambu', la napungo lando soppä'na.
7 Maka' matem to tameada', la pada pa'de pahhannuanna,
anna kamatohoam to nahannuam labu' di limbä tallam di pahupu.
8 To meada' dilappasam dio mai kamasussaam,
anna napessullei to tameada'.
9 Pessubungam pudu'na to tameada' ungkadakei padanna hupatau,
sapo' kapaissanganna to meada' melangnga'i ia.
10 Maka' untammu hongko' ullolongam dalle' to meada', la kassi tilalla' issinna kota,
anna maka' mate to tameada', la sikaahhe hupatau tilalla'.
11 To malolo penaba napolalam tibangom pa'bottoam,
sapo' pessubungam pudu'na to tameada' ullumbungam lembä.
12 Menna-menna umpetuna solana, takepikkiham ia,
sapo' to manähä, ungkambi' ia pudu'na.
13 To ma'kada bu'busam, tambu' lendom ia,
sapo' to mala dikatappa'i, deem ia pangngannaam pakunna.
14 Ianaanna tä'i deem pepungngu'na hupatau, titale bangke' pa'bottoam,
sapo' ianaanna budai to ma'pakilala, kende' ia kamalinoam.
15 Tilaka to umpangngindosam tau senga',
sapo' menna-menna moka mangngindo' ullinoi ia kalena.
16 Baine mapia penaba nalambi' ia pa'pakasalle,
sapo' muane ma'ila'-ila' angga ia kulle di lino nalambi'.
17 Lako to mapia penaba untendanniam kamapiaam kalena,
sapo' lako to palampi ungkabia' ia kalena.
18 To tameada' umpadondoi käle-käle,
sapo' to ussoeam kamaloloam, ullolongam ia saho ma'lontongam.
19 Menna-menna muanti manda' untobe matoto' kamaloloam, tinanda lako katuboam,
sapo' menna-menna angga ungkähä kakadakeam, tinanda lako ia kamateam.
20 To ma'penaba sengko' nakabassi DEBATA,
sapo' to tä' deem sassainna lingka salukatuboanna, napohäe ia DEBATA.
21 Kannassai, to tameada' tä' mala tala dipahuai pa'tahungkungam,
sapo' pessubunna to meada' la dilangnga'i ia.
22 Umba susi antim-antim bulabam dio kalasubä babi,
susi tappa'um too baine mapia sapo' hagi gau'.
23 Pa'pemulunna to meada' angga kamapiaam napoleam,
sapo' hannuanna to tameada' angga ia aha' napoleam.
24 Deem tau matutu ma'pebeem, sapo' tuttuam tomakaka mandi,
deem tau madi'dim kadake, sapo' tuttuam mase-mase mandi.
25 Menna-menna bassa' ma'pebeem, la dipatitolloam pa'tamba',
menna-menna si mampamoloi, la dipamoloi duka'.
26 Menna-menna untombom gandum,a la natädo tau,
sapo' la nalambi' ia tamba' lako to umbalu'i.
27 Menna-menna bassa' umpeä kamapiaam, la napohäe hupatau,
sapo' menna-menna umpogau' kakadakeam, la kakadakeam duka' ullambi'i.
28 Menna-menna uhhannuam kullena la mehonno',
sapo' to meada' ia la tubo mapia sihhapam tanangam kendaum händä.
29 Menna-menna undake-dake pandaposanna, la ma'sapu pala' ia;
to maho kalebu la naposabua' to keaka'.
30 Bua pa'palakoanna to meada' sihhapam kaju dipotubo buana;
menna-menna keaka' nabulu' to tando sau' nabulu' to tando dekke.
31 Ianaanna la nalambi' indei lino buana pa'pogausanna to meada',
iya senga'um ia to tameada' anna to madosa la nalambi' duka' buana pa'pogausanna.