Sanaka-naka hupanna petundam pepakilalaam
6:1-19
6
O änä'ku, maka' deengko umpangngindosam padammu,anna ma'dandiko lako to sule illaam bottomu la iko melluä sambu',
2 iya nasäke'ungko too tula'mu,
napungongko kadammu.
3 Dadi la susi inde änä'ku: la ullappa'iko kalemu,
aka diongko pala' limanna padammu.
Laoko pellambi'i, pengkahumaseko dio olona, anna umpeäi lalanna anna malako nalappasam.
4 Dapa yolo ummamma',
dapa ullao säkä petindo.
5 Lappasangko kalemu sihhapam jonga muäläi kalena dio mai to muasu,
sihhapam dassi ullappasam kalena dio mai to ma'pemälä.
6 O to busungam, laoko petua' linti',
petua' manappai pa'palakoanna ammu keaka'.
7 Moinna anna tä' deem pepungngu'na,
tä' deem to mampahe'na battu haka to pebabanna,
8 sapo' naissam umpatoka kinandena wattu kulla',
uhhempum alaam kinandena wattu kadeengam.
9 O to busungam, la pada hia umba masäena mamma'ko?
La pihampi isanga mane bangongko?
10 Sapäi'-sapäi' tikahu'du', tapakala mamma' oham;
sapäi'-sapäi' messingngammu', tapakala lentem-lentem oham.
11 Pissananna sule säkä-säkä ham kapemase-maseam sihhapam to pahappa,
kakuhängam sihhapam to umbaba paha'buno.
12 To takeguna anna kadake gau'
umbungkeko' lilana,
13 mangka'bi' bulu matanna,
umpopaningo kalasi bitti'na, umpopangka'bi' maneko tahuno-hunona,
14 angga tengko kumeso' illaam penabanna, angga umpattuju kakadakeam,
anna umpakende' kasipengkaam.
15 Iam too kasuhunganna anna nalambi' säkä-säkäm katilakaam;
tapakala anna dahi ambummi tä'um deem paulena.
16 Annam handanna kaha-kaha nakahidi' DEBATA,
battu haka, pitu handanna nakabassi:
17 yabo bulam mata, lila mambungkeko',
umpatei to tä' deem kasalaanna,
18 penaba umpattuju ingganna kakadakeam,
bitti' mahingngam ullomba kakadakeam,
19 sa'bi tatappa' umpobibi kakalasiam,
anna umpakende' kasipengkaam illaam alla'-alla'na to ma'hapu.
Pepakilalaam diona lullusam banne tau
6:20–7:27
20 O änä'ku, antii manda' tobei matoto' tula' napaondom ambemu,
oli'i mamma' salungkui metindo pepatuduanna indomu.
21 Patobä di tambu'i padondom di atei,
pelluäi illaam bahokomu sihhapam mani'.
22 Maka' lumingkako la naundu'ko napatette,
maka' mamma'ko, la nakambi'ko najagai,
maka' milli'ko, la nanännä'ko napakilala.
23 Aka paondom ia too la meballoi, anna pepatuduam ia too la memasiä'i,
anna pantappakadai sola pepanännä' la mepatinanda lako lalam katuboam.
24 Nasuhum la nakambi'ko najagai dio mai baine kadake gau',
dio mai pangkati-kati lila kalasinna baine passunda'.
25 Taia la kamapiaanna umpakapitti'i penabammu,
daa ummaelo' la nakeloi pangka'bi' bulu matanna.
26 Aka baine passunda'
anggam sabokkom hoti baja'na,
sapo' sigau' bainena tau senga' sungnga' ia baja'na.
27 Maka' hapanna deem tau la ungkoto'i api,
tä' daka tia la mampu' bajunna?
28 Maka' hapanna deem tau la uhhondoi hobaja,
tä' daka tia la lopa bitti'na?
29 Susim too duka' to unggau' bainena solana;
menna-menna umpogau' gau' ia too, tä' mala tala dipassala.
30 Maka' deem tau maboko aka natumä katadeasanna,
tä' la dipetuna.
31 Sapo' maka' kalambisam, la nabala'i pempitu tiluppi',
anna la disollo' kulakka'na dikolä' täiabunna.
32 Menna-menna ullullu' pa'bannetauam takepikkiham ia;
menna-menna ma'pogau' susi, ungkadakei kalena.
33 La dipakasihi' anna dipopehaha,
tala deemmi kebolom sihi'na sule lako salako-lakona.
34 Aka mesa muane ke kembuhui tä' dibela dipa'gam aha'na,
maka' lambi'um wattunna la dipepahottonganni, tä'um siampuam pa'häntängam bua.
35 Moi aka la dibolongam sihi'na tala nanenne'i;
moi la pada umba baja'na tala natahimai.