Pepakilalaam diona lullusam banne tau
5:1-23
5
O änä'ku, paalai penaba kakeakasangku,patanannii talinga kamanähängam to kupatuduangko,
2 anna malako muoli' mamma' ussalungku metindo pikki' pali',
anna ungkambi' pudu'mu umpassubum tula' kapaissangam.
3 Aka matannim susi duho pessubungam pudu'na baine ullullu' muanena,
anna mammi' tadiande tula'na lako muane senga',
4 sapo' katampasanna mapäi' susi hi pa'du,
anna pataham susi pa'dam pataham patomali.
5 Lingkana lu lako kamateam,
pentekkana tinanda lako kaliane anitu.
6 Tä' muola lalam la tinanda lako katuboam,
bulim, sapo' tä' deem napelabillo.
7 Iam too anna la umpehingngiinna' tula'ku, o inggannakoa' änä',
anna tä' la untekka pessubungam pudu'ku.
8 Pasikambelai kalemu baine ia too,
anna daa muempe'-empe'i banuanna.
9 Indana umpehingngangko angga'mu lako tau senga',
anna umpentandoangko sungnga'mu lako to tamessai',
10 indana tau senga' umpesenäi kamatohoammu,
anna tau bäbä umpokulle lupu' hesomu.
11 Kaedo-edo hangko mane ussossoko kalemu,
ke bukummu mandam sikatekä'.
12 Iya muua mandam: “Aka si umpa'bahinni'i hä' kao pepanännä'!
Anna si kutumpu pala' ke untappakadaiä'!
13 Akanna tä'i si kupehingngii tula'na tuangguhungku?
Akanna tä'i si kupatananni talinga kadanna to umpa'guhuä'?
14 Saidi'ku tamendadi petabaam tau,
illaam alla'-alla'na tau buda.”
15 Daa ullullu' pandaposammu,
daa ulluta-luta petindoammu.
16 La sihatam daka laoko ulloläi baine senga',
sihhapam salu mangngahoba lako lalam mahoa'?
17 La anggam bainemu umpasola metindo,
tala sihatam ia tala sipäto' tau senga'.
18 La napasuleam dako too tamba' bainemu,
la masannangkoa' sola to ma'dapo'mu to ussialaam wattu di mangnguhammu.
19 Maleke anna matitta susi jonga lundaha;
la napatiala liu hi too inabammu lemo dio dadanna,
anna la kende' liu penabammu aka elo' bunga-bunganna.
20 O änä'ku, aka gunana kende' kamohäeammu lako baine ullullu' muanena?
Aka gunana solako metindo baine sässä' gau'?
21 Aka nalampa'-lampa'i DEBATA pa'lao-laona hupatau,
anna nabändä-bändäi ingganna lingka salukatuboanna.
22 To tameada' nasäke' gau' kadakena,
anna napungo dosana.
23 La mate aka tä' umpehingngii pepanännä',
anna natumä kamahoanna nasuhum bulim.