Rut le'ba' lako pallullusam jelainna Boas
3:1-18
3
Masäe-säei, nauam Naomi lako Rut: “O änä'ku, pahallu la kupeängko muane anna malako masannam. 2 Muissam daka indo Boas, to si umpasola lelem to mengkähäna baine, kasahapuantapia' tia? Pehingngii sia too, bengi temo la ma'palili dio ongeam pallullusam jelai. 3 Dadi, pendio'ko ammu pake minnä'-minnä' bubanau', pakei poheba handam mapiammu, ammu le'ba' lako indo ongeam pallullusam jelai. Sapo' peäi lalanna indana naitako Boas sampe puha mangngande anna mangngihu'. 4 Maka' too ke le'ba'um metindo, iya paola matai indo naongei metindo. Mane le'ba'ko umpengngampe'i, ammu silläi indo sambu' illau' bitti'na anna metindoko eta.a Iya la natulasammoko too indo la umpogau'na.” 5 Iya natimba'um Rut naua: “Pada itim tula'mu Indo' la kupalako asam.”6 Iya le'ba'um Rut lako indo ongeam pallullusam jelai, anna napalako asanni pada indo to napakahi'diam pasananna. 7 Tappana puha mangngande anna mangngihu' Boas anna tiala inabanna nasi'dim, iya le'ba'um metindo lako bihinna indo jelai titombom. Tappana mamma' Boas, iya mengkamma'-kamma'um Rut napengngampe'i anna nasilläi sambu' dio bitti'na, anna metindoi eta. 8 La tängäi bengi, pissananna tihambam Boas. Tappana menggihi', iya tikkedu' aka deem mesa baine metindo dio ampe' bitti'na. 9 Iya mekutanam naua: “Mennako indee?” Iya natimba'im Rut naua: “Kao Rut, sabua'mu! Pakumbäi pani'mub inde sabua'mu tuam, aka mesako duka' kasahapuangki la pahallu uhhuhu'kam.” 10 Iya natimba'im Boas naua: “La natamba' dako too DEBATA, änä'ku! Tentomai, umpa'patandaangko pangkaha'mu anna kamanontongammu mentondom puha ia anna la indo umpogau' lako pasanammu, aka taia to mangnguha le'ba' umpeä, susi to mase-mase teem to makaka. 11 Tentomai änä'ku, muaka tiko mahea'. La kupalako asam pada pelauammu aka naissam asam tau illaam kota naua, iko mesako baine ma'penaba litä'. 12 Abana tappa', kao duka' mesa kasahapuammua' to la pahallu uhhuhu'koa'. Sapo' deempi mesa kasahapuammua' mahuku' puha ia anna la kao. 13 Pa'bengingko too inde, anna makale'pa mebengngi' mane kukutanai indo tau. Maka' too naaku nahuhu'ko, iya mapiam too. Sapo' maka' tä' naaku nahuhu'ko, iya ma'dandiä' dio oloNa DEBATA tubo kao la uhhuhu'ko. Petindo liungko too sampe mebengngi'.” 14 Iya metindo lium duka' Rut dio ampe' bitti'na Boas sule lako la masiä kale.
Tä'pi landa' diita anna bangommi Rut, aka nauaam Boas: “Indana deenni tau muissanni deem mesa baine sule inde ongeam pallullusam jelai.” 15 Mane nauaanni: “Lendu'i itim salendammu, babai mai anna umballa'i.” Iya naballa'um duka' Rut indo salendanna. Iya napadokkoammi Boas pengngannam pegantamc jelai mane nabalii naäkä'. Puhai, iya le'ba'um Boas lako kota.
16 Tappana landa' lako pasananna Rut, iya nakutanaim naua: “Maaka susi pa'laoammu, änä'ku?” Iya napahuttu' asammi Rut indo to napogau' Boas lako kalena. 17 Anna mane naua Rut: “Indepi jelai pengngannam pegantam nabeennä' aka naua: ‘Indana tä'i deem aka umbaba ma'pasule lako pasanammu.’ ” 18 Iya nauam Naomi: “Pahapa'i isu'mu änä'ku, ampai, sampe muita ma'tämpä' inde saha. Aka tä' tia la napatohho ke tä'i tika'lolä' inde saha allo temo siam duka'.”