Rut silambi' Boas
2:1-23
2
Deem hampeanganna Naomi isanga Boas kasahapuannapi to mate muanena. Indo Boas mesa to sugi' tangkalantungam pehapuam Elimelekh. 2 Pissam wattu, ma'kada Rut indo baine to Moab lako Naomi naua: “O Indo', mala haka laoä' lako baha'ba' uhhuhu'i jelai sisabuli untuhu' boko'na to la mapia penaba lako kaleku?” Natimba'i Naomi naua: “Io, le'ba'ko änä'ku!” 3 Iya le'ba'um Rut lako baha'ba' uhhuhu'i jelai untuhu' boko'na to massäe'. Siampu' eta too indo naongei baha'ba'na Boas, mesapi duka' to mentama pehapuam Elimelekh. 4 Iya diita ham sule Boas dio mai Betlehem. Iya ma'kadam lako ingganna to massäe'na naua: “La naundu' dakoa' too anna naolaam DEBATA.” Iya mentimba'im duka' naua: “La natamba' dako too DEBATA tuam!”5 Puhai, mekutanam Boas lako mando'na to massäe'na naua: “Menna kasahapuanna inde dio änä' daha?” 6 Natimba'i indo mando' naua: “Baine to Moab, sule sola Naomi dio mai lembäna Moab. 7 Naua ingngena': ‘Mala haka kutuhu' boko'na inde lako to massäe' anna kuhuhu'i jelai mehonno' tama alla'na jelai diba'ba-ba'basanni?’ Sulena ingngena' mebengngi' naukkunnim mahhuhu' sule lako temo. Anggam sapäi' mellube dio läntä.a”
8 Iya ma'kadam Boas lako Rut naua: “Pehingngii änä'ku! Damom too ullulako baha'ba' senga' huhu'i jelai le, anna damom too umpentieli' eta inde. Eta liungko too inde pengngampe'i to mengkähäku baine. 9 Petua' liui indo baha'ba' to disäe'. Tuhu'i boko'na indo to mengkähäku baine. Puham tia kupakahi'di indo to mengkähäku muane anna tä'ko naganggu. Maka' mabähhängko, iya le'ba' mammoko seo' uwai illaam busso to puha napangngissi to mengkähä.” 10 Iya ma'balinguntu'um Rut mendu'dum dokko litä' tanda pa'pakasallena napasindum ma'kada naua: “Akanna mapia penaba sugali'ko lako kaleku tuam, nasuhum unjappanni manappaä', moi kela daa mesa hä' to sule?” 11 Natimba'i Boas naua: “Puhamä' ditulasam ingganna pa'palakoammu lako pasanammu tappana mate muanemu. Susi toi indo untampeangko ambemu sola indomu anna lamungam tabonimmu, anna le'ba'ko lako mesa botto tuli tadeempi muissam yolona. 12 La nabala'iam dako too DEBATA indo pa'pogausammu anna la napadokkoangko lisu pala'mu saho sanda silapi' DEBATA, Puang Allataala to napenombai to Israel, aka suleko umpopeonganni kalemu lako kaleNa!” 13 Iya nauam Rut: “Abana tä' deem pada samapia penabako lako kaleku tuam. Umpakahangaä', anna mahambam malute pa'tula'mu lako kaleku, moinna anna taiaä' mesa sabua'mu baine.”
14 Tappana lambi' kamuandeam, iya napa'kadaim Boas naua: “Maiko, andei inde hoti anna tu'doi dokko inde panduhoam hoti.” Iya muokko'um duka' Rut dio ampe'na indo to massäe'. Iya nasohäim Boas gandum batte. Iya mangngandem Rut sampe dea', tä' pole napuha. 15 Tappana le'ba' oo Rut uhhuhu'i jelai, iya umpakahi'dim to mengkähäna Boas naua: “Pabäi mammi mahhuhu' moi tama alla'na indo jelai puha diba'ba' le, daa ungkambahoannia'. 16 La si ullu'du'iampia' liu saidi' indo jelai ditombom anna umpaokkosannia' anna mala nahuhu'i. Daa umpakada makahha'a' lako.”
17 Iya mahhuhu'um Rut sule lako mahammo. Mane natämbä'i indo pahhuhu'na, iya kiha-kiha mesa efab budanna indo jelai. 18 Iya nababam Rut ma'pasule tama kota, anna napaitai pasananna indo pahhuhu'na tä' deem pada sabuda. Naalapi duka' indo pamputu'na tää'nam napuha sangngallo anna nabeenni pasananna. 19 Iya mekutanam pasananna naua: “Umba hiko ngei muongei mahhuhu' sangngallo? Umbako ngei mengkähä? La katambasam di too indo to unjappanni manappako!” Iya natulasammi Rut lako pasananna indo to naongei mahhuhu', naua: “Indo to kuongei mahhuhu' sangngallo dio baha'ba'na tau isanga Boas.” 20 Iya nauam Naomi: “La natamba' di too DEBATA itim tau. Tä' deem kattu pangkaha' pa'kamaseNa DEBATA susi lako to tubopi teem lako to puham mate.” Mane nauai: “Itim tau kasahapuantapia' tia. Iam too mesa to la sipäto' uhhuhu'ki'.” 21 Iya ma'kadam Rut naua: “Nauampä' liu Indo': ‘Pengngampe'i liuko to mengkähäku pahhuhu' sampe puha asam nasäe' baha'ba'ku.’ ” 22 Iya natimba'im Naomi naua: “Io änä'ku, abana mapia si'da hi tia ke si lao liuko sola indo to mengkähäna baine, indana nagangguko tau ke lu lakoko baha'ba' senga'.” 23 Iya si umpengngampe'i lium to mengkähäna Boas baine Rut mahhuhu', sampe puha wattunna passäesam jelai sola gandum. Anna pada masäena indo wattu passäesam si tohho liu sola pasananna Rut.