RUT
Rut anna Naomi
1:1-22
1
Wattunna linonapi sanaka-naka pangngulunna to Israela umbaba kapahentaam dio lembäna Israel, pissam wattu kende' kakobeam illaam pa'lembängam ia too. Iya deem mesa muane sola bainena anna dua änä'na muane umpellei Betlehem illaam paluäna Yehuda le'ba' lako lembäna Moab la messihuhu dio. 2 Indo muane isanga Elimelekh, bainena isanga Naomi, anna indo dua änä'na isanga Mahlon anna Kilyon. Indo to sahapu pehapuanna Efrata dio Betlehem illaam paluäna Yehuda. Landa'i lako lembäna Moab, iya tohhoim dio. 3 Masäe-säei, matem ia Elimelekh muanena Naomi. Iya angga mandam Naomi da'da' sola indo dua änä'na muane. 4 Lessu'i ia too, iya bassim kebainem indo änä'na umpobaine to Moab, mesa isanga Orpa anna mesa isanga Rut. Tappana kiha-kiha sapulo taunna tohhoi dio, 5 iya bassim matem duka' Mahlon sola Kilyon. Dadi, mesa-mesanna mandam Naomi napellei muanena sola indo dua änä'na.6 Masäe-säei, napelelem Naomi diua umpaalai penaba umma'Na DEBATA nabeem alaam kinande. Iya ma'kalili'um Naomi sola indo dua manintunna la umpellei Moab. 7 Mengkalaom dio tondä'na dio Moab sola indo dua manintunna muola pangngolalalangam ma'pasule lako lembäna Yehuda. 8 Muolai lalam, nauam Naomi lako indo dua manintunna: “Pa'pasulengkoa', le'ba'koa' lako banuanna indomu. La umpa'patandaam di too pangkaha' pa'kamaseNa DEBATA tama kalemua', umba susi puhangkoa' umpa'patandaam pangkaha' pa'kamasemu lako indo to mate muanemua' anna duka' lako kaleku. 9 La namana' dakoa' too DEBATA pandaposam bakahu sola muanemua'.” Mane bassim naudunni. Sapo' bassim kaoli-oli hi sumahho 10 napasindum ma'kada naua: “Tä' ia pole' Indo'! La laokia' sola lako botto litä'mu.” 11 Sapo' natimba' Naomi naua: “Pa'pasulengkoa' änä'ku, akanna la untuhu'ä'? La deempaka tia lalanna undadiam poleä' änä' la umpomuanea'?b 12 Pa'pasulengkoa' änä'ku. Le'ba'ungkoa', aka matua punalamä' ke la kemuane poleä'. Hapanna la kuua: ‘La kemuanepä',’ anna la deem siaham muaneku inde bengi temo, anna la undadiannä' änä' muane-ane, 13 iya la muaku haka' tiko muampai sampe kasalle? Toko la iangka tia ullabaikoa' kemuane pole? Daa umpa'pateenna' änä'ku! La mabanda' sugali'koa' ke la umpendudunnia' duka' inde kamapäisam kupendudum, aka napaepe'iä' katea' bassinNa DEBATA.” 14 Iya bassim kaoli-oli pole oom sumahho indo to dua. Mane muudunni pasananna Orpa napasaha', sapo' Rut ia muanda'-anda'i liu Naomi.
15 Iya ma'kadam Naomi naua: “Petua' siai too, ma'pasulem ia lagomu lako botto litä'na anna lako debata to napenombai. Pa'pasuleko, tuhu'i dio lagomu!” 16 Sapo' natimba' Rut naua: “Daa umpassaä' la kupelleiko Indo' battu diua la ma'pasule anna tä'ko kutuhu'. Aka iai too muola iam duka' kuola. Iai too muongei tohho iam duka' kuongei tohho. Bottomu la kupobotto, anna Puang Allataala to umpenombai Ia duka' la kupenombai. 17 Iai too muongei mate iam duka kuongei mate anna kuongei dilamum. La napalambi'i hä' too pesämbä' DEBATA, pesämbä' mabanda' ke la kupellappasangko, sulibanna ke kamateanni umpasilappa'ki'!” 18 Tappana naita Naomi natittinni liu Rut la le'ba' sola, iya napengkamma'i bäbäm. 19 Iya umpatahhu'um pellaoanna indo to dua sampe landa' lako Betlehem.
Tappana mentama kota Betlehem, iya tikindä issinna kota napobua' kasuleanna. Iya sikama'kadam baine illaam indo kota naua: “Naomi haka inde dio?” 20 Iya natimba'im Naomi naua: “Daa muuaannä' Naomi.c Si uaammä' Marad aka napalambi'imä' kamapäisam To Handam Kuasa illaam salukatuboangku. 21 Indo angku le'ba' sitonda hepo'kam, sapo' tentomai napopa'pasulemä' DEBATA ussoeam pala' puteku. Akanna muuaam liuä' Naomi, aka tä'um tontä DEBATA mendadim sa'bi ma'dudungam tama kaleku, anna napahuaiä' pi'di' tanggana-gana To Handam Kuasa.”
22 Susim too tulasanna anna ma'pasulei Naomi sola Rut, indo baine to Moab, manintunna. Landa' dio Betlehem wattunna dipahandu' ussäe' jelai.e